راگرتنا بالانسا سیاسی و ئابوورى دناڤبه‌را دوو جه‌مسه‌رێن زلهێزێن جیهانێدا كاره‌كێ زۆر ب زه‌حمه‌ته‌و دشێم بێژم د كێم حاله‌تاندا دهێته ڕاگرتن، هه‌رێما كوردستانێ هه‌مى ده‌مان بزاڤ یا كرى كو د ناڤبه‌را هه‌مى هێزێن سیاسی دا بالانسا خوه یا سیاسى و ئابوورى ڕابگریت، هه‌مى ده‌مه‌كێ ژى ب ئاشكه‌را سه‌رۆكایه‌تیا هه‌رێمى و سه‌رۆكایه‌تیا حوكمه‌تا هه‌رێمێ ته‌كه‌ز ل سه‌ر وێ چه‌ندێ دكه‌ن كو هه‌رێما كوردستانێ كار ژ بۆ به‌رژه‌وه‌ندیێن خه‌لكێ كوردستانێ دكه‌ت و ئه‌ڤ به‌رژه‌وه‌ندییه ژى نابیت ل سه‌ر حسابا ته وه‌لاته‌كى بن، ئه‌ڤه ئه‌وه یا كو بۆ جاده‌یا كوردى یا دیار و ئاشكه‌رایه.
ب گشتى سیاسه‌تا راسته‌قینه ئه‌وه كو ب پراكتیك دهێته ئه‌نجامدان، گه‌له‌ك جاران به‌یاننامه و هه‌لویست و سه‌ردانكرنا سه‌ركرده‌یان..هتد، بتنێ سیناریۆنه ژ بۆ هنده‌ك مه‌به‌ستان، بۆ نموونه دچیته دچارچێوه‌یێ پرۆپاگنده‌یان دا، یا خۆیایه هه‌رێما كوردستانێ سه‌ره‌ڕاى وێ چه‌ندێ كو هه‌مى ده‌مان سه‌ربخوه‌ییا خوه یا سیاسى و ئابوورى دئیننه زمان، لێ د ڕاستیدا هه‌رێما كوردستانێ دژینگه‌هه‌كا ب ڤى ئاوایی یا ئالۆز و خوه‌دى دوژمنێن مه‌زندا نكاریت ب ساناهى مینا زلهێزه‌كێ سه‌ره‌ده‌ریێ بكه‌ت و پشت ل هنده‌ك وه‌ڵاتێن جیهانێ بكه‌ت.
ئه‌مریكا پرۆژه‌یه‌ك بۆ رۆژهه‌لاتا ناڤین یا دارشتى و ئێخستیه د وارێ پراكتیزه كرنێ دا، ئه‌ز باوه‌رم ده‌هان ساڵانه پلان بۆ داناى و ل سه‌ر كار دكه‌ت، واته هه‌ر ڕوودانه‌كا مه‌زن كو ل رۆژهه‌لاتاناڤین چێ دبیت ئه‌سته‌مه ده‌ستێ مخابرات و جیهازێن ئه‌منى و سیاسى یێن وه‌لاتێن زلهێز ل پشت نه‌بن، هه‌رێما كوردستانێ بنیاتێ وێ گورانكاریێ یه یا كو ئه‌مریكا و ئیسرائیل و ئه‌ورۆپا داناى، هه‌ر وه‌كى د بابه‌تێن ده‌ربازبوویی دا من ئاماژه پێداى هه‌رێما كوردستانێ باشترین میكانزمه بۆ دابه‌شكرن و لاوازكرنا وه‌ڵاتێن سه‌ربازى و مه‌ترسیدار لسه‌ر ئه‌وله‌هیا وان وه‌لاتان و هه‌ڤپه‌یمانێن وان یێن ستراتیژى و هه‌روه‌سا سه‌رچاوه‌یه‌كێ گرنگێ ئابوورییه بۆ ئه‌ورۆپا و ئه‌مریكا، كورد ژبه‌ركو نه‌ته‌وه‌یه‌كا جودانه ژ عه‌ره‌بان و ب مه‌رجه‌عێن تائیفیڤه گرێدایی نینن دشێن ببنه هه‌ڤپه‌یمانه‌كێ ستراتیژى و گرنگێ ئه‌مریكا و هه‌ڤپه‌یمانێن وێ، هه‌ر ژ به‌ر ڤێ چه‌ندێ ئه‌مریكا هه‌ر كاره‌كێ دكه‌ت كو بشێت هێزێ بده‌ته هه‌رێما كوردستانێ و ده‌وڵه‌ته‌كا سه‌ركه‌فتى و دیمۆكراسى ل سه‌ر ڕێڕه‌وه‌كا ساخله‌م دابمه‌زرینیت، واته ئه‌و ئارمانجێن كوردان سه‌دان ساڵن خه‌ون پێڤه ددیتن ئه‌ڤرۆ یێ دكه‌فتیه د به‌رنامه و ستراتیژیی و به‌رژه‌وه‌ندیێن زلهێزێن جیهانێدا، وه‌كى ماله‌كێ كو ده‌هان سالان دهه‌ژاریێ دا بناڵن و ل داویێ گه‌نجینه ل ژێر خانیێ وان ده‌ركه‌ڤیت، كوردان ژى ب سه‌ركرایه‌تیا سه‌رۆك بارزانى خوه ب باشى ل گه‌ل ڤان پێنگاڤێن نیڤده‌وڵه‌تى گونجاندییه و سه‌ره‌ڕاى كاركرنا لۆبیێن ئیرانى و دوژمنێن ئه‌مریكا ل كوردستانێ، بارزانى شیا هه‌مى پلانه‌كێ ب سه‌ركه‌فتیانه ژناڤ ببه‌ت.
پرسیارا گرنگ ئه‌ڤه‌یه، دهێته زانین رۆسیا و ئه‌مریكا دو جه‌مسه‌رێن دژى هه‌ڤن، هه‌رێما كوردستانێ گرێبه‌ستێن نه‌فتێ ل گه‌ل مه‌زنترین كۆمپانیایێن جیهانێ یێن ئه‌مریكى مینا ئێكسۆن مۆبیل ئیمزا كرینه، ئه‌مریكا و ئێسكۆن موبیل ب ساناهى ناهێلن هه‌ڤپه‌یمانێن وان بچنه ژێر بارێن هه‌ڤرك و نه‌یارێن وان، ب تایبه‌ت كوردستان كو د هه‌ستیارترین ده‌مدا ده‌رباز دبیت و ئه‌مریكا دشێت ب ساناهى باردۆخێ كوردستانێ تێك بده‌ت و بارێ وێ یێ ئێكونۆمى سه‌راوژێر بكه‌ت، لێ بۆچى ئه‌مریكا ڤى كارى ناكه‌ت؟، ئانكو چاوا نێچیرڤان بارزانى دچیته رۆسیا و ل گه‌ل هه‌ڤركێن سه‌رسه‌ختێن ئیسكۆن مۆبیل و چیڤرۆن و تووتال گرێبه‌ستێن نه‌فتێ ئیمزا دكه‌ت؟، هه‌مى ده‌ما ئه‌و پرسیارا من ل خوه دكر، رۆسیا دزانیت ئه‌گه‌ر ده‌وڵه‌تا كوردستانێ بهێته دامه‌زراندن دێ كاریگه‌ریه‌كا مه‌زن ل سه‌ر ئابوورێ وێ كه‌ت ب تایبه‌ت ژ لایه‌نێ گاز و نه‌فتێ ڤه، پا بۆچى هه‌لویستێ رۆسیا ل گه‌ل دامه‌زراندنا ده‌وله‌ته‌كا كوردى (یا خودان سه‌رمایه‌كێ مه‌زنێ وزه) یێ نه‌رمه!، ئه‌ڤ به‌رسڤه ب سه‌ردانا نێچیرڤان بارزانى بۆ رۆسیا من وه‌رگرت، بێ گومان ئه‌مریكا وێ راستیێ دزانیت كو روسیا د ئاسته‌كێدایه دكاریت كێشه‌یان بۆ ستراتیژییه‌تا ئه‌مریكا چێ بكه‌ت، رۆسیا نه‌شێت بپه‌رژینیت ده‌وڵه‌ته‌ك ل هه‌مبه‌ر ئابووریا وێ دا دابمه‌زریت و مه‌ترسیان بۆ چێبكه‌ت، لێ ئه‌مریكا بۆ رازیكرنا رۆسیا ناچاره رۆسیا ژى ژ نه‌فت و گازا كوردستانێ به‌هردار بكه‌ت، هه‌ر وه‌كى توركیا ژى ژ به‌ر ڤان ده‌ستكه‌فتان ل گه‌ل دۆزا كوردى نه‌رم بوو و دێ دان ب ده‌وله‌تا كوردى ژى ئینیت، هه‌روه‌سا رۆسیا دزانیت دگه‌ل ئه‌مریكا به‌رژه‌وه‌ندییه‌كا هه‌ڤپشك یا هه‌ى، ئه‌و ژى مه‌ترسیا تیرورا ئیسلاما توندروویه، كو به‌رنامه‌یێن ئه‌مریكا و ده‌وله‌تا كوردى د به‌رژه‌وه‌ندیا وانژى دانه.
