بێوار حەمدی:

پەرتوك گەلەك تشتان ل دەڤ گەنجان زێدەدكەت و ئەڤە ژی دمینیت ل دووڤ كاودانێن وی گەنجێ پەرتووكێ دخوینیت. گەنجەك ژی دبێژیت: ژبەركو كچ پتر د مال دایە، وێ پتر دەم بۆ خواندنێ هەیە و حەزدكەت جوانی و خواندنا پەرتووكێ د وێنە و رستەیان دا دیاربكەت.

هەلبەستڤان دیار عەبدولعەزیز، بۆ رۆژناما ئەڤرۆ گۆت: وەكو دیار ژ رەنگڤەدانا جڤاكێ مە و بەگرەوەند و هزركرنا مە، خواندنا پەرتووكان نەل ئاستێ پێتڤی یە، چونكو بازارێ فروتنا پەرتوكان یێ لاوازە، هەتا نڤیسكارێن مە ژی ڤێ گازندێ دكەن كو پەرتووك وەكو پێدڤی ناهێتە خواندن و فروتن.
دیاری ئەو چەندە ژی دیار كر، پەرتووك گەلەك تشتان ل دەڤ گەنجان زێدە دكەت، ئەڤجا ئەڤە ژی دمینیت ل دووڤ كاودانێن وی گەنجێ دخوینیت، بێگومان ئەگەر ئەو پەرتوكە ل ئاستێ پێدڤی بیت بۆ خواندنێ، دێ كارتێكرنێن ئەرێنی ل دەڤ وی كەسی پەیداكەت و گۆت: (هەر گەنجێ پەرتوكێ بخوینیت دێ چاڤ روونیەكا دی لدەڤ پەیدابیت و دیتن و گوشەیەكا دی بۆ ژیانێ و دهەمان دەمدا پرۆسێسا هزركرنێ و پاشی ئەو هزركرنە دێ بیتە رەخنە و پشتی ڤان هەردووان دێ دەربازی داهێنانێ بیت).

راگەهاندكار دلێر زوهێر، سەبارەت بابەتی گۆت: هەر ژ زارۆكینیێ من حەز ل سەر خواندنا پەرتوكێن گشتی هەبوویە، ئانكو ژ زارۆكینیێ پەرتووكێ ل دەڤ من گەشەكریە و مەزنبوویە، و گۆت: (حەزا من پتر ژ بۆ خواندنا رۆمانێ یە و من گەلەك رۆمان خواندینە، چونكی هەست پێدكەم مروڤی دگەل خۆ دبەنە د وی سەردەمی دا، یان وێ دەلیڤێ دا یا كو ئەو چیروكە دروست بووی).
دلێری د بەردەوامیا ئاخفتنا خۆ دا دیار كر، پەرتووكێ گەلەك تشت ل دەڤ من زێدەكرینە وەكو (ئاخفتنا جوان، بەرفرەهكرنا هزرێ، بیرتیژی، ئارامی و گونجاندن دگەل هەر رەوشەكێ) و گۆت: ژ بەر كو رەگەزێ مێ پتر د مال دایە، دبیت وێ پتر دەم هەبیت ژ بۆ خواندنێ و ئەو حەزدكەت جوانی و خواندنا پەرتوكێ د وێنە و رستەیان دا دیاربكەت، لێ د بەرامبەردا ئەڤ چەندە ل دەڤ رەگەزێ نێر كێمترە).

نورمان عەلی، كچەكا گەنجە و چالاكڤانە گۆت: ئەز ژی ئێكم ژ خواندەڤانێن پەرتووكا مە، ژ بەر كو پەرتوك تاكە هەڤالە بۆ دەرگەهێ پێشكەفتن و رەوشەنبیریا مێشكێ مرۆڤی و گۆت: (مروڤ ب خواندنا دروستی یا پەرتوكێ دبیتە كەسەكێ سەركردە و خودان مێشكەكێ ساخلەم، هەر دیسان ژ بۆ هەر لایەنەكێ ژیانێ مروڤی دكەتە كەسەكێ سەركەفتی).
ل دووماهی ئاخفتنا خۆ دا نورمانێ دیار كر، گەنجێن مە یێن نوكە گەلەك رۆمانا دخوینن، چونكی ل دویڤ وان دووڤچونێن مە كرین دیاربوویە كو پتریا گەنجێن خواندەڤان حەزا رۆمانێ هەیە و ئارامیا خۆ تێدا دبینن، بەلێ ئەز وەك كچەك پەرتوكێن گشتی دخوینم و گۆت (دەمێ مرۆڤ پەرتووكێ دخوینیت یا پێدڤی یە مرۆڤ د كەش و هەوایەكێ ئارام دابیت، چونكی هەردەمێ مێشك یێ ئارام بیت مروڤ دشێت بچیتە دناڤ ناخێ پەرتوكێ دا، دگەل خواندنێ گرنگە پێنوسەك و كاغەزەك ل دەڤ مە هەبن، ژ بۆ نڤێسینا هەر پێزانینەكا گرنگ د پەرتوكێ دا، ژ بەر كو هەر پەرتوكەك ژی وانەیەكە بۆ مرۆڤی).

