سەرۆك مەسعود بارزانی ل رۆژا 17 ئەڤێ مەهێ پێشانگەها هەولێرێ یا نێڤدەولەتییا 16 یا پەرتووكێ ڤەكر.
ئەو پێشانگەهە كو ژ ئالیێ دەزگەهێ مەدا یا راگەهاندنێ و رەوشەنبیری هاتییە رێكخستن، ب بەرهەڤبوونا سەرۆك بارزانی و هەژمارەكا مێهڤان و نوونەرێن وەلاتان و كەسایەتیێن سیاسی و رەوشەنبیر و رۆژنامەنڤیس دەست ب كارێن خوە كر و هەتا رۆژا 27/4/2024 دێ یا بەردەوام بیت.
سەرۆكێ هەرێما كوردستانێ، نێچیرڤان بارزانی پشكداری ددیدارا سلێمانیێ ل زانكۆیا ئەمریكی ل سلێمانیێ دا كر و تێدا پەیڤەك پێشكێشكر و د پشكەك ژ پەیڤا خوە دا گوت» گەلێ ئیراقێ ل سالا 2005 ل سەر دستوورەكێ گونجای رێككەفتن. دستوورێ ئیراقێ ب پەسەندكرنا سیستەمێ فیدرالی، رێكا هەڤپشكییەكا گونجای بۆ هەموو نەتەوە و پێكهاتەیێن ئیراقێ دروستكر. ئەو هەڤپشكییەژی، ئیراقێ ب هێز دكەت. گەلەك یا گرنگە سیستەمێ فیدرالی ب كریار و تمامی بهێتە بجهئینان. نابیت باوەرنەبوونا ئالییەكی، یان چەند ئالییان ب فیدرالیێ، سیستەمی ل ئیراقێ لەنگ بكەت و بجهئینانا دستووری ب راوەستینیت.
هەموو نەتەوە و پێكهاتە ل ئیراقێ، دڤێت ب كریار خوە ب هەڤپشك د رێڤەبرنا ئیراقێدا ببینن. نابیت هیچ پێكهاتەیەكێ ئیراقێ بهێتە پشتگوه هاڤێتن، چونكە ئەو چەندە دێ رێكەكا خراب ل ئیراقێ ڤەكەت. ئەو رێك پێشتر ل ئیراقێ هاتییە تاقیكرن و جهێ نەخوەشیێ بوو بۆ هەموو خەلكێ وەلاتی.
سەرۆك وەزیرێن ئیراقا فیدرالی محەمەد شیاع سۆدانی، خودان هزرەكا بەرفرهەیە و باوەرییەكا مەزن ب دستوورێ ئیراقێ یا هەی. ئەوێ هزرێ سەقامگیرییەكا باش د رێڤەبرنا حوكمەتا وی دا ل ئیراقێ دروستكرییە. خەلكێ ئیراقێ هەست ب ئەوێ گوهۆڕینێ دكەت. ئەو هزرە و ئەو شێوەیێ بڕێڤەبرنێ. دشێت ئیراقێ بەر ب پێشڤە ببەت و دەلیڤەیەكا گەلەك باشە بۆ ئیراقێ.
بەلێ ئەڤ بۆچوونا سەرۆكێ وەزیران، پێدڤی ب پشتەڤانیێ یا هەی، ئالیێن سیاسی یێن ئیراقی نوكە د بن ئەوێ بەرپرسیارەتیێدانە كو پشتەڤانیێ ل حوكمەتا ئیراقا فیدرال بكەن. ئیراقێ ئاسۆیەكێ رۆهن یێ هەی هەكە دستوور و سیستەمێ فیدرالی ب تمامی بهێتە بجهئینان.
شێوەیێ رەفتاركرنێ ل گەل هەرێما كوردستانێ مەزنترین ئەزموونە بۆ سیستەمێ سیاسیێ نوو ل ئیراقێ. ئیراقەكا ب هێز یا گرێدایە ب هەبوونا هەرێما كوردستانێ یا ب هێز، هەروەسا هەرێما كوردستانێ یا ب هێز ژی، گرێدای ئیراقەكا فیدرال و سەقامگیرە.
