شێروان بەشار: هەکە من مافێن خوە یێن دارایی وەرگرتن دێ دەست ژ یانەیێ بەردەم
دویڤچوون: تاهر رێكانی
ئەڤە ده‌مه‌كێ درێژه ڕه‌وشا وه‌رزشا یانه‌یا گاره به‌ره‌ڤ نه‌مانێ دچێت و گارگێریا یانه‌یێ گازندێ ژ لایه‌نێن په‌یوه‌ندیدار دكه‌ت و ده‌نگویێ نه‌مانا وێ دهێنه گۆتن، لەوما ژی مه دڤیا دویڤچوونا ره‌وشا وێ بكه‌ین و بزانێن دێ چ رویده‌ت دڤێ راپۆرتێ دا ببینن:
لده‌ستپێكێ شێروان بشار سه‌رۆكێ یانه‌یێ گۆت: یانەیا مه كانییا یاریزانان بوویە تایبه‌ت لسه‌ر ئاستێ كچان چه‌ندین ده‌سكه‌فت لسه‌ر ئاستێ هه‌رێمێ و ئیراقێ ئیناینە لێ نۆكه یێن راوه‌ستیاین، مه چو داهات نینه كارو چالاكیێن خۆ پێ برێڤه‌ببه‌ین، پشتبه‌ستنا یانه‌یان تایبه‌تی یێن هه‌رێمێ و ئیراقێ لسه‌ر پشته‌ڤانیا حكومه‌تێ نه، مخابنی لایه‌نێن په‌یوه‌ندیدار پشته‌ڤانیا مە نه‌كریه و پڕانییا چالاکیێن مە هاتنە ڕاوەستاندن، تیما فوتبۆلێ گه‌هشتبووینە پلا نایابا کوردستانێ، لێ ژبەر نه پشكداریکرنا بەردەوام پاشڤەچووینە پلا دویێ، ژبه‌ر هه‌مان ئه‌گه‌ر یا باسكێت بۆلێ نه‌شیاین پشكداریێ د خولا ئیراقێ دا بكه‌ین، زێدەباری تیمێن جەنگی ئەوێن پشتبەستن ل سەر مەزاختییێ خوە دکەن.
هەروەسان ناڤهاتی گۆت: بڕیاربوو ل چریا دویێ یا سالا بوری هه‌لبژارتن هاتبانه كرن، به‌لێ پشتی هه‌ردو رێكخراوێن قوتابیان و لاوان بووینە ئێک داخواز ژمه كر هه‌لبژارتن نه‌هێنه كرن ب مه‌ره‌ما وه‌رگرتنا یانه‌یێن ئاماژە ب هەبوونا پرۆژه‌كێ نوو و به‌رفره‌هـ کر، مه‌ژی به‌رهه‌ڤیا خۆ دیاركر چونكه ئه‌م ژی پارچه‌كێن ژڤێ رێكخراو، مە بۆ دیارکر کو یانە ب كۆژمەیە‌كێ پاره‌ی قه‌رداره، پشتی بۆرینا ده‌مه‌كێ نڤیساره‌ك ژ مه‌كته‌با رێكخستنێ هات كو خواستبوو لژنه‌ك بهێته پێكئینان ژبۆ چارەسەرکرنا ئاریشەیین یانەیێ، مه‌ژی راپۆرته‌ك به‌رهه‌ڤكر هه‌ر ژ ده‌ستپێكا دامه‌زراندنا یانه‌یێ و هه‌تا نۆكه هاته بلند كرن بۆ سكرتاریه‌تا ئێكه‌تیا ناڤبری، ل مه‌هـا بۆرین تنێ ب په‌یوه‌ندیه‌كێ ئه‌م هاتینه ئاگه‌هدار كرن كو شیان نینن پشته‌ڤانیێ ل یانه‌یا مە بكه‌ن لێ دگەل یانەیێ بەردەوامبم هەتا چارەسەرییەک هەبیت.
