چنار احمد:

گروپێ خوەرست هاتیە دامەزراندن ب مەرەما خزمەتكرنا گەنجان و گەلەك پشتەڤانیا گەنجان دكەت ب هەموو شێوە و شێوازا و بۆ گەنجان دەرگەهەكە بشێن شیان و هزرێن خۆ تێدا دیاربكەن و بەرچاڤ بكەن و ئاراستەی كۆمەلگەهێ‌ بكەن و بەرپرسێ‌ گرۆپی دبێژیت: ئەم هەیڤانە دو هەتا سێ چالاكییان ئەنجام ددەین و چالاكیێن مە د جۆراوجۆرن و پتریا وان پێك دهێن ژ سمیناران بۆ كەسێن شارەزای د وارەكی دا هەبیت.

سەربەست سەعید، بەرپرسێ گروپێ (خوەرست) دبێژیت: مە ئەڤ گرۆپە ل 1-10-2023 دامەزراند، ب مەرەما خزمەتكرنا تەخا گەنجان و ئارمانجا مە ئەو بوو ئەم ببینە دەستەكێ‌ دی یێ‌ ئاڤاكرن و جوانكرنا ناخێ‌ تاكێن ڤی جڤاكی و گۆت: مە ل قوناغا دەسپێكێ‌ ئەو هەڤال و كەسایەتی ل خۆ كۆم ڤە كرن كو مە دزانی حەز ژ خۆ ئاڤاكرنێ دكەن و دشێن خەمێ‌ ژ رەوشەنبیركرنا خۆ و جڤاكێ خۆ بخۆن و مە دەست ب چالاكیێن خۆ كر و هێدی هێدی ئەو كەسێن چالاكیێن مە د دیتن و حەزا خۆ ئاڤاكرنێ‌ هەین خۆ نێزیكی مە كرن ژ كور و كچا و ماموستا و پسپۆران هەتا كو هژمارا ئەندامێن مە ژ 100 ئەندامان بوری.
سەربەستی گۆت ژی: ئەم هەیڤانە دو تا سێ چالاكیان ئەنجام ددەین و چالاكیێن مە د جوراوجورن و پتریا وان پێك دهێن ژ سمینارا بۆ كەسێن شارەزای د وارەكی دا هەبیت ژ كەسێن ئەدیب و رۆماننڤیس و دكتورێن سایكولوجی و نەفسی و شارەزایێن كەلتوری و مێژووی و هەتا دكتورێن د وارێ‌ شەریعێ‌ ژی ئەم مێڤان دكەین و گەلەك كەسێن دی یێن زیرەك شیانێن خۆ ل دەف مە دبینن و ئەم ل دووڤ پێدڤیا جڤاكی و پێدڤیا تاكی دچیت كا چ پێدڤیە بهێتە گۆتن و تاكێ‌ مە پێدڤی ب چیە و بوشایی د كیڤە هەیە، ئەم هەول ددەین وێ‌ بوشایێ پر بكەین.
سەربەستی گۆت ژی: بۆ پتر ئاشنا بوون دگەل پەرتۆكا و وەرگرتنا پێزانینا ژ وان و نیاسینا پەرتوك و نڤیسەرێن وان، هندەك جارا ئەم پەرتۆكا نڤیسەرەكی دەست نیشان دكەین و ئەندامێن مە وێ‌ پەرتوكێ‌ دخوینن و د رۆژەكا دەست نیشانكری دا دگەل نڤیسەری كۆم ڤەدبن و دكەڤنە دانوستاندنێ‌ ل سەر پەرتوكێ‌.
