د داخویانیەکێ دا سەرپەرشتێ تیما باسکێت بۆلا یانه‌یا زاخۆ ئەوا پشکدار د خولا نایابا ئیراقێ دا بۆ رۆژنامه‌یا ئەڤرۆ دیار کر وان پێشەکارەک دوورئێخستیە و پێشەکارەکێ دیتر پەیوەندی ب تیمێ کریە و چاڤەرێ پێشەکارەکێ دیترن.
زێدەتر عەبدولستار عەلی گۆت: پشتی بۆ چەند یارییەکان ئاستێ یاریزانەکێ مە یێ پێشەکارێ ئەمریکی نە لدووف خاستەکا مە بوو و ئاستێ وی باش نەبوو لەوما نەچار بووین هەڤبەستا وی هەلوەشینن و دگه‌ل پیشه‌كارێ ئەمریکی ئارون کلاودی رێكه‌ڤتینه‌ و پەیوەندی ب تیما مە کریە،لدووف وێ دووڤچوونا مە ل ئاستێ یاریزانی کری باشترە و سەربورەکا باشتر ژ یاریزانێن دیتر هەیە و دێ شێت زێدەتر ئاستەکێ باش پێشکێشی تیما مە کەت، پشتی هاتنا وی یاریزانێ ئەمریکی ئەم چاڤەرێنە هەتا دو رۆژێن دی یاریزانەکێ دی یێ پێشه‌كارێ ئەمریکی بهێتە زاخۆ و هەڤبەستێ دگەل دا ئیمزا بکەین و ببیتە پێشەکارێ سیێ دناڤ تیما مە دا .
ناڤبری گۆت ژی: هەکە ئاستێ یاریزانێن پێشەکار یێ باش بیت بێگومان ب شێوەیەکێ گشتی دێ ئاستێ تیمێ ژی یێ باش بیت ژبەرکو یاریزانێن پێشەکار نیڤا هێزا تیمێ نە،ئەم ب هیڤینە د یاریێن بهێت دا ئاستێ مە باشتر ببت و رێزێن باشتر د خولێ دا ب دەستڤە بینت.

د داخویانیەکێ دا ئەندامەکێ دەستەیا کارگێریا یانا زاخۆ یا وەرزشی بۆ رۆژناما ئەڤرۆ دیار کر بڕینا کارەبێ د یاریا واندا بەرانبەر یانه‌یا ئه‌لقاسم ژ خولا ستێرێن ئیراقێ یا ته‌پا پێی د دەستهەلاتا واندا نەبوو و چاڤەرێنە ئاریشەیا کارەبێ بۆ یاریگەها وان بهێتە چارەسەر کرن.
زێدەتر دلژار عەدنان گۆت: بڕینا کارەبا گشتی د یاریا تیما مە دا بەرانبەر یانه‌یا ئه‌لقاسم دەستهەلاتا مە دا نەبوو ژبەركو ب شێوەیەکێ گشتی ئاریشەیێ کارەبێ ل کوردستانێ هەبوو، مە موەلیدەیەکێ کارەبێ یێ تایبەت ب یاریگەهێ ڤە نینە، لێ بۆ هەمی یاریان موەلیدەیەکێ کارەبێ ب کرێ دگرین و بۆ ڤێ یاریێ ژی هەمان کار مە ئەنجامدا و ژبەریا دەستپێکرنا یاریێ ژی وی موەلیدەیی کارێ خوە کر لێ دگەل نێزیکبوونا ژڤانێ یاریێ ئێدی وی موەلیدەیی ژی نەشیا زێدەیر بەرگریا هێزا بلاجیکتۆرێن یاریگەهێ بکەت و ڤەمری، لێ هەتا مە موەلیدەیەکێ دیتر یی کارەبێ ئینایی یانه‌یا ئه‌لقاسم ئامادەنەبوو یاریێ ئەنجام بدەت ژبەرکو ل دووف رێنمایێن فیدراسیۆنا تەپاپێی یا ئیراقێ هەکە د ماوەیێ دەمژمێرەکێ دا خودانا یاریگەهێ نەشیا ئاریشەیا کارەبێ چارەسەر بکەت یاری دێ هێتە پاشئێخستن.
ناڤبری گۆت ژی: ئیدارەیا سەربەخویا زاخۆ رەزامەندی ل سەر کرینا موەلیدەیەکێ کارەبێ بۆ یاریگەهێ کریە و ئەم ژی چاڤەرێ کرینا وی موەلیدەیێ نە و هەتا ئاریشەیا مە دهێتە چارەسەر کرن د وی دەمی دا دێ یاریێن خوە ب رۆژ کەین.
ل دووماهیێ گۆت ژی: پاشئێخستنا وێ یاریێ چو کارتێکرن ل تیما مە نەکریە و ئەم ب ژڤانین بۆ یاریا بەرانبەر یانه‌یا نەورۆز سەرکەڤتنێ تومار بکەین و د نوکە دا تیما مە د قۆناغەکا باش دا دەرباز دبیت و چو کێشە ژی نینن.