هیچ كێشەیەك نینە ل ئیراقێ نەهاتە چارەسەركرن، هەكە دستوور بهێتە بجهئینان. دستوورێ ئیراقێ تایبەتمەندییا هەموو پێكهاتەیێن ئیراقێ د پارێزیت، بجهئینانا دستووری، ئەم هەموو دێ وەلاتیێن پلە ئێك بین د ئیراقێدا.
پۆختەیا ئاخڤتنا ناڤ دلێ خەلكێ كوردستانێ، داخوازییا ئێكڕێزییا ئالیێن سیاسییە. جینۆساید و چەوساندنا گەلێ كوردستانێ، وەكرییە دیرۆك ئێك ئارمانجێ بێخیتە دلێ كوردان، ئەوژی ئێكبوونە. ئەو ئاراستەیا هەرە درستە و نیشانا هشیارییا گەلێ كوردستانێیە.
مە ب دوبەرەكیێ ناڤودەنگییەكا باش ل جیهانێ دروست نەكریە، بەلكو ب دیموكراسیێ و ئاڤەدانكرنێ و سەقامگیریێ د ئەڤێ دەڤەرێدا، مە ناڤودەنگییا خوە دەركریە. هەر كەسەكێ بەری 30 سالان هاتبیتە كوردستانێ و ئەڤرۆ سەرەدانا كوردستانێ بكەت، نا نیاسیت. پشتی ئەنفالێ و كێمیابارانكرنێ، ئەو ئاڤەدانكرنا مە دروستكری. نوكە ب شارەزاییا زێدەتر، دشێین ئەوێ پێشكەفتنێ باشتر و ب لەزتر بكەین.
نوكە مە نڤشەكێ گەلەك خودان شیان و ئاست بلند پەروەردە كریە. نڤشەك ل كوردستانێ یێ دروستبووی، ئەم هەموو گەلەك د خوەشحالین ب ئاست بلندی و هشیارییا وی. هەكە ئالیێن سیاسی ب دروستكرنا دەلیڤەیەكا گونجای، دەرفەتێ بۆ ئەوی نڤشی دروست بكەن، دێ كوردستانێ گەلەك زێدەتر پێشكەڤیت.
هندەك كەس پرسیار ژ من دكەن: بۆچی یێ گەشبینم؟ ب راستی، ژێدەرێ گەشبینییا من د خۆڕاگری و فرەشیانێن خەلكێ كوردستانێدایە. نوكە ژی دبێژم: مە بۆرییەكێ نەخوەش هەبوو، بەلێ پاشەڕۆژەكا گەش یا بەراهییا مە.
گەلێ كوردستانێ یێ ئێكگرتییە، پێدڤییە ئالیێن سیاسی ژی وەكو گەلێ خوە بۆ بەرژەوەندییا نیشتمانی، رێكبكەڤن. ب ئەوێ شێوەی ئەم دشێن هەلبژارنێن رۆهن و دادپەروەرانە بكەین، ب رازیبوون و پشكدارییا هەموو ئالییان.
پەرلەمانێ كوردستانێ ئەزموونەكا گەلەك گرنگە د دەڤەرێدا، پێدڤییە بپارێزین. حوكمەتا هەرێما كوردستانێ وەلاتەك پشتی ئەنفالێ و كێمیابارانكرنێ دروستكریە، دڤێت ئەم هەموو پشتەڤانیێ لێ بكەین. پێشمەرگەیێن قەهرەمان ئەفسانەیا داعشێ شكاند و بوونە جهێ ناڤودەنگییەكا مەزن بۆ هەرێما كوردستانێ ل جیهانێ. ئەڤە هەموو جهێ ئەوێ چەندێ نە كو د گەشبین بین و هەر چ زوویە د ناڤخوەییا خوە دا رێكبكەڤین. ب رێككەفتنا مە، ئاڤەدانكرنا زێدەتر و سەركەفتنا زێدەتر دێ بینین.
