جه‌ماوه‌رى، زاخۆ ژ وه‌كهه‌ڤیێ قورتالكر
زاخۆ، هشیار دوبانكى:
د چارچوڤێ یاریێن گه‌را چارێ دا ژ خۆلا عیراقێ یا ته‌پا پێ بۆ یانێن پلا نایاب ئه‌ڤرۆ ل یاریگه‌ها ده‌لال یانا زاخۆ شیا سه‌ركه‌فتنا خوه یا ئیكا نه ل ڤى وه‌رزى تومار بكه‌ت ئه‌وژى ل سه‌ر یانا شورته ب دوو گولان به‌رامبه‌ر گوله‌كێ.
دنێڤا ئێكى دا ئاستێ هه‌ردوو تیمان یێ ناڤنجێ بۆ و یارى ل نێڤا یاریگه‌هێ دهاته كرن هه‌تا ده‌قیقا 15 یاریكه‌رێ یانا زاخۆ عه‌باس حسێنى بشیوه‌كێ جوان گولا ئێكى بۆ زاخۆ تومار كر و پشتى بورینا دو ده‌قیقا ستار یاسینى ده‌لیڤه‌كا مسوگه‌ر ژده‌ست دا و دووڤدا بزاڤین شورته نه راوه‌ستیان بو توماركرنا گولا وه‌كهه‌ڤیێ و ئه‌ف چه‌نده ل ده‌قیقا 41 هاته پێش و یاریكه‌رێ وێ ئه‌حمه‌د فازل شیا بره‌نگه‌كێ جوان گولا وه‌كهه‌ڤیێ تومار بكه‌ت و نێڤا ئێكى ب ڤێ ئه‌نجامێ ب دووماهى هات.
دنێڤا دویێ دا ئاستێ تیما مێڤان باشتر لێهات و شیا دچه‌ند هه‌لكه‌فتان دا خوه بگه‌هینت گولا زاخۆ، به‌روڤاژى یانا زاخۆ بتنێ شیا دوو چاران مه‌ترسیا ل سه‌ر گولا یانا شورته دورست بكه‌ت و پشتى راهینه‌رێ رومانى یاریكه‌ره‌كێ پێشه‌كار یێ ژ هنگافتنێ زڤرى پشكدار كرى ب تنێ چار ده‌قیقا یارى كر و جاره‌كادى هاته هنگافتن و یارى بجه هێلا و د ماوێ 13 ده‌قیان دا زاخو ب 10 یاریكه‌را یاریێ دكر و ب تنێ ئه‌ركێ خوه كره به‌ره‌ڤانى داكو شورته هێرشان دورست نه‌كه‌ت و د ده‌مێ زێده‌كرى دا و ژ هێرشه‌كا هه‌ڤدژ یاریكه‌ر فه‌رحان شه‌كور شیا باسه‌كا جوان بده‌ت ئه‌میرى سه‌باح و گولا سه‌ركه‌فتنێ هاته توماركر و هه‌مى هیڤێن شورته مراندن.
ل دور ڤێ یاریێ جاسم حاجى كاپتنێ تیما زاخۆ دبیژیت: جه‌ماوه‌ر ئه‌گه‌رێ سه‌ركه‌فتنا مه بۆ به‌رامبه‌ر یانا شورته چونكو تیما مه دكاودانه‌كێ بزحمه‌ت دا ده‌رباز دبۆ و گڤاشتن ل سه‌ر مه هه‌بوون و ئه‌ڤرۆ مه یارى گه‌له‌ك باشتر كر و ل نیڤا ئێكێ یارى ژلایێ مه‌ڤه یا كونترول كرى بوو.