نووترين نووچه
- پەرلەمانتارەكێ رۆسی: سەرۆك بارزانی ئەشقا كوردستانێ د دلێ هەموویان دا چاند
- بەغدا ل گەل هندێ یە هەلبژارتن ب پشكداریا هەموو ئالی و پێكهاتێن كوردستانێ بهێنە كرن
- ئەو دەولەتا میلیشیا ل ئیراقێ دروستكرین دژ كوردستانێ بكار دئینیت
- بڕیارا هەلبژارتنێن كوردستانێ د دەستێن نێچیرڤان بارزانی دایە و ئامادەبوونا وی بۆ بەغدا گەلەك یا گرنگە
- هەردو بانكێن ئیراقێ رەشید و رافیدەین د لیستا رەش دانە و دۆلار بۆ ناهێتە هنارتن
- ب پشكداریا نێچیرڤان بارزانی كۆمبوونا هەڤپەیمانیا بڕێڤەبرنا دەولەتێ هاتە كرن
- سەرۆكێ هەرێما كوردستانێ ل گەل سەرۆككۆمارێ ئیراقێ كۆمبوو
- سەرۆكێ هەرێما كوردستانێ سوپاسیا فایق زێدانی ژ بەر رۆلێ وی یێ كاریگەر كر
- فەرەنسا هەڤسۆزی و پشتەڤانیا خوە بۆ هەرێما كوردستانێ دوپاتكر
- نەوال مووسەوی: مەرەم ژ ئارمانجگرتنا كۆرمۆر تێكدانا رێككەفتنا د ناڤبەرا حوكمەتا هەرێما كوردستانێ و حوکمەتا ئیراقێ دا یە
كامی كمال
په‌روه‌رده ده‌رمانێ هه‌مى ده‌ردان
ڤى بابه‌تى دێ ب سه‌رهاتیه‌كا كورت ده‌ست پێكه‌م كو هزر بۆ نڤیسینا وێ دایه من، جاره‌كێ كه‌سه‌كێ ب ته‌مه‌ن هاته ده‌ف من ل فه‌رمانگه‌هێ كو نزیكى دو سه‌د كیلۆمه‌ترێن رێك بڕى بوون، ده‌مێ من داخواز ژێ كرى پێدڤیێن خوه ڕاده‌ستى من بكه‌ت، ده‌ركه‌فت بۆ گرێدانا ده‌رماله‌یا خێزانى نفۆسا زارۆكێ خوه نه‌ئینابوو، ده‌مێ من گۆتیێ ئه‌و ژى گه‌ڕه‌كه، كابراى ده‌ستێن خوه ب كێله‌كێن خوه‌ڤه‌نان و ب تۆڕه‌یی ڤه گۆتى: (ئاخ پارتى ئاخ)، من ژى ب حه‌یبه‌تی ڤه به‌رێ خوه‌دایێ و من لێ پرسى (خال پارتى بۆچى؟)، گۆتى من هنده خزمه‌ت كر و وه‌ستیام، نوكه فه‌رمانبه‌رێ بانكه‌كێ ل دهۆكێ نابێژیته من، نفۆسێن زارۆیێن خوه ببه و ژخوه نه‌گرت ب دروستى به‌رسڤا من بده‌ت و زانیارییان بده‌ته من، من ژى به‌رێ خوه دا كابراى و من گۆتێ: خالێ هێژا پێدڤیه زارۆیێن خوه په‌روه‌رده بكه‌ین، كابرا ب ئاخفتنا من حه‌یبه‌ت گرتى بوو و گۆتى زارۆیێن مه چ په‌یوه‌ندى پێڤه هه‌یه؟، من گۆتێ ئه‌و كه‌سێ تو پشتگوه ئێخستى ئێكه‌م جار زارۆیێ كه‌سانه‌كێ یه كو ب دروستاهى نه‌هاتیه په‌روه‌رده‌كرن، پارتى حزبه‌كا سیاسیه و كاریگه‌ریا وێ ل سه‌ر په‌روه‌ردێ زور كێمتره ژ كاریگه‌ریا دایك و بابان. گه‌لۆ ئه‌ڤ كابرایه خوه‌دى زارۆیه و به‌رپرسه ب په‌روه‌ده‌كرنا چه‌ند كه‌سه‌كان د ڤى جڤاكی دا، هه‌كه تێگه‌هشتنا وى هنده یا لاواز بیت و پارتى تاوانبار بكه‌ت كو فه‌رمانبه‌ره‌كێ رێنمایی یێن دروست نه‌داینێ، ئه‌و چاوا دێ شێت زارۆیان د جه‌وهه‌رێ ڕاستى و شاشیان تێگه‌هینیت و ئه‌ركێ خوه یێ په‌روه‌ردێ ل سه‌ر خوه ڕاكه‌ت؟!.
پشتى ڤێ گه‌نگه‌شێ ده‌هان پرسیار د مه‌ژیێ مندا ئازرین، گه‌لۆ پێناسه‌یا حزبێ و حوكمه‌تێ و په‌روه‌دێ و شه‌ره‌فێ و زانستێ…هتد، د ناڤ جڤاكا مه‌دا چیه؟، بۆچى كه‌س خوه ل چ كێشه و خالێن لاواز ناكه‌ته به‌رپرس؟ بۆچى ل ڕاستیا دڕه‌ڤین و خوه دخاپینین و هه‌مى كێماسیان خوه دئێخنه ستویێ به‌رامبه‌ر؟!..
د وه‌لاتێن پێشكه‌فتى یێن جیهانێ دا، هه‌ر ل ده‌ستپێكا ژدایكبوونا زارۆكان دا هه‌تا داوى هه‌ناسه كو ل سه‌ر زه‌ڤیێ هه‌لدكێشن، سیسته‌مه‌ك بۆ هاتیه داڕێشتن كو د ناڤ فیلته‌ر و سه‌ر ڕێڕه‌وه‌كا ساخله‌م یا په‌روه‌رده‌یی ده‌رباز دبن، د وان وه‌لاتان دا ب گشتى دایك و باب ئێك ئان دو زارۆیان ب تنێ دئینن و ئه‌و ژى ل وى ده‌مى كو ئاستێ په‌روه‌ده‌یی یا وان گه‌هشتبیته خالا پێدڤى و شیانێن وان یێن ئابوورى ژى د گونجایی بن، ئه‌ڤجا سیسته‌مێن وه‌ڵاتێن وان هنده‌ك خالان ل سه‌ر دسه‌پینن كو نابیت سه‌رپێچیێ ل سه‌ر بكه‌ن، بۆ نموونه ئه‌گه‌ر دایك و بابه‌ك زارۆیێ خوه بقوتن، دێ ژ لایێ حوكمه‌تێ ڤه هێنه سزادان و دبیت زارۆ ژێ بهێته وه‌رگرتن و هه‌تا ڕاده‌یه‌كێ ئێدى ئه‌و زارۆیێ خوه نه‌بینیته‌ڤه، وان ده‌وڵه‌تان ژ به‌ر ئێش و گریانا زارۆیى نینه كو ب ڤى ئاوایی به‌رگیریێ ل زارۆیى دكه‌ن، به‌لكى ئه‌و دزانن ئه‌نجامێ قوتانا زارۆى چ ئێشه‌كا مه‌زنه بۆ پاشه‌رۆژا وه‌لاتى، ئه‌و دزانن كو ب گشتى ئه‌و زارۆیێ ل ژێر په‌روه‌رده‌یه‌كا توندوتیژ مه‌زن دبیت، د پاشه‌رۆژێ دا بێ توندوتیژى دێ یێ نه‌په‌روه‌ده كرى بیت و ژبۆ پاشه‌رۆژا وڵاتێ وان ب تنێ دێ مینا سه‌رئێش و پرسگرێكه‌ك مینیت، ئه‌ڤجا ل وه‌لاتێ مه جڤاك هه‌ر ناپه‌رژینیت كو توندوتیژیا خێزانى نه‌مینیت!، ژ به‌ر كو مه دیت به‌رى چه‌ند سالان ل سه‌ر ئاسته‌كێ بلند بزاڤ هه‌بوون كو توندوتیژیا خێزانى نه‌مینیت، لێ نه‌ڕازیبوونه‌كا جه‌ماوه‌رى چێبوو و دگۆت نه‌هێلانا توندوتژییا خێزانى ل دژى یاسایێن ئیسلامێنه و نابیت بهێته لادان!.
د وه‌لاتێ مه‌دا ب گشتى دایك و بابێن هه‌ین، نه ئاستێ وان یێ په‌روه‌ده‌یی مینا پێدڤیه، نه ئاستێ وان یێ ئابوورى، لێ خوه‌دى زێده‌تر ژ ده‌ه زارۆكانن!، ئه‌ڤجا ل دووڤ باوه‌را خوه دبێژن (خودێ زارۆى دده‌ت و رزقێ وان ژى دده‌ت)!، ئه‌ڤجا ئه‌ڤ زارۆیه ب گشتى د كولان و سه‌رجادان بێ هه‌بوونا كارگه‌ریا چو په‌روه‌ده‌یه‌كا پۆزه‌تیڤ مه‌زن دبن و ل داویێ دبنه نه‌خۆشى و ئێش بۆ جڤاكى، ئه‌ڤجا دبیت ئه‌ڤ زارۆیه بچنه قوتابخانێ و باوه‌رنامه‌یه‌كا زانستى ژى ب ده‌ستڤه بینن!، بۆ نموونه ئێك ببیته مامۆستایه‌كێ خوه‌دى زانست و نه‌په‌روه‌ده كرى و وانه‌یان بده‌ته زارۆیێن خه‌لكى!، ئه‌ڤجا هه‌مى دێ بێژن ئاخ فلان سه‌رۆك ئان به‌رپرس!، قوربان گه‌ره‌كه ئه‌م بزانین په‌روه‌ده‌یا مه بخوه یا ته‌مام نینه‌و ل سه‌ر په‌روه‌ردێ بخوینین و زارویێن خوه په‌روه‌ده بكه‌ین.
هێتیمبوونا گۆڕانا بێ بنیات
هێتیمبوونا گۆڕانا بێ بنیات
هنده‌ك جاران ده‌لڤیه ژبۆ هنده‌ك كه‌سان چێدبن كو د ناڤ جڤاكیدا پشكه‌كا خه‌لكى بێخنه ل ژێر باندۆرا خوه یا سیاسى و ئایدۆلوژیڤه و ل داویێ ڕێ ژ بۆ وان خوه‌ش دبیت كو ده‌ست ب دامه‌زراندنا حزبه‌كێ بكه‌ن ژبۆ په‌ره‌پێدانا ئایدۆلوژیایا خوه و گه‌هشتن ب ئارمانجێن خوه، گه‌له‌ك جاران ل ژێر گڤاشتنێن ئێش و ئازاران كه‌سانه‌ك هزر ل میكانزمه‌كێ دكه‌ن كو حزبه‌كێ دابمه‌زرینن و ل دژى فاكته‌رێن وان ئازاران ب سیاسى و سه‌ربازى بجه‌نگن، لێ مه‌رج نینه د هه‌رده‌مه‌كی دا ئه‌و ئێش و ئازارێن بۆیه فاكته‌رێ چێبوونا حزبه‌كێ د چارچووڤه‌كێ لۆژیكی دا بن، واته دبیت ئێش و ئازاران په‌یوه‌ندى ب پرسگرێكێن سایكولۆژیڤه هه‌بن، بۆ نموونه ژى چێبوونا ته‌ڤگه‌را گۆڕان.