د شیانێن هەموو كەسان دایە رەخنێ و گازندێ ژ دەستهەلاتێ و ژ دەستهەلاتداران بكەن، دشیاندایە ب هەموو رێكێن مەدەنیانە نەرازیبوونێ دەرببڕن، بەلێ ل دوماهیێ دڤێت ئەم هەموو سەرەرای جوداهییان، تشتەكی بپارێزین و بەرگریێ ژێ بكەین و ل سەر هەموو تشتەكی بهێلین و كۆمكەرێ مە هەموویانە، كۆمكەرێ مە هەموویان دڤێت نیشتمان بیت.
هێز و حزب و سەركردەیێن سیاسی دێ هێن و چن، بەلێ نیشتمان، وەلات، كوردستان هەر دێ مینیت. نابیت كوردستانێ بكەینە قوربانییا تورەیی و نەرازیبوونێ ژ دەستهەلاتێ و سیاسەتمەداران. گەلێ كوردستانێ یا سەلماندی شیانێن بەرگرییا هەموو زەحمەتییان و شیانێن راستكرنەڤیا هەموو كێماسییان یا هەی، ژ بەر ئەوێ چەندێ هەموو نەخوەشی دێ دەرباز بن و هەموو ناكۆكی دێ چارەسەر بن، چونكە ل دوماهیێ بۆ چارەسەریێ، ئەم هەموو پێكڤە دێ ل سەر ئێك مێز رۆنین، ژ بەر ئەوێ چەندێ كوردستان ژ مە هەموویان مەزنترە، نیشتمان ژ مە هەموویان ب هێزترە.
ب، سهرجان مەحمود:
نڤیسەر و ڤەکۆلەرەکێ ناڤدار یێ تورکیا دیار دکەت، یا نها د ناڤبەرا ئیران و ئسرائیلێ دا روو ددەت د راستی دا قۆناغا سیێ یا پرۆژێ ئەمریکا یە ل رۆژهەلاتا ناڤین و ئەمریکا دڤێت ئیرانێ ژی وەکو ئیراقێ و سووریێ پارچە بکەت.
لهڤهند گولتهکین رۆژنامهڤان و نڤیسهرێ ناڤدار یێ تورکیا سەبارەت ب ئالۆزیێن د ناڤبهرا ئیرانێ و ئسرائیلێ دا راگههاند کو ئهمریکا 25 سالن کار بۆ بجهکرنا پرۆژهیا مهزن یا رۆژههلاتا ناڤین دکهت و گۆت: (ئهمریکا پێنگاڤا یهکهم ل ئیراقێ ئاڤێت و ئیراق ژ ههڤ پارچه کر و نه ب فهرمی بیت ژی نها ئیراق بوویه سێ پارچه. پارچهک ئالیێن سوننه، پارچهک ئالیێ شیعە و پارچێ سێیهم ژی هەرێما کوردستانێ یە. پشتی ئیراقێ پێنگاڤا دویهم ژی ب بهارا عهرهبی هاته دهستپێکرن و د ڤێ چارچۆڤێ دا لیبیا ژ ههڤ پارچه کرن، مسر و مغرب کرنە ژێر کۆنترۆلا خوه و سووریێ ژی ژ ههڤدو پارچه کرن و نها سووریێ ژی د ناڤ خوه دا بوویه سێ پارچه. ل سووریێ ژی بهشهک د دهستێ کۆمێن چهکدارێن سوننه دایه و پشکهکا وێ ژی د دەستێ هێزێن کوردی دایە و پشکهک ژی د دهستێ رژێما شامێ دایه. ئانکۆ هەکە ئەم بەرێ خوە بدەینێ پێنگاڤ ب پێنگاڤ پرۆژێ ئەمریکا ل رۆژهەلاتا ناڤین بجه دبیت).