بەرپرسێ گروپی ئەو چەندە ژی دیاركر، هەتا نوكە مە شیایە پتری 20 چالاكیێن هەمەجور ئەنجام بدەین و ئەندام و هەڤالێن ئامادە مفا ژ وان چالاكیان وەرگرتیە و ئەنجامێن ڤی كارێ ئەم ئەنجام ددەین ژی رەوشەنبیركرنا تاكێن جڤاكیە و ئەڤ ئارمانجە هێدی هێدی یا دهێتە بجهئینان و ئەم یێ‌ ئاستێ‌ ئەندامێن خۆ دبینین كو هێدی هێدی یێ‌ بلند دبیت د هەموو واران دا و ئەز دبینم ئەڤەیە یا كو گرنگ بهێتە ئەنجان دان، چونكو هەر تاكەكێ‌ ڤی جڤاكی رەوشەنبیربیت دێ گرێدانا وی ب وەلاتێ‌ وی ڤە موكمتربیت و دێ پتر ئاشنا بیت دگەل هندێ‌ كا ئەڤ مللەتە چاوا و د چ قوناغ دا دەرباز بوویە و دێ پترین زانیاریا د هەموو بواران دا وەرگریت.
سوزان باپیر ئێك ژ ئەندامێن ڤی گرۆپیە دبێژیت: ئەز ئێك ژ ئەندامێن سەرەكی یێن ڤی گرۆپی مە و ژ كەسێن دەسپێكی بووم د ناڤا گروپی دا و ئەڤ گروپە گەلەك پشتەڤانیا گەنجان دكەت ب هەموو شێوە و شێوازا و ئەز وەكو ئەندامەكا وان من گەلەك مفا ژ چالاكیێن وان وەرگرتیە و گەلەك جارا ژ وان بسپورێن ئامادە دبوون من هزرێن نوو بۆ خۆ ژێ‌ وەردگرتن و گۆت: ئەز ب فەر دبینم پشتەڤانیا گرۆپێن ب ڤی رەنگی بهێتە كرن كو خەمخورێن تاك و گەنجێن مەنە و بۆ گەنجان دەرگەهەكە بشێن شیان و هزرێن خۆ تێدا دیاربكەن و بەرچاڤ بكەن و ئاراستەی كۆمەلگەهێ‌ بكەن.

بێوار حەمدی:

گەنجەكێ خودان پێدڤیێن تایبەت دیار كر، نە دوورە پێشكەفتنێن مەزن ل سەر دەستێن كێم ئەندامان بن، چونكی كێم ئەندامی ب ڕامانا كێم شیانیێ ناهێت و كەسێن بێ ئارمانج وەكو پاپوڕەكێ نە د دەریایێ دا و نزانن دێ بەرەڤ كیش ئاراستەیی ڤە چن و گۆت: من د ژیانێ دا دوو هیڤیێن گرنگ هەنە، یا ئێكێ ئەز ببمە ئێك ژ باشترین نوژدارا دا كۆ خزمەتا ئایین و وەڵات و مرۆڤایەتیێ بكەم، یا دووێ ژی ببمە ستێرەكا گەش.

شوكری سەعدی، گەنجەكێ خودان پێتڤیێن تایبەتە د دیدارەكێ دا بۆ رۆژناما ئەڤرۆ گۆت: ل دەسپێكێ ئەز سوپاسیا خودایێ مەزن دكەم كۆ ئەز ب ڤی شێوەی ئافراندیم و گەلەك دەرگەهێن خێرێ ل بەر من ڤەكرین، گەلەك سوپاسیا دەیك و بابێن خۆ ژی دكەم كو هەتا ڤی دەمی دگەل من د هاریكاربون، ژ بەر كۆ دەمێ ئەز هاتیمە سەر دونیایێ یێ كێم ئەندام بووم و گۆت (من پۆڵا 12 زانستی ب تێكڕایا 91.3 ب دووماهی ئینایە و ب تنێ من ب دوو تبلێن پێیان نڤیسایە، شیایمە هەر ب وان دوو تبلان كار ل سەر لاپتۆپی و تێلەفۆنێ ژی بكەم و ژبلی زمانێ دایك ئەز زمانێ عەرەبی و ئینگلیزی ژی دزانم).
د بەردەوامیا ئاخفتنا خۆدا شوكری گۆت: ب ڕاستی ژی ل دەسپێكێ ژبەر نەبونا هەردوو دەست و پێیان بیاڤێن ژیانێ ل بەر من گەلەك ب زەحمەت بۆن، ژ وان ژی: نە دشیام هاتن و چوونێ بكەم و من ئاریشە دگەل نڤێسینێ هەبوون، بەلێ دگەل بورینا دەمی ئەز دگەل ڕاهاتم و ب خوشحالی ڤە نوكە گەهشتمە زانكۆیێ بەشێ دەرمانسازی كۆ هیڤیا من یا زارۆكینیێ بوو.
