دیدار، سالار محەمەد دۆسكی:
زیندانیێ‌ سیاسی، ئازاد مجید سلێمان، یێ‌ بەرنیاس ب (ئازاد بۆتی) ل رێكەفتی 1/2/1965 ل گوندێ‌ بوتیا ل دەڤەرا دۆسكیا ژ دایك بوویە، پتر ژ شەش سالان زیندانا ئەبوغرێب دەرباز كرینە.
ئازاد بۆتی، بۆ رۆژناما ئەڤرۆ گۆت: ل سالا 1980ێ‌ قوتابیێ‌ ئامادەیا برایەتی بووم ل پولا چارێ‌ وێ‌ سالێ‌ هاتمە رێكخستن داناڤا رێزێن پارتی دیموكراتی كوردستان دا لژنا ناوچا شێخان سەر ب لقا ئێك ڤە، شانا سەرەكی بناڤێ‌ (لەیلا قاسم) و شانا بنەكی(بزاڤ) بوو سەر ب رێكخراوا شەهید(وەیسی بانی) ڤە و دووڤ دا ناڤێ‌ رێكخراوێ‌ هاتە گوهورین بۆ رێكخراوا (روژهات) و بەرپرسێ‌ رێكخراوێ‌(جەمیل سەلیم خرابی) بوو ، رێككەفتی 30/8/1982ێ‌ هاتمە گرتن ل گەل هەڤال (لەزگین خەلیل ملحەم پیرۆمەری) بژڤان بووین بچینە كومبوونەكێ‌ ل گەل لژنا محلی ل گوندێ‌ خرابیا ل نێزیك باگێرا ئەم هاتینە گرتن، رێكخراوا مە ئەم شەش كەس بووین و هندەك هەڤالێن مە شیان خوە قورتال بكەن، و بتنێ‌ ئەز و (لەزگین خەلیل پیرۆمەری، عزیز صالح، ئەحمەد ئلیاس موسا، صباح گەرماڤی، علی محەمە علی بێسی) هاتینە دەستە سەركرن و پشتی بورینا یازدە هەیڤان 19/6/1983ێ‌ ل دادگەها (پورە) هاتینەداداگەهكرن ل مادێ‌ (157) ب سزایێ‌ زیندانكرنا هەتا هەتایێ‌، و مخابن هەڤال (علی محەمەد علی بێسری) هاتە سێدارەدان و ئەم هاتینە ڤەگوهاستن بۆ زیندانا (ئەبوغرێب) ل بەغدا و ماوێ‌ شەش سال و 15 رۆژان مامە ل زیندانێ‌ دا و 14/9/1988 ل هەوا ئەنفالێن رەش ب بریارەكا حوكمەتا عیراقێ‌ ئەم هاتینە ئازادكرن.
ئازاد بۆتی، زێدەتر گۆت: دەمێ‌ ل زیندانێ‌ مە كومەكا هەڤالان سوزدا بوو پشتی ئازاددبین بتنێ‌ هەیڤەكێ‌ ل دهۆك دا بمینین و دووڤ دا پەیوەندیێ‌ ب شۆڕەشێ‌ بكەین، مخابن پشتی هاتینە ئازادكرن مە دیت وەلاتەكێ‌ وێرانە و گوندێن خراب بووین و بێ‌ ئومێدی دروست بوویە، وەلاتەكێ‌ وێرانە و ئەو سوزا مەدا نەشیاین جێبەجێ‌ بكەین، بتنێ‌ سێ‌ هەلبژارتن ل بەر دەستێ‌ مەبوون یان ببینە (لەشكر، جاش، پێشمەرگە) پێشمەرگاتی ب دەست مە نەكەفت و یا دووێ‌ ژی مە ل سەر خوە قەبوول نەكر، ئەو ناڤ بهێتە سەرمە وەك زیندانیێن سیاسی لەوما مە لەشكریا رژێمێ‌ هەلبژارت و پشتی چەند هەیڤان مە هێلا و دەردورێن دهۆكێ‌ مە خوە دپاراست، وی دەمی پشتی عیراقی چوویە ناڤ ئاخا كوێتێ‌ گەلەك كاودانێن ئابووریێن خەلكی تێكچوون و لەوما بریارەك دەركر كو هەر كەسەكێ‌ ئەرزاقی ل دەرڤە بینت كاغەزا دەستیردانێ‌ بۆ دهاتە چێكرن، ل دهۆكێ‌ خەلكی بخوە دروستكر و ژوانا شەهید(عزەدین زێوكی) كومەكا هەڤالان ل گەل بوو و خودێ‌ ژێ‌ رازی دگەهشتنە مە وەك مرۆڤانی و هەمان دەم مەفرەزەكا پێشمەرگەی یا لقێ‌ ئێكی هاتە ناڤ ئاخا عیراقێ‌ ب سەركێشیا د. كەمال كەركووكی وی دەمی بەرپرسێ‌ لقێ‌ بوو، شەهید عزەدین گۆت دشێم نامەكا تە بگەهینە بەرپرسێ‌ لقێ‌ و من ناما خوە هنارت ب رێكا شەهیدی و من خواست پەیوەندیێ‌ ب شۆڕەشێ‌ بكەین و بەرسف هات گۆت خوە پارێزن و دێ‌ سەرهلدان دەست پێ‌ كەت، و خوە پارێزێن هەتا زانیاری بۆ هەوە دهێن و مە چەند هەڤالان ل چیایێ‌ بۆتیان بخوە دروست كربوو و بەردەوام دچووینێ‌ و دووڤ دا هاتینە پشتا چیایێ‌ ماسیكێ‌ و زێدەتر ئەم ل چیایی بووین، زێدەتر ل شكەفتا (كون حەفتیار) بووین هەتا سەرهلدان نێزیك بووی و نامەكا دی ژ بەرپرسێ‌ لقێ‌ بوومە هات و مە كومبوونێن خوە دكرن، (ئازدا بوتی، لەزگین پیرۆمەری، عزدین زێوكی، بیار گەرماڤی، نەجمدین زێوی، عزەت دێرگژنیكی، رەجب باخورنیفی) رەنگە من هندەك ناڤ ژبیركربن ژی .