ناڤهاتی ههروهسا راگههاند ژی کو نها دۆرا ئیرانێ هاتیه و ئهمریکا و ناتۆ بۆ بجهکرنا قۆناغا سێیهم یا پرۆژهیا مهزن یا رۆژههلاتا ناڤین شهڕ د ناڤبهرا ئسرائیلێ و حهماسێ دا دهرخستن و گۆت: (شهرێ د ناڤبهرا ئسرائیلێ و حهماسێ دا بۆ دروستکرنا بنگههێ شهرێ ل دژی ئیرانێ هاته دهستپێکرن و ئیران رۆژ ب رۆژێ دکهڤیته ناڤ پیلانا ئهمریکا و نه دووره شهڕ د ناڤبهرا ئهمریکا و ئیرانێ دا دهستپێ بکەت. ئهمریکا و ناتۆ ئهڤ دهمهک درێژه کوردان و ئازەریێن ئیرانێ بۆ شهڕێ ناڤخوە ژی ئاماده دکهن و ئهو هێزا ئیرانێ نینه د شهڕهکی ناڤخوەیی و د شەڕەکێ ل گەل ناتۆیێ دا یهک پارچه بمینیت. ئیران ژ یاریێن ئهمریکا و ناتۆیێ ئاگەهداره و بۆ ڤێ یهکێ ناخوازیت بهرسڤێن دژوار بدهته ئسرائیلێ).
لهڤهند گولتهکین د دووماهیا ئاخڤتنا خوه دا ژی راگههاند کو د چارچۆڤێ پرۆژهیا مهزن یا رۆژههلاتا ناڤین دا تورکیا د رێزا چارێ دا جه دگریت و ئهمریکا بۆ بجهکرنا خالا سێیهم و چارهم یا پرۆژهیا خوه پشتهڤانیا ئهردۆغانی کر و ل سهر دهستههلاتێ هێلا و گۆت: (ل ئیرانێ و تورکیا زەمینە هەردەم بۆ شەڕەکێ ناڤخوەیی هەیە و ب دهستێوەردانێن دهرڤه ههر دو دهولهت ژی دشێن ببنە مهیدانا شهڕەکێ دەمدرێژ).
وەزارەتا بەرگریێ یا تایوانێ راگەهاند، بەری دو رۆژان ٢١ فرۆکێن شەڕی یێ چینێ سنۆرێ وەلاتێ وان دەربازی کرینە و ئەو یەک ژی بنپێکرنا قانوونێن نێڤدەولەتی یە و ئەو یەک ژی نیشا ددەت چینێ دڤێت ئالۆزیان بۆ تایوانێ دروست بکەت.
وەزارەتا بەرگریێ یا تایوانێ ئەو یەک ژی دیار کریە، بەری نها ژی هێزێن سەربازی یێن چینێ ل سەر سنۆرێ وان مانۆرێن سەربازی کرینە و ئەو یەک ژی نیشا ددەت نیەتا بەرپرسێن چینێ یا خرابە.
ئەو یەک د دەمەکێ دایە کو بەری نها بەرپرسەکێ وەزارەتا دەرڤە یا ئەمریکا ئاماژە ب ڤێ یەکێ کربوو چینێ دڤێت تایوانێ داگیر بکەت و ژ بەر ڤێ یەکێ ژی دەست ب مانۆرێن سەربازی ل سەر سنۆرێ تایوانێ کریە، لێ هەر وی دەمی بەرپرسێن چینێ ئەو یەک رەت کرن و داخواز ژ تایوانێ کرن کو نەبیتە پشکەک ژ پیلانێن ئەمریکا بۆ تێکدانا رەوشا دەڤەرێ، چونکی ئەمریکا دڤێت ئالۆزیێن نوو بۆ چینێ دروست بکەت.
