ب بەرهەڤبوونا نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ و هەژمارەكا مەزن ژ كەسایەتیێن سیاسی و ڤەكۆلەر و ئەكادیمیێن ناڤدارێن هەرێما كوردستانێ و ئیراقێ و ڕۆژهەلاتا ناڤین و ئۆرۆپا و باكوورێ ئەمریكا، كۆڕبەندا ئاشتیێ و ئاسایشا ڕۆژهەلاتا ناڤین (MEPS) سەر ب زانكۆیا ئەمریكی كوردستان ل دهۆكێ‌ دوهی دەست ب كارێن خوە كر و بۆ دەمێ دو ڕۆژان دێ بەردەوام بیت.
ل دەستپێكا كۆڕبەندێ، مەسرور بارزانی، سەرۆكێ دەستەیا ئەمیندارێن زانكۆیا ئەمریكی كوردستان و سەرۆكێ حوكمەتا هەرێما كوردستانێ پەیڤەك پێشكێشكر و د پشكەكا وێ پەیڤێ دا دیاركر» پێدڤیە د بەرهەڤ بین بۆ دانپێدانێ ب وێ چەندێ كو هندەك ژ وان كێشەیێن دێ ل ڤێرێ دانوستاندن ل سەرهێتە كرن، ل سەر مە هەموویان مەترسینە.
سەرۆكێ حوكمەتێ‌ ئاماژە ژی كر كو نوكە نە دەمێ خوە ڤەدزینێ یە ژ بەرپرسیارەتیێ و پێدڤیە ژ پێخەمەت بەرژەوەندیا گشتی كار بكەین و ئەگەر بڕیارێن تاكلایەنەیێن ئیراقێ بەردەوام بن، هەستێ نەدادپەروەریێ دێ زێدەتر بیت و گۆت:(شێوازەكێ گشتگیر و هەمەلایەن بۆ بڕێڤەبرنا ئیراقێ پێدڤیەكا بلەزە).
هەروەسا سەرۆكێ هەرێما كوردستانێ، نێچیرڤان بارزانی د چارچۆڤەیێ كۆڕبەندێ ئاشتیێ و ئاسایشا ڕۆژهەلاتا ناڤین (MEPS) دا راگەهاند، نوكە دەمێ وێ چەندێ یە ئیراقێ بكەینە مەیدانا چارەكرنا كێشەیان، نەكو مەیدانا شەڕ و ئالۆزیان ل دەڤەرێ و گۆت:(چارەكرنا كێشەیێن هەرێما كوردستانێ كلیلا سەقامگیریا ئیراقێ یە).
ل دۆر رەوشا ناڤخۆ، سەرۆكێ‌ هەرێمێ‌ راگەهاند، چو كێشەیێن هند ئالۆز د ناڤبەرا پارتی و ئێكەتیێ دا نینن كو نەهێنە چارەكرن.
ئاماژە ب وێ‌ چەندێ‌ ژی كر كو شەڕی د ناڤبەرا حەماس و ئیسرائیلێ دا سەلماند كێشە ب گیرۆكرنێ و تەپەسەركرنێ ناهێنە چارەكرن.

رۆژا ئێكشەمبی 19/11/2023/ مەسرۆر بارزانی، سەرۆكێ حوكمەتا هەرێما كوردستانێ كارگەها (دستار) یا ئاری ل دهۆكێ ڤەكر و د ڕێوڕەسمێ ڤەكرنا كارگەهێ دا پەیڤەك پێشكێشكر و ئەڤە دەقێ وێ یە:
پشتی سالەكێ ژ دانانا بەرێ بنیاتێ ڤی جهی ئەڤرۆ ئەم ل ڤێرێ نە، بۆ من جهێ خوەشحالیێ یە كو ئەڤرۆ ل ڤێرێ ل كۆمەلگەها دۆمیز ڤێ كارگەها گرنگ ڤەدكەین. دەستخوەشیێ ل كۆمپانیا جێبەجێكار دكەم كو ئەڤ كارێ پێشكەفتی لڤێرێ دروستكری و دەلیڤەیێن كاری بۆ سەدان كەسان پەیدا كری.