گەنجان:

جلكێن كوردی ئارامی و جوانی و تایبەتمەندیەكا تایبەت هەیە ل دەڤ مە كوردان ب تایبەت ل هەلكەفت و شەهیانان ل دور ڤی بابەتی ژی خودانێ‌ جهەكێ‌ پەرۆكێن زەلامان دبێژیت: كارێ‌ مە ب تنێ‌ وەرزەكی هەیە و ژبەر بلندبوونا بهایێ‌ دولاری و گرانبوونا پەرۆكی گەلەك كێم دكڕن.

سالح عەلی ئەرزی، خودانێ‌ جهێ‌ رۆژان یێ‌ فرۆتنا پەروكێن كوردی یێن زەلامال ل قەیسەریا كەڤن ل بازارێ‌ دهۆكێ‌ گۆت: گەلەك جۆرێن پەروكی هەنە وەكو یێ‌ توركی و هندی و دوبەی و ئیرانی و ئیتالی هتد، بەلێ‌ گەلەك خوەش سیلكا و كەشمیر دهێتە فرۆتن و خەلكێ‌ مە وان دكرن و قوماشێ‌ ئیتالی ب ناڤێ‌ سولتان ژ هەموویان گرانترە، ڤی قوماشی ژی كەسێن بەرنیاس دكرن و نوكە باراپتر دانعەمر دهێن پەرۆكی دكرن ژ گەنجان و ب تنێ‌ هەكە هەلكەفت بن و دبیت ل وی دەمی ژی بچن بخوە كرێ‌ بكەن.
عەبدولجەبار ئەحمەد، خودانێ‌ جهێ‌ شێخ عەبدولجەبار دبێژیت: نوكە چو هەلكەفت نینن هەكە كار هەبیت 75% گەنج بكرن و قوماشێ‌ سیلكا و ئیتالی نوكە د بازاری دا دگرانن و نمرە ئێكن، بەلێ‌ ل گەل بلندبوونا بهایێ‌ دولاری پەرۆك ژی گران بووینە و بكر كێم دكرن. بەلێ‌ د بازارێ‌ مە دا چو دوكان نەهاتیە گرتن ژ بەر نەبوونا كاری.
عەدنان ئەحمەد، ماموستایێ‌ زانكۆیا دهۆك بسپور د وارێ‌ ئابوری دا خوەیاكر، كەلتۆرێ‌ جلكێن كوردی د ناڤ مە دا یێ‌ كێمە و هەكە بەرێ‌ خوە بدەینە دەولەتێن عەرەبی شانازیێ‌ ب كەلتۆرو جلكێن خوە دبەن و گۆت: گەنجێ‌ مە گەلەك حەز ژ جوانیێ‌ دكەت ب تایبەت ل دەواتان حەز دكەت ل دەواتان جلكێن خوە ب گوهۆریت و دبیت ژبەر گرانیا بهایێ‌ پەرۆكی و دروارێ‌ گەنج وان گوهورینا ب خوە ڤە نەبینیت، ژ بەر كو گەنجێ‌ مە ب تنێ‌ ل هەلكەفتان جلكێن كوردی دكەتە بەرخوە، لەورا دبیت نەكریت و ب تنێ‌ بۆ وێ‌ رۆژێ‌ كرێ‌ بكەت.

بێوار حەمدی:

هێلان چیا، بەرپرسا رێكخراوا یەسنا بۆ
ڤەژاندنا چاند و فەلسەفا زەردەشتی د دیدارەكێ دا بۆ رۆژناما ئەڤرۆ گۆت: پتریا گەنجێن مە یێن بیروباوەرا دینێ زەردەشتی یان ژی بەهدین رەوشەنبیڕن و دەرچوویێن كولیژ و پەیمانگەهانە، خودان مێشكەكێ ڤەكرینە و تا نوكە چ گازندێن وان ژ چ جها بۆمە نەهاتینە و گۆت: (ژ بەر كو دینێ زەردەشتی ئێك ژ ئولێن زانست و داهێنانێ یە، لەوما گرنگیەكا زۆر ب تەخا لاوان ددەت، نوكە ژی چەندین داهێنەر و خودان شیان هەنە، لێ رێیا پشتەڤانیێ گەلەك یا ب زەحمەتە).
هێلانێ د بەردەوامیا ئاخفتنا خۆ دا گۆت: داخواز و هیڤیا مە وەكو كچ و ژن و ب تایبەت یێن گەنج
ئەوە ئەم ل رێز و بوهایێن خۆ یێن رەسەن ببینە خودان و نەهێلین وەك ئامیرەك بهێنە دیتن، یان ژی رەگەزەك جودا ژ مروڤایەتیێ و گۆت: (ئەم داخوازێ ژ هەمی گەنج و لاوێن خۆ یێن ئولا زەردەشت دكەین خۆ و دیرۆكا خۆ بنیاسن و خودانێن ڤیانێ بن بۆ ئاخ و نەتەوا خۆ و ب جان گۆری ئاخا خۆ ب پارێزن ل ژێر هزرا باش و گۆتنا باش و كریارا باش).
ل دووماهیێ ژی بەرپرسا رێكخراوا یەسنا دیار كر، ژ بەر كو گەنجێن مە رەوشەنبیرن و خودان هزركرنەكا ساخلەمن و حوكمەت ژی ل سەر نەرەوا و رادیكال یا زالە و باوەردارێن زەردەشتی ژی نە ژ وان باوەردارانن بچن جەنگی دژی دینێن دی بفروشن، لەوما گەنج و لاوێن مە دڤێت نە بنە دەستخوشكەر و رێخوشكەرێن وان كەسا یێن مێشكێ وان و ئاخا وان داگیردكەن ل ژێر هەر ناڤەكی.

بێوار حەمدی:

پەیوەندیێن دلینی ل وی دەمی كارتێكرنا نەرێنی دكەن دەمێ لوژیك یێ ئامادە نەبیت، ژبەركو پێدڤیە لوژیك و هەست پێكڤە د پەیوەندیێ دا هەبن، دەرونناسەكی ژی گوت: هەكە پەیوەندیێن دناڤبەرا كچ و كوران بتنێ سوزداری بن دێ تووشی هندەك نەخۆشیێن دەروونی بن
دەرونناس كارزان میرانی، د دیدارەكێ دا بو روژناما ئەڤرو دیار كر، هەستێ دلینی یان سوزداری لدەڤ هەموو گیانداران هەیە و ب رێكا هندەك رەفتاران دهێتە دیار كرن بو نموونە: ل دەڤ مروڤان ب رێكا هوزانا یان ئاخفتنێن هەستیار یان دەمێ دایك ب رێكا گرنگی پێدانێ ب زاروكێن خۆ دیار دكەت یان ژی پەیوەندیێن دناڤبەرا كچ و كوران و گوت (پەیوەندیێن دلینی باشی و خرابیێن خۆ هەنە، بەلێ هەكە بەهرا مێشكی ژی د پەیوەندیێ دا هەبیت باشترە ئانكو نەك بتنێ هەست و سوز بن )
كارزان ئەو چەندە ژی دا زانین، پەیوەندیا دلینی ل وی دەمی كارتێكرنەكا نەرێنی دكەت دەمێ د پەیوەندیێ دا لوژیك نەبیت، ژبەركو هەر پەیوەندیەكا سوزداری دڤێت لوژیك و هەست پێكڤە بن و گۆت: (بو نمونە: هەكە پەیوەندیا كچێ‌ و كورەكی بتنێ هەست و گرێدان بیت ل دەمی ئەو پەیوەندیە نەمینیت دێ كارتێكرنێن دەروونی ل سەر رەوشا وان دروست كەت، و دێ وان هەردوو لایەن هێنە ئێشاندن و دێ تووشی نەخۆشیا خەموكیێ بن یان ژی تێكچونا خۆ گونجاندنێ دێ لدەڤ پەیدا بیت).
دەروونناسی گوتژی: (هەبوونا ساخلەمیەكا باش یا دەروونی وەل مروڤی دكەت كو بشێت خۆ ژ گڤاشتنێن دەروونی یێن ژیانێ قورتال بكەت و گوت (ئەز داخۆازێ ژ هەموو كچ و كوران دكەم هەكە هەستێن دلینی و سوزداری هەبن خۆ پشتراست بكەن ژ هەستێن خۆ ب رێكا هزرێن خۆ، ئانكو د پەیوەندیێن سوزداری دا دڤێت مێشك یێ ئامادە بیت).