وەزیرێ دەرڤە یێ ئیرانێ راگەهاند، بەرپرسێن ئسرائیلێ یاریێ ب ئاگری دکەن، دڤێت ئسرائیل رێزێ ل قانوونێن نێڤدەولەتی بگریت و دەست ژ دروستکرنا ئالۆزیان ل دەڤەرێ بەردەت، هەکە ئسرائیلێ بڤێت جارەکا دی ئێرشی ئیرانێ بکەت یان ژی ئالۆزیان بۆ ئیرانێ دروست بکەت وەکو ئیران دێ ڤێجارێ بەرسڤا وان گەلەک یا جودا بیت و دێ وەسا کەن کو ئسرائیل ژ کریارێن خوە پەشیمان بیت. حسێن ئەمیر عەبدوللاهیان ئەو یەک ژی دیار کر، ئیرانێ د چارچۆڤێ پاراستنا رەوا دا ئێرشی ئسرائیلێ کر و ئەڤ پەیامە ژی دا هەموو جیهانێ کو ئیرانێ ئەو شیان یێت هەین دشێت ل هەر جهەکێ بەرەڤانیێ ژ خوە بکەت.
ل ئالیێ دی چاڤدێرێن سیاسی دیار دکەن د ئێرشا ڤێ دووماهیێ یا ئسرائیلێ بۆ سەر بنگەهەکێ سەربازی ل باژێرێ ئیسفەهان یێ ئیرانێ زیانێن گەلەک مەزن گەهشتینە وی بنگەهی و هەتا نها ژی بەرپرسێن ئیرانێ بەحسێ ئێرشا ئسرائیلێ نەکرینە.
ئامێدیێ، مەحمود نهێلی:
ژ ئەنجامێ كەفتنێ د كەڤرەكی دا ل چیایێ گەرەگۆ ل سنوورێ ناوچەداریا سەرسنكێ، گەنجەكێ 35 سالی گیانێ خوە ژ دەست دا.
ل دووڤ ئاخڤتنا كەسوكارێن وی پشتی دیار نەمانا وی ل چیایێ هنداڤی ناوچەداریا سەرسنكێ، تەرمێ وی هاتە دیتن، كو د چیایی دا فڕیە.
وی كەسێ نێزیك ژ كەسوكارێن قوربانی بۆ رۆژناما ئەڤرۆ دیار كر، ئەڤ وەلاتیە، كو ئاكنجیێ تاخێ ئازادی یێ ناوچەداریا سەرسنكێ یە ناڤێ وی (گوهدار ئاڤدەل)ە و ژییێ وی دۆرێن ٣٥ سالانە و بۆ مەرەما ئینا گیایێ بهارێ قەستا چیایی كریە و گۆت: «پشتی بێ سەروشوون بوونا وی خەلكێ دەڤەرێ د دووڤ دا چوویە و پشتی جهێ ئەوی قەستكریێ، دیار بوویە، كو د چیایی دا فڕیە و گیانێ خوە ژ دەست دایە».
دهێتە زانین ناڤهاتی خێزانداربوویە و زارۆ هەنە و بۆ مەرەما گیایێ بهارێ چو بوویە چیایی، لێ ب مخابنی ڤە ژ ئەنجامێ كەفتنا وی د كەڤرەكی دا گیانێ خوە ژ دەست دا.
دلڤین رەشید:
پشتی بورینا 30 رۆژان تەرمێ سنێلەكێ ناوچەداریا خانكێ ب ناڤێ رۆژڤان ئدریس شمۆ هەویری یێ 16 سالی د رووبارێ دیجلەی دا هاتە دیتن، كو ل 20ی مەها ئادارێ ل دەمێ چێبوونا لەهیێن دهۆكێ بەر ئاڤێ كەفتبوو و بەرزەببوو.
زەردەشت شێخ شامۆ، رێڤەبەرێ ناوچەداریا خانكێ بۆ رۆژناما ئەڤرۆ دیار كر، 20ی مەها ئادارێ خۆدێ ژێ رازی رۆژڤان ئدریس بەرزەببوو، تیمێن بەرگریا شارستانی ب هەلیكۆپتەرێ و بەلەم و ب هاریكاریا هێزێن پێشمەرگەی و پۆلیس و ئاسایش و كەسانێن حكومی و حزبی و خەلكێ ناوچەداریا خانكێ بەردەوام ل تەرمێ وی دگەڕیان، سوپاس بۆ خودێ دوهی 20/4/2024 تەرمێ وی د رووبارێ دیجلەی دا هاتە دیتن.