شوكری ئەو چەندە ژی دا زانین، من د ژیانێ دا دوو هیڤیێن گرنگ هەنە، یا ئێكێ ئەز ببمە ئێك ژ باشترین نوژدارا دا كۆ خزمەتا ئایین و وەڵات و مرۆڤایەتیێ بكەم، یا دووێ ژی ببمە ستێرەكا گەش ل ڤی ئەردێ ئەز لێ، دا كۆ گەشاتی و بڕسقینا من ببیتە ڕوناهیەك ژ بۆ رۆنكرنا وان تاریاتیێن هزری یێن نۆكە گەلەك ژ مە د بەرزە و بێ ئومێدن دناڤدا و گۆت (داخوازیا من ژ جهێن پەیوەندیدار ئەوە پتر د ئازارێن كێم ئەندامان بگەهن، چونكی نەدوورە پێشكەفتنێن هەڕە مەزن ل سەر دەستێ وان بن، ژ بەر كۆ كێم ئەندامی ب ڕامانا كێم شیانیێ ناهێت).
ل دووماهیێ ژی شوكری گۆت: ئەز دبێژمە گشت كێم ئەندام و خودان پێدڤیێن تایبەت، مادەم نەهات هوون ئارمانجا بدانن و ژ بۆ بڕێڤەبڕنا ژیانا خۆ ببنە نێچیرڤان، بزانن هندی هوون هەست ب هەبوونا خۆ نەكەن، دێ هەردەم د ناڤ تاڕیاتیێ دابن، چونكی كەسێ بێ ئارمانج وەكو پاپوڕەكێ یە د نیڤا دەریایێ دا و نزانیت دێ بەرەڤ چ ئاراستە ڤە چیت.

هەرهین محەمەد:

پتریا جاران وەك بها و رێزگرتن بۆ كەسێ‌ بەرامبەر ئەم پەیڤەكا خۆش بكاردئینین مینا پەیڤا سەیدا و ئەڤ پەیڤە ژی دجڤاكێ‌ مە دا بۆ هەموو كەسان دهێتە بكارئینان، ئەو كەسێن بو مە ئاخفتی ب دروستی ئەڤ پەیڤە بۆ كەسێن وانەیان دبێژن یا دروستە، گرنكە پەیڤا ماموستا بتنێ‌ بۆ ماموستایان بهێتە بكارئینان و بۆ كەسێن دی پەیڤەكا دی وەكو بەرێز بهێتە بكارئینان.
ماموستا ئیبراهیم جەرجیس، دیار كر كوپەیڤا سەیدا دهێتە گۆتن وەكو رێزگرتنەك بۆ كەسێ‌ بەرامبەر، دبیت مە گەلەك پەیڤێن دی هەبن بكار بینین، بەلێ‌ پەیڤا سەیدا ئەم ژ هەموویان جوانتر ددانین بۆ كەسێ‌ بەرامبەر و گۆت: (ب دیتنا من هەكە پەیڤا سەیدا بتنێ‌ بۆ چینەكێ‌ بهێتە گۆتن دێ‌ باشتر بیت، ژبەركو دێ‌ كەسێن خواندەڤان و رەوشەنبیر هێنە ژێكجوداكرن ژ كەسێن نەخواندەڤان و نە رەوشەنبیر و دنوكە دا ئەڤ پەیڤە گەلەك دهێتە بكارئینان هەتا هەكە كەسێ‌ بەرامبەری مرۆڤی نەیێ‌ خودان باوەرنامە ژی بیت بتنێ‌ سەروبەرەكێ‌ جوان هەبیت، لێ‌ ئەڤ پەیڤە بتنێ‌ بۆ ئەوی كەسی یا دروستە یێ‌ وانان دبێژیت، یان فەرمانبەر بیت).
