ڕیال مەدرید و ئینتەر میلان د گۆپیتكا یاریێن ئەڤرۆ دایە
بڕیارە ئەڤرۆ وەرزێ نوو یا قارەمانییا یانەیێن ئۆرۆپا قارەمانێن خولا چامپیۆنز لیگ وەرزێ 2026-2027 ب ئەنجامدانا شەش یارییان بهێنە كرن، ئەوا 36 یانە ل دووڤ سیستەمێ نوو د قووناغا ئێكێ دا هەڤڕكیێ كەن و یاریێن وان ب شێوەیێ خول دهێنە كرن.
هەڤڕكی بۆ خۆ سەپاندنێ
جەماوەر و پشتەڤانێن وەرزشا ئۆرۆپا تایبەت یانەیێن مەزن ئەڤرۆ ل دەمژمێر 10ی شەڤ چاڤەڕێ یارییەكا ئاگرینن دناڤبەرا خودانێن ئەردی یانەیا ڕیال مەدرید یا ئسپانی هەلگرا 15 ناسناڤێن چامپیۆنزێ بەرانبەر ئینتەرمیلان یا ئیتالی هەلگرا حەفت ناسناڤان ئەوا دێ ل یاریگەها بێرنابیویێ هێلینا مەدریدیان دا بیت كو دهێتە هژمارتن گۆبیتكا یاریێن ئەڤرۆ و ئاگرین، هەردو یانە خودان پێكهاتییەكێ بهێزن و چاڤ ل ئێكەم سێ خالێن وەرزێ نوو بن، دیدارێن پێشتر پڕانییا وێ د بەرژوەندیا ڕیالێ دابووینە ب 10 سەركەڤتنان، بەرانبەر حەفت سەركەڤتن بۆ ئینتەرێ و سێ وەكهەڤی.
پۆرتۆ دڤێت تۆلێن خوە ڤەكەت
ژلایەكێ دووڤە دهەمان دەمێ شەڤێ دا یانەیا پۆرتۆ یا پۆرتۆگالی دێ ل یاریگەها خوە دراجاو مێڤاندارییا یانەیا مانچستەر ستی یا ئنگلتەرایێ كەت و چاڤ ل سەركەڤتنا ئێكێ یە و تۆلڤەكرنێ یە، مان ستی د كاودانێ باش دایە سەرێ لیستا خولا ئنگلتەرایێ دهێت و گواردیۆلا پشتراستە ب سەركێشیا هێرشبەرێ خوە یێ نەرویجی ئیرلینگ هالاند ژ ئاستەنگا پۆرتۆ دەربازبیت، لێ دڤێت هزر د هەبوونا هەر سوپرایزەكی بهێتە كرن، ژبەركو تیما پۆرتۆ ژی د خولا وەلاتێ خوە دا سەركێشە وتیمەكا ڕێكخستی یە و دێ بزاڤێ كەت تۆلێن خوە ژ مانچستەرێ ڤەكەت ئەوا د دیدارێن پێشتر دا سێ جاران خوسارەت بوو و جارەكێ وەكهەڤی ئینایی.
شەڕەكێ دی یێ ئسپانی و ئەلمانی
یارییا سێیێ یا ئەڤرۆ ل دەمژمێر 10ی شەڤ دێ ل یاریگەها سیجنال ئیدۆنا بیت دەمێ یانەیا بۆرۆسیا دۆرتمۆند یا ئەلمانی یانەیا ڤیاریال یا ئسپانی مێڤان بكەت، ل دووڤ ئاماران هەردو یانە تا ڕادەیەكی هەڤسەنگی د ئاست و شیانان دا هەیە و هەتا د یاریێن پێشتر ژی دا كو بتنێ سێ جاران كەڤتینە بەرانبەری ئێك، هەر ئێكی سەركەڤتنە ئینایە و وەكهەڤییەك، یارییا ئەڤرۆ هەڤڕكییەكە بۆ باشترینێ.
بزاڤ بۆ وەرگرتنا دەلیڤەیەكێ
د یارییەكا دی دا یانەیا لیل یا فرەنسی دێ ل یاریگەها خوە یانەیا ڕیال پیتس یا ئسپانی مێڤان كەت كو دهێتە هژمارتن یارییەك بۆ بدەستڤە ئینانا سێ خالان پێخەمەت وەرگرتنا دەلیڤەیەكێ بۆ قووناغا دویێ، پشكداریێن لیل یا فرەنسی 10 جاران بوویە د چامپیۆنزێن بۆری دا لێ ریال پیتس دێ بیتە جارا دویێ، بتنێ یارییەكا هەڤالینی دناڤبەرا واندا ل 2018ێ چێبوویە و وەكهەڤی ب دووماهی هاتبوو.
دیدارەكا دی یا تۆلڤەكرنێ یە
یارییا پێنجێ یا ئەڤرۆ بڕیارە ل دەمژمێر حەفتی مەغرەب یانەیا كلۆب برۆج یا بەلجیكی ل یاریگەها خوە یانەیا ئاستۆن ڤێلا یا ئنگلتەرایی مێڤان بكەت، ئەڤ یارییە بۆ خودانێن ئەردی یا تۆلڤەكرنێ و ڤەگەڕاندنا هێزا خوەیە، ئەوا د وەرزێ 2024-2025ێ سێ جارا د چامپیۆنزێ دا بەرانبەر ئێك بووینە، د قووناغا كومان دا یانەیا بەلجیكی سەركەڤتن ئینابوو، لێ د قووناغا هەشتێ دا د یاریێن هاتنوچوونێ دا ئاستۆن ڤێلایی دوجارا سەركەڤتن ئینا.
ئەسینا دێ پشتگەرمی ب دیرۆكا خوە كەت
د یارییەكا دی دا یانەیا ئەسینا یا یونانستانی دێ ل یاریگەها خوە یانەیا لاسك یا نەمساویی ل دەمژمێر 7:45 شەڤ مێڤان كەت، ڤەگەڕیانا یانەیا یونانستانی پشتی حەفت سالێن ڤەقەتیانێ دێ پشت گەرمیێ ب دیرۆك و یاریگەهـ و جەماوەرێ خوە كەت، لدووڤ ئاماران 16 جاران پشكداری د چامپیۆنزێ دا كرییە و وەرزەكی گەهشتییە چارێك دووماهیێ ژی، د دەمەكی دا ئێك ژ یانەیێن سۆپرایز و هێز بوو، ژلایێ خوەڤە یانەیا لاسك دبیتە جارا دویێ دهێتە چامپیۆنزێ پشتی پشكداریا ئێكێ ل 1965ێ.
بۆ زانین 36 یانە د چامپیۆنزێ دا پشكدارن، هەر یانەیەك ل دووڤ سیستەمەكێ تایبەت چار یاریان دناڤ ئەردێ خوەدا و چار ژ دەرڤەیی یاریگەها خوە دگەل یانەیێن جودا كەت، لدووماهیێ ئەو یانەیێن ل ڕێزا ئێكێ هەتا هەشتێ دهێت ئێكسەر دەربازبنە قووناغا 16ێ، یانەیێن ڕێزا نەهێ هەتا 24ێ دێ یاریێن ڤەبر بەرانبەر ئیك كەن بۆ دەربازبوونا هەشت ژ وان بۆ قووناغا 16ێ، ئەو یانەیێن ل ڕێزێن 24 هەتا 36ێ دهێت دێ خاترا خوە ژ چامپیۆنزێ كەن.