گرنگیدان ب كەرتێ چاندنێ و دابینكرنا ئاسایشا خۆراكی، ئێك ژ ئارمانجێن سەرەكی یێن كابینەیا نەهێ یا حوكمەتا هەرێما كوردستانێ یە، بۆ ڤێ مەبەستێ ژی ل سالا بۆری ب هاریكاریا كەرتێ تایبەت مە كار بۆ ئەنجامدانا چەندین پڕۆژەیان ل باژێرێن كوردستانێ كر د بوارێ ب بازاركرنا گەنمێ جۆتیاران و كڕینا گەنمێ جۆتیاران ل ناڤخوەیا كوردستانێ.
پێدڤیە ئەم هەموو بزاڤان بكەین ژ پێخەمەت دابینكرنا ئاسایشا خۆراكی و پشتەڤانیا بەرهەمێ ناڤخوە و بەرهەمێ جۆتیارێن كوردستانێ, پێدڤیە جۆتیارێن كوردستانێ پشتڕاست بن كو حوكمەت دێ هەموو پشتەڤانیەكێ كەت و بازاڕێ ناڤخوە و دەرڤە بۆ بەرهەمێن ئەوان پەیدا كەت.
دروستكرنا ئەڤان جۆرە كارگەهان ژی هاریكاریەكا مەزن یا جۆتیارێن مە دكەت تاكو بەرهەمێن ئەوان بهێنە فرۆتن، هاندانەكە بۆ وێ چەندێ ل سەر چاندنێ و بەرهەمی بەردەوام بن.
ل دەمێ چەندین سالان جۆتیارێن مە د ڕەوشەكا بێ ئومێدیێ دا بوون، وەكی پێدڤی پشتەڤانیا وان نەدهاتە كرن، بەلێ ئەز وان پشتڕاست دكەم كو ئەز گەلەك د خەما پێشئێخستنا كەرتێ چاندنێ و هاریكاریكرنا جۆتیاران دامە و هەر چ د شیانێن مە دا بیت دێ كەین بۆ هاریكاریا ئەوان و خەمساریێ ناكەین.
هوون ژی د ئاگەهدارن كو ل سالا بۆری پڕۆسەیا هنارتنا بەرهەمێ جوتیارێن كوردستانێ بۆ بازاڕێن دەرڤە دەستپێكریە و دێ بەردەوام بیت ژی.
كوردستان هەر د سەردەمێ دێرین دا دەڤەرەكا چاندنێ یا بناڤودەنگ بوو و خودانا ئەردێ بەرفرهە كو هەكە وەكو پێدڤی مفای ژێ وەربگرین، دێ شێین تا ئاستەكێ باش، ئاسایشا خۆراكی دابینكەین و بینە سەلكا خۆراكی بۆ ئیراقێ و دەرڤە ژی.
سوپاسیا كۆمپانیا جێبەجێكار دكەم بۆ ڤی پڕۆژەی. كەرتێ تایبەت دشێت ڕۆلەكێ گرنگ د پێشئێخستن وپێشڤەبرنا ئابۆرێ هەرێما كوردستانێ دا بگێڕیت و حوكمەتا هەرێمێ ژی یا بەرهەڤە هەموو ئاسانكاریەكێ پێشكێشی كەرتێ تایبەت بكەت تاكو ل گەل كەرتێ گشتی پێكڤە هەرێما كوردستانێ بەر ب قۆناغەكا پێشكەفتی ببەن.
ل ڤێرێ داخوازێ ژ وەبەرئێنەرێن كوردستانێ دكەم كو وەبەرئێنانێ د كەرتێ چاندنێ و پیشەسازیێ دا بكەن تاكو ئابۆرێ كوردستانێ پتر گەشێ بكەت و چاڤێ مە كێمتر ل دەرڤە بیت بۆ دابینكرنا پێدڤیێن خوە.
