پرۆژێ شیعه‌یان خاپاندنه‌ك دى؟!
وه‌ك دیار هه‌ڤالبه‌ندا شیعه‌یان پرۆژه‌ك نشتیمانى بۆ ئاشتبوونا گشتى د ناڤبه‌را هه‌مى ئالێن عێراقێ دا هه‌یه. سه‌ر و بنێن ڤى پرۆژه‌ى كۆمه‌كا گۆتن و ئاخفتن و (دارشتنه ـ انشا‌و) ن و چو ئالیه‌ته‌ك زه‌لال و چو زه‌مانه‌ته‌كا به‌رجه‌سته‌كرى تێدا نینه, بۆ كوردستانێ چو تایبه‌تمه‌ندیه دیار نه‌كریه و ئاسانترین پرس پرسا هنارتنا بودجێ یه كو ب بریاره‌كێ كوردستان سزا دایه و ئێخستیه بن ئابلۆقا ئابوورى چو چاره‌سه‌ریه‌ك بۆ دیارنه‌كریه. پرۆژێ ئاشتبوونا نشتمانى و پێكڤه‌ژیانێ د ڤى وه‌لاتێ ناڤى و عێرا قد ا چو سه‌ركه‌فتنه‌كێ نائینیت, هه‌ڤشریكێن مه دڤیا بگه‌هنه وێ باوه‌ریێ كوردستان پێدڤى ب هندێ یه ئالیه‌ته‌كا دى ل گه‌ل عێراقا عه‌ره‌بى رێكبێخیت, هه‌مى بنه‌مایه‌كێ فیدارالى و حكم زاتى و هه‌ر كه‌لیشه‌كێ ژ ڤى ره‌نگى هاتیه تاقیكرن و سه‌رنه‌گرتیه, باوه‌ر ناكه‌م كه‌سێ ل كوردستانێ ئه‌و شیان و وێره‌كیه هه‌بیت جاره‌كا دى كوردستانێ بۆ (بیت التاعه) بۆ به‌دا بزڤرینیت, گه‌لێ كوردستانێ ل بن چو هه‌لومه‌رجه‌كێ, ده‌ست به‌ردارى ده‌ستكه‌فتێن خوه نابیت, چو هێزه‌ك ل عیراقێ نینه بشێت باوه‌ریێ بۆ گه‌لێ كورد په‌یدا كه‌ت، پشتى سه‌ربۆرا ده‌سته‌لاتا شیعه‌یان و سنه‌یان ب هه‌مان لۆژیكى سه‌ره‌ده‌رى ل گه‌ل كوردستانێ كرى, كه‌سێ ل كوردستانێ ژى شیانا هندێ نینه گه‌لێ كوردستانێ رازى بكه‌ت جاره‌كا دى بن ده‌ست بژین؟! سه‌ره‌راى هه‌مى له‌نگى و گه‌نده‌لیى و بێ عه‌داله‌تیا ده‌سته‌لاتا كوردى لێ گه‌لێ كوردستانێ پێ باشتره ژ زڤرین بۆ حكمێ بنده‌ستیا راسته‌وخوه‌یا به‌غدا, هه‌ر چو نه‌بیت ل ڤى وه‌لاتى ئه‌م ئازاد ره‌خنێ دكه‌ین و ئازاد د ئازرین و ئازاد دره‌فترین و ئازاد كاردكه‌ین و ب كوردى ره‌خنێ دكه‌ین, تازه شیعه ب هندێ حه‌سیانه كو كورد شه‌ریكێن وانن؟! به‌رسڤا برینا نان و قوت و چه‌كى ل كوردستانێ جى رامانه‌كێ ده‌تن؟! كوردستانێ چه‌ند ساله‌كێن پرى دژوارى ژ ئه‌نجامێ سیاسیه‌تا شیعه‌یان بۆراندن, هه‌ڤالبه‌ندیا كوردى شیعى ژ ئالیێ شیعه‌یان ڤه ب (زواج متعه) هاته پێناسه‌كرن. براێن مه یێن شیعه بوون هه‌مى دژایه‌تیه‌كا وه‌رارا كوردستانێ كرین و ئاڤ ژ ئاشێ پێشكه‌فتنا كوردستانێ برین. پرۆژێ شیعه‌یان تشته‌ك نینه ب تنێ خاپاندنه‌كا دى یا كوردان و سنه‌یانه و پیلانه‌كا دى یه بۆ ژناڤبرنا هه‌ر پرۆژه‌كێ ئه‌لترناتیفێ كوردى بو پاشه‌رۆژا كوردستانێ؟ یێ ب هوورى پرۆژێ شیعه‌یان بخوینیت دێ قه‌نج زانیت مه‌ره‌م ژێ سنۆرداركرنا هه‌رێما كوردستانێ یه و دوباره چه‌وساندنا سنه‌یانه, كوردستان پێدڤى ب راپرسیه‌كێ یه هه‌تا ڤى پرۆژه‌ى قه‌بوول كه‌ت یان نه..!!