پشتى نه‌مانا حزبا به‌عس یا دیكتاتۆر، پارتى و ئێكه‌تیێ ڕێككه‌فتنه‌كا ستراتیژى د ناڤبه‌را خوه دا ئیمزا كر، ئه‌گه‌ر چ تێبینى ل سه‌ر رێككه‌فتنێ هه‌بوون كو خالێن نێگه‌تیڤ تێدا دهێنه دیتن ژ بۆ به‌رژه‌وه‌ندیێن گشتى، لێ هه‌رچاوا بیت باشترین پێنگاڤ بوو ژبۆ نه‌هێلانا مه‌ترسیێن چێبوونا شه‌ڕه‌كێ ناڤخوه و ده‌سپێكه‌ك بوو ژبۆ كێمكرنا ته‌شه‌ننجێن سیاسى و جڤاكى د ناڤبه‌را خه‌لكێن كوردستانێ دا كو ژ ئه‌گه‌رێ شه‌ڕێن خوه‌كوژیێ چێببوون، ئیمزاكرنا ڤێ ڕێكه‌فتنێ فاكته‌ر بوو كو نه‌وشیروان مسته‌فا مینا ته‌كتیك ده‌ست ژ كارێ سیاسى به‌رده‌ت، ژ بۆ بێ ده‌نگكرن و تێر كرنا نه‌وشیروان داكو نه‌بیته كۆسپه‌ك ل سه‌ر رێكا ئێكه‌تیێ، جه‌لال تاله‌بانى كوژمێ ده‌ه ملیۆن دۆلاران ژبۆ نه‌وشیروان ته‌رخان كرن، نه‌وشیروان ل سالا 2006 ده‌ست ب دامه‌زراندنا كۆمپانیایا “وشه” كر و ل ساڵا 2009 به‌رۆڤاژى خواسته‌كا تاڵه‌بانى ته‌ڤگه‌را گۆڕان دامه‌زراند، ئارمانجا نه‌وشیروان ژ دامه‌زراندنا وێ ته‌ڤگه‌رێ ئه‌و بوو كو ئه‌و ئارمانجێن ژیانا خوه بۆ ته‌رخانكرى بپێكبیت و ل سه‌ر په‌ره‌پێدان و به‌رفره‌هكرنا بیروباوه‌ر و فێرگه‌ها “برایم ئه‌حمه‌د” یێ به‌رده‌وام بیت كو ئارمانج و كارێن وان ئه‌و بوونه نه‌ك ب تنێ دژایه‌تیكرنا پارتى ل سه‌ر ئاستێ سیاسی دا بمینیت، به‌لكى ببیته كه‌لتۆرێ جڤاكى، واته هه‌تا ئه‌گه‌ر پارتى د گۆره‌پانا سیاسی دا ژى نه‌مینیت، دیسا سه‌ركرده و خودان بیروباوه‌رێن رێبازا بارزانى ب به‌ر نفرینا جه‌ماوه‌رى بكه‌ڤن و ئه‌ڤ چه‌نده ژى ببیته كه‌لتۆر و دیارده د ناڤ جڤاكیدا!، هه‌بوونا مالباتا بارزانى ل ده‌ف نه‌وشیروان یا ب ئازار به‌خش و ب ئێش بوو، ئه‌ڤ ئازاره ژى فاكته‌ر بوون كو هزر ل دامه‌زراندنا بزاڤا گۆڕان بكه‌ت و ب ناڤى ئه‌نتى گه‌نده‌لیێ و چاكسازیێ خه‌لكه‌كێ بگه‌هینیته رێزێن حزبا خوه، هه‌لبه‌ت ڤالاهیا یه‌كسانیێ و هه‌بوونا گه‌نده‌لیه‌كا بێ ویژدانانه و لاوازیا رۆلێ رێخستنا پارتى ل سلێمانیێ فاكته‌رێن سه‌ره‌كى بوون كو نه‌شیروان مفاى ژ بۆ ب هێزبوونا ته‌ڤگه‌را خوه لێ وه‌ربگریت، ئه‌گه‌ر سه‌رنجێ بده‌ینه سه‌ر سیاسه‌ت و كارێن گۆڕان هه‌مى ته‌كتیكى و ده‌مكینه، واته د هه‌ر ده‌مه‌كێ و هه‌رده‌لیڤه‌یه‌كێدا كو چێ ببیت ل دژى پارتى و بارزانى پێنگاڤه‌كێ بهاڤێژن، ئه‌و هزر ل چ درووشم و هه‌لویستێن خوه یێن به‌رێ ناكه‌ن و ئێكسه‌ر دچنه پشت سه‌نگه‌ران!، ئه‌ڤ چه‌نده ژى وێ ڕاستیێ دسه‌لمینیت كو ئه‌وان چ به‌رنامه‌یێن پۆزه‌تیڤ و عه‌قلانى بۆ ڤى ولاتى نینن و دچارچوڤه‌كێ سنۆرداركرى یێ نه‌ساخله‌مدا ئاسێ بووینه.
ل وى سه‌رده‌مێ كو نه‌شیروان مسته‌فا د گه‌ل ئێكه‌تیێ دابوو، پشتى تاڵه‌بانى كه‌سێ دوویێ بوو، ل سلێمانیێ نه‌وشیروان كاریگه‌ریه‌كا مه‌زن هه‌بوو ل سه‌ر جڤاكى ب گشتى و هه‌مى سه‌ركرده‌یێن سیاسى ل سلێمانیێ ب جۆره‌كێ ل نه‌شیروانى دترسیان، ئه‌ڤ چه‌نده ژى ئه‌گه‌ر بوون كو ئێكه‌تى د ده‌ربازبووی دا ده‌ست ژبۆ كریارێن سه‌ربازى ل دژى گركێ زه‌رگه‌تێ نه‌به‌ت كو باره‌گایێ سه‌ره‌كیێ ته‌ڤگه‌را گۆڕان د ناڤ دایه، لێ پشتى مرنا نه‌شیروان مسته‌فا ئێدى ئه‌و باردۆخێ به‌رێ بۆ ته‌ڤگه‌را گۆڕان نامینیت و هه‌دارا به‌رپرسێن ئێكه‌تیێ دێ یا سنۆرداركرى بیت و ئه‌ندام و سه‌ركرده‌یێن گۆڕان نه‌شێن مینا به‌رێ هه‌ڤڕكیێ دگه‌ل ئێكه‌تیێ بكه‌ن، وه‌كى مه ئاماژى پێداى چ سیاسه‌ته‌كا ستراتیژى ل جه‌م ته‌ڤه‌گه‌را گۆڕان بۆ ملله‌تى نین، هه‌روه‌سا ئێكه‌تى ژى د وى باردۆخیدایه، واته دهه‌ر كاودانه‌كێ نوودا ئه‌گه‌رێن چێبوونا ته‌شه‌ننوجان دێ هه‌بن، گۆڕان پشتى نه‌وشیروان مینا زارۆیه‌كێ هێتم و سێوى لێهات، یان ناچاره خوه ڕاده‌ستێ ئێكه‌تیێ بكه‌ت و لاواز ببن، یان ژى دێ هێته هه‌لوه‌شاندن، یان ژى خوه نێزیكى پارتى بكه‌ن كو ئه‌ڤێ چه‌ندێ پێدڤى ب گوهۆڕینا ڕیشه‌ی یا عه‌قلیه‌تا گۆڕان هه‌یه‌و ل سه‌ر هاتیه دامه‌زراندن.
خرابیێن دیمۆكراسیه‌تا كوردستانێ
پشتى ئازادبوونا جڤاكان ل ژێر حوكمه‌ته‌كا دیكتاتۆر و سیسته‌مه‌كێ فاشلێ حوكمڕانیێ ب تایبه‌ت ئه‌گه‌ر ده‌مه‌كێ درێژ دۆمى بیت، هێزه‌كا (به‌رگیری ژ دیكتاتۆریه‌تێ) د له‌شێ وه‌لاتی دا چێدبیت كو ل دژى پره‌نسیپ و یاسایێن دیمۆكراسى دجه‌نگیت و ب چ ئاوایه‌كێ ناپه‌رژینیت، چێبوونا دیمۆكراسیه‌ت و ژیانێ بۆ خه‌لكى دێ بیته كاره‌كێ زۆر ب زه‌حمه‌ت و ئالۆز، پشتى كو تۆرێن خرابكار ب ته‌مامى وه‌لاته‌كێ كونترۆل دكه‌ن ژ لایێ سه‌ربازیڤه ب تایبه‌تى، دێ ئێدى ده‌ست ب كوێله‌كرن و ب كه‌لتۆركرنا دیكتاتۆرپه‌رێسیێ د ناڤ جڤاكی دا كه‌ن، واته ل وى ده‌مى ڕێڕه‌وا وه‌ڵاتى دێ به‌ر ب ئاقاره‌كێ خراب و خراپتر چیت و دبیت ساڵه‌كا خرابكرنا كه‌لتۆرێ جڤاكى ب ده‌ه سالێن چێكرنێ نه‌هێته‌ڤه رێخستن و باجا وێ چه‌ندێ یا زۆره، هه‌روه‌كى بۆ سه‌لماندنا ڤێ ڕاستیێ عیراق باشترین نموونه‌یه، ڕژێما دیكتاتۆرا به‌عس یا ژناڤچوویی د حوكمڕانیا خوه دا ب جۆره‌كێ كه‌لتۆرێ خه‌لكێ عیراقێ خسته سه‌ر ڕێره‌وه‌كا شاش و مه‌ترسیدار، كو نها و هه‌تا سه‌رده‌مه‌كێ دی ژى هه‌ر دێ باجا ڤێ چه‌ندێ ده‌ن كو خه‌لك بخوه ب پلا ئێكێ قوربانی یه.
د وه‌ڵاتێ مه دا سه‌ركردایه‌تیا كوردستانێ (مه‌به‌ست سه‌رۆك بارزانى و چه‌ند تاكه‌كێن دیكه‌یه) باجێن مه‌زن دده‌ن ژ پێخه‌مه‌ت هه‌ڕفاندنا ئه‌و كه‌لتۆرێ كو سه‌دان ساڵن سه‌دام و رژێمێن به‌رى وى ب دیكتاتۆریێ ئاڤاكربوو، بارزانى نیازێن هه‌ین كو تاكێ كورد فێر ببیت خوه ب هێز ببینن و خوه‌دى بڕیار و هه‌لۆیستێ خوه بیت، ژ به‌ر كو ئه‌م كورد پشكه‌ك بووین ژ وێ عیراقا سه‌دام و هه‌ڤكارێن وى فه‌رهه‌نگێ مه سه‌ركوتكرى و تێكدایى، ئه‌ڤ ئه‌ركه بۆ ده‌سه‌لاتا كوردستانێ زۆر یا ب زه‌حمه‌ت كه‌فتى، چێكرنا سیسته‌مه‌كێ دیمۆكراسی د جڤاكێن ده‌سپێكی دا كێشه‌یه‌كا زۆر یا مه‌زنه هه‌م ژ بۆ جڤاكى و هه‌م ژ بۆ ده‌سه‌ڵاتێ ژى، ژبه‌ركو دیمۆكراسیه‌ت مافێ بریارێ دده‌ته بۆچوونا گشتى یا جڤاكى، ده‌مێ تاكێن جڤاكى ژى ب گشتى شیانێن تێگه‌هشتن ژ سنۆرێن مافێن خوه و به‌رامبه‌ر نه‌بن ب دروستى نه‌شێت به‌رژه‌وه‌ندیێن خوه ببینیت و ڕاستى بڕیاردان و كردارێن شاش دبن، هه‌تا كو ئاستێ مرۆڤان یێ ره‌وشه‌نبیرى پێشكه‌فتنێ نه‌بینیت، نه‌شێتن مینا پێدڤى د پێناسا دیمۆكراسیێ دا و سنۆر و مافێن خوه بگه‌هیت، هه‌روه‌سا تاك ب گشتى نه‌دزانیت دوست و دوژمنێن خوه ژێكجودا بكه‌ت، نه دزانیت چ كه‌ساتیه‌ك ژ هه‌ژییه مینا نوونه‌ر ئانكو به‌رپرسێ خوه هه‌لبژێریت، نه دزانیت چ سیسته‌مه‌كێ باشه كو ژیان و ڕێره‌وا پێشڤه‌چوونا وه‌لاتى ل سه‌ر بهێته داڕشتن، نه‌دزانیت سنۆرێن مافێن وى و نه‌یێن به‌رامبه‌ر تا چ ڕاده دبه‌رینن…هتد.
