دەلیڤەیا سێ خالان بۆ بەرشەلۆنا و پاریس بەردەستە و لیڤەرپۆل بەرانبەر ئەتلەتیكۆ مەدرید د یارییەكا ئاگرین دا
د بەردەوامییا یاریێن چامپیۆنز لیگ دا بڕیارە ئەڤرۆ ژی شەش یاریێن دی ژ چارچووڤەیێ دەستپێكا وەرزێ نوو یا قارەمانییا یانەیێن ئۆرۆپا قارەمانێن خولا ب دیدارێن ئاگرین و تاقیكرنێن بهێز دناڤبەرا یانەیان دا بهێنە كرن.
بەرشلۆنا و سۆپرایزا فاینۆرد
چاڤەڕێ دهێتە كرن ل دەمژمێر 7:45 مەغرەب یانەیا بەرشەلۆنا یا ئسپانی دناڤا یاریگەهـ و جەماوەرێ خوە دا یانەیا فاینۆرد ڕۆتردام یا هۆلەندی مێڤانكەت، یانەیا خودان بناغەیەكێ بهێز یێ جەماوەرییە و شیایە 35 جاران پشكداری د چامپیۆنزێ دا بكەت و پێنج جاران ناسناڤ ب دەستڤە بینیت و سێ جالان یا دویێ بهێت، ژلایێ خوەڤە فاینۆرد 19 جاران پشكداربوویە ب تنێ جارەكێ ناسناڤ دەستڤە ئینایە، دو جاران بەرانبەری ئێك بووینە ئەوژی ل قووناغا 16ێ یا وەرزێ 1974-1975، ب وەكهەڤیەكێ و سەركەفتنا بەرشەلۆنا بوو.
شتۆتگارت و فایكینگ ئێكەم دیدارا دیرۆكی
یارییا دویێ یا ئەڤرۆ دێ دناڤبەرا خودان ئەردی یانەیا شتۆتگارت یا ئەلمانی و فایكینگ یت نەرویجی بیت كو دێ بیتە یارییەكا دیرۆكی بۆ پشتەڤانێن هەردو یانەیان، ژبەركو دبیتە ئێكەم یاری دناڤبەرا واندا دهێتە كرن، فایكینگ وەرزێ بۆری قارەمانا نەرۆیج بوو لێ ئەڤێ ناگەهینیت كو تیما ئەلمانی یا ب سانەهی یە ئەوا پێنج جاران پشكداری دچامپیۆنزێ دا كری.
دیدارا مەزنان
ئێك ژ دیدارێن ئەڤرۆ یێن بهێز یانەیا لیڤەرپۆل یا ئنگلتەرایێ دێ ل یاریگەها خوە ئانفێلد یانەیا ئەتلەتیكۆ مەدرید یا ئسپانی ل دەمژمێر 10 شەڤ مێڤان كەت ئەوا هاتیە نیاسین ب دیدارا ئاگرین، یانەیا ئنگلتەرایی خودان سەربۆرەكا مەزنە د چامپیۆنزێ دا ئەوا دبیتە جارا 28ێ پشكداری كرییە و شەش ناسناڤ ب دەستڤە ئیناینە و چار جاران بوویە یا دویێ، دبەرانبەر دا یانەیا ئەتلەیكۆ مەدرید 20 جاران پشكداربوویە نەشیایە هیچ قارەمانیەكێ ب دەستڤە بنیت، سێ جاران چوویە یارییا فینالێ لێ ژ دەستدایە، لێ دیدارێن پێشتر یێن هەردو یانەیان ئاگرین بووینە چارسەركەفتن بۆ لیڤەرپۆلێ سێ بۆ ئەتلەتیكۆیێ و دو یاریان وەكهەڤ بووینە.
