فلمێ سینه‌مایی یێ «باج» ل وه‌لاتێ هۆله‌ندا دێ هێته نیشادان
زنار تۆڤی:
فلمێ سینه‌مایی یێ «باج»، كو ژ سیناریۆ و ده‌رهێنانا دیاكۆ بایزه، كۆمه‌كا ئه‌كته‌ران رۆل تێدا گێرایه، ل باژێرێ ئۆتریخت یێ وه‌لاتێ هۆله‌ندا دێ هێته نیشادان.
دیاكۆ بایز، ده‌رهێنه‌رێ وی فلمی دیار كر: فلمێ سینه‌مایی یێ «باج»، ب تنێ ڤه‌گێرانا چیرۆكا روودانه‌كا دیاركری نینه، به‌لكو بینه‌ری د ئێخیته دناڤ جیهانه‌كێ دا كو تێدا هه‌ر كاره‌كته‌ره‌ك دیتنه‌كا جودا بۆ هه‌مان روودان هه‌یه، ئه‌ڤ فلمه ب كارئینانا لیكۆلینێن پۆلیسان و دانوستاندن ل گه‌ل كه‌سێن په‌یوه‌ندیدار ب وێ روودانێ، هه‌مان روودان چه‌ندین جاران و د چه‌ندین دیتنێن جودا دا بۆ بینه‌ری ڤه‌دگێریته‌ڤه.
دیاكۆ بایز دبێژیت ژی: چیرۆكا ڤی فلمی ده‌رباره‌یی خێزانه‌كێیه، پشتی روودانه‌كا نه‌خۆش و تراژیدی، ژیانا وان ب ته‌مامی دهێته گوهۆرین، بابێ وان كێشه‌یا ئالووده‌بوونێ ب ماددێن هشبر هه‌یه، ئه‌وی ب ئێكجاری ئاگه‌ه ژ وان روودانان نینه یێن كو دناڤ مالا وی دا روودده‌ن، خوە د ئێخیته دناڤ ره‌وشه‌كا ئالۆز دا و ب تایبه‌تی ئه‌و و هه‌ڤاله‌كێ خوە یێ تاوانبار د روودانه‌كا هاتنوچوونێ یا بله‌ز دا ل شه‌ڤه‌كێ كچا خوە بریندار دكه‌ت.
ئه‌و ده‌رهێنه‌ره ئاشكرا دكه‌ت ژی: ل گه‌ل پێشڤه‌چوونا روودانان، هه‌ر ئێك ژ ئه‌ندامێن وێ خیزانێ ب ره‌نگه‌كێ جودا ل گه‌ل ئه‌وێ روودانێ مامه‌لێ دكه‌ت و هه‌ر ئالیه‌كی دیتنا خوە بۆ راستییێن ل پشت ئه‌وێ روودانێ هه‌نه، ئه‌ڤێ وه‌كرییه چیرۆكا وی فلمی ب ره‌نگه‌كی هێدی و د چه‌ند ئاستان دا بۆ بینه‌ری بهێته ئاشكرا كرن.
دیاكۆیی ئه‌و چه‌ند ژی گۆت: ئه‌ڤ فلمێ سینه‌مایی پێشتر ل چه‌ندین باژێر و ده‌ڤه‌رێن كوردستانێ هاتییه نیشادان و د چه‌ندین چالاكی و به‌رنامێن سینه‌مایی یێن جودا دا پشكداری كرییه، هه‌روه‌سا ئه‌ڤ نیشادانێن ناڤخۆیی بووینه ده‌لیڤه بۆ هندێ ئه‌ڤ فلمه ژ لایێ بینه‌رێن كوردستانێ بهێته دیتن و چیرۆك و شێوازێ جودا یێ ڤه‌گێرانێ بگه‌هینیت.
فلمێ سینه‌مایێ یێ «باج»، ژ سیناریۆ و ده‌رهێنانا دیاكۆ بایزه و هه‌ر ئێك ژ، رزگار باهر، شایان كه‌یوان، رۆژان حه‌مه جه‌زا، كه‌نار سه‌رچل، یاسین عومه‌ر، شه‌ونم عه‌لی و ئدریس ره‌شید، رۆلێ سه‌ره‌كی تێدا گێرایه.