رۆژنامەڤان زەینەب ئەحمەد، دا زانین كو پەیڤا سەیدا بتنێ‌ بۆ ئەوان كەسان دهێتە بكارئینان یێن كو وانەیان دبێژن، بەلێ‌ ژبەركو مامۆستایان رێزەكا مەزن یا هەی و دەمێ‌ مرۆڤ رێزێ‌ و بهای دەتە كەسەكی دبێژیتێ‌ سەیدا، ماموستا وەكو سومبولەكێ‌ یە و بهایەكێ‌ مەزن هەیە، لەوما دەمێ‌ مرۆڤ ل گەل كەسەكی د ئاخڤیت دێ‌ بێژیتێ‌ سەیداو گۆت: (بەلێ‌ هەكە كەسەكی بسپوریا خوە هەبیت و ناسناڤ بهێنە ژێكجوداكرن و بۆ كەسێن دی پەیڤەكا دی وەكو بەرێز بهێتە بكارئینان باشترە).
ماموستایێ‌ زانكۆیێ‌ فاروق جەمیل بسپور دبیاڤێ‌ دەرونناسی دا دیار كر كو پەیڤا سەیدا پەیڤەكا عەرەبیە تێكەلی زمانێ‌ كوردی بوویە بتایبەت ل دەڤەرا بەهدینان یا مشەیە، هەروەسا ئەو پەیڤا جێگر وەسا ب ساناهی مە نەبوو سەیدای بكەیە مامۆستا دبیت سەیدا ب ساناهیترە و بۆ گۆتنێ‌ خوشترە و گۆت: (ئەو هێزا مە دایە پەیڤێ‌ كو گەلەك حەز دكەن سەیدا بیت و هێمایێ‌ پەیڤێ‌ بۆ ئەوێ‌ چەندێ‌ دزڤریت تو بهای بدەیە كەسێ‌ بەرامبەر).
ماموستا فاروق گۆتژی: (ب دیتنا من ئەو كەسە سەیدایە ئەوێ‌ دبوارەكی دا كاردكەت و خەلكی فێر بكەت و فێری ژیانا سەردەم و پەروەردێ‌ و زانستێ‌ و رەوشتی دكەتو یا خەلەت دجڤاكێ‌ مە دا هەر رێڤەبەریەكا ئەم چووینێ‌ دێ‌ پەیڤا سەیدا بكارئینین و هەركەسەكێ‌ بۆ بەرپرس دێ‌ كەینە سەیدا و هەركەسەكێ‌ هاتە سەر سوشیال میدیایێ‌ و هندەك ڤیدیو بەلاڤكرن دێ‌ بێژینێ‌ سەیدا و هەركەسەكێ‌ دبوارێ‌ هزری و ئاینی و رەوشەنبیری دا هندەك تشت بەلاڤكرن و دووری كەلتور و تەكنەلوژیا و زانستی بیت مە هەرگۆتێ‌ سەیدا، یان كەسەكی بخوە ریكلامەك ژی كر مە كرە سەیدا).
ماموستایێ‌ زانكۆیێ‌ ئەو چەندە ژی گۆت: (پێدڤیە پەیڤا سەیدا بیتە مامۆستا و بۆ ئەوی كەسی بهێتە گۆتن یێ‌ كو د (سلكێ‌) پەروەردێ‌ دا كاربكەت ژ باخچەی هەتا كو زانكۆیێ‌ و ب دیتنا من بۆ ئەوان كەسان نەهێتە گۆتن یێن كو دسلكێ‌ پەروەردێ‌ دا كار نەكەنو بتنێ‌ پەیڤا بەرێز بهێتە بكار ئینان و رێزێ‌ ل ئەوان بگرین.)

سێمێل، سالار محەمەد دۆسكی:

دەیكا پێنچ شەهیدێن ئەنفالكری ل گەل هەڤژین و تیێ‌ وێ‌، ب چاڤێن تژی روندك ڤە بەحسێ‌ ئەوان رۆژێن نەخوش دكەت، داخوازا قەرەبووكرنا كەس و كارێن ئەنفالاكریان دكەت، و بێژیا پتر 30 سالانە هێشتا خێزانێن مە وەك پێدڤی چ بوو نەهاتیەكرن.
