ئامێدیێ، مەحمود نهێلی
ژ بەر خرابیا جادەیا گوندێ رەشانكێ ل سنورێ ناوچەداریا دێرەلۆك، ئاكنجیێن وی گوندێ بێزار كرینە و داخواز دكەن جادەیا گوندێ وان ژی بهێتە چێكرن.
وەحید حاجی ئاكنجی گوندێ رەشانكێ بۆ رۆژناما ئەڤرۆ دیار كر، ئەڤە چەندین سالە ئەو ل گوندی ئاكنجی بووین، لێ ئاریشا وان یا هەری مەزن نەبوونا جادەیێ و خرابیا رێكا گوندی یە و گۆت: ئەڤە ل سالا 2020 نڤیسارا وان ل رێڤەبەریا ناوچەداریا دێرەلۆك هات بوو بلندكرن، پشتی ژ لایێ وان ڤە داخوازی هاتیە كرن ل سەر چێكرنا وێ جادەیێ، لێ تا نوكە چ بەرسڤ نەبووینە و گۆت: كابینەیا نوویا حكومەتا هەرێما كوردستانێ رازیبوون ل سەر چێكرنا چەندین جادەیان كریە، لێ نزانن بوچی جادەیا گوندێ وان تا نوكە مایە و نە هاتیە چێكرن.
هاولاتیەكی دێ یێ ئاكنجێ وی گوندی بۆ رۆژناما ئەڤرۆ دیار كر، ئەو نێزیكی 60 مالان ل گوندی ئاكنجی نە و رۆژانە ئەو هاتن و چوونێ دكەن بو دێرەلۆكێ و شێلادزێ و گۆت: ژ بەر خرابیا ڤێ رێكێ و ڤێ جادەیێ ترۆمبێلێن وان ژ كار دكەڤن، ژ بلی رێكا سەرەكی یا دهێتە گوندی ، جادەیێن ناڤ گوندی ژی د بێ سەرۆبەرن و دەمێ دو چپكێن بارانێ بهێن ئەو نەشێن ل مال دەربكەڤن و هیڤی ژی خواستن چارەسەریا جادەیێن وان بهێتە كرن.
رێبەر سادق رێڤەبەرێ ناوچەداریا دێرەلۆك بۆ رۆژناما ئەڤرۆ دیار كر، جادەیا گوندێ رەشانكی تا رادەیەكی یا بێ سەرۆبەرە و تێكچوویە و گۆت: چێكرنا ڤێ جادەیێ و چەندین جادەیێن دیتر د پلانا پرۆژێن سالان 2023 ێ دایە و ئەو پرۆژە هاتینە بلند كرن و ئەم چاڤەرێ هندێ دكەین رازیبوون ل سەر وان پرۆژان بهێتە كرن و ئەو ژی دناڤ دایە و دێ هێتە چێكرن.
رێڤەبەرێ ناوچەداریا دێرەلۆك گۆت: ب سوپاسی ڤە د ڤان سالێن داویێ دا رێیا چەندین گوندێن دەڤەرێ ژلایێ كابینەیا نەهێ یا حكۆمەتا هەرێما كوردستانێ ڤە هاتینە چێكرن و نوكە ژی پرۆژێ چێكرنا رێكا گوندێن سپیندارێ و مژێ و كەڤنە مژێ و گوندێ سەرگەلێ ل ژێر بجهئینانێ یە و گۆت: گوندێ رەشانكێ ژی سەر ب ناوچەداریا دێرەلۆكێ یە و ئەو دێ هەموو پرۆژێن پێدڤی گەهینێ وەكو هەموو گوندێن دیتر.
نيشاندان