دیدار، سالار محەمەد دۆسكی:

پێشمەرگە و زیندانیێ‌ سیاسی، هشیار محەمەد حەسەن رێكانی، رێككەفتی 15/9/1961ێ‌ ل گوندێ‌ سندورێ‌ ل دەڤەرا دۆسكیا ژدایك بوویە، خێزانا وی ژ گوندێ‌ (بێدە) ل دەڤەرا رێكانیان هاتینە دەڤەرا دۆسكیا و پاشی باژێرێ‌ دهۆكێ‌، ل سالا 1967 ب زمانێ‌ كوردی ل خواندنگەهێن (مهاباد و برایەتی) خواندیە و ل سالا 1979 ئامادەیا چاندنێ‌ ل باژێرێ‌ زاخۆ ب دووماهی ئینایە.
هشیار محەمەد حەسەن رێكانی، د دیدارەكێ‌ دا ل گەل رۆژناما ئەڤرۆ ئاشكراكر كو ل سالا 1976ێ‌ دەست ب ڤەهاندنا هەلبەسان كریە و هەر ژ وێ‌ دەمی و هەتا ئەڤرۆ و هەلبەستێن وی پەسن و ئەڤینداریێ‌ ب ڤیانا وەلاتی و كوردینیێ‌ ژی هاتینە خەملاندن، ل سالا 1980ێ‌ دبیتە پێشمەرگە لژنا ناوچا شێخان و پاشی ل راگەهاندنا لقێ‌ (پ.د.ك) ل كوماتەی و پاشی ل سالا 1981ێ‌ دچیتە ئیرانێ‌ و دووڤدا بەرب وەلاتێ‌ سوریێ‌ دچیت، ل سالا 1981ێ‌ خولەكا لەشكری ل گەل بەرەیێ‌ دیمەكراتیی یا فەلەستینی ب دووماهی دئینن و ل سالا 1982ێ‌ خولەكا سیاسی ل قامشلی ل گەل (پارتی گەل) ب دووماهی دئینت، ل سالا 1983ێ‌ خولەكا برینپێچیێ‌ ل قامشلی دگەل نڤێسینگەها كاروبارێن ئیراقێ‌ ب دووماهی دئین، ل سالا 1983دزڤریتە ئاخا ئازداكرییا كوردستانێ‌.
هشیار رێكانی زێدەتر گۆت: ل سالا 1980 ئەزێ‌ رێكخستی بوون و هەستا نەتەوی و كوردستانەكا ئازاد و سەربەست ئەز پالدام ب رێكا هێژا ( رەشید تەلوەیی، شەهید ئەحمەد تەلوەیی) گەهشتمە گوندێ‌ ئاتوشێ‌ و رۆژەكا بەفرین بوو و من دەست هاڤێتە چەكێ‌ شەرەفێ‌ و بوومە پێشمەرگە لژنا ناوچا شێخان، و پاشی ل رگەهاندنا لقێ‌ ئێك ل كوماتەی و دووڤدا ل سالا 1981 دبمە پێشمەرگە و نڤیسەر ل گەل خودێ‌ ژێ‌ رازی (مستەفا نێروەیی) ل جەلدیان رۆژهەلاتێ‌ كوردستانێ‌ و دووڤدا ژ ئیرانێ‌ بەر ب رۆژئاڤایێ‌ كوردستانێ‌ دچم و بەردەوامیێ‌ دەمە خەباتا پێشمەرگاتیێ‌.
هێشتا گۆت: ل سالا 1980ێ‌ ل گوندێ‌(ئاتوشێ‌) مالا رەحمەتی (حەسەنێ‌ مشۆی) من پەیوەندی ب شۆڕەشێ‌ كر، و درێكا گەلی كورتكی را چووینە (سینا و شێخ خدرا) مە هێرشەك برە گوندێ‌ (داكا) و دەسكەفتێن مە (10) كلاشینكوف بوون، پێشمەرگە (خالد بانی) كلاشینكوفەك پێشكێشی من كر، وی دەمی ل گەل رێكخراوا شەهید (وەیسی بانی ) بووم و عەدەد بازوك خودێ‌ ژێ‌ رازی (عەلویێ‌ فەلەكێ‌) بووم، و لەورا من كورتە چیرۆكا (هەڤال هێل و هەڤالگر) پێ‌ چێكر و دگوڤارا كاروان دا بەلابوویە، ل سالا 1981ێ‌ دەمێ‌ ل رۆژهەلاتێ‌ كوردستانێ‌ ل (كێلەشین و جەلدیان) وی دەمی ل گەل خودێ‌ ژێ‌ رازی (مستەفا نێروەیی) بووم، و بتنێ‌ گولەك من بەردابوو ئەسمانی، دەمێ‌ ئەز پێشمەرگە ل جەلدیان ئەز دبەردەرگەهێ‌ قوتابخانەكێ‌ را دەربازبووم و قوتابیان سرودا (ئەی رەقیب) دگۆت، ژ بیرهاتنێن خوەشێن ل بیرا من ل 14ی ئادارا 1991ێ‌ سپێدەیا رۆژا سەرهلدانێ‌ بێی چەك دەركەفتم و سروودا (وەرنە شۆڕەشێ‌ لەشكر) بوو گەنجێن دهۆكێ‌ دگۆت و گەنجان ل گەل من دگۆت و بەرب ئەمنا دهۆكێ‌ ڤە چووین.