د ناڤ جڤاكێن ڤه‌مایی دا ده‌سه‌لات ژى ڕاستى زۆر كێشه‌یان دبن، بێگومان ئه‌گه‌ر خوه‌دى نیازێن باش بن بۆ به‌رژه‌وه‌ندیێن جڤاكى، ژبه‌ر كو ئاستێ لاوازێ ره‌وشه‌نبیرى یێ جڤاكى گه‌له‌ك جاران فاكته‌ركێ مه‌زنه كو ده‌سه‌لات یا ناچاره بریارێن شاش ده‌ربكه‌ت، ئانكو خواسته‌كا جڤاكى ب گشتى بپه‌رژینن هه‌تا ئه‌گه‌ر ئه‌و خواسته‌ك چه‌ند زیانێ بگه‌هینیته به‌رژه‌وه‌ندیێن جڤاكى بخوه!، پشتڕاستم گه‌له‌ك بریار ژ لایێ ده‌سه‌لاتا كوردستانێ ڤه دهێنه‌دان كو مینا ژه‌هرێ بو وان ژى یا ته‌عله، ژبه‌ر كو هه‌م خه‌لكه‌كێ باش دبیته قوربانى و هه‌م خه‌لكه‌كێ نه‌ژهه‌ژى و خراب سودمه‌ند دبیت، لێ ژبه‌ر خواسته‌كا جڤاكى ناچارن بریارێ بده‌ن، ب دیتنا من ده‌سه‌لاتا كوردستانێ ژ به‌ر ده‌ستێ ده‌ره‌كى و ئه‌و مه‌ترسى یێن ل سه‌ر ولاتى هه‌ى ژبه‌ر نه‌بوونا ده‌وڵه‌ته‌كا سه‌ربخوه، راستى زۆر پرسگرێكا دبن د بریاردانێ دا، هه‌رده‌مێ ده‌وڵه‌ته‌ك چێبوو، پێدڤیه گه‌له‌ك بریار بێ خواسته‌كا جڤاكى بۆ به‌رژه‌وه‌ندیێن جڤاكى بهێنه‌دان، هه‌تا كو جڤاك دگه‌هیته ئاستێ پێدڤى یێ ه‌روشه‌نبیرى، پێدڤیه ده‌سهه‌لات بریارێن بوێرانه بده‌ت و پێنگاڤێن مه‌زن بهاڤێژیت ئه‌گه‌ر ل دژى مه‌زاج و تێگه‌هشتنا گشتى ژى بیت، واته قووناغ ب قووناغ سیسته‌مێ دیمۆكراسى پراكتیزه بكه‌ن، ئه‌ڤ سیسته‌مێ دیمۆكراسى فاكته‌ره‌كه گه‌له‌ك مرۆڤێن نه ژهه‌ژى ببنه به‌رپرس، گه‌له‌ك مرۆڤێن نیازخراب و نه‌ساخ ژ لایێ ده‌روونیڤه ب ناڤێ ئوپوزسیۆنێ و ئه‌نتى گه‌نده‌لیێ كه‌یسا باردۆخى بكه‌ن و جڤاكێ بخاپینن بۆ به‌رژه‌وه‌ندیێن تایبه‌ت ئانكو ڕێشتنا كینه و گرێ یێن خوه یێن ده‌روونى ل سه‌ر حسابا جڤاكى، لێ ئه‌ز باوه‌رم ده‌مێ ده‌وله‌تا كوردى هاته ڕاگه‌هاندن ئه‌ڤ خراب مفا وه‌رگرتن ژ باردۆخى نامینیت، له‌وما هه‌مى خرابكار و نیازخراب ل دژى ده‌وڵه‌تا سه‌ربخوه‌یی كار دكه‌ن ژبه‌ركو ل به‌رهه‌مێ وێ دترسن كو ئێدى ده‌لیڤه‌یا خه‌لك خاپاندنێ ناهێته‌دان.
ئۆجه‌لان و بارزانى د دو ئه‌زمونێن دیروكێدا
ئێك ژ ئه‌و فاكته‌رێن كو نه‌هێلاى كورد بگه‌هنه ئارمانجێن خوه یێن نه‌ته‌وه‌یی و مینا هه‌مى نه‌ته‌وه‌یێن دیكه خوه‌دى ده‌وڵه‌تا خوه بن، ئه‌وه كو ل ئه‌و سه‌رده‌مێ پترین ده‌وڵه‌تان ل جیهانێ سه‌ربخوه‌یا خوه ڕاگه‌هاندى و بوینه ده‌وڵه‌ت، كورد نه‌شیاینه دسه‌ركه‌فتى بن و مینا هه‌مى نه‌ته‌وه‌یێن دیكه ده‌وڵه‌تا خوه دابمه‌زرینن و دگه‌ل كاروانێ پێشكه‌فتنا جیهانێ بچن، نه‌ته‌وه‌یێن دیكه ده‌مێ بووینه خودان سه‌روه‌رى و سه‌ربخوه‌یی ئێدى ده‌ست ب پێشكه‌فتێن سه‌ربازى و روشنبیرى و كه‌لتورى ب گشتى كرن، ژبه‌ركو كوردژى خوه‌دى ئاخه‌كا به‌رفره‌ه و زه‌نگینن، نه‌ته‌وه‌یێن دیكه ده‌ڵه‌ت نه‌بوونا كوردان ب ده‌لیڤه دیت كو ئێدى نه‌هێلن كورد ب چ ئاوایه‌كێ خوه پێشبێخن و تاما ئازادیێ و مافێن ژیانێ هه‌ست بكه‌ن، بوڤێ چه‌ندێ ژى دوژمنان كه‌لتورێ كوشتنێ و هۆزى و خورافاتى..هتد د ناڤ كورداندا زالكر و مفا ل هێزا كوردان بخوه ل دژى كوردان وه‌ردگرت!. هه‌ر شه‌ڕێن نافخوه ژى كو د ناڤبه‌را هێز و حزبێن كوردستانێدا ل ڤێ داویێ ژى ڕوویداى ژ ئه‌نجامێن وێ سیاسه‌تێ و وان پلانان بوون یێن كو دوژمنى ل دژى نه‌ته‌وه‌یا كورد دگرتن و دگرنه‌به‌ر، هنده‌ك سه‌ره‌ده‌رى ددیارن و ل جهێ سه‌رنجێنه بۆ هه‌ر تاكه‌كێ كورد ل سه‌رانسه‌رێ جیهانێ، ناچمه د ناڤ هویرده ئه‌گه‌رێن شه‌ڕێن ناڤخوه دا كو د ناڤبه‌را پارتى و ئێكه‌تیدا ڕووداى، لێ هه‌رده‌م دپرسم عه‌بدولله ئوجه‌لان كو مینا سه‌رۆكه‌كێ نه‌ته‌وه‌یی و مه‌زن و پیرۆز خوه‌ددا نیاسین بۆ خه‌لكه‌كێ ساده‌هزر، بۆچى ل شوونا وێ چه‌ندێ كو بهێته د ناڤبه‌را پارتى و ئێكه‌تیدا و نه‌هێلیت كورد هه‌ڤدرو بكۆژن و ئه‌ڤ ده‌ستكه‌فتێن كو ل باشۆر بده‌ستڤه هاتى بكه‌ڤنه دمه‌ترسیێ دا، هات بۆ پشكه‌ك ژ شه‌ڕى و درێغى ل خوه‌شكرنا شه‌ڕێن نافخوه نه‌كر و جار شه‌ڕ ل دژى پارتى دكر و جار ل دژى ئێكه‌تیێ؟!، واته ل جهێ ڕۆلێ ناڤبژیڤانیێ و پۆزه‌تیڤ بگێریت و خوه بسه‌لمینیت كو مینا لایه‌نێ مێهڤان ل باشۆر كو خوه ب برایێن خه‌لكێ باشور ددا ناساندن، به‌رۆڤاژى پترین قوربانى و شه‌هیدێن مه ب ده‌ستێن چه‌كدارێن عه‌بدالله ئوجه‌لان بوون. لێ بارزانى چ كر؟، پشتى ئالۆزى یێن سووریێ ده‌ست پێ كرى و شه‌پۆلێن سه‌رهه‌لدانا ب ناڤ بهارا عه‌ره‌بى ب سه‌ردا هاتى و رۆژئاڤایێ كوردستانێ ژى كه‌فتیه د ناڤ دۆخه‌كێ ئالوزتردا، په‌كه‌كێ هه‌ر زوى په‌یوه‌ندیێن خوه دگه‌ل رژێما ئه‌سه‌د كرنه ستراتیژى و ئاشكراو پلان ژ بۆ كونترۆلكرنا رۆژئاڤا دانان كو ئه‌و پارچه نه‌كه‌ڤیته دژێر كونترۆلا ئه‌و لایه‌نێن داخوازا سه‌ربخوه‌یى یێ دكه‌ن، په‌كه‌كه ژبه‌ركو خوه‌دى سیاسه‌ته‌كا ڕادیكاڵ و خوه‌سه‌پێنه‌ره‌و پیروزییه‌كا مینا ئیلاهى بوونێ دده‌ته خوه‌و هه‌مان رێبازا ماكسى ب شێوازه‌كێ توندتر و تێكه‌ڵ دگه‌ل كه‌لتوورێ ئه‌تاتوركى دایه‌به‌رخوه، نكاریت دان ب سیاسه‌تا رۆژئاڤا ب ئینیت و ته‌نازولێ ژ سیاسه‌تا خوه‌یا خوه‌په‌رست و هشك بكه‌ت، له‌وما مینا دووپشكى ده‌مێ زۆر پێچاره دبیت ژه‌هرا خوه دكه‌ته‌ف دله‌شێ خوه ب وى ئاوایی ئه‌وژى ل دژى خوه ڕادبیته‌ڤه‌و هه‌م خوه وێران دكه‌ن و هه‌م وڵات و نیشتیمانێ خوه ب ده‌ستكه‌فتڤه تا ڕاده‌یه‌كێ ل دژى ناڤ و ئالایێ كوردان سیاسه‌تێ دجه‌نگیت!، په‌كه‌كێ هه‌مى لایه‌نێن دیكه ل رۆژئاڤا ده‌رئێخستن، ب سته‌م و سیاسه‌ته‌كا پلان بۆ دارێشتى یا دیكتاتورى ل دژى هه‌بوونا هیڤییه‌كێ بۆ ئازادییا تاكێ كورد ل رۆژئاڤایێ كوردستانێ ڕاوه‌ستیان، ل ڤێره من دڤێت هه‌ڤبه‌رییه‌كێ د ناڤبه‌را مه‌سعود بارزانى و ئوجه‌لان دا بكه‌م، سه‌رۆكێ هه‌رێما كوردستان هه‌رچه‌نده دزانى كو په‌كه‌كه یێ كه‌فتیه دبن بالێ رژێما “به‌شار ئه‌سه‌د”ڤه‌و سیاسه‌تا دلێ دوژمنى جێبه‌جێ دكه‌ت، لێ نه‌هێلا حزبێن رۆژئاڤا یێن نه‌ته‌وه‌یی ده‌ست ب شه‌ره‌كێ نافخوه بكه‌ن و كورد هه‌ڤدوو بكوژن، پشت ڕاستم ئه‌گه‌ر سیاسه‌تا حه‌كیمانه‌یا بارزانى نه‌با نوكه هزاران لاوێن دیكه یێن كورد د شه‌ره‌كێ دژوارێ نخوه‌كوژیدا ببانه‌ف قوربانى، بارزانى دزانى ئه‌گه‌ر حزبێن دیكه یێن رۆژئاڤا ل هه‌مبه‌ر ده‌ست درێژیێن په‌كه‌كێ ڕانه‌وه‌ستن، په‌كه‌كه بێ دوودلى دێ ل رۆژئاڤا پاسه‌وانیا ئه‌سه‌د كه‌ت، لێ نه‌ڤیا خراپتر چێ ببیت و شه‌ره‌كێ نافخوه ڕوى بده‌ت، درست یا به‌رۆڤاژى ئوجه‌لان كو دسالێن نوتاندا پشكه‌كا مه‌زن یا فتنێ و شه‌ڕخوازیێ بوو ل باشورێ كوردستانێ كو باشور مینا رۆژئاڤاژى نه‌بوو، ژبه‌ركو سه‌دام و عه‌ره‌ب و دوژمنان ب گشتى ده‌سه‌لات ل باشور نه‌مابوون.