خانم جوەیرا ئەحمەد یەزدین، ژ دایك بوویا سالا 1940ێ‌، بەحسێ‌ ژیانا خوە یا سەردەمێ‌ شۆڕەشا ئیلۆنێ‌ دكەت، بەری شۆڕەشا ئیلۆنێ‌ هەڤژینی من ل گەل (فەتاح)ی پێكئینا و ل گوندێ‌ (ناڤشكێ‌) دئاكنجی بوون، و دووڤدا هەتنە گوندێ‌ (راس عەینێ‌)، و زێدەتر بۆ رۆژناما ئەڤرۆ گۆت: وی دەمی من هەڤژینی پێكئینا بوو و ل گوندێ‌ (راس عەینێ‌) دژیاین وهەڤژینی من پێشمەرگە بوو، و ل سالا 1975 دەمێ‌ چووینە ئیرانێ‌ ل گەل فەرماندە (رەشید سندی) پێشمەرگە بوو.
خانم جوەیرا زێدەتر گۆت: گەلەك نەخوشی و رەزالەت مە دیت و گەلەك جاران حوكمەتێ‌ نەخوشی بوومە چێكرن و دیسا هەر دو كورێن من ژی (محەمەد ئەمین و تاهر) ژی پێشمەرگە بوون، ژیانا من ل گەل هەڤژینێ‌ من هەتا هەوا ئەنفالا گەلەك یا خوەش بوو، و خوشی و نەخوشیان پێكڤە دژیاین، و من (12) زارۆك ژێ‌ هەبوون ( 7) كوڕ و (5) كچ بەلێ‌ (5) كوڕێن من ل گەل باب و مامێ‌ خوە ل هەوا ئەنفالان حوكمەتا گور بە گور بەرزەكرن و هەتا نوكە دبێ‌ سەرۆشینن.
هێشتا گۆت: مالا مە و خەزیرێ‌ من ل گەل ئێك بوون، وی دەمی دەرگەهێن مالێن مە بۆ پێشمەرگەی دڤەكری بوون و تایبەت شۆڕەشا گولانێ‌ و دەمێ‌ هەوا ئەنفالان دەسپێكری، مە هزر دكر وەك پێشتر دێ‌ هێرشێ‌ كەنە گوندی و جارەكا دی دێ‌ ڤەگەرین، ئەم چووینە بەرخابیری بن دارێن تیا و دووڤدا دەنگۆباس هاتن كو برەڤن ئەم چووینە گوندێ‌ (بانكا)، و هەمی پێشمەرگێ‌ دەڤەرێ‌ وێ‌ شەڤێ‌ ل وێرێ‌ كومبوون، ب ترۆمبێلەكێ‌ چووینە گوندێ‌ (باپیرێ‌) و (كەلا شێخو) و حوكمەتێ‌ هێرشی مە كر، ب چەكێ‌ گران و مە خوە پاراست لبن كەڤرەكی و ئەڤە هەمی ب شەڤ بوو، و زارۆكێن من هەمی دبچیك بوون و ماین هەتا چەك هاتیە راوستاندن، دووڤدا مە بریار دابزڤرین و ئەم گەهشتینە (سپنەی) شنی مە ئاگەه ژ خوە هەبوو، كو كوڕێ‌ مە (جەلال) ل گەل مە نینە و مابوو دخەو ل بن كەڤری و مە هێلا بوو، و خەزیرێ‌ من ژی یێ‌ نەخوش بوو و ئەم ل كورێ‌ خوە نەزڤرین، و بەردەوام بووین ل سەر زڤرینا خوە هەتا گەهشتینە گوندێ‌ (بەرۆشكا سەعدونی)، زڤرینا مە ئەو بوو چونكی رێك هاتبوونە گرتن و لەشكر گەهشتە مە و هەر وی دەمی زەلام جوداكرن، و ژن و زارۆك هێلانە ل گەل ئێك، و دووڤدا وێنێن زەلامان ل گوندێ‌ (بەرۆشكێ‌) گرتن و ترۆمبێلێن لەشكری ئینان، و ئەم هەمی پێكڤە ژن و زارۆك هاڤێتی نە تێدا هەتا مانگێشكێ‌ ئینان، دو كورێن من ل گەل مە نەبوون ل بەر پەزی بوون، و ئەو ژی ئینان و ئەم كرینە دقوتابخانا مانگێشكێ‌ ڤە، و سێ‌ رۆژا ماینە ل قوتابخانێ‌ برسی و تهێنی و خەلكی خوارن بوومە دئینان، و لەشكرێ‌ ئیراقێ‌ دەردورێن قوتابخانێ‌ گرت بوون، هەڤژینێ‌ من و كورەكێ‌ من ئینانە ل گەل مە ب وێ‌ بهانێ‌ كو هەڤژینێ‌ منێ‌ مەزن و كورێ‌ من ژی یێ‌ بچووكە بەر رەمیێ‌ ناكەڤن، و مانە ل گەل مە هەتا كەلها نزاركێ‌ و دووڤدا گۆتن لێبورین دا، گۆت كەسەكێ‌ نەكوژن دا خەلك هەمی خوە رادەست بكەت، ل كەلها نزاركێ‌ جارەكا دی زەلام ژ ژن و زارۆكان جوداكرن و هەتا كەلهێ‌ ژی مە ئاگەه ژ كورێ‌ خوە (جەلال) نەبوو ئەوێ‌ بەرزەیە.
جەلال فەتاح، كورێ‌ جویرایێ‌ ئەو زارۆكێ‌ بەرزە بەحسێ‌ وێ‌ شەڤێ‌ دكەت دەمێ‌ بەرزەبووی بۆ رۆژناما ئەڤرۆ گۆت: نیڤا شەڤێ‌ ژ خەو رابووم و لدووف سەرێ‌ خوە چووم و گەلەك من كرە گری و من ل قێری یا دا، و من هندەك مروڤێن مە دیتن بناڤێ‌ (عەبدولكەریم و حەجی ئوسێ‌) ومامە ل گەل وان، پاشی (عەبدولكەریم) گۆت ئەز خوە رادەستی حوكمەتێ‌ ناكەم و دێ‌ چمە ئیرانێ‌، چوو و ئەز ژی بدیف كەفتم و راوستیا گۆت هەرە ل گەل (حەجی ئوسێ‌) من یا ل گەل ئاخفتی، ئەز دێ‌ چمە (ئیرانێ‌) هەتا زڤریم (حەجی ئوسێ‌) ژی ل من بەرزەبوو و جارەكا دی مامە بتنێ‌ دونیا تاری بوو چوومە بن بەرەكی نفستم، و دو رۆژا مامە بتنێ‌ و هەتا رۆژا دی ل چیایێ‌ پاسێ‌ هاتمە خوار و من هندەك خێزان دیتن چووینە دناڤا دارو باریدا، چوومە بن دارەكێ‌ و زەلامەك هاتە دەف من و پرسیارا من كر، و هندەك خوارن بوو من ئینا و من خوار و ب رێكا وی زەلامی من مرۆڤەكێ‌ خوە نیاسی، و چوو مە ل گەل وان هەتا رۆژا دی سپێدێ‌ لەشكری دەردورێن مە گرتن ، و ترۆمبێلا ئیناینە (رەشەورێ‌) و هەر من دكرە گری بۆ دایك و بابێن خوە، و من هزر كر ئەو دێ‌ چنە ئیرانێ‌ و دێ‌ بتنێ‌ مینم، و دووڤدا ئەم ئیناینە كەلها نزاركێ‌ و دەمێ‌ هاتین خێزانا وی مرۆڤێ‌ مە گۆتن دێ‌ سەمۆنا بەلاڤ كەن هوون ڤێرە بن، و ئەز لدووف چووم من مەتا خوە (شەرمین) دیت، و من هەمی مالا خوە دیتن و گەهشتمە خێزانا خوە.