زەردەشت گۆت: «پشتی تەرمێ وی بۆ نۆشداریا داد ل دهۆكێ هاتیە ڤەگوهاستن، دیاربوو لەشێ وی وەكو خوە مایە و چو برینێن گومانكری ل سەر نەبوون، ئەگەرێ مرنا وی ب تنێ خەندقین بوو د ئاڤا رووبارێ دیجلەی دا و هەر دوهی ل خانكێ هاتە ڤەشارتن».
هەولێر، قائید میرۆ:
رێڤەبەرێ گشتیێ تۆماركرنا كۆمپانیان خویا كر، تۆماركرنا كۆمپانیان ب شێوەیەكێ بەرچاڤ زێدەبوویە و رسوماتێن تۆماركرنا كۆمپانیان ژی هاتینە كێمكرن و وەلاتی دشێن د دەمێ دەمژمێرەكێ دا ب بهایەكێ گەلەكێ كێم ب شێوەیێ ئەلكترۆنی كۆمپانیا خوە تۆمار بكەن.
بلند محەمەد، رێڤەبەرێ گشتیێ تۆماركرنا كۆمپانیان بۆ رۆژناما ئەڤرۆ دیار كر، ل هەرێما كوردستانێ 34 هزار كۆمپانیێن ناڤخوە و بیانی هاتینە تۆماركرن و گۆت: «پشتی پرۆسا چاكسازیێ د بیاڤێ تۆماركرنا كۆمپانیان دا، پێشكەفتنێن مەزن چێبووینە، چونكی بوویە ئەگەرێ تۆماركرنا كۆمپانیان ل هەرێما كوردستانێ، ژ بەركو پرۆسا تۆماركرنا كۆمپانیان بوویە ئەلكترۆنی و ب تنێ د دەمێ چەنددەمژمێرەكان دا هەر كەسەك دشێت كۆمپانیێ تۆمار بكەت، ب تنێ سالا بۆری دو هزار و 600 كۆمپانی هاتینە تۆماركرن و ئەڤ سالە ژی رێژەیا تۆماركرنا كۆمپانیان ژ سالا بۆری زێدەترە».
بلند محەمەد گۆتژی: «پێنج ملیار دینار داهات بۆ حوكمەتێ هاتیە زێدەكرن و بڕیارە نێزیك رسوماتێن تۆماركرنا كۆمپانیان ب شێوەیەكێ بەرچاڤ بهێنە كێمكرن و بۆ تۆماركرنا كۆمپانیێ ب تنێ 100 دۆلار دێ هێنە وەرگرتن، سالا 2019 وەرە هەتا نوكە سەرەڕای قەیرانا دارایی و هاتنا ڤایرۆسێ كۆرۆنایێ تۆماركرنا كۆمپانیان گەهشتیە ئاستەكێ بلند و نەه هزار كۆمپانی ل سالا 2019 هەتا نوكە هاتینە تۆماركرن».
هەولێر، قائید میرۆ:
بەرپرسەكێ وەزارەتا كار و كاروبارێن جڤاكی یا حوكمەتا هەرێما كوردستانێ ئاشكرا كر، پڕۆژەیەك ل بەغدا هاتیە بەرهەڤكرن بۆ زێدەكرنا مووچەیێ كێمئەندامان و دبێژیت: ئەگەر پڕۆژە هاتە پەسەندكرن، ئەم وەكو هەرێما كوردستانێ ژی دێ داخوازكەین كێم ئەندامێن هەرێما كوردستانێ ڤەگریت و لیستا مە ژی یا بەرهەڤە.
