هێرشێن روسی ل سووریێ ده‌ستپێكا شه‌ڕێ جیهانیێ په‌ترۆلێ یه
ئه‌ڤرۆنیۆز، ئه‌یاد به‌روارى
رۆژنامه‌كا بریتانی دیاركر كو هێرشێن ئه‌سمانی یێن روسی ل سووریێ شه‌ڕێ بهایێ په‌ترۆلێ د ناڤبه‌را روسیا و سعودیێ دا هه‌لكر و خویاكر ژی كو ئه‌ڤ شه‌ڕه دێ بهایێ په‌ترۆلێ گران كه‌ت.
رۆژناما ( تیلگراف) یا بریتانی د راپۆرته‌كا خوه‌دا دبێژیت” پرسا په‌ترۆلێ رۆله‌كێ مه‌زن یێ د بریارا سه‌رۆكێ روسی دا هه‌ی ب ده‌ستپێكرنا هێرشێن ئه‌سمانی ل سووریێ و بابه‌ت نه ب تنێ پشته‌ڤانیا هه‌ڤپه‌یمانێ وی به‌شار ئه‌سه‌دی یه”.
زێده‌تر دبێژیت” نزمبوونا بهایێ په‌ترۆلێ ل جیهانێ كو ئه‌مریكا و هه‌ڤپه‌یمانێن وێ ئه‌گه‌رێن وێ چه‌ندێ بوون كارتێكرنه‌كا مه‌زن ل ئابوورێ روسیا كریه و به‌ر ب ئیفلجبوونێ بریه”.
رۆژناما بریتانی ئاشكرا دكه‌ت” مایتێكرنا روسیا یا ئێكسه‌ر د سووریێ دا دێ هه‌موو وه‌لاتان به‌ر ب شه‌ڕێ بهایێن په‌ترۆلێ یێ جیهانی به‌ت”.