شێروان بەشاری گۆت: به‌رهه‌ڤم هه‌ر بڕیاره‌كا رێكخراوا ناڤبری بده‌ت، لێ لدووف سیسته‌مێ نۆكه یێ ب رێڤه‌برنا یانه‌یان دێ یا بزه‌حمه‌ت بیت، ژبه‌ركو بارێ حكومه‌تێ یێ گرانه و شیان نینن ڤان هه‌می یانه‌یان ب رێڤه‌ببه‌ت، ئانكو پێدڤیه ئه‌رد بۆ یانه‌یان بهێته ته‌رخانكرن و ئه‌و بخۆ وه‌ربه‌رهێنه‌ران بینن پێخەمەت پرۆژه‌یەكێ به‌رهه‌مدار هه‌ر یانه‌یه‌كێ داهاته‌ك هه‌بیت داكو پشتبه‌ستنێ لسه‌ر خۆ بكه‌ت.
ژلایه‌كێ دویڤه مه‌تین عه‌لی ئه‌ندامێ مه‌كته‌با سكرتاریه‌تا قوتابی و لاوێن دیموكراتا كوردستانێ گۆت: بابەتێ یانه‌یا گاره گەلەک شێلییه، هزر هاتیەکرن وه‌كۆ یانه‌یا وه‌رزشی نه مینیت بەلکو وه‌كێ ئه‌كادیمییه‌كا وه‌رزشی بیت و چه‌ند پێشنیارێن دێ ژی هه‌نه یانه بمینیت، لێ د هه‌ردو بیاڤاندا تا نۆكه چ دیارنینه و هندی ده‌سته‌كا نۆكه ئێكلا نەبیت ئه‌م ناگه‌هینه چو رێكه‌فتنان، هنده‌ك پێشنیار ژی هه‌نه كو ئه‌ڤ جهه بۆ رێكخراوێ بهێته زڤراندن داكو ته‌خا گه‌نج و لاوان پتر مفای ژێ وه‌ربگرن، ژبه‌ر هندی هه‌تا نۆكه نه‌گه‌هشتینه چ بریاران، بابەتێ قه‌رێن یانه‌یێ مه نڤیساره‌ك بۆ به‌شێن جه‌ماوه‌ری و دارایی ل مه‌كته‌با سیاسی بلندكرینه لژنه‌ك پێكئینایه دووڤچوونا ڤێ چه‌ندێ یا كری لێ هه‌تا نۆكه چ دیار نینه چونكه ئه‌و بلندترین ده‌ستهه‌لاته و بڕیار د ده‌ستێ واندایه، د وه‌ختێ خۆدا داهاتێ گه‌ردۆن و یاریگه‌ها وێ یێ ئێكه‌تیا لاوان بۆ و پشكه‌كا كێم دا یانه‌یێ لێ رۆژ ب رۆژێ ئه‌وژی كێم بوو له‌وا ئه‌م نه‌شیاین یانه‌یێ ب خۆدان بكه‌ین، به‌لێ پشتی 2017 مه هاریكاریه‌كا كێم بتایبه‌ت بۆ یاریێن تاك دكر.
ناڤبری دیاركر ژی پشتی یانه هاتیه هه‌لاویستن تا راده‌كێ من وه‌كۆ كه‌س هاریكاریا وان یا كری بتایبه‌ت بۆ تیما باسكێت بۆلێ، لێ ئه‌و هاریكاریا دورست كو یانه خۆ لسه‌ر پێن خۆ بگریت نه‌مایه، د وه‌خته‌كێ دا كۆمپانیا فاسلینگێ خۆ لێ كربوو خۆدان ب پشتەڤانیەکێ، لێ پشتی ئه‌ڤه نه‌ماین دبه‌رده‌وام بوون لسه‌ر چالاكیێن خۆ له‌وا ئه‌ڤه هه‌می بونه قه‌ر لسه‌ر یانه‌یێ.