ب دووماهی هاتنا یاریێن گەڕا شەشێ‌ ژ هەڤڕكیێن خولا ستێرێن ئیراقێ‌ یا تەپا پێی ئەنجامێن یانەیێن كوردستانێ‌ جودا بوون، تیما دهۆك نە گەهشتە هیڤیێن دەستڤە ئینانا سێ‌ خالان و سەرێ‌ لیستەیا خولێ‌ ب شێوەیێ‌ بەروەخت، ژلایێ‌ خوە یارییا یانەیا زاخۆ دگەل ئەلقاسم هاتە پاشئێخستن و هەولێر بەردەوامی دا ئەنجامێن خراب و نەورۆز سەركەفتنا چارێ‌ ئینا.
یاریزانێن یانەیا دهۆك دەلیڤەیا وەرگرتنا سەرێ‌ لیستا خولێ‌ یا بەروەخت ژ دەستدا، پشتی د یارییا خوە دا ب گۆلەكێ‌ بێ بەرانبەر دگەل خودانێن ئەردی یانەیا كەرخ یا بەغدایی خوسارەت بوو، ئەڤ ئەنجامە كارتیكرنەكا نەرێنی ل سەر رێزبەندییا تیمێ‌ كر ژ رێزا دویێ‌ پاشڤە چوو رێزا پێنجێ‌ ب11 خالان، راهێنەرێ‌ تیمێ‌ سلێمان رەمەزان بۆ دەزگەهێن راگەهاندنێ‌ گۆت: تیما مە ئاستەكێ‌ باش نیشاندا بتنێ‌ دووماهییا وێ‌ یا كێم بوو ژبۆ تۆماركرنا گۆلان، ئەگەرێ‌ سەرەكی یێ‌ خوسارەتیێ‌ گەشتێن تیمێ‌ و ئەنجامدانا گەلەك یارییان.
ژلایێ‌ خوەڤە یارییا تیما زاخۆ ئەوا بڕیاربوو ل پێنج شەمبییا بۆری ل یاریگەها خوە مێڤانداریا یانەیا ئەلقاسم بكەت لێ‌ ژبەر ئاریشەیا كارەبێ‌ و پشتی بۆرینا ئێك دەمژمێر ژ بۆرینا وەختێ‌ دروست سەرپەرشتێ‌ یاریێ‌ بڕیاردا یاریی بهێتە پاشئێخستن و چاڤەڕێ‌ فیدراسیۆنا تەپا پێی یا ئیراقێ‌ بۆ دانانا ژڤانەكێ‌ نوو.
ژلایەكێ‌ دووڤە یانەیا هەولێر بەردەوامی دا ئەنجامێن لاواز و تووشی خوسارەتییا چارێ‌ بوو پشتی نەشیایی ژ ئاستەنگا یانەیا تەلەبە یا بەغدایی دەربازبیت ب گۆلەكێ‌ بێ بەرانبەر خوسارەت بوو، ژلایێ‌ خوەڤە یانەیا نەورۆز بەردەوامە ل سەر ئەنجامێن دلخوەشكەر بۆ جەماوەرێ‌ خوە و سەركەڤیت ل سەر یانەیا كەربەلا ب سێ‌ گۆلێن پاقژ.

