ئیدارا بەردەڕەش سالەکە بڕیارا پارێزگارێ دھۆکی جێبەجێ نە کریە
ئه‌ڤرۆ نيوز:
١٥٠٠ دۆنەم زەڤیێن ١١٠ جۆتیاران ل تاخێ خێلەکێ ل سەنتەرێ قەزا بەردەڕٍەش ژ لایێ باژێرڤانیا بەردەڕەشێ ڤە ھاتە ڤەمراندن و بوونە پارچێن زەڤیێن ئاکنجیبوونێ و ل سەر پۆلیس و فەرمانبەران ھاتینە دابەشکرن و ھەتا نوکە ئەو جۆتیار نەھاتینە قەرەبووکرن.
عەبدولرەحمان دارەوان، ئێکە ژ کەساتی و ریھسپین تاخێ خێلەکی و نوونەرێ ھەر ١١٠ جۆتیاران بۆ ئەڤرۆ دیار کر، پرانیا وان جۆتیاران ھەژارن و نوکە زەکاتێ ژ خەلکی وەردگرن و ١٥٠٠ دۆنەم زەڤی ل دەستێن مە چووینە و ئەو زەڤی یێن ١١٠ جۆتیارانە و ھەتا نوکە کەس ژ وان نەھاتینە قەرەبووکرن و زەڤیێن وان یێن چاندنێ ژی د دەستێن وان دا نەماینە.
دارەوانی بۆ ئەڤرۆ دیار کر، زەڤیێن وان ل سەر پۆلیسین شێلادزێ و کانی ماسێ و سێمێل و شێخان و دێرەلوکێ و پشکەش فەرمانبەرێن بەردەڕەش ھاتنە دابەشکرن و ئەو ژی مانە بێ زەڤێ. ئەڤە ل دەمەکی دایە کو ل گۆر یاسا پەرلەمانێ کوردستانێ ھەر جۆتیارەک زەڤیا وی بھێتە تەمراندن دبیت ٣% بھێتە قەرەبوو کرن ب زەڤیین نێشتەجێ بوونێ.
دارەوانی گۆت: ل سالا چوویی مە خۆنیشاندانەک کر و سەبارەت ب ڤێ ئاریشەی ل بەروارا ١٦/٢/ ٢٠١٤ ژمارە ٢٩٤ پارێزگارێ بەرێ یا دھۆکێ نڤیسارەکا فەرمی ئاراستەی قایمقامیا قەزا بەردەڕەشێ کری یە کو ئەو جۆتیار ھەمی بھێتە قەرەبوو کرن. لێ ئەڤە نێزیکی سالەک و چەند ھەیڤ ب سەر ئەوی بریاری دا چوون و ھێشتا ئەو جۆتیار نەھاتینە قەرەبوو کرن و بریارا پارێزگاری دھۆکی نەھاتیە جێبجێکرن.
دارەوانی زێدەتر بۆ ئەڤرۆ گۆت ئیدارەیا خوەجھیا بەردەڕەشێ نەڤێت ئەڤ ئاریشە چارەسەر ببیت، لەورا ئەو جۆتیار ناھێنە قەرەبوو کرن دەما ئەم داخواز چ باژێرڤانیی دکەین بۆچی ئەم ناھێنە قەرەبوو کرن دبێژنە مە جارێ راوەستن و ل دەمەکی دا ھندەک کەسێن خودان واستە کو رێک و ستوونا کەھرەبێ ب ناڤ زەڤیین وان دا چووی گەلەک ب ساناھێ دھێنە قەرەبوو کرن. لەورا ئەز داخواز ژ پارێزگارێ دھۆکی بخوە دکەم خوە ل وان جۆتیاران بکەتە خودان و ئاریشەیا وان چارەسەر بکەت چونکی ئەو ھەمی مەغدوورن و زەڤیین وان ل دەستین وان نەمایە و بەھرا پتر ژی ھەژارن و ئەز باوەر ناکەم ل ھەمی کوردستانێ ل جۆتیارێن خێلەکی ھەژارتر ھەبن و پشکەک ژ وان جۆتیاران ٢٥ کەسن ل مالا خوە دا. دارەوان داخواز ل پارێزگاری نوکە یێ دھۆکی دکەت پێشوازی یا مە بکەت حەتا گەلەک دزیێن بەرپرسان و کەسانێن خودان واستە ل بەردەڕەشێ بۆ وی ئاشکەرا بکەت. خێللەکی بەری نووکە گوندەک بوو ل نزیک سەنتەرێ قەزا بەردەڕەشێ و بەری نووکە خەلکێن وی گوندی حەتا نووکە ژی ھەمی جۆتیارن و پشتی سالا ٢٠٠٧ خێللەکی دکەڤیتە د ناڤ سنوورێ باژێرڤانیی و دبیتە تاخەک ل سەنتەرێ قەزا بەردەڕەشێ.
فەرھاد محمەد عەبدولا ئێکە ژ وان ١١٠ جۆتیارین تاخێ خێللەکی پشتەڤانیا خوە بۆ ئاخافتنێن عەبدورەحمان دارەوانی دیارکر و گوت غەدرەکا مەزن ل جۆتیارێن خێللەکی ھاتیە کرن و ل گۆر یاسایان دبیتە ئەو ھەمی بھێنە قەرەبوو کرن لێ حەتا نووکە چ کەسەک ژ وان نەھاتینە قەرەبوو کرن ب تنێ ھندەک مەلاکێن گوندی نەبوون کو ل ھەمی دەمان ئەو موستەفیدن. فەرھادی دیارکر کو ١٦ دۆنم زەڤیین چاندنێ نووکە ل دەستێن وان نەمایە و ھاتیە ڤەمراندن لەورا ئەو داخوازا قەرەبویان دکەت. ئەڤێ جۆتیاری زێدەتر بۆ ئەڤرۆ گۆت گەلەک ژ زەڤیین خێلەکی ھاتیە ژناڤبرن و حەتا نووکە ئەم نەھاتینە قەرەبوو کرن لەورا داخواز دکەم چدی ئەڤ غەدرە ل مە نەھێتە کرن.
سەبارەت ڤێ ئاریشێ رۆژناما ئەڤرۆ پەیوەندی ب بەیار مووسا عەلی، سەرۆکێ باژێرڤانیا بەردەرس کر، بەلێ یێ ئامادە نەبوو چو داخۆیانیان بدەت.