هەولێر، قائید میرۆ:

شاندەكێ وەزارەتا چاندنا ئیراقێ سەرەدانا هەرێما كوردستانێ كریە و بریكارێ وەزارەتا چاندنا هەرێما كوردستانێ ژی ئاشكرا كر، هەردو وەزارەت دێ رێژەیا وەرگرتنا بەرهەمێ گەنمێ جۆتیاران بۆ ئەڤ سالە دیار كەن.
كەریم سلێمان، بریكارێ وەزارەتا چاندنا هەرێما كوردستانێ‌ بۆ رۆژناما ئەڤرۆ دیار كر، سالا بۆری گەلەك دانوستاندن ل دۆر پشكا گەنمێ هەرێما كوردستانێ هاتنە كرن و بڕیار هاتەدان ئەڤ سالە لیژنەیەكا هەڤپشك پشكا هەرێما كوردستانێ دیار بكەت و گۆت: «دوهی لیژنەیەكا چاندنا بەغدا سەرەدانا هەرێما كوردستانێ كر و ل گەل وەزارەتا چاندنێ كۆمبوون، بڕیارە سەرەدانا پارێزگەهێن دهۆكێ‌ و سلێمانیێ ژی بكەن، چونكی دێ ئەردێ چاندنێ ب گەنمی هێتە دیاركرن و د دووڤ دا رێژا بەرهەمێ ئەڤ سالە دێ‌ هێتە دیاركرن، كانێ‌ چەند گەنم ژ جۆتیارێن هەرێما كوردستانێ بهێتە وەرگرتن».
كەریم سلێمان گۆتژی: «ژ لایێ وەزارەتا چاندنێ و وەزارەتا پلاندانانێ یا هەرێما كوردستانێ ڤە بەرهەڤی هاتینە كرن بۆ دیاركرنا پشكا گەنمێ هەرێما كوردستانێ، لەوڕا ئەز باوەرم دێ ئەڤ سالە رێژەیەكا زێدەتر یا گەنمی ژ لایێ بەغداڤە هێتە وەرگرتن، چونكی سالا بۆری ب تنێ 500 هزار تەنێن گەنمی هاتنە وەرگرتن، بەلێ ئەو رێژا سالا بۆری یا كێم بوو پێدڤیە زێدەتر بهێتە وەرگرتن».

ئامێدیێ، مەحمود نهێلی:

ژ بۆ پتر گرنگیدان ب كەرتێ‌ گەشتوگوزارێ‌ و راكێشانا سەرنجا گەشتیاران بۆ دەڤەرێ‌ و خزمەتكرنا وەلاتیان ب گشتی، نوكە پڕۆژەیێ‌ جوانكرنا باژارۆكێ‌ سەرسنكێ‌ ل سنوورێ‌ دەڤەرداریا ئامێدیێ‌ ل ژێر بجهئینانێ‌ یە و د دەمەكێ‌ نێزیك دا دێ‌ كەڤیتە د خزمەتا خەلكێ‌ دەڤەرێ‌ و گەشتیاران دا.
وارشین سەلمان، دەڤەردارێ‌ ئامێدیێ‌ بۆ رۆژناما ئەڤرۆ دیار كر، ئەڤە ئێك ژ وان پڕۆژەیێن گرنگ یێن ل سنوورێ‌ دەڤەرداریا ئامێدیێ‌ دهێنە بحهینان و گۆت: «ئەڤ پڕۆژەیە نوكە ل ژێر بجهئینانێ‌ یە و دۆرێن دو ملیار و 500 ملیۆن دیناران بۆ هاتینە تەرخانكرن».
ناڤهاتی دیار ژی كر، ئەڤی پڕۆژەی گرنگیەكا تایبەت هەیە هەم بۆ جوانكرنا باژێرێ‌ سەرسنكێ‌ و هەم ژی ژ لایێ‌ ئابۆری و راكێشانا گەشتیاران ڤە و گۆت: «ژبلی ڤی پڕۆژەی، نوكە چەندین پڕۆژەیێن دیترێن خزمەتگوزاری ل دەڤەرا ئامێدیێ‌ ل ژێر بجهئینانێ‌ نە و دێ‌ ئەو ژی كەڤنە د خزمەتا وەلاتیان دا».