ل سالێن بۆری كێمترین وەبەرئێنان د وارێ چاندنێ و پیشەزای دا هاتیە كرن، د دەمەكی دا پتر پێشئێخستنا ئابۆرێ هەرێما كوردستانێ پێدڤی ب وێ چەندێ یە گرنگیەكا زێدەتر ب گەشەكرن و پێشئێخستنا كەرتێن چاندنێ و پیشەسازیێ بدەین.
بەری ماوەیەكی ل گەل وەبەرئێنەرێن كوردستانێ ژ هەموو پارێزگەهان ڕوونشتم، مە باسێ بۆچوونا حوكمەتا هەرێما كوردستانێ و پاشەڕۆژا ئابۆری یا هەرێما كوردستانێ كر و ژ نێزیك مە گوهـ ل تێبینی و گلە و گازندە و داخوازیێن ئەوان ژی گرت كا چاوان حوكمەت و كەرتێ تایبەت پێكڤە بشێن هاریكاریا هەڤدو بكەن تاكو بشێین وەبەرئێنانێ ل ئاستێ هەرێما كوردستانێ زێدە بكەین و كەرتێ چاندنێ، پیشەسازیێ، گەشتوگوزارێ و .. هتد ل كوردستانێ بەر ب پێشڤە ببەین.
مە تێبینیێن وان ب گرنگ وەرگرتن، جهێ گرنگیێ بوون، مە ژی ئێخستنە بەرنامەیێ كارێ خوە تاكو ئەو كێماسیێن كو هەین، بهێنە چارەسەركرن. بەلێ جارەكادی لڤێرێ داخواز دكەم، سەرمایەدار و وەبەرئێنەرێن كوردستانێ پارێ خوە ل كوردستانێ بكاربێخن. ئەو كەسێ زیدەتر ل كوردستانێ وەبەرئێنانێ بكەت، پشتڕاست بن حوكمەت ژی دێ زێدەتر پشتەڤانیا ئەوان كەت، پێكڤە ئەم هەموو دشێین كوردستانێ بەر ب ئاستەكێ باشتر ببەین. ئابۆرێ كوردستانێ باشتر لێبكەین. دەلیڤەیێن كاری بۆ خەلكێ خوە زێدەتر بكەین. بێگومان ئەڤە دێ بیتە ڕێك و ئامرازەك بۆ وێ چەندێ ڕەوشا كوردستانێ، ڕەوشا ژیانا خەلكێ مە ل كوردستانێ بەر ب باشتر بچیت.
جارەكادی سوپاسیا هەوە دكم و دەستخوەشیێ ل هەوە دكەم بۆ ئەوێ كارگەها هەوە دروستكری، ئینشائەللا نموونەیێن وەكو هەوە گەلەك بن. هیڤیدارم ل جهێن دی ژی ئەو كو حوكمەتێ بەرنامە بۆ دانای و ئەو پڕۆژەیێن كو ڕازیبوون ل سەر هاتیە كرن، بهیچنە بجهئینان.
ل ڤێرێ د جهێ خوە دایە سوپاسیا ئیدارەیا پارێزگەها دهۆكێ بكەم بۆ پشتەڤانیا ئەوان و هاریكاری و هەماهەنگیا ئەوان ل گەل كەرتێ تایبەت بۆ ئەوان پڕۆژەیێن حوكمەتێ دەستنیشانكرین، لڤێرە ئەوان ئەوان ئەو پڕۆژانە بجهئیناینە. هیڤیدارم ل هەموو ئیدارە و پارێزگەهێن دی یێن كوردستانێ ژی داهاتێ پارێزگەهان دیسان بۆ خزمەتا خەلكێ پارێزگەهان و كوردستانێ بهێتە بكارئینان.