هشیار رێكانی بەحسێ‌ گرتنا خوە دكەت ژلایێ‌ رژێما بەعس ڤە و گۆت: ل سالا 1986ێ‌ ب دەستێن جەلادێن ئەمنا دهۆكێ‌ دهێمە گرتن و ئەشكەنجەدان بۆ ماوێ‌ سالەكێ‌ وەك زیندانیەكێ‌ سیاسی و پاشی ل دادگەها (سەورە) یا رژێما سەدام حسێنی دهێمە حوكمكرن ب مادێ‌ (ا-157) سزایێ‌ من هەتا هەتایێ‌ و دهێمە زیندانكرن ل زیندانا (ئەبو غورێب) ل بەغدا هەتا سالا 1988 ب لێبورینەكا گشتی دهێمە ئازادكرن، ل سالا 1991 من دەست بكارێ‌ پارتایەتی و سەندیكا و رێكخراوەی كریە و ل هەمان سال كارگێرێ‌ (ن.ر.لق 1) یا پارتی گەل بوویمەن ل سالا 1991ێ‌ بوومە ئەندامێ‌ ئێكەتیا نڤیسەرێن كورد، ل سالا 1992ێ‌ بوویمە جێگرێ‌ سەرۆكێ‌ ئێكەتیا كرێكارێن كوردستانێ‌/ دهۆك و سەرنڤیسەرێ‌ بەلاڤوكا دەنگێ‌ كرێكاران، ل سالا1993ێ‌ دبمە ئەندامێ‌ دەستەكا نڤیسەرێن گوڤارا گازی، سالا 1993ێ‌ دبمە بەرپرسێ‌ ئیدارا لق (9) یا (پ.د.ك) ل ئاكرێ‌، هەمان سال دبیتە ئەندامێ‌ دەستەكا نڤێسەران ل گوڤارا گازی، سالا 1993ێ‌ دبیە بەرپرسێ‌ ئیدارا لقێ‌ (9) ل ئاكرێ‌، سالا 1994ێ‌ ئەندامێ‌ (ن.ر.ج.پ. لق 1 پ.د.ك) ل سالا 1995ێ‌ ئامادەكار و پێشكێشكارێ‌ پرۆگرامێ‌ رەوشەنبیری ل تەلەڤزیونا دهۆك، ل سالا 1996ێ‌ دبیتە ئەندامێ‌ لژنا هەلسەنگاندنا سترانان ل كەنالێ‌ كوردستان یێ‌ ئەسمانی، ل سالا 1996ێ‌ دبمە سكرتێرێ‌ یەكگرتوویا مافێن مرۆڤی ل كوردستانێ‌ و سەرنڤیسەرێ‌ 45 ژمارێن گوڤارا ماف، ل سالا 1997ێ‌ ئەندامێ‌ لژنا هەلسەنگاندنا سترانان ل تەلەڤزیونا كوردستان كەنالێ‌ ئەسمانی، ل سالا 2003 كارگێرێ‌(جەماوەری) ل ن میسل لقێ‌ 14 و پاشی كارگێرێ‌ رێكخستنێ‌ ل .ن. ئازادی لقێ‌ 14 (پ.د.ك)، ل سالا 2008ێ‌ دبیتە ئەندامێ‌ رەوشەنبیری و راگەهاندنێ‌ لقێ‌ 18ێ‌ (پ.د.ك) ل ئامێدیێ‌ و سالا 2008 ێ‌ رێڤەبەرێ‌ نڤێسینا گوڤارا سیلاف، ل سالا 2010 بەرهەفكار و پێشكێشكارێ‌ پرۆگرامێ‌ (خامە) ل رادیۆیا سیلاف – ئامێدیێ‌ و زێدەباری بەرهەفكرنا چەندین پەرتوكان ژ وەشانێن لقێ‌(18) یێ‌(پ.د.ك).
