كێمترين و پترترين مووچێ خانه‌شينكريان دێ ب ڤى ره‌نگى بيت
ئه‌ڤرۆ نيوز:
پشتی ئەنجامدانا کۆمبوونا لیژنا دارایی و ئابووریا پەرلەمانێ کوردستانێ ھویردەکاریێن چاکسازیێ لدۆر مووچێ فەرمانبەر و خانەنشین و پلەیێن تایبەت ھاتنە ئاشکراکرن و ئەندامەکا لژنا دارایی و ئابووری تەکەزکر، ئەو کەسێن بێ خزمەت ھاتینە خانەنشینکرن دێ ھێنە ھەلوەشاندن و کێمترین مووچە دێ بیتە چوارسەد ھزار دینار.
دکتۆر شیرین حوسنی، ئەنداما لژنا دارایی و ئابووریا پەرلەمانێ کوردستانێ بۆ رۆژناما ئەڤرۆ گۆت” رۆژا دوشەمبی لیژنا دارایی و ئابووریا پەرلەمانێ کوردستانێ لدۆر دەستپێکرنا چاکسازیێ د مووچێ فەرمانبەر و پلەیێن تایبەتدا کۆمبوو، بەری نوکە پێنج پڕۆژە قانوون یێن ھاتینە بەرھەڤکرن ژلایێ فڕاکسیۆنێن پەرلەمانی، سێ ژوان پڕۆە قانوونا بۆ رێکخستن و پێداچوونا مووچانە و پڕۆژەیەک بۆ راستڤەکرنا مووچێ خانەنشین و پڕۆژەیەک ژی بۆ کێمکرنا موچێ پلێن تایبەتە ل ھەرێما کوردستانێ، لژنا دارایی بڕیاردا راپۆرتەک لدۆر ھەرسێ پڕۆژە قانوونێن دەربارەی مووچەی بھێتە بەرھەڤکرن، خالەکادی یا کۆمبوون ئەو بوو کو نڤیسارەک بھێتە ھنارتن بۆ نێچیرڤان بارزانی سەرۆک وەزیرێن ھەرێما کوردستانێ، ژبەرکو بەری نوکە سەرۆکێ حوکمەتێ ئیماژە بڤێ چەندێ کربوو مەلەفەکێ چاکسازیێ لبەردەستێ ویە و بھێتە ھنارتن بۆ لژنا دارایی ھەتا ئەڤا پەیوەندی ب مووچەیڤە ھەی بھێتە راستڤەکرن بۆ ناڤا پڕۆژە قانوونێ و ببیتە پشتەڤانەک بۆ پڕۆسا چاکسازیێ”.
ئەنداما لژنا دارایی دیارکر” ھندەک کەس ھەنە تنێ رۆژەکێ فەرمانبەرێن حوکمەتێ نەبووینە و ب پلا وەزیر یان رێڤەبەرێ گشتی ھاتینە خانەنشینکرن، خەلکەکێ دی ب پلێن سەربازی ھاتینە خانەنشینکرن و چو خزمەتا سەربازی و پێشمەرگایەتی نەبوویە وەکی ئەف لیستا ٤٠٤ ژنێن ئێکەتیێ ھاتینە خانەنشینکرن ب پلێن سەربازی ئەڤە ھەموو دکەڤیتە چوارچوڤێ ئەڤێ چاکسازیێ و نوکە کار یێ لسەر دھێتەکرن، ئەف کەسێن ب حەقێ خوە نەھاتینە خانەنشینکرن دێ ھێنە ھەلوەشاندن و جۆداھی دێ ھێتەکرن ناڤبەرا کەسێن بێ خزمەت خانەنشینبووی دگەل کەسێن خەبات ھەی، ھەر کەسەکێ بندیواربیت و دەوامێ نەکەت دگەل کەسێن دو مووچە ھەی ھەموو دێ ھێنە رەشکرن، ئەڤەژی ب پشتەڤانی و ھاریکاریا حوکمەتا ھەرێما کوردستانێ بتایبەت دڤێت سەرۆک وەزیران پشتەڤانبیت”.
دکتۆر شیرینێ گۆتژی” کار یێ لسەر قانوونا مووچێ ئێکگرتیێ عێراقێ دھێتەکرن و کێمترین مووچە دێ مووچێ خانەنشینیێ بیت کو دکەتە ٤٠٠ ھزار دینار، واتە پشتی چاکسازیێ نابیت چو مووچەیەک ل ٤٠٠ ھزار دیناران کێمتربیت، ددەمەکیدا نوکە فەرمانبەرێ خانەنشین ھەیە مووچێ وی بتنێ ٢٥٠ ھزار دینارن، مووچێن بلندژی دێ ھێنە کێمکرن بشێوەیەکی زۆربەیا بۆچوونان لسەرڤێ چەندێ یە بلندترین موچە ژ چوار ملیۆن دیناران دەرباز نەبیت، چونکە نوکە پەرلەمانتار و وەزیرێ خانەنشین ھەیە مووچێ وی شەش ملیۆن دینارن، پشتی پێداچوونێ بێگومان جوداھیەکا زۆر ناڤبەرا مووچەیدا نامینیت، ئەف مووچێن پلە بلند دەمێ دھێنە کێمکرن دێ زێدەبیتە سەر مووچێن کێم”.
