ئاشتی سالح
جهێن گشتی، ئەو جهێن كو بۆ هەموو خەلكی نە، رۆلەكێ مەزن د ژیانا مە دا دگێڕن، ئەڤ جهێن گشتی، وەك باخچە، پارك، قوتابخانە، نەخۆشخانە، هەموو جهێن مە نە و مە هەموو كەسان دڤێت پاراستنا وان بكەین دەمێ ئەم د جهێن گشتی دا دژین، دڤێت ئەم هزر بكەین كو ئەڤ جهە نە ب تنێ یێ مەیە بەلكو یێ هەموو كەسی یە كو پێدڤی پێ هەی، ئەڤە ب وێ واتایێ دهێت كو ئەم دڤێت رێزێ ل ڤان جها بگرین، وان پاقژ بهێلین و ب شێوەیەكێ وەسا بكاربینین كو هەردەم دپاقژبن.
باخچەیێن گشتی ئێك ژ گرنگترین جهێن گشتی نە، ل ڤێرێ، زارۆك دگێڕن خەلك وەرزشێ دكەن، یان بەس بۆ بێهنڤەدانێ دچن، دڤێت ئەم ڤان باخچەیان پاقژ بهێلین، گیا و داران نەشكێنین و پاشماییێن خوە نە هاڤێژینە سەر ئەردی، هەروەسا دڤێت ئەم رێزێ ل هەڤدوو بگرین د دەمێ بكارئینانا ڤان جها دا، نەخۆشخانە ژی جهێن گشتی نە كو خزمەتا هەموو كەسا دكەن، دڤێت ئەم هاریكاریا كارمەندێن نەخۆشخانێ بكەین و پێگیریا رێنمایێن وان بكەین، ئەم دشێین ڤێ چەندێ بكەین ب رێكا پاراستنا نەخۆشخانێ پاقژ، دەنگێ خوە نزم بكەین ل دەمێ سەرەدانان و رێزێ ل نەخۆشێن دی و كارمەندا بگرین.
قوتابخانە جهەكێ گرنگە بۆ پەروەردەكرنا زارۆكێن مە، دەمێ كو دایك و باب زارۆكێن خوە دهنێرنە قوتابخانێ، دڤێت ئەو هاریكاریا مامۆستایان بكەن و پێگیربن ب رێنمایێن قوتابخانێ، بازارَ جهێن گشتی نە كو خەلك تێدا كرین و فرۆتنێ دكەن، دڤێت ئەم پاقژیا ڤان جها بپارێزین، پاشماییێن خۆ نە هاڤێژینە سەر ئەردی و ب شێوەیەكێ بێدەنگ و رێك و پێك مامەلێ بكەین.
رێژی جهێن گشتی نە كو هەموو كەس تێدا دچن و دهێن، پێدڤی یە ئەم رێزێ ل یاسا و رێنمایێن هاتنوچوونێ بگرین و نەبینە ئەگەرێ سەر ئێشی بۆ كەسێن دی، هەر وەسا دڤێت ئەم پاقژیا رێكا بپارێزین و پاشماییێن خوە نە هاڤێژینە سەر ئەردی.
ب كورتی، جهێن گشتی مولكێ هەموویانە و ئەو چەندە بەرپرسیاریەكا مەزن دئێخیتە سەر ملێن مە بۆ پاراستن و بكارئینانا وان ب شێوەیەكێ دروست، دڤێت ئەم باوەر بكەین كو ئەڤ جهە یێ هەموو كەسا نە، و ئەم هەموو تێدا پشكداربین، هەكە ئەم ب شێوەیەكێ درست چاڤدانا ڤان جها بكەین، دێ ژیانا مە هەموو كەسان خۆشتر و باشتر بیت.
نيشاندان