ئــــازاد بۆتی، بەحسێ‌ چەند بیرهاتنێن زیندانێ‌ كر و گۆت: خیانەتا هەڤالەكێ‌ منێ‌ گەلەك نێزیكی من چو جاران ژ بیرا من ناچیت و ب هۆزان من هەستێ‌ خوە دەربرین ژێ‌ دكر، هەڤالەكێ‌ گەلەك نێزیك هەبوو و مە هەمیان هاریكاریا وی دكر و ل زیندانێ‌ ئەگەر مرۆڤێ‌ خوە راگرنەبا دا بدەست ئەمنێ‌ ڤە چیت و مخابن ئەڤ هەڤالە ب دەست ڤە چوو بوو، ل زیندانێ‌ پتر من نڤێسی و پتر چیرۆك من نڤێسین، گوڤارەك هەبوو بناڤێ‌ (كاروان) هاتە زیندانێ‌ و چیرۆكەكا من هاتە بەلاڤەكرن بناڤێ‌ (سەرچیا محەمەد) من پرسیار كر دەركەفت كورخالەتێ‌ هەڤالێ‌ منێ‌ نێزیك و ئەو ژی گۆت هەما ل ڤارا بوو و ئەوی داخاز كر من ژی داڤێ‌ و ئەڤە بۆ ئەگەر باوەری د ناڤبەرا مە دا نەمینت و كور خالێ‌ وی گەلەك شەرم ژ خوە دكر… هەرەم ب شەڤ یێ‌ هشیاربووم من دنڤێسی و ب رۆژ یێ‌ نڤستی بووم رۆژەكێ‌ من چاڤێن خوە ڤەكرن ئێكێ‌ ئەمنێ‌ یێ‌ ل هنداڤ من و هات داخازا دەفتەرێن من كر و هەمی پەرتووك و دەفتەرێن من راكرن و دیوانەكا هۆزانا من چێكربوو و تشتێ‌ سیاسی من چێكربوون و گۆت وەرگێرە و چەند كەسەك برن كو وەرگێرن و هندەك سورا برن گۆتێ‌ ئەم تێ‌ ناگەهین كاك (خەلەف گەرگەری) بر وی وەرگێرا و هەكە بدورستی وەرگێرابا رەنگە دا بوو من گەلەك یا ب مەترسی بیت و ناڤێ‌ پێشمەرگەی من ب پیتا دروستكر وەك (پ ، م) خەلەف گەرگەری گۆت ئەڤە ناڤێ‌ دەزگرا وی یە ناڤێ‌ وێ‌ (پەیمانە) پیتا (ب) بارزانی بوو لێ‌ كاك خەلەفی گوهورت و قورتال بووم و هەڤال(نەوروز مجید بالێتەی) ل گەل (ئەمین قائیدی، تەمەر شەمدین، جەلال رەشو) گەلەك هاریكاریا من كرن ب رێكا خێزانێن خوە ل دەرڤە كو ئەفسەرەكێ‌ زیندانێ‌ كریفێ‌ وانێ‌ خوەینێ‌ بوو و هەتمە قورتالكرن.
