هەولێر، قائید میرۆ
بسپۆرەكێ ئابووری راگەهاند، حوكمەتا ئیراقێ یا بەرهەڤ نینە بۆ بجهئینانا رێكەفتنا دگەل هەرێما كوردستانێ و بەرۆڤاژی هەرێم ئەڤە چەندین هەیڤە كار بۆ بجهئینانا خالێن ناڤا رێكەفتنێ دكەت. هەروەسا دبێژیت: مادەم ئاریشێن ئابووری بووینە سیاسی، ئەڤە دبیتە ئەگەر ئاریشێن تەكنیكی ببنە ئاریشێن مەزن و سال بۆ سالێ ئالۆزتر ببن.
د. ئیدریس كۆچەر، بسپۆرێ ئابووری بۆ رۆژناما ئەڤرۆ دیار كر «پرسا بودجە و مووچێ خەلكێ هەرێما كوردستانێ ل بەغدا زێدەتر بابەتەكێ سیاسیە نەك ئابووری، ب دیتنا من ئاریشێن دناڤبەرا هەرێم و بەغدا هەین تەكینیكی نە، بەلێ حوكمەتا ئیراقێ ل ئاریشێن تەكینیكی خوە ناكەتە خودان، مخابن حوكمەتا فیدڕال خۆ ژ رێكەفتنا دگەل هەرێما كوردستانێ ڤەددزیت و چەندین هەیڤە حوكمەتا هەرێما كوردستانێ ب هەموو شیانێن خوە كار دكەت بۆ بجهئینانا رێكەفتنا دگەل بەغدا هەتا رێككەفتن وەكی خۆ بهێتە بجهئینان.
زێدەتر گۆت: حوكمەتا ئیراقێ ناهێتە بن بارێ حوكمەتا هەرێمێ و تنێ بابەت سیاسیە نەك ئابووری، چونكە كۆتلەیێن سیاسی یێن ناڤا حوكمەتا ئیراقێ ب چاڤەكێ دوژمنكارانە بەرێ خوە ددەنە هەرێما كوردستانێ، نەك وەكی نەتەوەیەكێ بەرێ خوە ددەنە كوردان كو ب شێوەیەكێ ئاشتیانە د ناڤا ئەڤی وەلاتی دا بژین، لەوڕا ژی بجه نەئینانا رێكەفتنا دناڤبەرا هەرێم و بەغدا كاریگەری ل سەر هەرێم و ئیراقێ ژی پەیداكرینە و هەموو لایەك ژی گەهشتیە وێ باوەریێ ئەڤە بەغدایە یا بەرهەڤ نینە بۆ بجهئینانا رێكەفتنا هاتیەكرن بۆ چارەسەركرنا ئاریشەیان، ئەڤە ژی بوویە ئەگەر مووچێ فەرمانبەرێن هەرێمێ گیرۆببیت و چالاكیێن ئابووری و خزمەتگوزاری بهێنە راگرتن.
ڤی بسپۆرێ ئابووری ئاماژەكر» هەر چەندە ئاریشە د تەكینیكی نە و دشیاندایە بهێنە چارەسەركرن، بەلێ حوكمەتا ئیراقێ چو دەلیڤە نەداینە هەرێما كوردستانێ بۆ بجهئینانا خالێن ناڤا رێكەفتنێ، سال بۆ سالێ ژی ئاریشەیێن ناڤبەرا هەرێم و بەغدا یێن بەرەف زێدەتر دچن، ئەڤە ژی بۆ ڤێ چەندێ ڤەدگەڕیت لایەنێن بەرامبەر چو بەرهەڤی تێدا نینە بۆ چارەسەركرنا ئاریشەیان.
ل دۆر پڕۆژێ هەژمارا من ژی د. ئیدریس كۆچەر گۆت» هەژمارا من ئێكە ژ وان پڕۆژێن سەردەمە، چونكە دێ بیتە ئەگەرێ رێكخستنا مووچێ فەرمانبەرێن هەرێما كوردستانێ و جارەكا دی دێ باوەری بۆ بانكێن هەرێمێ ڤەگەڕیت، چونكە د دەمێ نوكەدا وەلاتیان زۆر باوەری ب سیستەمێ بانكی نینە، هەروەسا دێ ئاسانكاریێن زۆر بۆ فەرمانبەران هێنەكرن، ئەگەر هژمارا بانكی بكەڤیتە كاری و هەموو فەرمانبەران هەژمارا بانكی هەبیت، ئێكە ژ وان پێنگاڤێن هەری باش ژلایێ حوكمەتێ ڤە هەژمارا من بۆ هەموو فەرمانبەران بهێتە ڤەكرن، ژبەركو ل پڕانیا وەلاتێن پێشكەفتی یێن جیهانێ كار ب سیستەمێ بانكی دكەن و ئەو سیستەمێ نوكە یێ كلاسیك ب سەرڤەچوویە و تنێ ل هندەك وەلاتێن جیهانێ دهێتە بكار ئینان، هەروەسا هەژمارا من دێ بیتە ئەگەرەكێ بهێز كو وەلاتی شارەزایێ سیستەمێ بانكی ببن و ئێدی كار ب پارەیێ كاش نەكەن، بەرۆڤاژی بۆ كڕینا كەل و پەلان ژی حیسابا بانكی و كارتێ بكار بینن.
نيشاندان