ئامێدیێ، مەحمود نهێلی:

د بەردەوامیا گەهاندنا پڕۆژەیێن خزمەتگوزاری دا بۆ سنوورێ دەڤەرداریا ئامێدیێ، ل ژێر چاڤدێری و بەرهەڤبوونا د. عەلی تەتەر، پارێزگارێ دهۆكێ و وارشین سەلمان، دەڤەردارێ ئامێدیێ و بەرەڤان حەمدی، بەرپرسێ لقێ 18 یێ پارتی و رێڤەبەرێن دام و دەزگەهێن پەیوەندیدار بەرێ بنیاتی بۆ پڕۆژەیێ چێكرنا ئاڤاهیێ كۆلیژا پەروەردا بنیات ل ئامێدیێ ب گوژمێ حەفت ملیار و 335 ملیۆن دیناران و پڕۆژەیێ چێكرنا رێكا پەیادە ل دەوروبەرێن كەلها ئامێدیێ ب گوژمێ دو ملیار و 318 ملیۆن دیناران و پڕۆژەیێ چێكرنا ئاڤاهیێ دادگەها بەرایی ل ئامێدیێ ب گوژمێ ئێك ملیار و 651 ملیۆن دیناران هاتە دانان.
هەر د ڤێ سەرەدانێ دا پارێزگارێ دهۆكێ ئاڤاهیێ دانا دەستووریا شۆفێریێ یا ئەلكترۆنی ل رێڤەبەریا هاتنوچوونێ ل ئامێدیێ ب گوژمێ 558 ملیۆن دیناران ڤەكر.
د. عەلی تەتەر، پارێزگارێ دهۆكێ د كۆنگرەكێ رۆژنامەڤانی دا دیار كر، ب مەرەما پتر خزمەتكرنا وەلاتیێن دەڤەرداریا ئامێدیێ، بەرێ بنیاتی بۆ سێ پڕۆژەیێن گرنگ ل سەنتەرێ دەڤەرداریێ‌ هاتە دانان، ژ وانا ژی: ئاڤاهیێ كۆلیژا پەروەردا بنیات و ئاڤاهیێ دادگەهێ، هەروەسا رێیەكا پیادە یا گەشتیاری ب گوژمێ 11 ملیار و 863 ملیۆن دیناران و ئاڤاهیێ دانا دەستووریا شۆفێریێ ب داوی هاتیە و هاتە ڤەكرن و گۆت: «ل دووڤ رازیبوونا مەسرور بارزانی، سەرۆكێ حوكمەتا هەرێما كوردستانێ و ل سەر بودجەیا تایبەت یا پارێزگەهێ ئەڤ پڕۆژە دێ هێنە ئەنجامدان و گۆت: «د دەمەكێ نێزیك دا دێ بەرێ بنیاتی بۆ هەژمارەكا دی یا پڕۆژەیان ل ناوچەداریێن دێرەلۆكێ و كانی ماسێ و بامەرنێ هێنە دانان، ئەنجامدان و پێشكێشكرنا پڕۆژەیێن خزمەتگوزاری دێ ل سنوورێ دەڤەرداریا ئامێدیێ و هەموو دەڤەرداریێن سەر ب پارێزگەها دهۆكێ ڤە بەردەوام بن».

ئاكرێ‌، رەمەزان زەكەریا:

كویستان محەمەد، وەزیرا كار و كاروبارێن جڤاكی كومەلایەتی حوكمەتا هەرێما كوردستانێ و شاندێ د گەل دا سەردانا دەڤەرداریا ئاكرێ كر و ژ لایێ دەڤەردارێ ئاكرێ د. دلاوەر بۆزۆ ڤە هاتە پێشوازیكرن، د ڤێ سەرەدانێ دا هەردو ئالیان ل دۆر كۆمەكا پرس و بابەتێن جودا و پلانێن وەزارەتا كار گەنگەشەكرن.
پاشی ب مەرەما ڤەكرنا دو پڕۆژەیێن وەزارەتا كار، وەزیرا كار و كاروبارێن جڤاكی ژ نێزیكڤە ب بەرهەڤبوونا هەژمارەكا سازیێن ئیداری ل رێڤەبەریا چاڤدێری و گەشەپێدانا جڤاكی ل ئاكرێ پڕۆژەیێ سەنتەرێ تووشبوویێن ئۆتیزمێ‌ و سیستەمێ تاكپەنجەرە و ئاڤاهیێ داینگەها ئاكرێ هاتنە ڤەكرن.