رۆژا ئێكشەمبی 19/11/2023، مەسرۆر بارزانی، سەرۆكێ حوكمەتا هەرێما كوردستانێ، بەرێ بنیاتێ پڕۆژەیێ دەڤەرا پیشەسازی و كارگەها ژێكجوداكرنا گلێشی (ڕیسایكلین) ل ناحیا ڕزگاری ل سنۆرێ ئیدارەیا سەربخوەیا زاخۆ دانا و د وی ڕێوڕەسمی دا پەیڤەك پێشكێشكر و ئەڤە دەقێ وێ یە…
گەلەك پێشخوەشحالم كو جارەكا دی ژی هاتینە ڤێ دەڤەرێ ل باژێرێ زاخۆ یا دەلال و ل گەل هەوەیێن خوەشتڤی پشكدارم د دانانا ژێرخانەیا دو پڕۆژەیێن گرنگ كو پێك دهێن ژ دەڤەرا پیشەسازی ل زاخۆ و كارگەها ژێكجوداكرنا گلێشی (ریسایكلین) كو هەردو پڕۆژە ژی گەلەك د گرنگ و ستراتیژی نە و مفایەكێ مەزن دێ گەهیننە ئە‌ڤێ دەڤەرێ.
دەستخوەشیێ ل هەردو كۆمپانیێن جێبەجێكار دكەم و هیڤیخوازم ب شێوەیەكێ باش ئەڤان هەردو پڕۆژەیان ئەنجام بدەن. مە ل سالێن بۆری كاردكر داكو پڕۆژەیێن خوە وەكو دەڤەرا پیشەسازی ل باژێر و پارێزگەهێن دی ژی ل كوردستانێ هەبن، ئەڤ پڕۆژە دێ دەلیڤەیێن كاری بۆ سەدان و بەلكو بۆ هزاران كەسان پەیداكەن و ئابۆری هەرێما كوردستانێ بەر ب پێشڤە بەن.
پێشڤەبرنا كەرتێ پیشەسازی ل گەل كەرتێن دی دێ كاریگەریەكا دیار ل سەر پێشڤەچوونا كوردستانێ هەبیت. ئەڤرۆ ل جیهانێ ئەو وەلات ب پێشكەفتی دهێنە زانین كو ژ ڕوویێ پیشەسازی ڤە د پێشكەفتی بن و داهێنانێ د بەرهەمئینانا پێدڤیێن ژیانا مرۆڤی دا بكەن.
ب خوەشحالی ڤە هەرێما كوردستانێ دەڤەرەكا زەنگینە ژ ڕوویێ كەرەستەیێن خاڤ و سامانێن سروشتی كو بنیاتەكێ سەرەكیێ گەشەكرنا كەرتێ پیشەسازی یە. بازاڕێ كوردستانێ ژی بازاڕەكێ نوو و پێگەهشتیە ودێ پێدڤی ب هەر كەلوپەلەكی هەبیت، دڤێت ئەم كار ل سەر بكەین بۆ دەستەبەركرنا پێدڤیێن مە یێن ناڤخوەیی ل هەرێما كوردستانێ و ئینانا كەلوپەلان ژ دەرڤە بهێتە سنۆرداركرن.
بۆ پێشئێخستنا كەرتێ ئابۆری، مە پێدڤی ب پێكڤەگرێدانا بازاڕێن كوردستانێ هەیە، ئەڤە ژی ب ڕێكا هەبوونا ڕێك و پرێن باش دهێتە كرن تاكو هاتنوچوون ب ساناهی بیت و دەم ژی بهێتە كورتكرن كو دەرئەنجام ژی تێچوویێن دارایی ژی بۆ خودان كاران دێ كێم بن. مە ل سالێن بۆری ل سەر ڤان ئالیان ژی كاركریە و نوكە ڕێك و پرێن د ناڤبەرا باژێران پێشكەفتنەكا باش بخوەڤە دیتیە، دەم د ناڤبەرا باژێر و پارێزگەهان دا گەلەك یێ كێمتر لێهاتی ژ بەری نوكە.