جه‌وهه‌رێ ئارمانجا بارزانى نه‌ته‌وه‌ییه یان مرۆڤى؟
هه‌كه سه‌رنجێ ل سه‌ر كه‌لتۆر و په‌روه‌ده‌یا رێبازا بارزان بده‌ین، د چ قووناغه‌كێدا دژایه‌تیا چو نه‌ته‌وه‌یه‌كێ و ئاینه‌كێ نه‌كریه، به‌لكى به‌رووڤاژى باوه‌ریه‌كا مه‌زن یا ب پێكڤه ژیانێ هه‌بووى و هه‌لگرێن ڕێزه‌كا مه‌زن بوونه بۆ بیروباوه‌رێن رۆحى و نه‌ته‌وه‌یێن جودا.
هه‌روه‌كى دیار گه‌ره‌كه مرۆڤاتى ببیته پیڤه‌رێ جوداكرنا مرۆڤان ژهه‌ڤدو، نه‌ك بیروباوه‌رێن ئاینى و سیاسى ئانكو نه‌ته‌وه‌یی..هتد، د ئه‌نجامێ زالبوونا كه‌لتۆرێ ئیسلامیدا ل سه‌ر جڤاكا كوردى جۆره گرێیه‌كا ده‌روونى د ناڤبه‌را ئایین په‌رستێن دیكه و موسلماناندا هه‌بوو، لێ خۆشبه‌ختانه سه‌ركرداتیا سیاسى و حوكمڕانیا كوردستانێ د ڤى لایه‌نی دا رۆله‌كێ گه‌له‌كێ ئه‌رێنى دبینن، هه‌كه هه‌ڤبه‌ریه‌كێ د ناڤبه‌را ده‌ڤه‌رێن دیتر یێن رۆژهه‌لاتا ناڤین دا ب گشتى و ب تایبه‌ت ولاتێن ئیسلامى بكه‌ین، دێ دیار بیت هه‌رێما كوردستانێ د ئاسته‌كێ هه‌ره بلند دایه، هه‌ر چه‌نده ده‌وله‌تێن عه‌ره‌ب و فارس و توركان گه‌له‌ك سته‌م ل نه‌ته‌وه‌یا كورد كرینه، لێ سه‌ركرده‌یا كوردستانێ سنۆرێن خوه ژبۆ وان عه‌ره‌بان ڤه‌كرن كو پتریا وان ده‌ست دقڕكرنا كورداندا هه‌بوو ل سه‌رده‌مێن ده‌رباز بووییداو نها ل كوردستانێ ژى دژین دیسا د ناخێ واندا گرێیه‌كا سایكۆلوژى یا دژه كورد هه‌یه!، دیساژى ژ لایێ سه‌ركردایه‌تیا كوردستانێدا به‌رده‌وام كار ل سه‌ر كه‌لتۆرێ لێبۆرینێ دهێته‌كرن و ناخوازیت تۆڤێ تولڤه‌كرنێ ل ده‌ف تاكێ كورد شین ببیت و دیرۆكا ره‌شا وان ولاتێن كو ل دژى نه‌ته‌وه‌یا كورد تومار كرى به‌رۆڤاژى نوى ببیته‌ڤه، بێ گومان ئه‌ڤ چه‌نده ژى فاكته‌ره‌كێ هه‌ره‌سه‌ركیه كو جیهان ب چاڤه‌كێ مه‌زن و ب رێزڤه ل كوردستانێ و نه‌ته‌وه‌یا كورد بنێرن.
ل ڤێره جهێ پرسیارێ یه، ماده‌م د فه‌رهه‌نگا رێبازا بارزانی دا پێكڤه‌ژیانا هه‌مى نه‌ته‌وه و ئایین په‌رستان ب گرنگ دهێته زانین و ئێك ژ درووشمێن ڤێ رێبازێ یه، بۆچى هه‌مى بزاڤێن مه‌سعود بارزانى دامه‌زراندنا ده‌وله‌ته‌كا نه‌ته‌وه‌ییه؟،
بێ گومان ئه‌و فاكته‌رێ ژیانا نه‌ته‌وه‌یا كورد تێكداى و هه‌مى مافێن سه‌ره‌تایی یێن ژیانێ ل كوردان وه‌رگرتى، ب تنێ كورد بوونه، واته ژبه‌ر كوردبوونێ كورد هاتنه پارڤه‌كرن و زولم ژێ هاته كرن، له‌وما هه‌ر كورد بوون ئه‌و خاله كو بارزانى دشێت ملله‌ته‌كێ سته‌م دیتى و بنده‌ست كۆم بكه‌ت و بگه‌هینیته مافێن وان، واته ل پێش وێ چه‌ندێ كو بارزانى بزاڤێن چێكرنا ده‌وڵه‌ته‌كا نه‌ته‌وه‌یی دكه‌ت، كاره‌كێ مه‌زنێ مرۆڤی دكه‌ت كو ملیۆنان مرۆڤ دێ ژ بن ده‌ستیێ و ژێر سته‌مێ ده‌ركه‌ڤن، ب دیتنا من فاكته‌رێ سه‌ره‌كى ژى هه‌ر بو ب ده‌ستڤه ئینانا مافێن مرۆڤینه كو بارزانى د بزاڤا دامه‌زراندنا ده‌وله‌ته‌كا نه‌ته‌وه‌ییدایه.
ده‌وله‌ت گه‌هشتیه چ قووناغه‌كێ؟
ب دیتنا من د نها دا كێمترین پێنگاڤێن ماین كو ده‌وڵه‌تا كوردى بهێته ڕاگه‌هاندن، هه‌ر وه‌كى د هه‌ژمارێن ده‌رباز بووییدا من تیشك ئێخستیه سه‌ر، دامه‌زراندنا ده‌وله‌ته‌كا كوردى ژبلى وێ چه‌ندێ كو پرۆژه‌یێ سه‌رۆك بارزانی و هیڤیا گشت كورده‌كێیه، پرۆژه‌یێ ولاتێن زلهێزێن جیهانێ یه ژی و ئه‌ڤ ده‌وله‌تا دێ هێته دامه‌زراندن هه‌ڤده‌م ل گه‌ل خزمه‌تا نه‌ته‌وه‌یا كورد، خزمه‌تا ستراتیژییه‌تا ولاتێن رۆژئاڤاژیدا بیت.
بێگومان د هه‌یامه‌كێ نزیكدا پارتى ب هه‌ڤكارى ل گه‌ل باله‌كێ ئێكه‌تیێ و ئێكگرتوو و هنده‌ك حزبێن دیتر په‌رله‌مانى كارا كه‌نه‌ڤه و ده‌ست ب قووناغێن ده‌سپێكرنا ریفراندۆمى بۆ ده‌وله‌تا كوردى كه‌ن، ئیران هه‌تا نها ژى هه‌مى بزاڤه‌كێ دكه‌ت ل رێیا هه‌ڤپه‌یمانێن خوه یێن ب ناڤ كوردى رێگیریێ ل دامه‌زراندنا ده‌وڵه‌تا كوردى بكه‌ت، لێ ل داویێ دێ ناچار بیت ڤێ ده‌وڵه‌تێ بپه‌رژینیت، ژ به‌ركو توركیایێ ده‌مه‌كێ ئه‌ڤ راستیه په‌رژاندى و دێ رۆله‌كێ پوزه‌تیڤ هه‌بیت د سه‌رئێخستنا پرۆسێسا سیاسى و ئابووریا ڤێ ده‌وڵه‌تێدا، دبیت بۆ گه‌له‌ك خوینه‌ران پرسیار بیت كو بۆچى توركیایێ دژایه‌تییا بلندكرنا ئالایێ كوردستانێ كر ل سه‌ر باره‌گایێن میرى یێن كه‌ركووكێ؟، ب دیتنا من توركیا هه‌كه دژایه‌تیا وى ئالای بكه‌ت، بالێ ئیرانى ل كوردستانێ دێ وه‌سا هزر كه‌ت كو بلندكرنا ئالا و نه‌ڕازیبوونا توركیا دێ كاریگه‌ریێن نێگه‌تیڤ ل سه‌ر په‌یوه‌ندیێن پارتى و توركیا چێكه‌ت، له‌وما ئه‌و بالێ ئیرانى دێ پتر ڕژد بیت ل سه‌ر ڤه‌گه‌راندنا ئێكجارییا كه‌ركووكێ بۆ سه‌ر هه‌رێما كوردستانێ، لێ د ڕاستیدا ئه‌و گرێبه‌ستا 50 سالى یاكو توركیا ل گه‌ل حوكمه‌تا هه‌رێما كوردستانێدا ئیمزا كرى و ئالایێ كوردستانێ ل فرۆكه‌خانه‌و كوچكا سه‌رۆك وه‌زیرێن وێدا هاتیه دانان، ژ لایێ سیاسیڤه زۆر گرنگتر بوون ل به‌رزكرنا ئالایێ كوردستانێ ل كه‌ركووكێ.
كورد د ناڤبه‌را شه‌ڕێن دو جه‌مسه‌ران دا
مینا دیار د نها دا وه‌لاتێن زلهێزێن جیهانێ ل سه‌ر دو جه‌مسه‌رێن سه‌ره‌كى پاڕڤه‌بوونه كو ئێك ژوان جه‌مسه‌رێ رۆژئاڤاییه‌و ئه‌مریكا سه‌ركێشیا وێ دكه‌ت و كاریگه‌رترین و خورتترین هێزه ل سه‌ر به‌لانسا سیاسى و ئابوورى و سه‌ربازى …هتد یێن جیهانێ، چه‌ندین ولاتێن زلهێز یێن جیهانێ مینا ئیسرائیل و وه‌لاتێن ئه‌ورۆپى هه‌ڤپه‌یمانێن وێ یێن ستراتیژینه، جه‌مسه‌رێ ل به‌رامبه‌ر كو ب جه‌مسه‌رێ رۆسى دهێته زانین، هه‌تا راده‌یه‌كێ زۆر ل گه‌ل هه‌ڤپه‌یمانێن خوه به‌رنامه و به‌رژه‌وه‌ندیێن ده‌مكى یێن هه‌ین و مینا جه‌مسه‌رێ ئه‌مریكى شیانێن دارێشتنا پلانێن ستراتیژى بۆ ده‌مه‌كێ درێژ نینن.
