دهۆك، شاكر ئه‌تروشی:
ئه‌مه‌ل سالح سلێڤانه‌یی، بێژه‌را ده‌نگوباسان ل كه‌نالێ ده‌لال تیڤی ل زاخۆ، د دیداره‌كێ دا بۆ رۆژناما ئه‌ڤرۆ گۆت: دژیه‌كێ بچووك دا من حه‌زدكر دوارێ راگه‌هاندنێ دا كاربكه‌م، پشتی ده‌لیڤه هاتی وێستگه‌ها من یا ئێكێ ل سالا 2002 ل گه‌ل ئێكه‌تیا قوتابیان بوو كو من به‌رنامێ خه‌باتا قوتابیان پێشكێش دكر و ل سالا 2003 وه‌ك بێژه‌ر هاتمه وه‌رگرتن ل رادیۆیا ده‌نگێ كوردستان ل زاخۆ، و ئێكه‌م ده‌زگه‌هێ من لێ كاركری رادیۆیا زاخۆ و كه‌نالێ ده‌لال تیڤی بوون ل زاخۆ، و هه‌تا نوكه یا به‌رده‌وامم.
ئه‌مه‌لێ گۆت: ژبلی كارێ راگه‌هاندنێ من حه‌زدكر ببامه نۆشدارا ده‌روونی و نه‌خۆشان چاره‌كه‌م، یانژی ببامه پارێزه و به‌ره‌ڤانیێ ژمافێن وان كه‌سان بكه‌م یێن تووشی غه‌درێ و نه دادپه‌ریێ بووین، لێ ئه‌ز بوومه راگه‌هاندكار و نوكه ب كارێ خوه یا سه‌رفرازم و د ناڤ مالباتا مه‌دا بتنێ ئه‌ز كارێ راگه‌هاندنێ دكه‌م، و من دڤێت ببمه پره‌ك بۆ گه‌هاندنا ئێش و ئازارێن خه‌لكێ خوه.
ل دووماهیێ گۆت: گه‌له‌ك جاران بۆ چێكرنا ریكلامان داخوازی ژمن هاتیه كرن هه‌تا وه‌ك ده‌نگ ژی، لێ ئه‌ز رازی نه‌دبووم، چونكو من نه‌ڤیایه ل سه‌ر حسابا كارێ خوه قوربانیێ بده‌م و نوكه بێژه‌رم به‌سه بۆ من، و ئه‌ز داخوزارێ ژ هه‌موو هه‌ڤالێن خوه یێن مه‌دیاكار ژی دكه‌م خوه ب پیرۆز بینن، هه‌روه‌سا كارێ خوه ژی مه‌زن ببینن، دیسان پێدڤیه راگه‌هاندكار دوور بن ژ مۆدیلا و خوه عه‌رزكرنێ و پێشكێشكرنا به‌رنامێن بێ مفا و ژدل كاربكه‌ن و ئه‌ز ژ دل سوپاسیا دایك و بابێ خوه هه‌روه‌سا هه‌ڤژینێ خوه (سه‌ردار عه‌لی) دكه‌م كو هه‌رده‌م پشته‌ڤانێن من بووینه و ب هاریكاریا وان دێ یێ به‌رده‌وام بم و شێم خزمه‌تا راگه‌هاندنا كوردی كه‌م، ب تایبه‌ت ل سنۆرێ ئیداره‌یا سه‌ربه‌خوه یا زاخۆ و هیڤیا من ئه‌وه كه‌نالێ ئه‌ز لێ كاردكه‌م رۆژ بۆ رۆژێ پتر پێشكه‌ڤیت و ببیته ده‌نگ و ره‌نگێ خه‌لكێ زاخۆ، هه‌روه‌سا هه‌موو خه‌لكێ ده‌ڤه‌رێ خوه تێدا ببینن.
نيشاندان