زاخۆ، دلۆڤان هالۆ:

دكتۆر سیروان ئەحمەد نەجار، ڕێڤەبەرێ گشتی یێ ساخلەمیا زاخۆ د كۆنگرەیەكێ ڕۆژنامەڤانی دا دیار كر، ب‌ پشتەڤانیا سەرپەرشتێ ئیدارەیا سەربخوە یا زاخۆ و ب سەرپەرشتیا دكتۆر بژار ئیبراهیم زاخۆیی ژ وەلاتێ سویدێ ئەڤ پێنگاڤە هاتە هاڤێتن و یەكا چارەسەریا مێشكی ل زاخۆ هاتە ڤەكرن.
ڕێڤەبەرێ گشتی یێ ساخلەمیا زاخۆ، ئاماژە ب وێ چەندێ ژی كر، ئەڤ یەكە دێ بۆ چارەسەریا جەلتا مێشكی بیت و ئارمانج ژێ‌ ئەوە ڕێژەیا پەككەفتنێ كێم ببیت و گۆت: «ئەم بشێین باشتر چارەسەریا نەخۆشان ل نەخۆشخانا هەوارهاتنا زاخۆ بكەین و ٢٤ دەمژمێران دێ د خزمەتا وەلاتیان دا بیت و پێدڤی ب دەرڤەی وەلاتی نابن».
دكتۆر بژار ئیبراهیم زاخۆیی، تایبەتمەندێ نەخۆشیێن كۆما دەماران گۆت: «ئارمانج ژ ڤەكرنا ڤێ یەكێ ئەوە؛ ئەم بشێین نەخۆشێن جەلتا میشكی ڕزگار بكەین و ژیانا خوە ب شێوەیەكێ سروشتی ببۆرینن».
دكتۆر بژار گۆتژی: «هەر كەسەكێ تووشی جەلتا مێشكی دبیت، هەكە د دەمێ چار دەمژمێران دا بگەهیننە نەخوەشخانێ، ئەم دێ شێین چارەسەركەین و ژ پەككەفتنێ ڕزگار كەین، ئەڤ پڕۆژە دێ ل زاخۆ دەستپێكەت و پاشی ل دووڤ داخوازا وەزیرێ ساخلەمیێ دێ ل هندەك دەڤەرێن دی یێن كوردستانێ ژی دەستپێكەین».
دكتۆر نەوفەل ڕەشید، ڕاگرێ كۆلیژا نۆشداری ل زانكۆیا زاخۆ دیار كر، ل مەها دەهـ یا سالا بۆری ئەڤ پڕۆژە هاتیە دانان، پشتی گەلەك قووناغ دەربازكرین، ب شێوەیەكێ فەرمی هاتە ڕاگەهاندن و كەڤتە كاری بۆ وان نەخۆشێن تووشی جەلتا مێشكی دبن، هەكە چارەسەری ب دروستی هاتنە وەرگرتن هەر وەكو ئەو كەسە تووشی جەلتێ نەبووی و چ پەككەفتن ژی ل نك وی پەیدا نابن.

هەولێر، قائید میرۆ:

نوونەرێ هەرێما كوردستانێ ل ئوپەراسیۆنێن هەڤپشكێن ئیراقێ ئاشكرا كر، هێرشا ل سەر كێلگەها كۆرمۆر تیرۆرستی بوویە و دو حەفتیێن داهاتی لیوایێن هەڤپشك ل دەڤەرێن ڤالاهیا ئەمنی هەی دێ هێنە جێگیركرن.
لیوا عەبدولخالق تەلعەت، نوونەرێ هەرێما كوردستانێ ل ئۆپەراسیۆنێن هەڤپشكێن ئیراقێ بۆ رۆژناما ئەڤرۆ دیار كر، ئەو هێرشا چەند رۆژێن بۆری ل سەر كێلگەها كۆرمۆر هاتیە كرن هێرشەكا تیرۆرستی بوویە و گۆت: «لیژنەیەكا ڤەكۆلینێ هاتیە پێكئینان بۆ ئاشكراكرنا ئەنجامدەرێن ئەڤێ هێرشا تیرۆرستی، مخابن ڤالاهیەكا زۆر یا ئەمنی هەیە و بوویە ئەگەرێ ئەنجامدانا وان هێرشان، لیژنە ب فەرمانا سەرۆكوەزیرێن ئیراقێ هاتیە پێكئینان و ژوورا ئۆپەراسیۆنێن هەڤپشكێن ئیراقێ نوكە دەست ب ڤەكۆلینێ ل دۆر هێرشێ كریە».
لیوا عەبدولخالق تەلعەت گۆتژی: «دو لیوایێن هەڤپشك هاتینە پێكئینان و بڕیارە هەتا دو حەفتیێن دی بهێنە پڕ چەككرن و ل دەڤەرێن ڤالاهیا ئەمنی هەی بهێنە جێگیركرن، ب تایبەتی ئەو دەڤەرێن بۆ ئابوورا هەرێما كوردستانێ گرنگیا خوە هەیە وەكی كێلگەها غازا كۆرمۆر، چونكی ئەگەر ئەو ڤالاهیا ئەمنی نەهێتە چارەسەركرن دێ بەردەوام هێرش بۆ سەر هەرێما كوردستانێ هەبن».