دهۆك، لەزگین جوقی:

بەرپرسێ بنگەهێ لالش یێ رەوشەنبیری و جڤاكی ل شاریا دیار كر، ل ژێر درووشمێ كەلتۆر ناسنامەیا گەلانە فەستیڤالا شاریا یا كەلتۆر و پێكڤەژیانێ ل كۆمەلگەها شاریا هاتە ئەنجامدان و دبێژیت: ئارمانج ژ فەستیڤالێ‌ ساخكرنا كەلتۆرێ جڤاكا ئێزدی و دیاركرنا جوانی و كەڤناریا كەلتۆرێ ئێزدیان بوو.
دلگەش سەلیم، بەرپرسێ بنگەهێ لالش یێ رەوشەنبیری و جڤاكی ل شاریا دیار كر، د ڤێ فەستیڤالێ‌ دا چەندین پێشانگەه و بڕگەیێن جودا یێن گرێدای ب كەلتۆر و چاند و پێكڤەژیانا ئێزدیان هاتنە بەرچاڤكرن، ئەوێن ب درێژاهیا دیرۆكێ ب رێیا باب و كالان و نفشێن ل دووڤ ئێك بۆ مە ماین و هاتینە پاراستن و گۆت: «ئەڤ فەستیڤالە بزاڤەكە بۆ پتر خۆرتكرنا گیانێ لێبۆرینێ و پێكڤەژیان و برایەتیێ د ناڤبەرا جڤاكا ئێزدی ب تایبەت و جڤاكا كوردی ب گشتی دا».
ناڤهاتی گۆتژی: «ئارمانج ژ ڤێ فەستیڤالێ ساخكرنا كەلتۆرێ جڤاكا ئێزدی و دیاركرنا جوانی و كەڤناریا كەلتۆرێ ئێزدیان بوو ب رێكا نیشادانا وێنەیێن فۆتۆگرافی و فلكلۆری، جلوبەرگ، خوارن، ئالاڤێن جۆتیاریێ و خوارنێ، یاریێن كەڤن، دیسا د فەستیڤالێ‌ دا رۆلێ ئافرەتا ئێزدی د ب رێڤەبرنا خێزانێ دا و هاریكاریا وێ د پاراستنا كەلتۆرێ جڤاكا ئێزدی دا هاتە دیاركرن».

هەولێر، قائید میرۆ:

سەرۆكێ ئێكەتیا مامۆستایێن كوردستانێ ئاشكرا كر، پرۆسا پلە بندكرنا مامۆستایان كار تێدا دهێتە كرن و گەهشتیە قووناغا دووماهیێ و دبێژیت: ل گەل لیستا مووچەیێ مەها داهاتی لیستا پلە بلندكرنا مامۆستایان رادەستی بەغدا دێ هێتە كرن، هەتا بهێتە پەسەندكرن.
عەبدولواحد محەمەد حاجی، سەرۆكێ ئێكەتیا مامۆستایێن كوردستانێ بۆ رۆژناما ئەڤرۆ دیار كر، وەزارەتا پەروەردێ مژوولی بەرهەڤیانە بۆ پلە بلندكرنا مامۆستایان و دەمێ بلندكرنا پلەیێن مامۆستایان هاتیە راگرتن دێ بۆ هێتە هەژمارتن و گۆت: «هەر مامۆستایەكی ل گورەی سالێن خزمەتێ پلەیێن وی دێ هێنە بلندكرن، مینا هەموو فەرمانبەرێن حوكمەتێ پلەیێن مامۆستایان ژی دێ‌ هێنە بلندكرن، ئەڤە پێنگاڤەكا باشە ل گەل چارەسەربوونا ئاریشا گیرۆبوونا مووچەی پلەیێن وان ژی بهێنە بلندكرن».
عەبدولواحد محەمەد گۆتژی: «ل گەل لیستا مووچەیێ مەها داهاتی، لیستا مامۆستایان ژی ب پلەیێن نوو رادەستی وەزارەتا دارایی و ئابووریا ئیراقێ دێ هێتە كرن، هەتا بهێتە پەسەندكرن و پارە بۆ بهێتە مەزاختن، بەردوام ئێكەتیا مامۆستایان كاربۆ دەسپێكرنا پرۆسا بلندكرنا پلەیێن مامۆستایان كریە، كو ژ بەر قەیرانا دارایی چەندین سالە پلەیێن فەرمانبەر و مامۆستایان نەهاتینە بلندكرن».

لەزگین جوقی:

رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ راگەهاند، گەلەك ئاوارە هەنە خانیێن وان ل شنگال خراب بووینە، نوكە جهێ ئاكنجیبوونێ نینە، ل شنگال حوكمەتا ئیراقێ‌ هێشتا خەلكێ شنگال قەرەبوو نەكرینە و بریار بۆ دائێخستنا كەمپێن ئاواران دایە و پێدانا چوار ملیۆن دیناران بۆ زڤرینا ئاواران گەلەك كێمە، ب كێماسی پێدڤیە حوكمەتا ئیراقێ‌ 10 ملیۆن دیناران هەتا 15 ملیۆن دیناران بۆ زڤرینا ئاواران تەرخان بكەن».

