شێروان دوبەردانی: د پڕۆژەیاسایا بودجەیا 2027ێ دا ب دەهان مین بۆ هەرێما كوردستانێ هاتینە چاندن
ئەندامەكێ جڤاتا نوونەرێن ئیراقێ ژ فراكسیۆنا پارتی ئاشكرا دكەت، پڕۆژەیاسایا بودجەی یێ پڕە ژ مێنێن چاندیی بۆ هەرێما كوردستانێ ، داخوازێ ژی دكەت پەرلەمانتارێن كورد ب ئێكگرتی ڕوو ب ڕوویێ وان مەترسییان ببن.
شێروان دووبەردانی، ئەندامێ جڤاتا نوونەرێن ئیراقێ ژ فراكسیۆنا پارتی، گۆت»پڕۆژەیاسایا بودجەیا 2027 كارەساتە و چ بەرچاڤ وەرگرتن بۆ مافێن دەستووری یێن هەرێما كوردستانێ تێدا نەهاتییە كرن، هەروەسا ل سەر بنیاتێ ئەنجامێن سەرژمێرییا گشتی یا ئاكنجییان نەهاتییە دانان».
شیروانی گۆت ژی، د ناڤ پڕۆژەیاسایێ دا دەهان مێن بۆ هەرێما كوردستانێ هاتینە چاندن، هەكە ب وی شێوەی بهێتە دەربازكرن، كارتێكرنێن نەرێنی ل سەر هەرێما كوردستانێ دبن.
ل دۆر هووركاریێن ئاریشەیان، شێروان دووبەردانی گۆت: «دانانا مەرجێ هنارتنا 400 هزار بەرمیلێن نەفتێ د ڕۆژەكێ دا، داهاتێ نە نەفتی و قەرێن بانكا بازرگانییا ئیراقێ، ژ وان بەربەستێن د ناڤ پڕۆژەیاسایێ دا هەین».
ب گۆتنا وی پەرلەمانتاری، پشكا هەرێما كوردستانێ بۆ كێمتر ژ 12% هاتییە دانان، د دەمەكێ دا دڤێت 14،14% بیت. ڕۆهن ژی كر، نابیت بودجەیا وەزارەتا پەروەردەیا ئیراقێ 13 ترلیۆن و 800 ملیار دینار بیت و بودجەیا ئێك وەزارەت ب تنێ (ئانكو وەزارەتا پەروەردەیا ئیراقێ) ژ پشكا هەرێما كوردستانێ پتر بیت.
ل دۆر شێوازێ سەرەدەریكرنێ ل گەل فەرمانبەران ئاماژە ب وێ دا «نابیت كەسەك ل ئوسترالیا مووچەی ژ ئیراقێ وەربگریت، بەلێ حوكمەتا ئیراقێ سزایێ فەرمانبەرێن هەرێما كوردستانێ بدەت ژ ئەگەرێ ڕادەستنەكرنا تەمامییا داهاتان دا».
سەبارەت هەلوەستێ فراكسیۆنێن كوردستانێ، دووبەردانی ڕاگەهاند: «چ چارەسەر و میكانیزم ژ بلی پێكڤەكاركرنا فراكسیۆنێن كوردستانێ بۆ ڕوو ب ڕووبوونا وان مەترسییان نینە».
ژ ئالییەكێ دی، هەرێم كەمال ئاغا، سەرۆكێ فراكسیۆنا ئێكەتیێ ل جڤاتا نوونەرێن ئیراقێ ڕاگەهاند، ب ڤی شێوازێ نها دەنگی نادەینە پڕۆژەیاسایا بودجەی و نابیت یاسا ب زیانگەهاندنێ ب مافێن خەلكی بهێتە دەربازكرن.