ئازادی گۆتژی: رۆژەكێ‌ ب هەلكەفتا ژ دایك بوونا سەدامی قارەمانیەكا تەپاپێ‌ بۆ زیندانیان هاتەڤەكرن و هەر هولەكێ‌ تیما خوە هەبوو و ئەژی كاپتنێ‌ تیمەكێ‌ بوو ل گورەپانێ‌ دەمێ‌ من دیتی ل ڤەكرنا قارەمانیێ‌ وێنەكێ‌ سەدامی ل پێشیا مەیە و دێ‌ تیم تیم دووڤ دا چن من خوە ڤەكێشا و چەند هەڤالان ژی خوە ڤەكێشا ئەم بووینە (13) دووڤ دا عەرەب و توركمانان ژی خوە ڤەكێشا و قارەمانی فاشل بوو، بۆ ئەمنێ‌ بۆ خوش هێجەت و برم هوسا قوتام كێم مرۆڤ هەنە خوە ل بەر ڤی جورێ‌ قوتانێ‌ بگرن، دووڤ دا هەڤالێت من سەحكرە پشتا من جهێ‌ (98) لێدانا لەشێ‌ من بوو، پشتی ڤێ‌ روودانێ‌ هەڤالێ‌ من دیاربوو كو یێ‌ دەنگ و باسێن مە دگەهینت وی گۆت مانە بمن ڤە و نەچاربووم، پشتی ڤێ‌ قوتانێ‌ ئەمنێ‌ گۆت نوكە دێ‌ چیە دادگەهێ‌ ڤە لدیف مادێ‌ (208) شەش سالێت دێ‌ زیندان بی و ئەگەر گەلەك مە كار بكەی ئەم دێ‌ درینین من گۆتێ‌ بلا شەش سالێن دی بن، رۆژەكێ‌ گازیكرن گۆت هەمی هەرنە دەرڤە ئەفسەرەكێ‌ ئەمنێ‌ ل دەرگەهی راوستیا و دڤیا سمعەتا من دناڤ زیندانیان بشكێنیت، چونكە هەر كەسێ‌ بەرامبەر ئەفسەرەكێ‌ ئەمنێ‌ راوستیابا ئێدی سمعەت ل زیندانێ‌ نەما و دڤیا بۆ زیندانیا دیار بكەت ئەزێ‌ ل گەل وانم و گۆت تە چو ل وی بابەتی كر من گۆتێ‌ من نەنڤێسی نە گەلەك گۆت من گۆتێ‌ ئەبد و ئاخفتنێن كرێت گۆتن و من بەرسف دا دناڤ زیندانیان شەق دانا من و ئەو شەق مەزنترین شانازی بوو بۆ هەمیان دیاربوو یێ‌ بێ‌ گونەهم.
ئازاد بۆتی گۆت: هەر دەمێ‌ سەدام دەركەفتبا ل تەلەڤزیونێ‌ دڤیابا كەسەك نە ئاخفت با یان لڤی با جارەكێ‌ دەركەفت و یێ‌ لڤی ژی ناڤ هاتنە نڤێسین و ئەم بووینە نێزیكی (40) كەسان و برین و برێزكرین و كەسێ‌ ئێكێ‌ (وەحید ئالەكینی )بوو گۆتێ‌ چ حزب گۆت پارتی ئەمنێ‌ گۆتێ‌ ئاخفتنا بێژە مام جەلال وی گۆت نابێژم شەق لێدا و دووڤ ئێكەتی بوو گۆتێ‌ ئاخفتنا بێژە مەسعود بارزانی وی گۆت نابێژم شەق دانایێ‌ یێ‌ دووڤ پارتی گەل بوو گۆتێ‌ ئاخفتنا بێژە بارزانی و تەلەبانی ئەوی ژی رەتكر شەق لێدا هوسا كەسەكێ‌ چو نە گۆت هەتا نیڤێ‌ هات وەستیا و گەلەك جاران ڤێ‌ دكمە نموونە وی دەمی شەرێ‌ براكوژیێ‌ بوو و رادیۆیێن پارتی و ئێكەتی دهاڤێتە ئێك و دو لێ‌ زیندانێ‌ هەمی زیندانی وەك ئێك بوون و شەق بۆ وان خوشتر بوو ئاخفتنێ‌ بێژیتە سەركردەكێ‌ كورد و بۆ دوژمنی ئێك و دو نەشكاند.
ئازاد بۆتی، زێدەتر گۆت: رادیو قەدەغە بوو من ئێك پەیداكربوو و گوهداریا رادیۆیا كوردی ل بەغدا دكر و سپێدەهی یا دەنگێ‌ كەوی دانا سەر بوومن گەلەك خوش بوو و من هوزانەك ب كەوی ڤەهاند بوو، كورمەتەكێ‌ عودەی ل زیندانێ‌ بوو چونكە نەببو بەعسی ب فەرمانا سەدامی گرت بوو و مامۆستایێ‌ زانكۆیێ‌ بوو و بتنێ‌ وی ماف هەبوو رادیۆیێ‌ ب ئازادنە هەلكەت و گەلەك جاران چووینە دەف وی مە گوهداریا ئێزگێ‌ دەنكێ‌ كوردستانێ‌ دكر.
ل دووماهیێ‌ ئازاد بۆتی گۆت: داخاز دكەم سەركردایەتیا كوردستانێ‌ ب رێكێن خوەیێن تایبەت فشارێ‌ بێخنە سەر بەغدا چینا زیندانیێن سیاسی بكەهنە مافێن وەك زیندانیێن سیاسی ل باشورێ‌ عیراقێ‌ چونكە ئەڤان زیندانیێن سیاسی مەزنترین بەرخودانا كری و هەتا ب كنفێ‌ ڤەكرین سرودا ئەی رەقیب و بارزانی گۆتینە.