پارێزگارێ‌ دهۆكێ‌ ژ لایێ‌ نوونەرێن لاوێن نەهـ وەلاتێن پشكدار د كۆڕبەندێ‌ جیهانی یێ‌ لاوان دا، ب مەتالێ‌ رێزلێنانێ‌ هاتە خەلاتكرن.
د. عەلی تەتەر، پارێزگارێ دهۆكێ ل رۆژا 30/11/2023 پێشوازی ل نوونەرێن لاوێن نەهـ وەلاتێن پشكدار د كۆڕبەندێ جیهانی یێ لاوان و پەیمانگەها SOSD یا ئەمریكی دا كر، كو ب مەرەما گێڕانا كۆڕبەندێ ناڤبری سەرەدانا باژێرێ دهۆكێ كرینە، د روونشتنەكێ دا دانوستاندن ل دۆر رەوشا لاوان و كار و چالاكیێن وان ل وەلاتێن جودا هاتە كرن.
شاندێ مێڤان خۆشحالیا خوە ب پشكداریا كۆڕبەندی و هەڤكاریا كارگێریا پارێزگەهێ بۆ ئەنجامدانا كۆڕبەندی دیار كر و مەتالێ رێزلێنان ب ناڤێ هەمی لاوێن پشكدار د كۆڕبەندی دا پێشكێشی پارێزگارێ دهۆكێ كرن.
بۆ زانین ل رۆژا 29/11/2023 و ب چاڤدێریا پارێزگارێ دهوكێ كۆڕبەندێ دەهێ یێ نێڤدەولەتیێ لاوان یێ داهێنانێ ژ بۆ بدەستڤەئینانا گەشەپێدانا بەردەوام و ب پشكداریا نەهـ وەلاتێن عەرەبی هاتە گێڕان.

شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ل سەر ڕاسپاردێن مەسرور بارزانی، سەرۆكێ حكومەتا هەرێما كوردستانێ و ب چاڤدێریا گۆهدار شێخۆ، سەرپەرشتێ ئیدارەیا سەربخوە یا زاخۆ، ب گوژمێ پێنج ملیار و 767 ملیۆن و 586 هزار دیناران، بەرێ بنیاتی بۆ چەندین پڕۆژەیێن خزمەتگوزاری یێن جودا ل سنوورێ ئیدارەیا سەربخوە یا زاخۆ هاتە دانان.
بەرپڕسێ ڕاگەهاندنا ئیدارەیا سەربخوە یا زاخۆ ئاماژە ب وێ چەندێ ژی كر كو ئەڤ پڕۆژە پێك دهێن ژ چێكرنا جاددە و سۆلین و ئاڤڕێژان ل سەنتەرێ دەڤەرداریا باتیفا و ناوچەداریا بێگۆڤا، چێكرنا شۆستەیێن جاددەیا 15 مەتری و چاندنا داران و ڕۆناهیكرنا جاددەیا جۆتسایدی ل دەڤەرداریا باتیفا، دیسا چێكرنا ڕێكا گوندێن شێرخواسكێ و ئاڤهێ هەتا بارهۆلێ و گۆڤكا سەری و غۆلدیا و مێسكێ ل ناوچەداریا بێگۆڤا، دیسا چێكرنا ڕێكا سەركی یا هیزاوا – دەركار ب درێژاهیا هزار و 350 مەتران.
گۆهدار شێخۆ د كۆنگرەكێ رۆژنامەڤانی دا گوت: «ل ژێر سیبەرا حكومەتا هەرێما كوردستانێ و كابینا نەهێ ب سەرۆكاتیا مەسرور بارزانی كاروانێ پێشكێشكرنا خزمەتگوزاریان و ئاڤەدانیێ د هەموو بیاڤەكی دا ل سنوورێ ئیدارەیا سەربخوە یا زاخۆ د بەردەوامن».