هەوراز خۆشناو، رێڤەبەرێ چاڤدێریا جڤاكی ل وەزارەتا كار و كاروبارێن جڤاكی بۆ رۆژناما ئەڤرۆ دیار كر، پڕۆژەیەك ل بەغدا هاتیە بەرهەڤكرن و ل گورەی ئەڤی پڕۆژەی 100 هزار دینار ل سەر مووچەیێ كێمئەندامان دێ زێدەبن و گۆت: «ئەگەر ئەو پڕۆژە بهێتە پەسەندكرن، ئەڤە هەرێما كوردستانێ دێ داخوازەكێ پێشكێشكەت، كو كێم ئەندامێن هەرێما كوردستانێ ژی ڤەگریت، وەزارەتا كار و كاروبارێن جڤاكی ژی دێ هەموو ئاسانكاریان كەت و لیستا ناڤێن كێم ئەندامان ژی یا بەرهەڤە».
هەوراز خۆشناو گۆتژی: «نوكە ل سەرانسەری هەرێما كوردستانێ 74 هزار كێم ئەندام ژ وەرگرتنا مووچەیێ مەهانە مفادارن و ناڤێن زێدەتری 13 هزار كێم ئەندامان ژی بۆ سەرۆكایەتیا جڤاتا وەزیران هاتیە بلندكرن، چاڤەڕێی بڕیارا سەرۆكایەتیا جڤاتا وەزیرانین بۆ مەزاختنا مووچەیێ وان 13 هزار كێم ئەندامان ژی، چونكی هەموو رێكارێن قانوونی و لیژنەیێن پشكنینێ تەمامكرینە و ب تنێ بڕیارا جڤاتا وەزیران یا مای».
هەولێر، قائید میرۆ
پەیڤدارێ رێڤەبەرایا گشتی یا حەج و عومرێ ل هەرێما كوردستانێ ئاشكراكر، بەرهەڤی دهێنەكرن بۆ ئەنجامدانا پرۆسا حەجا ئەڤ سالە و ل گۆرەی هژمارا ئاكنجیان رێژەیا حەجیان هاتیە دیاركرن. ل دۆر حەجا بازرگانی ژی دبێژیت: چو بنەما بۆ حەجا بازرگانی نینە و هەر كەسەكێ بهێتە خاپاندن و برن بۆ حەجێ ب رێكێن نە فەرمی، د دەمێ ئاشكرابوونێ دا، دێ ژلایێ وەلاتێ سعودیێ ڤە سزایێن دژوار بۆ هەبن و هەرێما كوردستانێ ژێ بەرپرسیار نینە.
كاروان ستونی، پەیڤدارێ حەج و عومرا هەرێما كوردستانێ بۆ رۆژناما ئەڤرۆ دیار كر» بەرهەڤی بۆ ئەنجامدانا پرۆسا حەجا ئەڤ سالە دهێنەكرن و ب پشتەڤانیا وەزیرێ ئەوقافێ و رێڤەبەرێ گشتیێ حەج و عومرێ هندەك رێكار تەمام بووینە و یێن دی ژی كار لسەر دهێتەكرن، بۆ جارا ئێكێ یە ڤیزا سعودیێ ل هەرێما كوردستانێ دهێتە وەرگرتن و ل سالێن بۆری پێدڤی بوو ل دەرڤەی هەرێمێ ڤیزا سعودیێ بهێتە وەرگرتن.
زێدەتر گۆت: بەری دەسپێكرنا پرۆسا حەجا ئەڤ سالە دێ هەموو بەرهەڤیێن ڤێ پرۆسێ تەمام ببن، پشتی هەماهەنگیا دناڤبەرا وەزارەتا ئەوقافا هەرێما كوردستانێ دگەل دەستەیا حەج و عومرا ئیراقێ گەهشتینە رێكەفتنێ، ئەڤ سالەژی مینا سالا بۆری پرۆسا حەجێ ب رێیا ئاسمانی و یا هشكاتی ژی بهێتە ئەنجامدان، ئەڤ سالە ل هەرێما كوردستانێ ئێك هزار و ٥٠٠ وەلاتیێن هەرێما كوردستانێ ب رێیا هشكاتیێ دێ گەشتا حەجێ ئەنجامدەن و هەر حەجیەك ژی دێ پێنج ملیۆن و 500 هزار دیناران مەزێخیت.