ئه‌ڤ هه‌ردو جه‌مسه‌ره د پرانیا وان وه‌لاتاندا یێن كو سه‌روه‌ریه‌كا باش نه‌بیت، د هه‌ڤڕكیێ دانه و مفاى ژ لاوازیا وان وه‌لاتان وه‌ردگرن و كونترۆلا سیاسه‌ت و ئابوورێ وان دكه‌ن، گه‌له‌ك ژ وه‌لاتێن رۆژهه‌لاتا ناڤین د نها دا مینا گۆره‌پان ل ژێر یارى و له‌یزینا واندانه، ئێك ژ وان ژى وه‌لاته‌كێ ب ناڤ عیراقه كو دیرۆكى ژ ئه‌نجامێ نه‌زانین و پاشڤه‌مانا فه‌رهه‌نگی یا خه‌لكێ وێ مینا بیكه‌كا پلاستیك یارى پێ دهێته كرن، هه‌روه‌كى دیار بن ده‌ستیا كوردستانێ ژى گه‌له‌ك جاران مینا كه‌ره‌سته و كارتێن سیاسى و سه‌ربازى ل دژى هه‌ڤدو بكارئینایه و دئینن.
وه‌لاتێ ئیرانێ (كو كاریگه‌ریه‌كا ب هێز یا هه‌ى ل سه‌ر پشكه‌كا زۆر یا كوردان و هنده‌ك لایه‌نێن سیاسى یێن كوردان ژ بۆ به‌رژه‌وه‌ندیێن خوه بكاردئینیت) مینا هه‌ڤپه‌یمانێ سیاسى یێ رۆسى ل دژى سیاسه‌تێن ئه‌مریكا دهێته نیاسین، لێ د ڕاستیدا ڕۆسیا بخوه ژى ل پاشه‌رۆژا ئیرانه‌كا خوه‌دى چه‌كێ ئه‌تۆمى دترسیت و ب تنێ بۆ هنده‌ك به‌رژه‌وه‌ندیێن ده‌مكى مفاى ل دوژمنداریا ئیرانێ بۆ ئه‌مریكا و ئیسرائیل وه‌ردگریت، هه‌كه سه‌رنجه‌كا باش بده‌ینه ل سه‌ر سیاسه‌تا ئیرانێ، ب تێكدانێ و ئالۆزكرنێ بزاڤێ دكه‌ت رێیێ ل سیاسه‌تێن ئه‌مریكا بگریت، ئیران ل هه‌ر جهه‌كا جیهانێ خوه‌دى هه‌ڤپه‌یمانه‌ك بیت، ب تنێ مینا كه‌ره‌سته‌یه‌كێ سه‌ربازى ئانكو ته‌قه‌مه‌نیه‌ك ئه‌و هه‌ڤپه‌یمان ب كارئینایه، له‌وما پشتگه‌رمكرن ب سیاسه‌تێن ئیرانێ شاشیه‌كا مه‌زنه كو هنده‌ك سه‌ركرده‌یێن كوردان كه‌فتینه تێدا.
ئه‌مریكا بزاڤێ دكه‌ت ل رۆژهه‌لاتا ناڤین پێگه‌هێ خوه بهێزتر لێ بكه‌ت، د نێرینا ئه‌مریكا دا لاوازكرنا ولاتێن سه‌ربازى و پۆلیسى یێن رۆژهه‌لاتا ناڤین باشترین پێنگاڤن كو كونترۆلا هه‌مى لایه‌نه‌كێ ل ده‌ستێ خوه بگریت، كوردستان باشترین كارته د ده‌ستێن ئه‌مریكا دا كو ل رێیا وێ بشێت چار وه‌لاتێن سه‌ربازى و پۆلیسى یێن مه‌ترسیدار ل سه‌ر پاشه‌رۆژا وێ و ئیسرائیلێ پارچه پارچه بكه‌ت و لاواز بكه‌ت، ئه‌مریكا به‌رنامه‌یێ دارشتى كو ئه‌ڤان چار وه‌لاتێن (ئیران و عیراق و سووریا و توركیا) قووناغ بۆ قووناغ پارچه بكه‌ت، كوردستان خاله‌كا هه‌ڤپشكه د ناڤبه‌را ڤان چار ده‌وله‌تاندا كو ژ لایه‌نێن دیرۆكى و كه‌لتۆرى و زمانه‌وانى و نه‌ته‌وه‌یی یا جودایه ل گه‌ل ڤان وه‌لاتان، ئه‌مریكا دكاریت ل پاشه‌رۆژێ چار ده‌وله‌تێن بچووك ژ له‌شێ ڤان ده‌وله‌تان جودا بكه‌ت.
د نوكه دا كوردستانا باشۆر بنیاتێ ستراتیژیا ئه‌مریكایه ل ده‌ڤه‌رێ، بێگومان ئه‌مریكا هه‌كه یا سه‌ركه‌فتى بوو و شیا كوردستانا عیراقێ بكه‌ته ده‌وله‌ته‌كا سه‌ربخوه و عیراقێ پارچه بكه‌ت، د پاشه‌رۆژێ دا هه‌م دێ ده‌نگ و باوه‌ریا خه‌لكێ پارچه‌یێن دی یێن كوردستانێ ب ده‌ست ئینیت و هه‌م دێ كوردستانا باشۆر هه‌ڤكارێ وێ بیت كو هه‌ر سێ وه‌لاتێن دی ژى پارچه بكه‌ت، ب دیتنا من ئه‌مریكا ده‌مه‌كێ درێژه ئه‌ڤ به‌رنامێ ستراتیژى دارێشتى و ب تنێ ده‌م دڤێت هه‌تا بینه‌رێن ڤان كاودانان بین، ئیرانێ ژى باش ل ڤان راستیان دزانیت و هه‌مى بزاڤێن وێ ئه‌ون كو ب چێكرنا شه‌ڕ و ئالۆزیان رێیێ ل ڤى پرۆژه‌یێ ئه‌مریكى بگریت، ل كوردستانا باشۆر ب سه‌رۆكاتیا “مه‌سعود بارزانى” خوه ل گه‌ل ڤى سیاسه‌تێ ب باشى دگونجینن و هه‌ر چ یا پێدڤى بیت بۆ سه‌ركه‌فتنا ڤى به‌رنامه‌ى ئه‌نجام دده‌ن، ژبه‌ر كو به‌رژه‌وه‌ندیێن كوردان و یێن وه‌لاتێن رۆژئاڤا هه‌ڤدو د ئێك ڕێڕه‌ودا دگرن، لێ هنده‌ك لایه‌نێن كوردى گه‌له‌ك ب كورتبینین ل پاشه‌رۆژێ دنێرن و ب وه‌ریسێ ئیرانێ دچنه د چالێن سیاسی دا، بت نێ یا گرنگ ئه‌وه ئه‌و لایه‌نێن كوردى بزانن، كو ئه‌مریكا بۆ سه‌ركه‌فتنا پرۆژێ خوه هه‌ر چ یا پێدڤى بیت دێ ئه‌نجام ده‌ت و دربا ئه‌مریكى یا كوشنده‌یه و هه‌ر لایه‌نه‌ك د رێیا وێ دا راوه‌ستیت و ب تێگه‌هشتن خوه نه‌ده‌ته لایه‌كێ دێ ڕاستى دربه‌كا مه‌زن بیت.
په‌كه‌كێ چ دڤێت؟
خۆیایه كو دیرۆكى خه‌لكێ كوردستانا باكۆر ژ بال ڕژێمێن توركیایێ ڤه ڕاستى زولم و زۆرداریه‌كا زۆر بوونه و بێ سنۆر سته‌م لێ دهاته كرن، خه‌لكێ كوردستانا باكۆر مینا كه‌سه‌كێ نه مه‌له‌ڤان كو دناڤ ده‌ریایه‌كێدا لڤلڤینا نقۆر بوونێ دكه‌ت و ژبۆ خوه ڕزگاركرنێ یێ به‌رهه‌ڤ بیت خوه ب نه‌هه‌نگه‌كێژیڤه بگریت، ل ژێر گڤاشتنان بوون و د به‌رهه‌ڤبوون خوه ب كنفا هه‌ر لایه‌نه‌كێڤه بكه‌ن كو هیڤیه‌كێ بده‌ته وان داكو ل سته‌ما ده‌وله‌تا توركیایێ ڕزگار ببن، دیار بوو “ئوجه‌لان” ل وى سه‌رده‌مى خوه‌دى هزره‌كا چه‌پ بوویه، ئانكو دبیت ئایدۆلوژیایه‌كا تایبه‌ت ب وى د سه‌رى ویدا هه‌بوو، له‌وما ئالۆزى و به‌دبه‌ختی و ئه‌و گڤاشتنێن جڤاكى و سیاسى و ئابوورى یێن كو خه‌لكێ باكۆر تێدا دژیان، ب ده‌لیڤه دیت كو ب ناڤێ ئازادكرنا كوردستانا مه‌زن و دامه‌زراندنا ده‌وله‌ته‌كێ كو هه‌ر چار پارچه‌یێن كوردستانێ بخوه‌ڤه بگریت، هێدى هێدى خه‌لكه‌كێ زۆر ل دوروبه‌رێن خوه كۆم بكه‌ت و ل ژێرڤه كار ژبۆ ئایدۆلوژیایا خوه بكه‌ت و ل مه‌یدانی ژى بده‌ته خۆیا كرن كو ئه‌ز كار بۆ نه‌ته‌وه‌و دۆزا كوردان دكه‌م، گه‌لۆ ب ڕاست ب لێدانا ئه‌و سه‌ركرده و شۆڕشگێرێن خزمه‌تا نه‌ته‌وه‌یی یا كوردان دكه‌ن و هزاران شه‌هید ژبۆ ئازاد كرنا كوردستانێ داینه، چ جۆره خزمه‌ته‌كه كو حزبا ئاپۆ دكه‌ت؟!، ب ڕاستى سه‌یره په‌كه‌كێ ده‌ست ژ پارچه‌یێن بنده‌ست و نه ئازادكرى هه‌لگرتیه و ل پارچه‌یا ئازادكرى مژوولى چێكرنا ئالۆزیان و تێكدانا ئه‌وله‌هى و ژیانا خه‌لكی یه، ئه‌ڤه چ جۆره خزمه‌ت و شۆڕشه‌كه په‌كه‌كه دكه‌ت؟!.