پیر دەیان جەعفەر بۆ رۆژناما ئەڤرۆ دیار كر، ئاوارە بۆ زڤرینا سەر جهێن خۆ د ئازادن و هیچ ئاوارەك ب زۆرداری ناهێتە زڤراندن، پێدانا چوار ملیۆن دیناران بۆ زڤرینا هەر خێزانەكا ئاوارە كێمە و پێدڤیە هەر خێزانەكا ئاوارە دەمێ ژ كەمپان دزڤریتە شنگالێ ب كیماسێ 10 هەتا 15 ملیۆن دینار ژلایێ حوكمەتا ئیراقێ‌ ڤە پێ بهێنە دان و هەتا ئاوارە دناڤ كەمپان دا مابن حوكمەتا هەرێما كوردستانێ دێ بەردەوام هاریكاری و پشتەڤانییا ئاواران كەت».
رێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ دیار كر: هەتا نوكە پتر ژ 330 هزار ئاوارە دناڤ كەمپێن سنورێ پارێزگەها دهۆكێدا دژین و هندەك ژی ژ دەرڤەی كەمپان دژین و حوكمەتا ئیراقێ‌ دبێژیت، ب تنێ‌ ئاوارێن دناڤ كەمپان دا دێ چوار ملیۆن دیناران دەمێ زڤرنە شنگالێ وەرگرن و ئاوارێن ژ دەرڤەی كەمپان ژ پێدانا چوار ملیۆن دیناران هاتینە بێ بەهركرن».
پیر دەیان جەعفەر گۆت ژی:» حوكمەتا هەرێما كوردستانێ نوكە د وارێ دابینكرنا ئاڤ و كارەب و پەروەردە و ساخلەمی و باژێرڤانیێ دا هەڤكارییا ئاواران دكەت و دێ هاریكاری و پشتەڤانیا حوكمەتا هەرێما كوردستانێ بۆ ئاواران یا بەردەوام بیت، نوكە حوكمەتا ئیراقێ‌ فشارەكا گەلەك مەزن ل سەر ئاواران چێكریە بۆ زڤرینا شنگالێ خەلك ناڤێن خۆ تۆمار دكەن».
خۆیا كر، حوكمەتا ئیراقێ‌ بریار بۆ دائێخستنا كەمپێن ئاواران دایە و حوكمەتا ئیراقێ‌ دبێژیت نابیت كەمپ بمینن، هەر ئاوارەكێ بڤێت نە ڤەگەریت دشێت ل پارێزگەهەكا هەرێما كوردستانێ ئاكنجی بیت، ئەم دبینن ئەڤە بریارەكا سیاسی یە و پێدڤیە هەڤكاریا ئاواران بۆ زڤرینا شنگالێ بهێتە كرن دا كو گوهۆرینا دیموگرافی ل شنگالێ دروست نەبیت و خەلكێ شنگالێ بشێن ڤەگەرن».
گۆت ژی: حوكمەتا هەرێما كوردستانێ ل سەر هەڤكاری و پشتەڤانیا ئاواران دێ یا بەردەوام بیت و ئاوارە بۆ زڤرینا سەر جهێن خۆ ئازادن و هیچ ئاوارەك ب زۆرداری ناهێتە زڤراندن، هەتا ئاوارە دناڤ كەمپان دا مابن ئەم دێ بەردەوام هاریكاری و پشتەڤانییا ئاواران كەین».
گۆت ژی:» نوكە د وارێ دابینكرنا ئاڤ و كارەب و پەروەردە و ساخلەمی و باژێرڤانیێ دا نوكە ب تنێ حوكمەتا هەرێما كوردستانێ هەڤكارییا ئاواران دكەت و دێ هاریكاری و پشتەڤانیا حوكمەتا هەرێما كوردستانێ بۆ ئاواران یا بەردەوام بیت».
تەكەز كر، نوكە حوكمەتا ئیراقێ‌ فشارەكا گەلەك مەزن ل سەر ئاواران دكەت بۆ زڤرینا شنگالێ خەلك ناڤێن خۆ تۆمار دكەن، ژبەر كو خەلكێ نەچار دكەن بزڤرنە شنگالێ ئەم دخوازین هەڤكاریا ئاواران بهێتە كرن، دەمێ دزڤرنە شنگالێ خەلكێ زیانڤێكەفتێن شنگالێ هەمی بهێنە قەرەبوو كرن و رەوشا ئەمنی باش بیت هەتا خەلك بشێن ڤەگەرن».