بازاڕێ مقێمێ ل ئاكرێ ژ كەڤنترین بازاڕێن باژێڕی بەرەڤ چۆلبوونێ دچیت
رەمەزان زەكەریا
بازاڕێ مقێمێ كو ئێكە ژ كەڤنترین و دیرۆكیترین بازاڕێن ئاكرێ، ژ بەر كێمیا خزمەتگوزارییان و نەبوونا جهێ ڕاوەستانا ترۆمبێلان، بەرەڤ چۆلبوونەكا تەمام دچیت و پشكەكا مەزن ژ دوكانێن وێ هاتینە گرتن.
بازاڕی مقێمێ دكەڤیتە نێزیك دەرگەهێ قشلا ئاكرێ ژ كۆما ٣٠٠ دوكانێن ناڤ بازاڕی نوكە ٢٠٠ ووكان ب تەمامی هاتینە گرتن و قفل ل سەر هاتینە لێدان.
ل گۆر گۆتنێن دوكانداران، هۆكارێ سەرەكیێ ڤی رەوشی ڤەدگەرێت بۆ خرابیا خزمەتگوزارییان و لاوازیا سیستەمێ كارەبایێ، گرانیا كرێیا دوكانان و زۆریا رسووماتان. ئەڤ چەندە ب خۆ راكێشایە كو كڕیار كێم ببن و ل دووڤ دا ژی دوكاندار ئێك ل دووڤ ئێك جهێن خۆ دگرن. ئەڤێن هەتا نوكە ماین ژی داخوازا چارەسەریێ و پتر خەمخۆری و ڤەژاندنا بازاڕی دكەن.
ئەمین سەلیم، رێڤەبەرێ گەشتوگوزارا ئاكرێ بۆ ئەڤرۆ راگەهاند: هەر گاڤەكێ ڤی بازاڕی ب چۆلی دبینم دلێ من ژان دكەڤیتێ، ژبەركو هۆكارەكێ دی یێ چۆلبوونا بازاڕی ئەوە چ جهـ بۆ ڕاوەستانا ترۆمبێلان تێدا نینن، لەوڕا ڤی خاڵی كاریگەرییەكا گەلەك خراب ل سەر بازاڕی هەبوویە.
ناڤبری گۆتژی: دگەل دەڤەردارێ ئاكرێ و سەرۆكێ باژێرڤانیێ مە كۆمبوون كریە و مە بەحس ل وێ چەندێ كریە كو ل جهەكێ نێزیكێ بازاڕی پاركەكا مەزن بهێتە دروستكرن، كو پشكا ژێری بۆ ڕاوەستاندنا ترۆمبێلان بیت و پشكا سەری ژی بۆ پیاسە و بێهنڤەدانا خەلكی بیت.
ناڤهاتی گۆت: بازاڕێ مقێمێ خودان مێژوویەكا دێرینە و سەردەمانەكێ ئێك ژ قەرەبالغترین ناڤەندێن بازرگانی یێن ئاكرێ بوو، بەلێ پشتگوهخستنا وێ ژ ڕوویێ نووژەنكرنەڤەیێ ڤە و دابین نەكرنا پێدڤیێن سەردەمی یێن وەكی پاركا ڕاوەستاندنا ترۆمبێلان بۆیە هۆكارێ وێ چەندێ كو شوناسا خۆ یا بازرگانی ژ دەست بدەت.
