ئەڤرۆ دهۆك و زاخۆ دێ بزاڤێ كەن سنۆرەكی بۆ ژ دەستدانا خالان دانن
قەیس وەیس:
بڕیارە ئەڤرۆ ژی چار یاریێن دی ژ هەڤڕكیێن گەڕا حەفتێ ژ خولا ستێرێن ئیراقێ یا فوتبۆلێ بهێنە كرن، هەردو یانەیێن پارێزگەهێ دهۆك و زاخۆ دووری جەماوەرێ خوە دێ بنە مێڤانێن یانەیێن كەرخ و مووسل و شرۆڤەكارەكێ وەرزشی دخوازیت بشێن قەرەبوویا خالێن بۆری بكەت و ئاگەهی ژ هەڤڕكێن خوە هەبن.
دهۆك بەرانبەر كەرخا بریندار
چاڤەرێ دهێتە كرن ئەڤرۆ ل دەمژمێر نەهی شەڤ تیما یانەیا دهۆك ل یاریگەها شەرار حەیدەر ل پایتەختێ ئیراقێ بەغدا ببیتە مێڤانا یانەیا كەرخ كو دهێتە هژمارتن یارییەكا ب سانەهی نابیت بۆ ئەلهۆیێن چیا ئەوا د نوكە دا هەشت خال كۆمكرینە ژ سەركەڤتنەك و پێنج وەكهەڤی ل ڕێزا هەشتێ دهێت، لێ یانەیا كەرخ تیمەكا ب سانەهی نابیت و دێ شەڕێ ڤەگەڕیانێ كەت ژبەركو د دەمەكێ هەستیار دا دەرباز دكەت ئەوا ژ شەش یاریێن بۆری بتنێ وەكهەڤیەك ئینایی ئەڤ یانە ل وەرزێن بۆری هەڤڕكەكا سەرخستە بۆ دهۆكییان سەرەرایی ئاست و ئەنجامێن وێ یێن لاواز، هەكە ئەم بتنێ پێنج یاریێن پێشتر یێن دناڤبەرا واندا دیاربكەین، هەر یانەیەكێ دو سەركەڤتن ئیناینە و یارییەك ب وەكهەڤی ب دووماهی ئینایە.
زاخۆ ل بن گڤاشتنێن جەماوەری سەركەڤتن دڤێت
ژلایەكێ دووڤە یانەیا زاخۆ دێ ل هەولێرا پایتەخت یاریگەها شەهید فرانسۆ حەریری بیتە مێڤانا یانەیا مووسل ل دەمژمێر 6:45 مەغرب، تێبینی ئەڤ یارییە دڤیابا ل یاریگەها زاخۆ هاتبا كرن، لێ ژبەر خرابیا ئەردێ یاریگەها وێ گوهۆڕین د سیستەمێ یاریگەهێ دا كرن، كووڕێن خابۆری ئەوا دەستپێكەكا خراب هاتییە دناڤ یاریگەهێ ب ئەنجام و ئاستێ نەباش ژ شەش یارییان شەش وەكهەڤی ئیناینە ل ڕێزا 14ێ دهێت ب سەركەڤتنەك، سێ وەكهەڤی و دو خسارەتی، ئەڤ ئەنجامە زێدە جەماوەرێ زاخۆ توورەكرییە و دخوازن ئەڤ یارییە دڤێت ب سەركەڤیت.
ژلایەكێ دووڤە تیما یانەیا مووسل ئەوا ئەنجامێن وێ ژی نە دجیگیر ل ڕێزا هەشتێ دهێت ب كۆمكرنا هەشت خالان ل ڕێزا نەهێ دهێت ب دو وەكهەڤی، دو سەركەڤتن و دو خوسارەتییان، یارییا ئەڤرۆ بۆ زاخۆییان تاقیكرنەكا دییە تایبەت بۆ ستێرێن وێ ئەوێن هەتا نوكە نەشیان دلێ جەماوەرێ خوە خۆشبكەن، دهێتە پێشبینیكرن یارییا ئەڤرۆ ئاكاد هاشم، ئەمجەد عەتوان، عەلی جاسم د ڤێ یاریێ دا ڤەگەڕین.
لدۆر یاریێن هەردو یانەیێن پارێزگەهێ سەلام شرۆڤەكارێ وەرزشی یێ خولا ستێرێن ئیراقێ بۆ ئەڤرۆ گۆت: هەردو تیم داخوازكرینە جەماوەرێ خوە ئاشتبكەن، ژبەركو نەشیاینە د یاریێن بۆری دا سەركەڤتنێ بینن ئەڤە ژی دلمانی و توورەبوونەك بۆ وان پەیدابوویە و دخوازن تیما وان ب سەركەفیت، سەبارەت تیما دهۆكێ سەرەرایی ئاستێ وێ یێ باش لێ ئەنجام د جێگیر نینن، لێ هەردەم تیمەكا ڕێكخستییە، یارییا ئەڤرۆ دێ بەرانبەر تیمەكێ بیت ل دووماهییا ڕێزبەندیێ یە لێ دڤێت هزر نەكەت یا ب سانەهییە و سڤكاتی وەربگریت، ژبەركو دەستپێكا خولێ پرانییا ئەنجامان نابنە پیڤەرێن ئاستێ هەموو یانەیان، كەرخ تیمەكا باشە دڤێت ب هەستیاری سەرەدەریێ دگەل بكەن
سەبارەت یارییا زاخۆ و مووسل گۆت: ئاستێ تیما زاخۆ گەلەك یێ خرابە و ئەنجامێن لاواز دەستڤە دئینیت، ئەڤە ژی دبیت گڤاشتنەكا ئێكجار ژلایێ جەماوەری ل سەر یاریزانان هەبیت، د دەمەكی دا مە هزر دكر زاخۆ ب هەبوونا ئەڤان ستێران دێ هەڤڕكییا سەركێ لیستێ كەت لێ د نوكە دا ڕێزبەندەیا خراب دایە، ئەڤرۆ دێ بەرانبەر تیمەكێ بیت خودان یاریزانێن باشە و دێ بیتە ئاستەنگ بۆ زاخۆیان ژبەركو پێكهاتییەكێ ڕێكخستی هەیە، هیڤییا من ئەوە هەردو یانەیێن مە یێن كوردستانی ب سەركەڤن.
ژ یاریێن دی یێن ئەڤرۆ
كارەبا- مینا، یاریگەها زەورا، دەمژمێر 6:45 مەغرەب.
نەفت میسان- تەلەبە، یاریگەها میسان، دەمژمێر نەهی شەڤ.
یاریێن سوبەهی دوشەمبی 14-9-2026
جەولان- نەورۆز، یاریگەها جەولان، دەمژمێر 6:45 مەغرەب.
نەفت- كەربەلا، یاریگەها كەرخێ، دەمژمێر 6:45 مەغرەب.
هەولێر- ئەلگەرمە، یاریگەها شەهید فرانسۆ حەریری، دەمژمێر نەهی شەڤ.