جەلال فەتاح گۆتژی: نێزیكی شەش زەلامان ل كەلها نزاركێ‌ ب بلوكان كوشتن و گەلەك قوتان و قێریێن زەلامان گۆهێن مە تژی كربوون، و جهێ‌ ڤەحواندنێ‌ نەبوو و جهێ‌ دەست ئاڤێ‌ نەبوو، و زەلام و ژن و زارۆك ژئێك جوداكرن، و باب و مامێ‌ من ل گەل برایێن من (محەمەد تاهر، شەریف، جندی) ژ مە جوداكرن ل كەلهێ‌ و برایێن من (ئەمین و فاخر) ل بەر پەزی بوون، و شەڤا بەری لێبورینێ‌ ئینانە كەلها نزاركێ‌ و ئەگەر وێ‌ شەڤێ‌ مابانە دا لێبورین ژێ‌ گریت، و مە دیتن دەمێ‌ ئینانە كەلهێ‌ و لەشكری گوپالێ‌ باپیرێ‌ من ژێ‌ ستاند و هەر دو برایێن من (ئەمین و فاخر) پێ‌ دقوتان و هەتا باپیرێ‌ من مری ئەو كول مادلێ‌ وی دا.
خانم جوەیرایێ‌ گۆت: ئەم شەش رۆژان ماینە ل كەلها نزاركێ‌ و خەلكی بوومە خارن دئینا و لەشكرێ‌ ئیراقێ‌ ئەو خارن ژێ‌ وەردگرت و دفرۆتە مە و مە بخوە ژێ‌ دكری، و دووڤدا ئەم برینە (سەلامیێ‌) ل مویسل و پازدە رۆژا ماین و لەشكرەكێ‌ ئیراقێ‌ هات كورد بوو و گۆت لێبورین دەركر، و گۆتن نەترسن ئێدی چل هەوە ناكەن بخوە سەمایێ‌ بكەن، و هەمان دەم ئەوی مرۆڤی دكرە گری ژی و هندەك زەلامێن پشتی لێبورینێ‌ هاتین ئەوا دەوات دكر، و سەما دكر و ستران گۆتن، دووڤدا دگۆتن دێ‌ هەوە رەوانەكەینە باشورێ‌ ئیراقێ‌ و پاش گۆتن لێبورین هاتیە دێ‌ هەوە رەوانەكەینە (هەولێرێ‌)، كەیفا مە هات مە هزر كر دێ‌ زەلام ژی ل گەل مەبن و ب ترۆمبێلا ڤەگوهاستیە هەولێرێ‌ و دەمێ‌ د مووسل رادەربازكرین، خەلكێ‌ مویسل ل سەر جادا ئاخفتن دگۆتن و خەلكێ‌ هەولێرێ‌ خوارن و ڤەخوارن بوومە ئینان، و دو زالگەه دانابوون دا خەلكێ‌ هەولێرێ‌ نەهێت لێ‌ خەلكێ‌ هەولێرێ‌ گەلەك هات و زالگەه ڕاكرن، و گەلەك كەل و پەل بوومە ئینا و هەتا پارە ژی ئینان و كارگەهێن بلوكا بلوك دانە خەلكی بێ‌ بەرامبەر و بێ‌ جوداهی گەلەك هاریكاریا خەلكێ‌ مەكر.
خانم جوەیرا ئەحمەد ئەو ژی گۆت: چ زەلام مە نەمابوون و ئەم ب هیڤیا خەلكی ڤە بووین، و كچەكا مەزن من هەبوو وێ‌ وەك زەلامان هاریكاریا خویشك و برایێن خوە دكر.
ل دووماهیێ‌، جوەیرا ئەحمەد گۆت: داخوازێ‌ ژ حوكمەتێ‌ دكەین هاریكاریا خەلكێ‌ مەبكەت، و زارۆكێن مە بهێنە دامەزراندن و پشتەڤانیا مە بهێتەكرن و مخابنی ڤە هەتا نوكە بۆ خێزانێن ئەنفالان چ نەهاتیەكرن، هەمان دەم جەلال گۆت: داخوازێ‌ ژ حوكمەتێ‌ كەین ئارامگەهەك بۆ كەسانێن ئەنفال بووی بهێتە دروستكرن، وكار ل سەر ئینانا روفاتێن ئەڤان ئەنفالكریان بهێتەكرن كو هەستیێن وا بۆ كوردستانێ‌ ڤەگەرن.