گازنده‌یێن ته‌ڕابه‌ڕا و به‌رسڤێن خرش
ئه‌ڤه پتر ژ 25 سالانه، هه‌ر وه‌لاتیه‌كێ هه‌رێما كوردستانێ ل دووڤ دیتن و وێره‌كیا خوه گازنده‌یان ژ ده‌ستهه‌لاتێ دكه‌ت، هه‌تا گه‌له‌ك جاران ب دزى و گه‌نده‌لیێ و نه‌دادپه‌روه‌ریێ و حزبیاتى و مرۆڤمرۆڤكانێ ل قه‌له‌م دده‌ن؛ لێ پرانیا ڤان گازنده‌یان د كیستێ وى خه‌لكى دمینن و ده‌ستهه‌لات هزره‌ك وه‌ها بۆ ده‌نگێن نه‌رازیبوویان ناكه‌ت كو خوه بگوهۆرت و چاكسازیێن گه‌وهه‌رى بكه‌ت؛ ژ به‌ر كو ئه‌و گازنده‌یێن دهێته كرن، گازنده‌یێن وه‌ها وێره‌ك و شارستانى و كاریگه‌ر نینن كو وه‌لاتیێ هه‌رێمێ بكارت هه‌مبه‌ر به‌رپه‌رسان ب وێره‌كى ئاره‌سته بكه‌ت. دبت گه‌له‌ك جاران خه‌لكه‌ك هه‌یه ل جهێن گشتى گۆتنه‌كێ دبێژن و همبه‌ر جهێن په‌رپسیار تشته‌كێ دى دبێژن كو ب دروستى به‌ره‌ڤاژى ره‌خنه و گازنده‌یێن به‌رى هینگێ ئاره‌سته كرینه.
راسته پرانیا ڤان گازنده‌یێن ته‌ڕابه‌ڕا نیشانا نه‌رازیبوونێنه؛ لێ هێشتا وه‌سا نه‌گه‌هشتینه كو بگه‌هنه وى ئاستى خودان په‌یامه‌ك هه‌ڤگرتى و ده‌ستهه‌لات هزره‌كێ بۆ بكه‌ت؛ چونكى هه‌تا نها ئه‌ڤ گازنده‌یه نه‌كارینه كورسیكا ده‌ستهه‌لاتێ بهه‌ژینن. ئه‌ز باوه‌ر دكم، هه‌كه په‌یاما خه‌لكێ هه‌رێمێ گه‌هشته وى ئاستى و زه‌نگا ترسێ لێدا، هنگێ به‌رپرسین هه‌رێمێ نه‌چارن، هه‌تا ئه‌و سامان و پاره‌یێ ب دزیێ و ب گه‌نده‌لیێ ب ده‌ستڤه هیناى، هه‌میێ بزڤڕینه جهێ شه‌رعى و ل سه‌ر وه‌لاتیان پارڤه‌بكه‌ن.
راسته هنده‌ك جاران ل ڤێرێ وێره‌هه‌نێ، خوه‌نیشاندان و گراڤگرتن ب ناڤێ وان گازنده‌یێن ته‌ڕابه‌ڕا دهێنه كرن، لێ د گه‌وهه‌رێ خوه‌دا ئه‌و جۆره لڤین ژ جه‌رگێ جڤاكه‌ك هه‌ڤگرتى و خودان ئیراده و ناڤه‌ندا بڕیارێ ده‌رناكه‌ڤن، دبت هه‌ر ل ده‌ستپێكێ هنده‌ك ئالیێن سیاسى، ئه‌ڤ جۆره گازنده‌یه بۆ خوه ب ده‌لیڤه دیتیه و (تسیسكرى) نه و بووینه سیبه‌را پارته‌كێ یان پتر دا كو ئه‌و حزب ب ناڤێ وان خوه‌نیشانده‌ران ئه‌جندایا حزبا خوه بده‌ستڤه بینت.
ژ ئالیه‌كێ دى، پرانیا تاكه كه‌سێ جڤاكێ هه‌رێمێ هند یێ ده‌ڤ گازنده و نه‌رازییه ژ ده‌ستهه‌لاتێ، هندى ئارمانجێن وى یێن كه‌سۆكى ب ده‌ستڤه نه‌هاتین، هه‌رده‌مێ حزبه‌ك شیا خوه بگه‌هینته ڤان جۆره وه‌لاتیان و شیا ب هنده‌ك ده‌ستكه‌ڤتى و پارییان رازى بكه‌ت، هینگێ ئه‌و جۆره كه‌سه ده‌ڤێن خوه دگرن و هه‌ر وه‌كى نه ئه‌وه پربێژێن به‌رى هینگێ ده‌ڤ گازنده.
د دیرۆكێ دا ڤان جۆره جڤاكان گه‌له‌ك ب زه‌حمه‌ت گوهۆرین كرینه یان دبنى دا نه‌كرینه و هه‌ر ده‌م ماینه ب هیڤیا خه‌لكه‌ك بیانیڤه كو بهێن وان رزگار بكه‌ن و ئه‌و ژى ب خێرا وان بژین. وه‌سا دیاره ئه‌ڤ جۆره جڤاكێن ب هیڤیا خه‌لكیڤه رزگاردبن، هه‌رده‌م ژیوارێ وان ئارام و ئاسایى نابت، ژ به‌ر كو ئه‌و جڤاك ژ ئالیێ هزریڤه هێشتا ب دورستى هشیار نه‌بووینه و نه‌گه‌هشتینه و ده‌ستهه‌لاتێن وان ب ئیراده‌یا وان رانه‌بووینه، دبت ب خێرا به‌رژه‌وه‌ندیێن خه‌لكه‌كێ بیانى یان كۆده‌تایه‌ك خرابتر رابووینه. نموونه وه‌لاتێن ئه‌ره‌بى مینا ئیراقێ، سووریێ، لیبیایێ و یه‌مه‌نێ، دیاره گوهۆڕینا وان ب هیڤیا خه‌لكه‌كیڤه بوویه، ژ به‌ر هندێ رۆژ بۆ رۆژێ ره‌وشا وان وه‌لاتان كامباختره و نیشانێن ئارامبوونا ره‌وشێ دیار نینن، به‌رامبه‌ر وه‌لاتێن وه‌ك ئۆرۆپا رۆژهه‌لات و ته‌یمۆرا رۆژ هه‌لات… هتد ب ئیراده و هشیاریا خوه ئازاد بووینه و نها ئه‌م ره‌وشا وان دبینن.