هشیار رێكانی ئاشكراكر كو هەتا نوكە چەندین بەرهەمێن چاپكری هەنە ژوانان، ( كۆما هەلبەستێن (رۆژ) ب پیتێن لاتینی ل سالا 1996ێ‌، كوما هەلبەستێن (بابەلیسك) ستران و سرود ل سالا 1997ێ‌، پەرتووكا (هەلبەستەك ژ گۆتنێن بارزانی یێ‌ نەمر) ل سالا 2002ێ‌، كوما هەلبەستا (رۆژ 2) ل سالا 2006ێ‌ كورتە چیرۆكێن (پێلا ڕەش – بیرهاتنێن پێشمەرگەكی) ل سالا 2009ێ‌ و زێدەباری دانا هەلبەستان بۆ چەندین سترانبێژان بووینە ستران و هاتینە بەلاڤەكرن (شاكر محەمە ئەمین، حەسەن شەریف، ئسماعیل جومعە، عەمەر گوندی، مەحمود بامەرنی، دلشاد نێروەیی، محەمەد تاها ئاكرەیی، كاروان كامل، مهاباد زاخۆیی، كەمال محەمەد صەبری، فەرست حسێن، گولستان پەروەر، هوزان دەروێش، ئیسلام زاخۆیی، بلند ئیبراهیم، گارە سازكار، ئەحمەد دلوڤان، عەلی دهۆكی، سەمیر صەدیق، جەمال سەعدون، فەیسەل عەبدوللا، بەها ئێكمالەیی، هاریمان شنگالی، بەختیار فەتاح، هوزان محەمەد، مەلەك، خەلیل حاجی، تیپا دهۆك یا موزیكێ‌، نسرت محەمەد حەسەن) زێدەباری هاریكاریا چەندین زارۆكان مە كریە بۆ گۆتنا سترانێ‌ وەك( ئاڤەند، رەڤەند، كیڤی مستەفا، لاوین و گەلیار، محەمەد) ل سالا 2014ێ‌ وەك خوبەشەك پشكداری شەرێ‌ داعش بووم بۆ ماوێ‌ دو سالان.
پێشمەرگە و زیندانیێ‌ سیاسی، هشیار محەمەد حەسەن كو نوكە ئەندامێ‌ پشكا هەلبژارتنانە ل لقێ‌ 18 یا پارتی دیموكراتی كوردستان گۆت: دەمێ‌ یێ‌ زیندانكری ل زیندانا ئەبو غورێب من هەلبەستێن خوە ژ زار دەڤێ‌ هەڤالان وەردگرتن و زێدەباری هەلبەستێن نوو من ب رێیا كەسوكار و هەڤالێن خوە مینا دایكێن زیندانیان یان نەمر سەبریا هەكاری و هونەرمەندان ئسماعیل جەمعە و عەمەر گوندی دهنارتنە دەرڤەی زیندانێ‌، ل دووماهی یا سالێن حەفتیان ل سەر داخواز (شاكر محەمەد ئەمین) پەیڤێن (رابن هەلكەن شەمالا) من بۆ نڤێسیی، وی دەمی مەزنان ستران بۆ زارۆكان دگۆتن و پشتی بورینا 20 سالان برایێ‌ من (نسرت محەمەد حەسەن) پشتەڤانیا من كر و ئەز پالدام هەلبەستێن زارۆكان بنڤیسم و وی ئاواز دانانە سەر و ل دەسپێكێ‌ هونەرمەند (عەمەر گوندی) ژ پەیڤێن من (جەژنا بوونا تە پیرۆز) گۆت و پاشی زارۆكێن من (گەلیار و محەمەد) و هندەك زارۆكێن دی ژی گەلەك ستران ژ پەیڤێن من گۆتن، ئەڤجا زارۆكی ستران ب زارۆكینی یا خوە دگۆتن، ژبلی هەلبەستێ‌ هەر ژ سالێن هەشتێیان من كورتە چیرۆك ژی نڤێسبنە و بەلاڤەكرینە و خەلاتێ‌ ئێكێ‌ ژ رێڤەبەریا گشتی یا رەوشەنبیری و هونەری وەرگرتیە و ئەز رێڤەبەرێ‌ نڤێسینا رۆژناما (رایە المۆسل) ژی بووم و من گوتار و هەلبسەت دگوڤار و رۆژنامەیان دا بەلاڤەكرینە، پتریا ڤیسەڤالێن ناڤخوە دناڤا جەرگێن دوژمنی دا پشكدار بوویمە لێ‌ بۆ ڤیسەڤالێن دەرڤە هێشتا ئەو دەلیڤە بوو من چێ‌ نەبوویە.
ل دووماهیێ‌ پێشمەرگە و زیندانیێ‌ سیاسی و هەلبەستڤان، هشیار رێكانی گۆت: خوزی هێشتا نە مریم بایێ‌ كوردستانەكا ئازاد و سەربەخۆ ل من دابا.