دهۆك و گارە بوونە قارەمان و ئافرەتێن دهۆك، ئامێدیێ و زاخۆ ل ڕێزێن دویێ هاتن
هەردو یانەیێن دهۆك و گارە ل سەر ئاستێ، پشكۆژ، تازەپێگەهشتی و پێشكەڤتیا بوونە قارەمانێن پارێزگەها دهۆكێ یا یارییا كیكبۆكسینگ بۆ وەرزێ 2026ێ، پشتی شیایین ل ڕێزێن ئێكێ بهێن، ژلایێ خوەڤە هەرسێ یانەیێن ئافرەتێن دهۆك، ئامێدیێ و زاخۆ ڕێزێن دویێ ل سەر ئاستێن جودا ب دەستڤە ئینان، د هەڤڕكیێن واندا ئەوا بۆ ماوەیێ دو رۆژان ل هۆلا گرتییا چالاكیێن وەرزشی هاتیە كرن.
ئەنجامێن گشتی بڤی ڕەنگێ بوون.
ل سەر ئاستێ پشكۆژان
1- یانەیا دهۆك 18 خال.
2- یانەیا زاخۆ 13 خال.
3- یانەیا باتیفا 13 خال.
ل سەر ئاستێ تازەپێگەهشتیان
1- یانەیا دهۆك 23 خال.
2- یانەیا ئامێدیێ 18 خال.
3- یانەیا تەناهی 10 خال.
ل سەر ئاستێ كچان
1- یانەیا دهۆك 16 خال.
2- یانەیا ئافرەتێن دهۆك 14 خال.
3- یانەیا پۆلیتەكنیك 10 خال.
لدۆر ڤێ قارەمانیێ مەحفۆز ئیبراهیم سەرۆكێ فدراسیۆنا كیكبۆكسینگا پارێزگەها دهۆكێ بۆ ئەڤرۆ گۆت: ب سەركەڤتیانە ئەم شیاین وەرزێ ئەڤ سالە یێ قارەمانییا كیكبۆكسینگێ ل سەر ئاستێ پارێزگەها دهۆكێ و ئیدارەیا سەربەخوە یا زاخۆ ڕێكبێخین ئەوا ل دووڤ بەرنامەیێ سالانە یێ فدراسیۆنا مە بووك و تێدا 135 یاریزانێن كوڕ و كچ یێن 10 یانەیێن مە پشكداربوون، هەڤڕكیێن وان ل سەر 12 كێشێن جودا یێن هەر ئاستەكی بوو، هەڤڕكییەكا بهێز و باش دناڤبەرا یاریزانان دا دهاتە كرن، دەستخوەشییا هەموو یاریزانان دكەین و ئەو یانەیێن پشكداربووین.
ژلایەكێ دووڤە ناڤهاتی گۆت: ئەڤ قارەمانییە گەلەك یا گرنگە بۆ یاریزانان و یانەیێن پشكدار تایبەت بۆ خوە بەرهەڤكرن بۆ قارەمانیێن داهاتی یێن ئیراقێ و دەرڤە، هەروەسان یا گرنگتر هەبوونا شەنگستێ ڤێ یاریێ كو دیاربوو ئەو ڕێژەیا زوور یا یاریزانان بەلگەیە ل سەر پێشڤەچوونا ڤێ یاریێ، هیڤییا مە ئەوە یانەیێن مە بەردەوام پشتەڤانییا یاریزانان بكەن، گرنگیدان ب پشكۆژ، تازەپێگەهشتی و كچان ئارمانجا مە یا سەرەكییە ژبۆ پێشئێخستنا ڤێ یاریێ.
لدۆر ئاستێ تەكتیكی و هونەری سالح كەكۆ ڕاهێنەرێ یانەیا دهۆك و هەلبژارتیێ ئیراقێ گۆت: ژبەركو سال بۆس الێ ئاستێ تەكتیكی یێ ڤێ یاریێ ل جیهانێ بەر ب پێشڤە دچیت لەوما ژی ئەم وەكو ڕاهێنەر و كەسێن بسپۆر د ڤێ یاریێ دا هەموو بزاڤان دكەین بەردەوام ئاستێ یاریزانان و هەموو یانەیان پێشڤە بچیت و بگەنە ئاستێن باشتر یێن نێڤدەولەتی، گەشبینن ب هژمارەیا پشكداران ل سەر ئاستێ كوڕان و كچان هێدی بەر ب باشتر دچیت لێ یا گرنگ ئەوە یانەیێن مە یێن وەرزشی و بەرپرسێن مە پشتەڤانییا وان بكەن داكو ئەڤ یارییە بەر قارەمانیێن نێڤدەولەتی ژی بچیت.