ئابوورناسەک: حوکمەت ژ خوە ناگریت شیرەتان ژ بسپۆر و شارەزایێن ئابووری وەرگریت
ئەڤرۆ نیوز:
بسپۆرەکێ دارایی و ئابووری ل زانکۆیا دھۆکێ دبێژیت قەیران ژ نەبوونا پلانان دروست دبن و ھەکە پلانا وەزیرەکی یا شاش بیت پێدڤیە دەست ژ کاری بەردەت و پتریا وەزیرێن ھەرێمێ د تایبەتمەند نینن د کارێ وەزارەتێن خوەدا و خویا دکەت کارەکێ مەزن دڤێت ھەتاکو سەربخوەیا ئابووری رابگەھینین.
ل گەلەک وەلاتان ھەکە قەیرانەکا دارایی و ئابووری ھەبیت، حوکمەت دھێتە ھەلوەشاندن و حوکمەتەکا تکنوکرات ژ بسپۆر و شارازایێن ئابووری دھێتە پێکئینان بۆ سەرەدەریکرنێ ل گەل قەیرانێ و چارەکرنا وێ، ئایا بۆچی ئەڤ پێنگاڤە ل عیراقێ و ھەرێما کوردستانێ ناھێتە ھاڤێتن د. ئەحمەد سەفار بسپۆرێ دارایی و ئابووری ل زانکۆیا دھۆکێ بۆ رۆژناما ئەڤرۆ گوت”
٩٠% ژ وەزیرێن ھەرێما کوردستانێ د تایبەتمەند نینن د وارێ کارێ وەزارەتێن خوەدا، بەلکو ھندەک ژوان یێ وەزارەتەکێ ب رێڤەدبەن، لێ تایبەمەندیا وی و کارێ وێ وەزارەتێ گەلەک د ژێک دوورن، ژێگرتنا وەزیران ل سەر بنەمایێ تەوافقێن حزبی یە و ھەر حزبەک ژی وەزیرێن خوە ل دووڤ بنەمایێن ( مەحسوبیەت و مەنسوبیەت) و بنەمایێن عەشائیری ژی، نەکو ل سەر بنەمایێ تایبەتمەندیێ دەستنیشان دکەت، ھەکە وەزیر یێ تایبەتمەند بیت و وەزارەت تووشی قەیرانێ دبیت و ئەگەرێ وێ قەیرانێ نەبوونا پلانان بیت، یان پلانا وی یا شاش بیت، یان ئەو ئەگەرێ وێ قەیرانێ بیت، بێگومان دڤێت دەست ژکاری بکێشیت، ل پتریا وەلاتێن جیھانێ ھەکە قەیرانەکا دارایی پەیدا دبیت، وەزیرێ دارایی ل راگەھاندنێ دەردکەڤیت دانپێدانێ ب سەرنەکەفتنا خوە دکەت، بەلێ ل ڤێرێ د بنەرەتدا چو سیاسەت و پلان نینن، ب دیتنا من خەلک ھەست ب قەیرانان دکەن، لێ ئەو ھەست پێ ناکەن، چونکی ھەموو کارێن ئیداری و مەزاختنێن حوکمەتێ یێن ب رێڤەدچن. ھەست کرن ب بەرپرسیارەتیێ یا دروست نینە، لەوما ئەڤە سالەکە ئەڤ قەیرانە ھەی و نەشیاینە چارەسەریێ بۆ ببینن، یان بزاڤ نەکرینە چارەسەریێ بۆ ببینن، دەمێ رۆژا ئێکێ قەیرانێ دەستپێکری، پێدڤی بۆ حوکمەتێ ژۆرەکا ئۆپەراسیۆنان چێکربان و زانیبا ئەگەرێن ڤێ قەیرانێ چنە و ھندەک ڕێ و پلان بۆ دانابان، لێ سیاسەتا نە رێکوپێک و بێ پلان دێ بیتە ئەگەر کو رۆژ بۆ رۆژێ قەیران دەرکەڤن و ئەم دێ بەردەوام تووشی ڤان قەیرانان بین”.
ب دیتنا د. ئەحمەد سەفاری ھەموو پشت بەستنا مە ل سەر وەلاتێن دەوروبەرە، لەوما دەم دڤێت بۆ پرسا سەربخوەیا ئابووری و دبێژیت”ھەکە سوباھی سنۆر بھێنە گرتن دێ بھایێ کەلوپەلان گەلەک گران بیت، چونکی ھەموو پشت بەستنا مە یا ل سەر دەرڤە، ٨٥% ژ کەلوپەلێن خوارنێ ژ دەرڤە دھێن ب تایبەتی ژ ئیرانێ و تورکیا و پانزینا مە یا ژ تورکیا و ئیرانێ دھێت و پارێن مە یێن ژ بەغدا دھێن، نزانم دێ چاوا دەولەتا خوە دروست کەین، و چەند کار بۆمە دڤێت ھەتا ئەم خوە بەرھەڤکەین بۆ سەربخوەیا ئابووری؟”.
زێدەتر دبێژیت” خواندنەکا دوور و درێژ دڤێت ھەتا سەربخوەیا ئابووری بھێتە راگەھاندن و دڤێت ھندەک پێنگاڤ بھێنە ھاڤێتن کو دەمێ ئەو بریار دھێتە دان، سەرکەفتنێ تێدا بینین و خوراگرین و دوبارە نەزڤرینە بەغدا یان لایەنەکێ دی و بکەڤینە دبن قەران دا، چارەیێن ھەین و شیانێن ھەین و کوردستان یا زەنگینە ب سامانێن خوە، بەلێ ئیدارە و ریفۆرم و پلان دڤێت”.
ل دۆر وێ چەندێ ئایا حوکمەتا ھەرێمی د قەیرانێن ئابووری دا پشت بەستنێ ب بسپۆر و شارازایێن ئابووری و دارایی یێن ناڤخوەیی و ژ دەرڤە دکەت، د. ئەحمەد سەفار گوت”دیارە ژ خوە ناگرن شیرەتا ژ کەسێ وەربگرن، ژبەر کو ھەکە چارەنەکەن ژی، دێ کارتێکرنا وێ قەیرانێ ل سەر خەلکی کێمتر لێکەن، ئەوان کەسێن شارەزا و بسپۆر و ل چارەیێن ژیواری بگەرھن نەڤێن، دبیت ئەڤ بارۆدوخە بۆ ھندەکا یێ باشتر بیت و قەیرانان ژی بازرگانێن خوە یێن ھەین، ھەر قەیرانەکێ ئامرازێن بەدیل یێن ھەین، کا ئەگەرێ وێ چیە و زیانێن وێ چنە و ئایا ئەڤ قەیرانە یا دراڤی یە، یان یا ئابووری یە، یان سیاسی یە، یان سستیەکە د ئیدارێ دا، ئانکو ئەگەرێن ھەین و پێدڤیە ب شێوەکێ زانستی ئەگەر بھێنە دیارکرن دا چارەیان بۆ ببینن و کارتێکرنا وێ سڤکتر بکەن ل سەر خەلکی”.