دهوك به‌رده‌وامى دا ژ ده‌ست دانا خالان
ئه‌ڤرۆ نیوز: بيستر
یاریێن گه‌را چارێ ژ خولا عیراقێ یا ته‌پا پێ بو یانێن پلا نایاب ئه‌ڤرۆ د چارچوڤێ كوما ئێكێ دا ده‌ستپێكرن و ل یاریگه‌ها خوه تیما ته‌پا پێ یا یانا دهوك به‌رده‌وامى دا ئه‌نجامێن خوه یێن لاواز و ژ ده‌ست دانا خالان ده‌مێ وه‌كهه‌ڤبووى ل گه‌ل مێڤانا خوه یانا ته‌له‌به ب گوله‌كێ.
د یاریكرنا دهوك و ته‌له‌بادا ل ده‌ستپێكێ ب هشیارى هه‌ردو یانه هاتنه د ناڤا یاریگه‌هێ دا و لێك گوهارتنا هێرشان هاته كرن بێ كو مه‌ترسین به‌رچاڤ ل سه‌ر گولێن ئێك دورست بكه‌ن هه‌ر چه‌نده ئاستێ یانا دهوك باشتر بوو لێ ل ده‌قیقا 36 به‌روڤاژى روودانا یانا مێڤان ب رێكا یاریكه‌رێ خوه عه‌بدولله‌تیف محه‌مه‌د گولا پێشكه‌فتنێ توماركر و ئه‌ف گوله بو ئه‌گه‌ر زێده‌تر رێكخستن ب كه‌ڤیته ناڤا رێزێن یانا دهوك ژبو گوهارتنا ئه‌نجامێ یاریێ لێ هه‌مى بزاڤ دبێ ئه‌نجام بوون هه‌تا نێڤا ئێكێ ب دووماهى هاتى.
د نیڤا دویێ دا و پێخه‌مه‌ت گوهارتنا ئه‌نجامێ یاریێ راهێنه‌رێ یانا دهوك گوهورینه‌ك ل ناڤا پێكهاتیێ تیمێ داكر ب تایبه‌ت ل هێلا هێرشبه‌ریێ و ل ده‌قیقا 56 ئه‌ف ئارمانجه ب جه هات ده‌مێ حاتم عه‌لى گولا وه‌كهه‌ڤیێ توماركرى و دووڤدا یاریكه‌رێن یانا دهوك به‌رده‌وامى دا دورستكرنا گڤاشتنا ل سه‌ر گولا یانا مێڤان لێ ئه‌ف چه‌نده بێ به‌رهه‌م بوو و چو ژ وان هێرشان نه ڤه‌گوهاستنه توماركرنا گولان و یارى ب وه‌كهه‌ڤى ب دووماهى هات.
