قایمقامێ شنگال ئەگەرێن گیرۆبوونا شەرێ ئازادکرنا شنگال ئاشکەرا دکەت
ئەڤرۆ نیوز:
قایمقامێ شنگالێ بۆ رۆژناما ئەڤرۆ راگەھاند، چەکدارێن پەکەکێ و یێن یەپەکێ ئەگەرین گیرۆوونا شنگالێ نە، ھەر لایەنەکێ ھاریکاریا خەلکێ شنگالێ کری، پرسا مە ب دەلیڤە ببینیت و بھێت تێکدانێ و فتنێ بکەت.
مەحما خەلیل قایمقامێ شنگالێ بۆ ئەڤرۆ گوت” ھێزێن پێشمەرگێ کوردستانێ دشێن شنگالێ ئازاد بکەن، خەلکێ شنگالێ ژی ھاریکارن ل گەل پێشمەگەی و ھێزەکا خەلکێ شنگالێ ژی یا دناڤ پێشمەرگەی دا ھەی”.
مەحمای گوت ژی” ھێزێن یەپەکێ دو روویاتیێ دکەن، باشە بۆچی ئاستەنگ نەدانانە بەر ھێزێن پێشمەرگەی دەمێ چووینە کۆبانێ و پێشمەرگەی بۆ وان کۆبانێ ئازادکر کو خەلکێ وێرێ ب رێزگرتن ڤە ئیدارا خوە بکەت؟، ل ڤێرێ ژی ھەر کەسەکێ ھاریکاریا مە کری، ئەم سوپاسیا وان دکەین، بەلێ ئەڤرۆ پێشمەرگە دشێت شنگالێ ئازاد بکەت و خەلکێ شنگالێ باوەری یا ب پێشمەرگەی ھەی و ئەم ناخوازین چو لایەنەکێ دی سەرپێچیێ ل سەر مافێن مە بکەت”.
قایمقامێ شنگالێ ئاماژە دا وێ چەندێ ژی کو ئەو ئاستەنگ و پێنگاڤێن پەکەکە و یەپەکە ل ڤێ دەڤەرێ دھاڤێژیت، دوژمن مفای ژێ وەردگریت و ژ بەر ڤێ چەندێ ژی پرۆسا ئازادکرنا شنگالێ گیرۆدبیت و خەلکێ شنگالێ ژی یێ دلتەنگە ب ئاستنەگێن پەکەکە و یەپەکە پەیدا دکەن کو دبنە ئەگەرێ گیرۆبوونا دەڤەرا وان.
مەحما خەلیل دیارکر کو داعش دناڤ شنگالێ دا گەلەک یا لاواز بووی و رۆژانە ژی چەکدارێن وان درەڤن، بۆ دەمێ چەندین رۆژانە ژی ژبەر ترسا وان ژ پێشمەرگەی، خوارن نەگەھشتیە چەکدارێن داعشێ ئەوێن دناڤ شنگالێ دا ماین و بەردەوام ھاوارا وانایە، دیسا چو چەکدارێن داعشێ یێن بیانی ل وێ دەڤەرێ نەماینە و ئەوێن ماین ژی خەلکێ تلەعفەر و شنگالێ نە، ھێزێن پێشمەرگەی و فرۆکێن ھەڤپەیمانان ژی بەردەوام چەکدارێن داعشێ ل شنگالێ توپباران دکەن و زیانێن گیانی و مادی دگەھیننە تیرۆرستان.
دیسا گوت” ورەیێن خەلکێ دەڤەرێ گەلەک د بلندن ب تایبەتی پشتی ھاتنا ھێزەکا مەزن یا پێشمەرگەی بۆ دەڤەرێ و پلانەکا گەلەک ب رێکوپێک یا ھاتیە دانان و ل دەمەکێ نێزیکدا شنگال و ھەموو دەڤەرێن دی، دێ ھێنە ئازادکرن و خەلکێ وان دێ ڤەگەرنە جھێن خوە”.
