پێدڤی یە هونەرمەند ڕەسەناتیا سترانا کوردی بپارێزن
هونەرمەندێ سترانبێژ ئەیوب دێرەشی د دیدارەکێ دا بۆ بەرپەرێ هونەری یێ ڕۆژنامەیا ئەڤرۆ دبێژیت: د سەرجەم کار و ئازارێن من یێن هونەری دا، ئەگەر ئەز سحکەمە بەرهەمێن خۆە یێن بوری، سترانێن من یێن ب ناڤێ (شەنگێ) و (کراسێ ڕەش) پتر ژ هەموو سترانێن دی دەنگڤەدان دناڤ جەماوەری دا هەبوویە. ئەڤ هەردوو بەرهەمە گەلەک زێدە نێزیکی دلێ خەلکی بوون و هەتا ئەڤرۆ ژی هەست ب زندیبوونا وان دهێتە کرن. خەلک ژ تەخ و چینێن جۆراوجۆر گەلەک ب گەرمی حەزژێدکەن و ل سەر پلاتفۆرمێن جۆراوجۆر یێن سوشیال میدیایێ ژی دەنگڤەدانا خۆە یا سەربەخۆ و بەردەوام هەبوویە و کراسێ نویبوونی ژ بەر نەکریا.
لدور نوترین کارێ خۆەیێ هونەری گۆت: نوکە ئەز ل سەر کار دکەم، ئامادەکاری بۆ چێکرنا کلیپەکا نوو ب ناڤێ (زالم یار) دهێنە کرن. پەیڤێن ئەڤێ سترانێ ب هاوبەشی ژ لایێ من و هونەرمەند وارهێل رەشید ڤە هاتینە نووسین، و ئاواز ژی بەرهەمێ وارهێل رەشیدی ب خۆە یە. پرۆسەیا کارێ میکس و ماسترینگێ ل باژێرێ دهۆکێ ل ستودیویا هونەرمەند محەمەد بامەرنی هاتیە ئەنجامدان. هەروەسا تۆمارکرنا ئامیرێن مۆزیکێ ژی هەر ل سەر دەستێ وی و د ناڤا ستودیویا وی دا ب داوی هاتیە، و د پلانێ دا یە ل دەمەکێ زوو و نێزیک کارێ وێنەکرن و کلیپکرنا ئەڤێ سترانێ ب دوماهی بهێت و بکەڤیتە بەردەستێ جەماوەری.
ل سەر دیاردا نوو یا کو دناڤ هونەری دا پەیدابووی دێرەشی گۆت: ب دیتنا من (ژێریا چێکری) بۆ مە و کارێ مە تشتەکێ ئێکجار نوو یە. ئەم نوکە ب چ ڕەنگان نەشێین بڕیارەکا دەستبەجێ و ئێکلاکەر ل سەر بدەین کا دێ تا چ ڕادە سەرکەفتنێ ئینیت یان ناکەڤیت. بەلکو ئەڤە بتنێ تشتەکێ دەمکی بیت، ئانکو دیاردەکا وەختی بیت کو بێت و بچیت ب بێ کو بشێت کاریگەریەکا بنەڕەتی ل سەر پرۆسەیا ئافراندنا هونەری دروست بکەت.
ل داویێ دا، ئەز داخازا سەرکەفتنێ ب هەموو گیانێ خۆە بۆ هەموو گەنجێن ڕێکا هونەری هەلبژارتی دخوازم. هیڤیدارام هەموو هونەرمەند ب هەستکرن ب بەرپرسیاریەتیێ کار بگەڕێنن و پەیڤ، ئاواز و سترانا ڕەسەنا کوردی ژ هەر تێکدانەکێ بپارێزن و پاراستنا ناسنامەیا هونەرێ کوردی بکەنە ئارمانجا خۆە یا سەرەکی.