خویاژی كر، ئەڤێن ب رێیا ئاسمانی گەشتا حەجێ ئەنجامبدەن، بهایێ حەجێ ب رێیا ئاسمانی شەش ملیۆن و 350 هزار دینارن، بزاڤێن زۆر هاتنەكرن هەتا ئەنجامدانا پرۆسا حەجێ ب پارەیێ ئیراقی بیت نەك دۆلار و وەزارەتا ئەوقاف و كارۆبارێن ئاینی ژی پارەیەكێ زۆر مەزاختیە ب مەرەما ئەرزانكرنا بهایێ گەشتا حەجێ بۆ وەلاتیێن هەرێما كوردستانێ، چونكو ئەگەر بزاڤێن وەزارەتا ئەوقافێ نەبانە، ئەڤە بهایێ گەشتا حەجێ زۆر بلندتربوو ژ بهایێ نوكە هاتیە دیاركرن، ل وەلاتێ سعودیێ دێ هەموو خزمەتگوزاری پێشكێشی حەجیێن هەرێما كوردستانێ هێنەكرن و حوكمەتا هەرێما كوردستانێ ژی، ب تایبەتی كابینا نەهێ یا رژدە ل سەر خزمەتكرنا وان وەلاتیێن گەشتا حەجێ ئەنجامددەن، ئەڤا خزمەتگوزاری بیت ل وەلاتێ سعودیێ پێشكێشی حەجیان دهێتەكرن.
كاروان ستونی گۆت ژی» ئەڤ سالە ل هەرێما كوردستانێ چوار هزار و ٦٨٥ كەس دێ فەریزا حەجێ ئەنجامبدەن و ل گۆرەی هژمارا ئاكنجیێن هەر وەلاتەكی رێژا حەجیان هاتیە دیاركرن، حەجا فەرمی ئەو حەجە یا ب رێیا رێڤەبەریا گشتیا حەج و عومرا هەرێما كوردستانێ دهێتەكرن، ئەو پرۆپاگندەیێن بۆ حەجا بازرگانی دهێنەكرن چو بنەما بۆ نینن، چو گەرەنتی نینە بۆ حەجا بازرگانی و ئەو خەلكێ حەجا بازرگانی دكەن ل وەلاتێ سعودیێ تووشی ئاریشەیان دبن و ل گۆرەی قانوونا عەرەبستانا سعودی ژی هەر كەسەك بهێتە دەستەسەركرن ئەگەر ب رێكێن قانوونی و فەرمی پرۆسا حەجێ ئەنجام نەدابیت دێ ب ١٥٠ هزار دۆلاران بهێتە غەرامەكرن و شەش هەیڤان ژی دێ هێتە دەستەسەركرن.
ئەو یەك ژی نە ڤەشارت، هەتا بۆ دەمێ ١٠ سالان دێ گەشتا وەلاتێ سعودیێ لێ بهێتە قەدەغەكرن و هەر كۆمپانیەكا ڤی كاری ژی بكەت دێ هێتە سزادان ژلایێ هەرێما كوردستانێ، ئەم وەك حوكمەت ژ ڤان كەسێن ب رێیا بازرگانی پرۆسا حەجێ ئەنجامددەن بەرپرسیار نینین، چونكە ئەو كەسێن ب رێیا ڤیزا سالانە یان دەستپێكێ دچنە وەلاتەكێ دی ول دووڤدا دچنە وەلاتێ سعودیێ، دەمێ تووشی ئاریشەیان دبن مە چو دەستهەلات نینە بەڕەڤانیێ ژێ بكەین و ئەو ب خۆ بەرپرسیارن.
نيشاندان