ل كوردستانا باكۆر هه‌كه ل سه‌رده‌مێ پرۆسێسا ئاشتیێ گوهارتنێن مه‌زنێن پۆزه‌تیڤ بخوه‌ڤه دیتن، خه‌لك دباشترین باردۆخدا دژیان و ژ هه‌مى ڕوویه‌كێڤه كوردستانا باكۆر به‌ر ب ئاڤه‌دانبوونێ دچوو و خه‌لكێ باكۆر ب مافێن خوه شاد دبوون، لێ چما په‌كه‌كێ به‌رده‌وام ب چه‌كى گه‌فێن ژناڤبرنا ئه‌وله‌هیا ئیسته‌نبول و ئه‌نقه‌ره دكر؟!، چما په‌كه‌كێ دو پۆلیسێن سڤیل د خه‌ودا كوشتن و ڕۆژا پاشتر خوه پێ به‌رپرس كر؟!، گه‌لۆ به‌رهه‌مێ وێ چبوو؟!، ب ڕاستى ب كوشتنا دو پۆلیسێن سڤیل توركیا ناچار كر كو زێده‌تر مافێن كوردان بده‌تێ ئان به‌هانه‌دا توركیا كو ملیۆنان ژ خه‌لكێ باكۆر ئاواره بكه‌ن و هزاران خه‌لك ببنه قوربانى و باژێر و باژێركێن كوردستانا باكۆر وێران ببن؟!، ژ به‌ر سیاسه‌تا په‌كه‌كێ هه‌تا كوردێن سه‌ر ب په‌كه‌كێ ژى كو هه‌نه ئاشتیخوازن د دیتنا جیهانێدا ڕه‌ش بوون و كه‌سایه‌تیا تاكێ كورد ل جیهانێ خسته ژێر وێنه‌یه‌كێ شه‌ڕانگیز و خرابڤه، ل رۆژئاڤایێ كوردستانێ مینا سالا 1992یێ و كوردێن باشۆر، ده‌لیڤه‌یه‌ك بۆ كوردێن رۆژئاڤا چێبوو كو وێ پارچه‌یێ ڕزگار بكه‌ن و ل ژێر حوكمێ عه‌ره‌بان ده‌ربێخن، لێ دبینین ناڤێ كوردستانێ ژى ئێدى دقاموسا هه‌مى كوردستانا رۆژئاڤادا ده‌رخست!، بلندكرنا ئالایێ كوردستانێ ل رۆژئاڤایێ كوردستانێ ل ده‌ف په‌كه‌كێ مینا تاوان دهێته هه‌ژمارتن!، بیروباوه‌رێن سیاسى گه‌ر ل گه‌ل ئایدولۆژیایا ئاپۆ نه‌گونجیت ل رۆژئاڤا ب تاوان دهێته ناساندن!، تو ئاپۆچى بى گرنگ نیه عه‌ره‌بێ به‌عسى بى، لێ تو ئاپۆچى نه‌بى چه‌ندێ كورد په‌روه‌ر بى مفایێ وێ نینه!، ل رۆژهه‌لات نها مینا پاسه‌وان ل پێشیا ڕژێما ئیرانێ ڕاوه‌ستاینه‌و پرسگرێكان بۆ حزبێن كوردى ل دژى ڕژێما ئیرانێ چێدكه‌ن!، گه‌لو ئه‌ڤه چ كوردایه‌تیه هوون دكه‌ن!، برن و چه‌كداركرنا زارۆیان بێ ده‌ستیرییا دایك و بابان كو دبنه ئارمانجێن فرۆكه‌یووێن توركیایێ چ خزمه‌تا گه‌لێ كورد دكه‌ت؟!، ئه‌ڤا هوون دكه‌ن ل توخیبێن مرۆڤایه‌تیێ ژى لادده‌ت، زڕه دیمۆكراسیه‌ك د ناڤ په‌یره‌و پرۆگرامێ وه دا ناهێ دیتن، چه‌كداره‌كێ وه هه‌مى ژیانا خوه ژبۆ وه خزمه‌ت كربیت، ل سه‌ر هێلانا ڕێزێن وه سزایێ وى مه‌رگه!، ئه‌ڤه چ كه‌لتۆرێ نزیك ل كه‌لتۆرێ ئه‌لقاعیده و داعشه هوون چێ دكه‌ن؟!، كورد ب تنێ بن ده‌ست بوون، نها بن ده‌ستن و پشكه‌كا زۆر ژ كوردێن باكۆر ژبه‌رهه‌مێن سیاسه‌ت و پرۆگرامێ وه بوونه خودانێن ئایدۆلوژیایه‌كا توندو تیژو مه‌ترسیدار!.
كوردستانا باشۆر نها ژبلى كو پارتى دیمۆكراتى كوردستان تێدا خوه‌دى پرۆژه‌یه‌كێ مه‌زنه كو ده‌وله‌تا كوردى بخوه‌ڤه دگریت، پرۆژه‌یه‌كێ نیڤ ده‌وله‌تیه ژى هه‌یه كو ب چ ئاوایه‌كێ په‌كه‌كه‌و چ حزب و لایه‌نه‌كێ دیكه‌یێ ده‌ڤه‌رێ نه‌شێت ڕێكێ لێ بگریت، یێ بزاڤا تێكدانا باشۆر دكه‌ت دێ باجه‌كا مه‌زن ده‌ت.
توركیا بۆچى هاته گوهۆرین؟
توركیا ئێك ژ وان وه‌لاتانه كو تیژترین هه‌لویست ل دژى كوردان هه‌بوون و ل دژى گه‌لێ كورد زۆرترین كریارێن سه‌ربازى یێن خویناوى ئه‌نجامداینه، ل فرۆكه‌خانه‌یێن توركیایێ ناڤێ كه‌سه‌كێ “كوردستان” بایه ژ ئالیێ ئیداره و پاسه‌وانێن فرۆكه‌خانێڤه ڕاستى پرسگرێكان دبوو، واته ناڤێ كوردستانێ ل ده‌ف وان هێلا سۆر بوو، بۆچى د ماوه‌یه‌كێ كێم دا توركیایێ گوهارتنێن ڕیشه‌یی و پۆزه‌تیڤ ل هه‌مبه‌ر نه‌ته‌وه‌یا كورد بخوه‌ڤه دیتن؟.
ئه‌ڤه پرسیاره‌كه پشكه‌كا زۆر ژ خه‌لكى ب گۆمان لێ دنێرن و پشكه‌كا دیكه ژى یا لایه‌نێن سیاسى مینا كه‌ره‌سته‌یه‌كێ خاپاندنێ ل ده‌ست گرتیه و ل سه‌ر ساده‌یی و نه‌زانینا هنده‌ك ژ خه‌لكێ كوردستانێ كار دكه‌ن. توركیا ولاته‌كه كو ستراتیژیی و پێنگاڤێن وێ یێن گرنگێن سیاسى و ئابوورى و دیپلۆماسى ل ژێر فیلته‌ر و شاره‌زایا بسپۆر و بلیمه‌تێن وى وه‌لاتى ده‌رباز دبن و د هه‌ر قووناغ و پێنگاڤه‌كێ دا ئه‌و ل واقعێ سیاسى و ئابوورى و دیپلۆماسیا جیهانێ ب گشتى و رۆژهه‌لاتاناڤین ب تایبه‌تى دنێرن و ئه‌ڤجا گاڤێن خوه دهاڤێژن، توركیا بزاڤێن گه‌له‌ك كرن كو ب گه‌فێن سه‌ربازى و گڤاشتنێن ئابوورى و ب كارئینانا لۆبیێن خوه ل جیهانێ هه‌رێما كورستانێ ل كاربئێخیت و ڕێى ل پێشڤه‌چوونێن هه‌رێما كوردستانێ بگریت، ل شه‌ڕێ ئه‌مریكا ل سالا 2003ێ ژبۆ ئازادكرنا عیراقێ ل ژێر ده‌سه‌لاتا دیكتاتوری یا به‌عسی ڤه، توركیایێ مه‌زنترین بزاڤ كرن كو وێ ده‌لیڤه‌یێ ئیستیغلال بكه‌ت و زیانێن مه‌زن بگه‌هینیته هه‌رێما كوردستانێ، لێ سه‌رۆكێ هه‌رێما كوردستانێ ب ڕه‌نگه‌كێ زۆر ڕژدو ب هه‌لویستێن تیژ بۆ جیهانێ وه‌سا دا خۆیاكرن كو ئه‌گه‌ر ڕێكێ بده‌نه توركیا دربێ ل هه‌رێما كوردستانێ بده‌ت و مایتێكرنێن سه‌بازى بكه‌ت، ئێدێ بۆ ستراتیژى و سیاسه‌تا وه‌لاتێن زلهێزێن جیهانێ ژى یا بێ باج نابیت و دێ كاودانێن خراب و نێگه‌تیڤ ل دووڤ دا مینن و ئه‌وله‌هیا ده‌ڤه‌رێ ب گشتى دێ تێك چیت و پڕۆژه‌یێ ئه‌مریكا ژى كو ئارمانجا وێ یا ده‌سپێكى ل وى سه‌رده‌مى ژناڤبرنا حوكمه‌تا به‌عسیان بوو ل عیراقێ دێ ب زه‌حمه‌ت كه‌ڤیت و هه‌ڤپه‌یمانه‌كێ خوه یێ سه‌ره‌كى كو هه‌رێما كوردستانێیه دێ ژده‌ست ده‌ن، ل وى سه‌رده‌مى هه‌رێما كوردستانێ ژى ژ هه‌مى ئالیه‌كێڤه رێخوه‌ش كرن و پشتگیریا خوه ژ بۆ وه‌لاتێن هه‌ڤپه‌یمان دیار كربوو ل دژى “سه‌دام حوسێن”و حوكمه‌تا وى، ل داویێ بارزانى شیا ڕێى ل توركیا بگریت و نه‌هێلیت سوپایێ وێ بهێته د ناڤ ئاخا هه‌رێما كوردستانێ دا و سه‌ركه‌فتنه‌كا دیرۆكى تۆماركر، بۆ توركیا ل وى سه‌رده‌مى هاته سه‌لماندن كو گه‌ره‌كه هێدى هێدى هه‌رێما كوردستانێ مینا دیفاكتۆ بپه‌رژینیت، ژ به‌ر كو هه‌رێما كوردستانێ دچارچووڤێ سیاسه‌تا وه‌لاتێن زلهێز دا هه‌ژماره‌كه و ده‌رخستنا وێ د لیسته‌كا هه‌ژمارێن وان وه‌لاتاندا یا ب زه‌حمه‌ته و به‌لكى مه‌حاله ژى. ئه‌ڤ چه‌نده فاكته‌ره‌كێ گرنگ بوو كو توركیا پێداچوونه‌كا مه‌زن د سیاسه‌تا خوه‌دا ل هه‌مبه‌ر هه‌رێما كوردستانێ بكه‌ت، هه‌روه‌سا فاكته‌ره‌كێ دیكه یێ سه‌ره‌كى هه‌بوونا پرسگرێكا كوردان بوو ل باكۆرێ كوردستانێ، توركیا مینا ولاته‌ك كو مرۆڤێن ژیر سیاسه‌تا وێ ب ڕێڤه دبه‌ن وێ راستیێ دزانن كو نه‌ته‌وه‌یه‌كا زێده‌تر ژ پێنجى ملیۆن كه‌سان كو پڕانیا وان ل ژێر داگیركه‌رییا توركیانه ب كریارێن سه‌ربازى و كوشتنێ ژناڤ ناچن و ده‌هان هزار خه‌لك ل سه‌ر لۆژیكا خه‌ندقاندنا دۆزا كوردان بوونه قوربانى و ده‌هان جارێن دیكه‌ژى ب وى ئه‌ندازه‌ى خه‌لك ببنه قوربانى ئه‌ڤ پرسگرێكه چاره‌سه‌ر نابیت و كورد ژى ژناڤ ناچن، له‌وما په‌رژاندنا باشترین لایه‌نێ كوردان كو لێك تێگه‌هشتنا سیاسى و ئابوورى هه‌بیت و خوه‌دى سیاسه‌تاكا توندوتیژ نه‌بیت و ئایدولۆژیایا توڵڤه‌كرنێ دپرۆگرامێ وێدا نه‌بیت، مینا ئه‌ركه‌ك دیت بۆ پاراستنا ئه‌وله‌هیا ده‌ڤه‌رێ ب گشتى و ب تایبه‌ت توركیایێ، پارتى دیمۆكراتى كوردستان ئه‌و خاڵ تێدا هه‌بوون یاكو توركیا دخوازیت، توركیا ئه‌و باوه‌رى ئینا پارتى بۆ نه‌بوونا شه‌ڕى ب تنێ شه‌ڕى دكه‌ت، واته توركیا ژنه‌چارى ئه‌ڤ سیاسه‌ته گرته‌به‌ر، توركیای خراب ل شوونا خراپتر هه‌لبژارت، بێگومان بۆ دۆزا كوردى ژى ئه‌ڤ په‌یوه‌ندیێن د ناڤبه‌را توركیا و هه‌رێما كوردستانێدا هه‌ى چ ئه‌لته‌رناتیڤێن دیكه نینن، خوین ب خوینێ ناهێته پاقژكرن و گه‌ر مرۆڤ ملیونان ل هه‌ڤدو بكۆژن ب تنێ ئاشتیه كو داویێ ب ئازار و به‌دبه‌ختیان دئینیت.