یارییەكا ب سانەهی بۆ هەلگرا ناسناڤی
ژلایێ خوەڤە ئەڤرۆ ل دەمژمێر 10ی شەڤ یانەیا پاریس سانجێرمان یا فرەنسی هەلگرا ناسناڤێ وەرزێ بۆری دێ ل یاریگەها خوە یانەیا سلۆڤان براتیسلاڤا یا سلۆڤینی مێڤان كەت، یانەیا فرەنس خودانا هەردو ناسناڤێن 2025 و 2026ێ ب سەرپەرشتیا ڕاهێنەرێ خوە لویس ئەنرێكی گەشبینن پێنگاڤا ئێكێ ب سەركەڤیانە دەرباز بكەن، یانەیا سلۆڤینی یا نوویە د چامپیۆنزێ دا كو ئەڤجارە دبیتە یا دویێ پشكداریێ بكەت بەرۆڤاژی یانەیا پاریسێ ئەوا 19 جاران پشكداریكری، دو ناسناڤ دەستڤەئینایین و جارەكێ یا دویێ هاتبوو، ئەڤ یارییە دبیتە یا ئێكێ یا دیرۆكی دناڤبەرا هەردو یانەیان دا.
یارییا هیڤیێن دەستپێكی
هەر دچارچووڤەیێ یاریێن ئەڤرۆ یێن چامپیۆنزێ دا بڕیارە یانەیا سپۆرتینگ لەشبۆنە یا پۆرتۆگالی ل یاریگەها خوە یانەیا گالاتا سارایی یا توركی ل دەمژمێر 10ی شەڤ مێڤان كەت، ئەڤ یارییە بۆ هەردو یانەیان دێ بیتە دەستپێكا هیڤییان بۆ هەردو یانەیان، هەرچەندە ئەڤ یارییە دبیتە ئێكەم دیدارا چامپیۆنزێ دناڤبەرا واندا لێ دیرۆكەكا باش یا پشكدارییان هەیە، 28 جاران یانەیا توركی پشكداری كرییە و لەشبۆنە 17 جاران پشكداری كرییە بێ هیچ جارەكێ ب گەهنە یارییا فینالێ ژی.
دیدارەكا ئاگرین و شەڕێ دەستپێكی
ئەڤرۆ ل دەمژمێر 10ێ شەڤ یاریگەها دیێگۆ ئارماندۆ مارادۆنا ل ئیتالیا یانەیا ناپۆلی دێ یانەیا ئارسنال یا ئنگلتەرایێ مێڤانكەت، دهێتە هژمارتن ئەڤ یارییە گۆپیكا یاریێن ئەڤرۆ یە ئەوا ددیرۆكا یاریێن هەردو یانەیان دا دبیتە یا شەشێ پیشتی پێنج دیدارێن پێشتر ئەوا بسێ سەركەفتنێن ئارسنال و سەركەفتنەكا ناپۆلی و ئێك وەكهەڤی، یانەیا ئنگلتەرایێ تۆمارەكا باش یا پشكدارییان هەیە ئەوژی دگەعیتە 22 جاران د بەرانبەر دا ناپۆلی نەهـ پشكداری هەبوون، لێ هیچ یانەیەك ناسناڤ دەستڤە نەئینایە سەرباری ئارسنال دو جاران چوویە فینالێ لێ ل2006ێ بەرانبەر بەرشەلۆنا و وەرزێ بۆری بەرانبەر پاریسێ ژ دەستدایە.
بۆ زانین 36 یانە د چامپیۆنزێ دا پشكدارن، هەر یانەیەك ل دووڤ سیستەمەكێ تایبەت چار یاریان دناڤ ئەردێ خوەدا و چار ژ دەرڤەیی یاریگەها خوە دگەل یانەیێن جودا كەت، لدووماهیێ ئەو یانەیێن ل ڕێزا ئێكێ هەتا هەشتێ دهێت ئێكسەر دەربازبنە قووناغا 16ێ، یانەیێن ڕێزا نەهێ هەتا 24ێ دێ یاریێن ڤەبر بەرانبەر ئیك كەن بۆ دەربازبوونا هەشت ژ وان بۆ قووناغا 16ێ، ئەو یانەیێن ل ڕێزێن 24 هەتا 36ێ دهێت دێ خاترا خوە ژ چامپیۆنزێ كەن.