بۆ جارا ئێكێ‌ د دیرۆكا وەرزشا پارێزگەها دهۆكێ‌ و كوردستانێ‌ دا یانەكا ژ دەرڤەیی هەرێمێ‌ پشت گەرمی ب راهێنەر و هەمی یاریزانێن پارێزگەهێ‌ ل سەر ئاستێ‌ كچان دكەت و ئێكەم سەركەفتن د خولا ئیراقێ‌ یا تەپا پێی دا ئینا.
راهێنەر خەیری ئەحمەد دگەل دا 20 یاریزانێن پارێزگەها دهۆكێ‌ تیما یانەیا ئال بدەییر نوونەرا پارێزگەها دیوانییە د خولا تەپا پێی یا ئیراقێ‌ ل سەر ئاستێ‌ كچان برێڤەدبەن و شیان د ئێكەم یارییا خوە دا سەركەڤن ل سەر یانەیا ئەمانەت بەغدا ب دو گۆلان بێ‌ بەرانبەر بینن، هەردو گۆلێن وان ژلایێ‌ یاریزانان سۆزان شڤان و ناڤین سەعید تۆماركرن.
ل دۆر ڤێ‌ یەكێ‌ راهێنەرێ‌ ناڤهاتی بۆ رۆژنامەیا ئەڤرۆ گۆت: پێخوەشحالم ئێكەم پێنگاڤا خوە وەكو راهێنەر و یاریزان شیاین پێنگاڤا ئێكێ‌ ب سەركەفتیانە پاڤێژین، هەرچەندە ئەركێ‌ مە ب سانەهی نینە و ئەڤە بۆ جارا ئێكێ‌ یە وەكو راهێنەرێ‌ تیمەكا یاریێن مەزن وەرگرم و یاریزانێن مە پێدڤی ێش شارەزاهیێ نە، كارگێرییا یانەیی داخوازا دەربازبوونێ‌ بەر ب چارگۆشەیا زێرین كریە و رژدین بۆ ڤێ‌ ئارمانجێ‌، ژ بەركو یاریزانێن مە هەمی خەلكێ‌ پارێزگەهێ‌ نە یانەیا ئال بدێر رازیبوویە یاریگەها یانەیێ‌ ل زانكۆیا دهۆكێ‌ بیت ئەڤەژی پالدەرە بۆ ئەنجامێن باش، ب هیڤی نە ئەم بگەهینە ئەوێ‌ ئارمانجا مە دڤێت.

رەمەزان زەكەریا

د داخویانیەكێدا پەیڤدارێ یانەیا ئاكرێ دیاركر ئەگەرێن نەباش د چەند یاریێن بۆری دا یاریزان یاری ل دووڤ یاریێ پەستانێ دئێخنە سەرخوە دبێژن یاریا بۆری مە ئاستەكێ خراب یێ پێشكێشكری دڤێت ڤێ یاریێ ئاستێ باش پێشكێشكەم ئەڤە ئەگەرێ سەرەكی یە، ئەڤچەندە هات پشتی تیما ئاكرێ‌ دگەل شێروانە ب گۆلەكێ‌ تووشی خوسارەتیێ‌ بوویی ژ چارچووڤەیێ‌ گەڕا حەفتێ‌ یا خولا پلا نایابا كوردستانێ‌.
زێدەتر سوهەیب عەلی بۆ ئەڤرۆ گۆت: ئەگەرێن خوسارەتیا هەر تیمەكێ دكەڤیتە سەر مللێ ڕاهێنەری ژبەر ئەنجامێن نەباش دەست ژ كاركێشایە، دەستپێكا خولێ هەتا یارییا چارێ ئەنجام دباش بوون، لێ‌ ئەو ئەنجامێن خراب دیارە پلانێن ڕاهێنەری نە دجهێ خودانە.
هەروەسان ناڤهاتی گۆت: هەتا نوكە چو راهێنەر نەهاتینە دەستنیشانكرن دشێم بێژم هەتا چار بۆ پێنج رۆژێن بهێت دێ راهێنەرەكێ دی دەستنیشان كەین لەوما یارییا بهێت ژ گەرا هەشتێ دگەل یانەیا هندرین هاریكارێ ڕاهێنەری دێ‌ تیمێ‌ ب رێڤەبەت، خوسارەت بوون تشتەكێ نوڕمالە بۆ هەر تیمەكێ یان یانەیەكێ لێ‌ د باوەریێ داینە ئەڤ ئەنجامێن خراب دێ بنە پالدەر بۆ یاریێن بهێت ئەم شەڕی ل سەر رێزێن پێش یێن خولێ بكەین.