بۆچى جاشایه‌تى بوو شانازى؟
ده‌مێ ده‌سپێكێ كه‌سه‌ك ده‌ست ب دزیكرنێ یان دره‌وكرنێ یان خاپاندنێ ئانكو هه‌ر كاره‌كێ نه‌جوان و دوور ژ ڕه‌وشتى دكه‌ت و ل دووڤدا تاوانا وى ئاشكه‌را دبیت، هه‌ست ب شه‌رمه‌زاریێ دكه‌ت و كاریگه‌ریه‌كا نێگه‌تیڤ ل سه‌ر سایكۆلوژیا وى دمینیت، لێ ده‌مێ ئه‌ڤ تاوانه ئان بێ ڕه‌وشتییه به‌رده‌وام دبیت ب تایبه‌تى كو ل دووماهیێ تاوانبار د ناڤ خه‌لكی دا خوه دبینیت چ سزا ل سه‌ر نینه و مینا هه‌ر وه‌لاتیه‌كێ دیكه به‌رده‌وامیێ ب ژیانێ دده‌ت، هێدى هێدى ئه‌ڤ تاوانكه‌ره دێ كارێ خوه یێ دوور ژ ڕه‌وشتى ب ئاشكه‌رایی كه‌ت هه‌تا دگه‌هیته ڕادیه‌كێ ب چ (تف) لێ كرنان ژى ته‌ڕ نابیت.
مه‌زنترین شاشیا ده‌سه‌ڵاتا هه‌رێما كوردستانێ ل پشتى سه‌رهه‌لدانێ كرى، ئه‌و بوو كو ل وان بۆرین ئه‌وێن پێشمه‌رگه شه‌هید دكرن و ملكێ وان لێ داگیر دكر و ده‌ست د ئه‌نفالێن ڕه‌شدا هه‌بوون و ل داویێ بگره د ناڤ به‌رهه‌مێ شۆڕشا كوردان دا گه‌له‌ك ژ وان پله‌ژى وه‌رگرتن!، ده‌سه‌لاتا كوردستانێ د زووما دیتنا خوه دا وه‌سا دنێرى كو كوردان پێدڤیا ب ئێكگرتنێ هه‌ى و ئه‌ڤرۆ ده‌مێ سافیكرنا ماف و حساباتان نینه، هه‌تا ڕاده‌یه‌كێ زۆر ئه‌ڤ چه‌نده ژى ڕاسته، لێ ب مخابنی ڤه ئه‌ڤ هه‌لویستێ ده‌سه‌ڵاتێ به‌رهه‌مێن نیگه‌تیڤ ل سه‌ر په‌روه‌رده و هه‌ستا نه‌ته‌وه‌یی هه‌بوون و نها ملله‌ت هه‌مى یێ باجێ دده‌ت، به‌ر هه‌مێ وێ ژى ئه‌وه كو نها جاشایه‌تى ب ئاشكه‌رایى دهێته كرن، نه‌ك ب تنێ شه‌رم ژ جاشه‌تى و له‌شفرۆشیێ ناهێته كرن، به‌لكى شانازیێ پێ دكه‌ن!، ده‌مێ ده‌سه‌لاتا وه‌لاتى جاش و ئه‌وێن خه‌لك ئه‌نفال كرى و ولات دفرۆت نه‌ك ب تنێ سزا نه‌داین به‌لكى گه‌له‌ك ژ وان كرنه خودان پله و پایه ژى، نابیت چاڤه‌رێ بیت كو ڤیانا وه‌لاتى چێ ببیت و خه‌لكێ دیكه ئێدى یێ دلسۆز بیت ل گه‌ل ئاخ و ئاڤ و هه‌وایێ وه‌لاتى، ئه‌ڤرۆ كه‌سه‌كێ مینا نوورى مالكى گه‌له‌ك ب ئاشكه‌را دوژمناهیا خوه بۆ كوردستانێ ڕادگه‌هینیت، نوونه‌رێن كوردان ل به‌غدا دچنه پشت و ب شانازیڤه پشتگیریێ لێ دكه‌ن!، نها سه‌رۆكێ هه‌رێما كوردستانێ مه‌سعود بارزانى ل ئه‌لمانیا مینا كاراكته‌ره‌كێ سه‌ره‌كى یێ ئه‌وله‌هیا رۆژهه‌لاتا ناڤین و سه‌رۆك وه‌ڵاته‌ك دهێته پێشوازیكرن و مژارا سه‌ره‌به‌خوه‌یا كوردستانێ د په‌رله‌مه‌نت و كۆنگره‌یێن نێڤده‌وڵه‌تی دا دهێته به‌حس كرن، د سه‌رده‌مێ شۆڕشێن كوردێن باشۆر دا پڕانیا وه‌لاتێن جیهانێ مینا تێكده‌رو مه‌ترسیدار ل پێشمه‌رگه و كوردان دنێرین، ئه‌ڤرۆ پێشمه‌رگه یێ بوویه جهێ شانازیا سه‌رۆكێن وه‌لاتێن جیهانێ كو شكۆیا مه‌زنترین ڕێكخراوا تیرۆرستى یا جیهانێ شكاند، لێ ژ ئالیه‌كێ دیكه‌ڤه جاشه‌كورد یێ ب ئاشكه‌رایی و شانازیڤه خوه‌نیشاندانان ل دژى پێشمه‌رگه و سه‌رۆكێ كوردستانێ دگێرن!، د ناڤ ڤى وه‌لاتیدا كو هێشتا خوینا لاوێن كوردان ب دروستاهى ل سه‌ر به‌رو داران هشك نه‌بوویه كو ب عه‌قلیه‌تا كه‌سێن مینا مالكى هاتیه رێتن، ده‌زگه‌هێن ڕاگه‌هاندنێ ل دژى سه‌روه‌ریا سیاسى و ئابوورى و دبلۆماسیا كوردستانێ ب ئه‌كتیڤى كار دكه‌ن!.
ل سالێن شێستاندا دیارده‌یا جاشاتیێ ب ئاشكه‌را هاته ڕاگه‌هاندن و كۆمه‌كا زۆر یا كه‌ساتیێن كوردان ب هه‌ڤكاریا گه‌له‌ك خه‌لكێن هه‌ژارێن ڤى وه‌لاتى ده‌ستێ خوه كره د ده‌ستێن دوژمنێن بوونا كوردان دا، لێ ده‌مێ به‌یانامه‌یا ئادارێ هاتیه ڕاگه‌هاندن و سه‌ركرداتیا كوردستانێ ب سه‌رۆكایه‌تیا بارزانیێ نه‌مر ڕازى بووى ل به‌رامبه‌ر مافێن ئوتۆنومى بۆ گه‌لێ كورد ل گه‌ل حوكمه‌تا عیراقێ پێكبهێن، هه‌مى جاش و وه‌لاتفرۆش زۆر ب شه‌رمزارى و ڕوى ڕه‌شى ڤه‌گه‌ریانه كوردستانێ داخوازا لێبۆرینێ كر، ل پشتى سه‌رهه‌لدانێ ژى هه‌ر ئه‌ڤ حاله‌ته دوباره بوو، كۆمه‌كێ به‌رده‌وامی دا جاشاتیێ و هه‌ر لێ دهاته بۆرین ژى و پله و پایه‌ژى وه‌ردگرتن!، گه‌لۆ حه‌ق نینه ئێدى جاشاتى و وه‌لاتفرۆشى كو خراپترین دیارده‌نه ببنه كاسبى؟!.
دبیت بۆ گه‌له‌ك ده‌ستكه‌فتان سه‌ركرداتیا كوردستانێ چاڤ نقاندن ل ڤێ دیارده‌یا شاش و به‌رهه‌م نێگه‌تیڤ كربیت، لێ پێدڤیه سه‌ركردایه‌تیا كوردستانێ هزر ل پێنگاڤێن ب له‌ز بكه‌ت، بێ گۆمان د نوكه دا زۆر یا ب زه‌حمه‌ته سه‌ركردایه‌تیا كوردستانێ ب سه‌رۆكاتیا سه‌رۆك بارزانى خوه ب بابه‌تێن لاوه‌كیڤه مژوول بكه‌ن، ژ به‌ر كو مژارا كاركرن ل سه‌ر دامه‌زراندنا ده‌وله‌تا كوردى یا بێ ئه‌لته‌رناتیڤه و پێدڤیه ئه‌ڤ مژاره ئێكلا ببیته‌ڤه، لێ پشتى ڤێ پێنگاڤێ گه‌ره‌كه سه‌ركردایه‌تى هزره‌كا ڕژد ل سه‌ر بنبڕكرنا جاشاتیا ب ئاشكه‌رای بكه‌ت، هه‌بوونا ده‌وله‌ته‌كا سه‌ربخوه ژى دێ پتر ژینگه‌هێ بۆ ڤێ پێنگاڤێ هاریكار كه‌ت.
نيشاندان
WP Facebook Auto Publish Powered By : XYZScripts.com