پڕۆژەیەكێ دی یێ گرنگ بۆ ئەڤرۆ كارگەها ڕیسایكلینا گلێشی و زبلی یە، ئەڤ پڕۆژەیە ژی سەرەرای وێ چەندێ دەلیڤەیێن كاری بۆ سەدان كەسان پەیدا دكەت، چەندین مفایێن گرنگ ژی هەنە، ژ وان ژی پاراستنا ژێنگەهێ و ژێدەرێن سروشتی و پاراستنا پاقژی و ژینگەها ئەردی. ژ بلی وێ چەندێ ژ ڕوویێ ساخلەمی ژی ڤە د ناڤبەرا گلێشی و زبلی ب شێوەیێ نوكە سۆتن و بن ئەردكرنا گلێشی و زبلی دا كو گەلەك جاران دبیتە ئەگەرێ بەلاڤبوونا چەندین نەخوەشیان ل دەڤەرێ، چونكە هەبوونا پاشمایێن گلێشی، مەترسی و گەفەكا گەلەك مەزنە ل سەر ژینگەهێ و پیسبوونا ئاخێ و ئاڤا ژێر ئەرد كو ل دوماهیێ دێ كاریگەریەكا خراب ل سەر ژیانا مرۆڤی هەبیت، لەوما پڕۆژەیێ ڕیسایكلینا گلێشی پڕۆژەیەكێ گەلەگ گرنگە و ئەم دێ كار كەین كو ل هەموو دەڤەرێن كوردستانێ پڕۆژەیێن ب ڤی شێوەی بهێنە ئەنجامدان.
ئەڤرۆ بابەتێ ژێنگەپارێزی و پاراستنا ژێدەرێن سروشتی و سەخبێركرنا وان ب شێوەیەكێ زانستی، ئێكە ژ پرسێن جیهانی و ژوان كێشەیێن مەزنە كو ڕوو ب ڕوویێ مرۆڤایەتی دبن، ل هەرێما كوردستانێ ژی ژ وان كێشە و ئاستەنگان ئەم د دوور نینین لەوما پێدڤیە هەموو بەرهەڤیان بكەین بۆ ڕوو ب ڕووبوونا ڤان ئاستەنگان.
جهێ سوپاسیێ یە كو خودێ دەلیڤە دا مە و مە شیای وان سۆزێن مە داین، گەلەك ژوان ببنە كریار و ببنە پڕۆژە، سەرەرای وان هەموو قەیران و ئاستەنگێن بۆ ڤێ كابینەیێ هاتینە دروستكرن، بێهنفرەهیا هەوە و پشتەڤانیا كەرتێ تایبەت و ب وەستیان و دلسۆزیا فەرمانبەرێن حوكمەتێ ل كەرتێ گشتی ئەڤ كابینەیە نەكەفت بەلكو ڕۆژ ب ڕۆژ بەر ب سەركەفتنێ پێنگاڤ هاڤێتن و هەكە خودێ دەلیڤێ بدەت دێ پێنگاڤێن باشتر و سەركەفتنێن مەزنتر ژی بدەستڤەئینین و مە ل ئەڤان دەمێن بۆری وەكو هوون دبینین گەلەك پێشكەفتن د وارێ چاندنێ و پیشەسازی بدەستڤە هاتینە و مە ل بەرە ئەڤ دەستپێكا ڤەژاندنا ئابۆری یان پێشئێخستنا كەرتێ چاندنێ یان كەرتێ پیشەسازی ببیتە شۆڕەشەكا ڤەژاندنا ئابۆری ل هەموو باژێر و پارێزگەهێن كوردستانێ.
هیڤیا مە ئەوە هەموو ئالیێن سیاسی ل ناڤخوە و هەموو دۆستێن مە ل دەرڤە ژی پشتەڤانێن بەرنامەیێن حوكمەتێ بن بۆ وێ چەندێ ئەم بشێیت بەرنامەیێن خزمەتگوزاری یێن زێدەتر بۆ خەلكێ كوردستانێ دەستەبەر بكەین.
جارەكادی دەستخوەشیێ ل كۆمپانیا جێبەكارا ڤی پڕۆژەیێ دكەم و هیڤیدارم ب كوالێتیەكا باش ئەڤ پڕۆژەیە بهێتە بجهئینان، خەلكێ زاخۆ و دەوروبەرێ زاخۆ و پارێزگەها دهۆكێ و هەموو كوردستان ژی مفای ژ ئەڤی پڕۆژەی ببینن.