داعش دێ منارا حه‌دبا په‌قینیت
ئه‌ڤرۆنیۆز، ئه‌یاد به‌رواری
ژێده‌ره‌كی ژ پارێزگه‌ها نه‌ینه‌وا ئه‌ڤرۆ سێ شه‌مبی راگه‌هاند، داعشێ خه‌لكێ باژێرێ مووسلێ ل دۆر بریارا خوه یا په‌قاندنا منارا حه‌دبا یا دیرۆكی یێن ئاگه‌هداركرین و چه‌كدارێن داعشێ داخوازا ژ مالێن ئاكنجی ل نێزیك منارا ناڤبری كری كو ژێ دووربكه‌ڤن.
وی ژێده‌ری بۆ سومه‌ریه نیۆز دیاكر كو رێكخستیا داعشێ خه‌لكێ مووسلێ ب بریارا په‌قاندنا مهنارێ یێن ئاگه‌هداركرین و داعشێ ئه‌گه‌رێ ڤێ بریارێ بۆ هه‌بوونا كاره‌كێ هه‌ڤدژی ئاڤاكرنا مزگه‌فتان دڤێ منارێ دا و پێدڤیه بهێته په‌قاندن.
منارا حه‌دبا دكه‌ڤیته مزگه‌فتا (ئه‌لنوری یا مه‌زن) كو مزگه‌فته‌كا دیرۆكی یه و جهێ وێ ل لایێ راستێ یێ مووسلێ یه، مزگه‌فتا ناڤبری ژلایێ (نوره‌لدین زه‌نكی) ل چه‌رخێ شه‌شێ یێ كۆچی هاتیه ئاڤاكرن، ئانكو به‌ری 9 چه‌رخان و چه‌ندین جاران هاتیه نووژه‌نكرن و ئاڤاكرن ڤه كو دووماهی جار ل سالا 1944 ێ بوو، مزگه‌فتا ناڤبری ب منارا وێ یا خوار به‌ر ب رۆژهه‌لاتی ڤه دهێته نیاسین كو ئه‌و منارا به‌رنیاسترین شوونوارێن باژێرێ مووسلێ یه.
پشتی رێكخستیا داعش یا تیرۆرستی باژێرێ مووسل ل 10 خزیرانا 2014ێ كونترۆلكری، چه‌ندین مزگه‌فتێن دیرۆكی ل وی باژێرێ په‌قاندن كو به‌رنیاسترین وان مزگه‌فتان (مزگه‌فتا نه‌بی یونس) بوو، دیسا ب ده‌هان شوونوارێن دیرۆكی یێن وی باژێری ژناڤبرینه.
