دەزگەهێ خێرخوازی یێ بارزانی ل ئاكرێ و بەردەڕەشێ 40 قوتابخانە نووژەنكری نە
رەمەزان زەكەریا:
دەزگەهێ خێرخوازیێ بارزانی ل سنۆرێ هەردو دەڤەرداریێن ئاكرێ و بەردەڕەشێ، هژمارەكا قوتابخانەیان نووژەنكرن و كارەبا تێهنا رۆژێ بۆ هژمارەكا قوتابخانەیان دابینكریە.
بێوار كەریم، بەرپرسێ ئۆفیسا ئاكرێ یا دەزگەهێ خێرخوازی یێ بارزانی بۆ ئەڤرۆ گۆت: «سێكتەرێ پەروەردەیێ ئێك ژ وان سێكتەرێن سەرەكییەن كو هەر ژ دەستپێكا دامەزراندنا دەزگەهێ گرنگیەكا تایبەت پێ هاتیە دان، چونكی پەروەردە بناغەیێ ئاڤاكرن و پێشكەفتنا هەر جڤاكەكی یە».
گۆت ژی: «ب خۆشحالیڤە سالانە ئەم چەندین چالاكی و پڕۆژەیێن جودا د ڤی سێكتەری دا ل سەرانسەری هەرێما كوردستانێ، بێ جوداهی ئەنجام ددەین».
بێوار زێدەتر گۆت: «كۆمەكا پڕۆژەیێن ژ لایێ دەزگەهی ڤە ل دەڤەرێ هاتینە بجهئینان، زێدەتر ژ 40 قوتابخانەیان هاتینە نووژەنكرن و كەرەستە و پێدڤی بۆ زێدەتر ژ 200 قوتابخانەیان هاتینە دابینكرن، سیستەمێ كارەبێ ژ تێهنا ڕۆژێ بۆ 15 قوتابخانەیان هاتیە دانان».