د. سلێمان تەمەر، نۆشدارەكێ‌ ڤێتێرنەرییە ل پارێزگەها دهۆكێ‌ خەلاتێ‌ ستێرا زێری بۆ باشترین نۆشدارێ‌ ڤێتێرنەری ل جیهانێ‌ وەرگرت.
د. سلێمان تەمەر بۆ رۆژناما ئەڤرۆ دیار كر، بۆ دەمێ‌ مەهەكێ‌ بەریكانەك ل سەر ئاستێ‌ جیهانێ‌ هاتبوو رێكخستن، ئەو بەریكانە ژ لایێ‌ ناڤەندەكا جیهانی بناڤێ‌ (نۆشدارێن ڤێتێرنەری ل سەرانسەری جیهانێ‌)، كو ناڤەندەكا بریتانیە هاتبوو رێكخستن، وێ‌ ناڤەندێ‌ پرۆژە ل سەرانسەری جیهانێ‌ هەنە، كارێ‌ وێ‌ ئەوە، ئەو جهێن ئەردهەژ لێ ددەن، یان ئەو جهێن بیابان یان ژی ئەو جهێن گیانەوەر لێ‌ برسی دبن، یان بریندار دبن، ل د هەوارا وان دچن، كارێ‌ وێ‌ ناڤەندێ‌ ل سە رملێن نۆشدارێن ڤێتێرنەری یێن خوەبەخشە و ئەوێن كارێ‌ مرۆڤایەتی دكەن، لەوما وان ژی د وێ‌ بەریكانێ‌ دا ئەڤ خەلاتە یێ‌ راگەهاندی، پار هەڤركیا ڤی خەلاتی د ناڤبەرا 12 كەسان دابوو، ئەڤ سالە نێزیكی پێنج هزار كەسان فایلێن خوە پێشكێشی وێ‌ ناڤەندێ‌ كربوون و ل دووماهیێ‌ وان 58 كەسێن خودان شیان ل سەر ئاستێ‌ جیهانێ‌ دیاركرن و هەڤڕكی د ناڤبەرا وان 58 كەسێن خودان شیان دا هاتە كرن و دەمێ‌ بەریكانێ‌ ژی مەهەك بوو.
ناڤهاتی گۆت: «شێوازێ‌ سەركەفتنێ‌ د وێ‌ بەریكانێ‌ دا ژی ب دو رەنگان بوو، وێ‌ ناڤەندێ‌ لژنەك هەیە دبێژنێ‌: (لژنا زانایان) و شێوازێ‌ دەنگدانێ‌ ژی ب رێیا لینكەكی بوو، ژ ئەمریكا 14 كەس بوون، بریتانیا چار كەس بوون، هندستانێ‌ حەفت كەس بوون و باكوورێ‌ ئەفریقیا سێ‌ كەس بوون، پیرۆ كەسەك، ئۆكرانیا دو كەس و تایلەند دو كەس و زامبیا دو كەس و ئەندونۆسیا و چین و پاكستان و غانا زامبیا و لایبیریا و ئیسرائیل و ئەلمانیا و ئوسترالیا و نیكاراگوای و كۆستاریكا و رۆمانیا و تونس و سەراییب و هەر ئێك ژ وان وەلاتان كەسەك پشكدار ببوو، ل ئیراق و هەرێما كوردستانێ‌ ژی سێ‌ كەس پشكدار ببوون، ل رۆژا 1ی كانوونا ئێكێ‌ 2023 ێ‌، ئەنجامێن وێ‌ بەریكانێ‌ هاتنە راگەهاندن، ژ سەرجەمێ‌ 10 هزار 342 دەنگان، ئەز شیام دو هزار و 340 دەنگان ب دەستخوەڤە بینم و ل سەر ئاستێ‌ جیهانێ‌ بوومە یێ‌ ئێكێ‌، ئەز سۆپاسیا وان كەسان دكەم یێن، كو ئەز ژ هەژی ڤی خەلاتی دیتیم».

ئیسماعیل محەمەد، دەڤەردارێ‌ دهۆكێ دوهی 2/12/2023 ب مەرەما دووڤچوونا پرۆسا بەلاڤكرنا گازا سپی، سەرەدانا گورەپانا بەلاڤكرنا گازا سپی كر و ژ نێزیك ئاگەهداری پرۆسا بەلاڤكرنا گازێ ل سەنتەرێ باژێرێ دهۆكێ‌ بوو.
دەڤەردارێ‌ دهۆكێ دیار كر، ل رۆژێن بهێن تانكەرێن بەلاڤكرنا گازێ دێ هێنە زێدەكرن، داكو زووتر خەلك بەهرا خوە یا گازێ‌ وەربگریت.
بۆ زانین هەتا نوكە د ناڤ سەنتەرێ باژێرێ دهۆكێ دا پتری 61 هزار پلێتێن گازا سپی ل سەر سەرۆكخێزانان هاتینە بەلاڤكرن و پتری 28 هزار خێزانان بەهرا خوە یا گازا سپی وەرگرتیە.
دهێتە چاڤەرێكرن ل ڤان نێزیكان پلێتێن گازێ ل سەر بنگەهێ 231 یێ بریكارێن ئاهێن خوارنێ، بهێنە بەلاڤكرن.

ئاكرێ‌، رەمەزان زەكەریا:

د چارچوڤێ بجهئینانا پڕۆژەیێن رێك و پران دا ل سنوورێ دەڤەرداریا ئاكرێ، نوكە رێكا هەشت گوندان ل سنوورێ ناوچەداریا گردەسێن دهێتە قێركرن و رێكا ناوچەداریا گردەسێن و بجیل ل گەل ئاكرێ پێكڤە دهێتە گرێدان.
ئەندازیار محسن میرانی، رێڤەبەرێ رێك و پران ل ئاكرێ بۆ ئەڤرۆ گۆت: «ئەنجامدانا پڕۆژەیان د بیاڤێ‌ رێك و پران دا بەردەوامی هەیە و بەری نوكە رێكێن چەندین گوندان هاتینە قێركرن و چەندین رێك ژی هاتینە سەخبێركرن».
ناڤبری گۆتژی: «نوكە كار ل سەر قێركرنا رێكا هەشت گوندان ل سنوورێ دەڤەرداریا ئاكرێ‌ دهێتە كرن، ئەڤ رێیە گەلەك یا گرنگە، ژ بەركو دێ ناوچەداریا گردەسێن و بجیل ل گەل ئاكرێ پێكڤە گرێ دەت و دێ هەشت گوند مفای ژێ‌ وەرگرن، كو درێژاهیا رێكێ سێ كیلۆمەتر و 200 مەترن و ب گوژمێ 413 ملیۆن دیناران دهێتە قێركرن».