ل ئیراقـێ… ئـەو وەلاتـێ خزمەتکار تێدا دمینیت هەژار
فەرەست عەبدولڕەحمان مستەفا
ل ئیراقێ، تڕانەکا تراجیدی یا هەیی و کەس پێ ناکەت کەنی، پالەوانێ ئێکێ یێ ڤێ ترانێ فەرمانبەرەکە پتری سیهـ سالان ژ تەمەنێ خوە د خزمەتا دەولەتێ دا بریە سەر، و پالەوانێ دووێ کەسەکە زانییە چاوا دێ وەفادار بیت بۆ لایەنەکی یان چەپلان بۆ کەسەکی لێبدەت و رێکا دەستهەلاتێ و ئیمتیازان ل بەر خۆ ڤەکەت.
ل ئیراقێ، یێ ئێکێ هەمی سپێدەهیان دچوو سەر کارێ خۆ، ئەرکێن خۆ جێبەجێدکرن و دبیت ژی بەرەبابەک بۆ پاشەرۆژێ پەروەرد و بەرهەڤکربیت، یان ژی تەمەنێ خۆ د ناڤ بەش و پشت مێزێن فەرمانگەهەکێ بۆراندبیت، ب وێ باوەریێ کو کارێ دلسۆزانە دێ ل دەمێ پیریێ و خانەنشینبوونێ ژیانەکا خۆش بۆ وی دابین کەت.
لێ پشتی دەمێ خانەنشینیێ، دهێت ژنوی دزانیت کو ئەو وەلاتێ وی پتر ژ سیهـ سالان خزمەت بۆ کری؛ نەشێت وی ژ سەختی و نەخۆشیێن ژیانێ بپارێزیت.
خانەنشینەک هەیڤانە 500,000 دیناران وەردگریت و د ناڤبەرا خوارنێ، کەهرەبێ، سۆتەمەنی، ئاڤێ، دەرمانان، هاتن وچوونێ و هندەک پێدڤیێن دی یێن گرنگ یێن ژیانێ پارڤە دكەت، ئەگەر گۆژمەک بمینیت ژی گەلەکێ کێمە! ئەوێ دمینیت تێرا نەخۆشیێن ژنشکەکێ ڤە یان خەرجیێن نەچاڤەرێکری ناکەت.
ل ئیراقێ، پشتی پتر ژ سیهـ سالێن خزمەتێ دەولەت دێ فەرمانبەری ب نڤیسارەکێ خانەنشین کەت و مووچێ وی ژی دیارکەت، پاشی دێ وی د باوەشا پیریێ دا بتنێ هێلیت، هەر وەکی تاوانەک کری، چنکو تەمەنێ وی مەزن بوو، یان تاوانبار بووی، چنکو نەخۆش کەفتی، یان ژی خەونێن وی کو وی ئەو باوەری هەبوو دلسۆزیا وی دێ سەقامگیریەکێ بۆ پەیدا کەت.
بەلێ ل ئیراقێ، ئەو چاڤدێریا جڤاكی یا پێدڤی د پیریێ دا مرۆڤان بپارێزیت وەک سەهوانەکا مرۆڤایەتی د ژیانا پڕانیا خانەنشینان دا یا بوویە سەهوانەکا کون کون، نە بارانێ رادگریت و نەمرۆڤان دپارێزیت، بتنێ هەستەکی ل دەف بەرپرسان پەیدا دکەت «ئەرکێ خۆ یێ ئەنجام دای» کو نڤیسارەک یا دەرکری.
ل ئیراقێ، ئەوا پتر فەرمانبەرێ خانەنشین دئێشینیت، ئەوە کو سەحدکەت هندەک کەسان، چاوا گەهشتینە پلەیێن سیاسی یێن بلند نە ب شاییستەی و ئەزموون، لێ ب وەفاداری بۆ لایەنەکی یان کەسەکی، خواندنا خۆ ژی تەمام نەکریە یان یێ بێ باوەرنامەیە.
کێماسی نینە کەسەکی خواندن تەمام نەکربیت و گەهشتبیت دەستهەلاتێ، ئەگەر یێ ژ هەژی و پاقژ و ژێهاتی بیت، کێماسی ئەوە کو مەلاقی ببیت جهێ پاقژیێ و دەست قوتان ببن جهێ خزمەتێ و بەرهەمی و وەفاداری بۆ کەسان گرنگتر بیت ژ وەفاداریێ بۆ وەلاتی. ل ئیراقێ، یێ تەمەنێ خۆ دپەروەردەکرن ئاڤاکرنا مرۆڤان دا بۆراندی، نەشێت ژیانەکا خۆش بۆ خوە دابین بکەت. و یێ سالێن خۆ ب پاقژکرنا وێنێ سەرکردەکی دا بۆراندی هەمی دەرگەهێن ئیمتیازان بۆ دڤەکرینە، ئەو دەرگەهێن باوەرنامە و خزمەت نە شیاین ڤەکەن.
ل ئیراقێ، یێ ئێکێ ب چاڤێن ب ترس بەرێ خۆ ددەت بهایێ دەرمانەک بۆ چارەسەریا خۆ بەری بکریت، و یێ دووێ ترومبێل و ئیمتیازات و پاسەوانێن خۆ دهەژمێریت.
ئەی ئیراق، خانەنشین داخوازا کۆچک و كاروانێ پاسەوانان ناکەت. بتنێ دڤێت بەری پاریەکێ نانی بخۆت یان دەرمانەکی بۆ چارەسەیێ بکڕیت نەترسیت ژ بهایێ وی و ل دوماهیا هەیڤێ ژی ب ترس و دلگرانی ڤە چاڤەرێ نە بیت، هەر وەکی تاوانەکێ ئەنجامددەت، چنکو پێدڤی یا ب ژیانێ هەی!
ئەی ئیراق، ئەو فەرمانبەرێ خانشین بووی د دەمێ خزمەتکرنێ دا داخوازا دەولەمەندبوونێ نەکریە، بتنێ داخوازا وی ئەوبوو ل دەمێ شیانێن خزمەتکرنێ نەمینن.. نەمینیت هەژار!
ل ئیراقێ، فەرمانبەر خانەنشین دبیت، دا گەشتەکا نەخۆشیان دەست پێ بکەت، د دەمەکی دا مەلاق و مەسینهەلگر خانەنشین دبن و گەشتا ئیمتیازاتان دەست پێ دکەت. د ناڤبەرا ڤان هەردویان دا، دادپەروەری بەرزە دبیت د وەلاتەکی دا کو چ کێماسی د داهاتی دا نینن، لێ هێشتا مرۆڤ ل خۆ دگەرهن.
