گرنگیا پشکنینێن بەری هەڤژینیێ د ناڤبەرا کەسێن نێزیك دا
د. زینب ئەحمەد سلێڤانەی، تایبەتمەندا شلوڤەکرنا نەخۆشیان دیار دکەت کو ئەنجامدانا پشکنینێن بەری هەڤژینیێ ب تایبەتی ناڤبەرا کەسێن نێزیك دا، چەکەکێ ب هێزە بۆ دەستنیشانکرنا نەخۆشیێن زکماکی، چونکو گەلەک جینێن کێشەدار یێن کو نیشانێن دیار ل سەر مرۆڤی نینن، د شیاندا نە بۆ زارۆکان بهێنە ڤەگوهاستن هەر دەمەکێ کو هەردو کەس ژ هەمان جینێن کێشەدار ببنە هەلگر. ئەڤ نەخۆشیە پتریا جاران د کۆمەلا نەخۆشیێن سەلاسیمیا و کێمیا خوینێ یا؟ منجەلی و هندەک ئاریشەیێن دەماران و ماسولکان دهێنە ڕێزبەندکرن، ژ بەر هەبوونا پێکهاتەیێن جینی یێن هەڤپشک ناڤبەرا ناسیاران دا، دەلیڤەیا دەرکەفتنا ڤان ئاریشەیان بەرامبەر کەسێن ئاسایی گەلەک پترە، ژ بەرکو زارۆک ژ هەردو ئالیان هەمان جینێن کێشەدار کۆم دکەت.
تایبەتمەندا شلوڤەکرنا نەخۆشیان جەختێ ل سەر هندێ دکەت کو ئەڤ پشکنینە نیشانا هەبوونا %100 یا هەمی نەخۆشیان نادەن، بەلکو تەرکیزێ دکەنە سەر وان جۆرێن هەرە بەربەلاڤ و مەترسیدار. ژ بۆ وێ چەندێ ژی، پشکنینێن خوینێ یێن گشتی و تاقیکرنا ڕێژەیا گۆڕانکاریێن سەلاسیمیایێ پێدڤیێن ڕاستەقینەنە کو دڤێت هەردو کەس ئەنجام ب دەن.
ئەو پێشنیار دکەت کو کەسێن کو دزانن کێشەیەکا تایبەت د خێزانا وان دا هەیە، پێدڤیە نۆشدار کۆنتڕۆلا پشکنینێن تایبەت ب وان جینان ل تاقیگەهێ بۆ ئەنجام بدەت دا کو ب تەمامی پاشەرۆژا زاڕۆکێن خۆ بپاریزن.
ئەگەر د ئەنجامێن پشکنینان دا ئاریشەیەک دیار بوو، ڕێکارێن پزیشکی یێن پێشکەفتی دهێنە بکارئینان. بۆ نموونە بکارئینانا ڕێکا پیتاندنا دەرەکی یان زارۆکێن دناڤ شویشەی و ئەنجامدانا فەحسا جینی بەری زارۆکبوونێ، دهێلیت ب تنێ زارۆکێن ساخلەم و بێ کێشە بهێنە پێشچاڤکرن. زێدەباری ئەڤێ چەندێ، شیرەتکاریا پزیشکی ئەوا کو پشتی دەرکەفتنا ئەنجامان دهێتە کرن، هەمی بژاردەیان روهن دکەت و بەرهەڤیێ ددەتە کچ و کوڕی داکو ب هۆشیاری بڕیارێ ل سەر پاشەڕۆژا خۆ بدەن.
د دووماهیێ دا، زانست و ڕاوێژکاریا پزیشکی ئەگەرێن مەترسیێ دکەنە کێمترین ئاست. تێگەهشتنا دروست و ئەنجامدانا پشکنینان بەری مارکرنێ، بەرهەڤکرنا خێزانەکا بەختەوەر و ساخلەم گرنتی دکەت و پێنگاڤەکا پێدڤی یە بۆ پاشەڕۆژەکا رووهن د جڤاکی دا.