خێزان ئەو ناڤەندە، یا كو جڤاكی پێك دئینیت، هەبونا جڤاكەكێ ساخلەم و سەركەفتی، پێدڤی ب خێزانێن ساخلەم و سەركەفتیە، خێزانا ساخلەم و سەركەفتی پێدڤی ب تاكەكێ ساخلەم و سەركەفتیە، ژلایێ عەقل و دەروونیڤە، هەروەكو ئەم هەموو دبینین و د ئاگەهدارین، نوكە رەوشا خێزانان د جڤاكێ مەدا زور یا خرابە و روژانە چەندین خێزان ژێك جودا دبن، ب تایبەت دناڤ تەخا گەنجان دا، ئەڤە ژی ڤەدگەریت بو هندێ كو ئەو كچ و كورێن بڕیارا هەڤژینیێ ل گەل ئێك ددەن، د پروسا هەڤژینیێ نە گەهشتینە و نە شیاینە هەلبژارتن و بریارەكا دروست د ڤی بابەتی دا بدەن، ل بیرا مە هەموویانە، دەمەكی مەهرەكرنا ژن و مێرا بتنێ ژلایێ مەلایانڤە دهاتە ئەنجامدان، بێی بەرچاڤ گرتنا لایەنێن تەندروستی، بەلێ نوكە هندەك مەرج و رێنما هاتینە دانان بو هەڤژینیێ، ئەو ژی پشكنینا نەخوشیا و گونجانا هەڤژینان ژلایێ ساخلەمیێ ڤە و مارەكرن ل دادگەهێ، داكو بزانن چ زوری ل سەر كچ یان كوری نینە ل سەر پێكئینانا ڤێ پروسا گرنگ، بەلێ یا من دڤێت باس بكەم و پێدڤیە گرنگی پێ بهێتە دان ئەوە، گرنگی ب لایەنێ عەقل و دەروونی یێ وان كەسان بهێتە دان ئەوێن دڤێن هەڤژینیێ پێك بینن و ناڤەندەك بهێتە دامەزراندن ژلایێ حوكمەتا هەرێما كوردستانێ ڤە بو ماوێ چەند روژەكان وانە ل سەر خێزانێ بو بهێنە گوتن، و ئەرك و مافێن وان بەرامبەر ئێكدوو بو بهێنە باس كرن و د وان وانەیان دا دشێن باوەریێ‌ بو وان گەنجان چێكەن هەتا مەزاختییێن شەهیانێ كێم كەن و زور كارێن زێدە د شەهیانێ دا نەكەنوەكو شریناهیێن vip و سالون و هولێن گران بها و… داكو پشتی هەڤژینیێ بو وان ئەو تشتێن دبنە كەتوار د نوو نەبن و تووشی ئاریشا نەبن، و بشێن ڤێ پروسێ ب شێوەیەكێ ساخلەم ئەنجام بدەن، نوكە مە ب دەهان و سەدان دەرچویێن بەشێن دەرونناسی یێن هەین،
هەكە حوكمەتا هەرێما كوردستانێ ڤێ ناڤەندا گرنگ دابمەزرینیت مفایێن وێ دێ ئەڤ خالێن ل خوارێ بن:-
1.دێ ئاریشێن خێزانی كێم بن و ئەو كەسێن هەڤژینیێ پێكدئینن دێ د ڤێ پروسەیا گرنگ گەهن و ژ لایێ عەقلی و دەروونیڤە هێنە پێگەهاندن و هەتا باوەری پێ بهێتە كرن، كو مەزاختیێن شەهیانێ كێم بكەن و بارێ خو گران نەكەن.
2.دێ ب دەهان كەسێن بسپور و خودان باوەرنامە هێنە دامەزراندن و بنە خودان كار و پیشە.
3.دێ بیتە داهاتەكێ باش بو حوكمەتێ، چونكی وەكو پشكنینا دێ كوژمەك هێتە وەرگرتن، بو وان وانەیان.
4.ب رێكا ڤێ ناڤەندا گرنگ، دێ ئاریشێن خێزانی زور كێم بن و ئاسایشا جڤاكی دێ بەرقرار بیت و بەر ب باشیێ چیت، و تاكێن ساخلەم و سەركەفتی د پروسەیا هەڤژینیێ دا دێ پێگەهن.
لدیف زانیاریێن من هەین ئەڤ ناڤەندە ل زور وەلاتێن پێشكەفتی هەیە و گرنگیەكا زور پێ دهێتە دان، و هەتا باوەرنامە ب كچ و كوران دهێتە دان ل سەر پێگەهشتنا پێكئینانا هەڤژینیێ و ئەو باوەرنامە دهێتە داخواز كرن ژ لایێ دادگەهێ ڤە لدەمێ مەهر كرنێ.
هیڤیدكەم پشنیارا مە لبەر چاڤ بهێتە وەرگرتن و جهێ مفایی بیت، ژبەر كو ژبو بەرژەوەندیا گشتیە و دڤێت ئەم هەر گرفت و نەخوشیەكا جڤاكی ب گرفت و نەخوشیا خوە بزانین و ئەركێ مەیە ل چارەسەریان بگەرین و پشنیار گەین بو جهێن شولەژێ .