سكرتێرێ حزبا شیوعی یا كوردستانی ئاماژە ب وێ چەندێ دكەت، دەستهەلاتدارێن نوكە ل بەغدا ب ئەقلیەتا ناڤەندی كار دكەن و ڕەوشا ئیراقێ د ناڤا تۆنێلەكا تاری دا دەرباز دبیت، هەروەسا دبێژیت، ئەو بابەتێن هەرێما كوردستانێ د سالێن بۆری دا ل سەر بنەمایێ هەڤپشكیێ و دستووری پشكداربووی ل ئیراقێ ب دووماهی هاتیە و دەستهەلاتدارێن ئیراقێ باوەری ب سیستەمێ فیدڕالی نینە.
د. كاوە مەحموود، سكرتێرێ حزبا شیوعی یا كوردستانێ بۆ ڕۆژنامەیا (ئەڤرۆ) دیاركر» پرۆسەیا سیاسی ل ئیراقێ پشتی پرۆسەیا ئازادیا ئیراقێ هاتیە دەستپێكرن و ددەمێ نوكە دا پرۆسەیا سیاسی ل ئیراقێ د ناڤا تۆنێلەكا تاری دا دەرباز دبیت و دیار نینە پاشەڕۆژا ئیراقێ دێ بەر ب كیرێ چیت، ئەو بابەتێن هەرێما كوردستانێ د سالێن بۆری دا ل سەر بنەمایێ هەڤپشكیێ و دستووری پشكداربووی ل ئیراقێ ب دوماهی هاتینە، چونكە ئەو كەسێن نوكە ل بەغدا حوكمڕانیێ دكەن ب مخابنی ڤە ل سەر بنەمایێ ئەقلیەتا دەولەتا ناڤەندی یا ڕەها كار دكەت و باوەریا تەمام ب سیستەمێ فیدڕالی نینە، ئەڤەژی بەروڤاژی وێ پەیاما ئیراقێ بوویە یا پشتی پرۆسەیا ئازادیێ چاڤەڕێ بووین، بەلێ خەمساری هەیە ژ ئالیێن سیاسی یێن هەرێما كوردستانێ، كو ب شێوەیەكێ گشتی ئالیێن سیاسی نەشیاینە پێداچوونەكێ د پرۆسەیا سیاسی ل ئیراقێ دا بكەن ل سالا ٢٠٠٣ێ هەتا ٢٠٢٣ێ، تاكو بشێن ستراتیژیەكا نوو بگرنە بەر كو بگونجیت دگەل نوكە و پاشەڕۆژێ».
د.كاوە مەحموود ئاماژەكر» مە پرۆسەیا ڕیفڕاندۆمێ ئەنجامدا د چارچۆڤەیێ مافێن هەر مللەتەكی كو دخوازیت ببیتە خوەدان دەولەتەكا نیشتیمانی و نێزیكی ٩٣%ێ خەلكێ كوردستانێ دەنگ بۆ سەربخوەیا هەرێما كوردستانێ دا، بەلێ بجهئینانا ڤی ئارمانجی گرێدای بابەتێن سیاسی ڤە هەیە، ب گۆرەی هەموو پیڤەران مافێ خەلكێ كوردستانێ یە بڕیارێ ل دۆر چارەنڤیسێ خوە بدەت، ئەز باوەرم هەموو كەسێن بڕیارا ڕیفڕاندۆمێ دەركری ل سەر بنەمایەكێ قانوونی بوویە و مللەتێ مە چەندین سالە قوربانیان ددەت بۆ ئازادیێ، خەباتا مللەتێ مە دێ بەردەوامبیت بۆ ب دەستڤە ئینانا مافێن خوە، ویستگەهێن خەباتێ ب دوماهی نەهاتینە و ئێك ژوان ویستگەهێن خەباتا بزاڤا ڕزگاریخوازا كورد ئەنجامدانا ڕیفڕاندۆم بوویە و ئەم پێشەمان نینین ژ ئەنجامدانا وێ».

ب، سه‌رجان مەحمود:

هێزێن سووریێ بەرهەڤیان بۆ دەستپێکرنا ئۆپەراسیۆنەکێ ل ئدلبێ دکەن، فرۆکێن شەری یێن رۆسیا ژی هاریکاریا هێزێن سووریێ دکەن، چەند رۆژن ژی لەشکرێ سووریێ ب چەکێن گران چەندین دەڤەرێن ستراتیژی ل ئدلبێ تۆپباران دکەن، رۆسیا و رژێما سووریێ پێکڤە کار دکەن دا پێگەهێ تورکیا ل سووریێ لاواز بکەن.

ل دووڤ نووچه‌یێن هه‌رێمی هێزێن رژیما ئه‌سەدی ل ئدلبێ ب تانک و تۆپان بنگه‌هێن کۆمێن چه‌کدار یێن سه‌ر ب تورکیا تۆپباران کر، د ئه‌نجاما تۆپبارانا لەشکرێ سووریێ دو که‌س ژ چه‌کدارێن سه‌ر ب تورکیا هاتنە کوشتن و سێ که‌سێن سڤیل ژی بریندار بوون، ل هه‌مبه‌ر ئێرشا رژێما سووریێ کۆمێن چه‌کدار ژی ب چه‌کێن گران به‌رسڤا لەشکرێ سووریێ دان.
ل ئالیێ دی ئاژانسا سپۆتینگ یا رۆسیا ژی د راپۆرتەکێ دا دیار کریە، رژێما سووریێ خوه‌ ئاماده‌ دکه‌ت ل گه‌ل ئێرشێن ئه‌سمانی، ب چه‌کێن گران ژی بنگه‌هێن کۆمێن چه‌کدار ژناڤ ببه‌ت و د ناڤ ڤێ هه‌یڤێ دا دەست ب ئۆپه‌راسیۆنه‌کا مه‌زن یا سه‌ربازی ل سنورێ ئدلبێ بکەت، ئارمانجا سەرەکی یا رۆسیا و شامێ ئەوە دا د پێنگاڤا ئێکێ دا بشێن ئدلبێ ژ دەستێ گرۆپێن چەکدارێن سەر ب تورکیا دەرخینن و ژ بەر هندێ ژی نها فرۆکێن شەری یێن رۆسیا پشتەڤانیا لەشکرێن سووریێ دکەن.
شاره‌زایێن سیاسه‌تا سووریێ وه‌سا دبینن کو پشتی ئاسایبوونا په‌یوه‌ندیێن سووریێ ل گەل وه‌لاتێن عه‌ره‌بی، رژێما ئه‌سەدی دڤێت ب ئۆپه‌راسیۆنێن به‌رفرەه هه‌وا ئازادکرنا ئدلبێ ده‌ستپێ بکه‌ت و ده‌وله‌تا رۆسیا ژی ب فرۆکێن شه‌ری هه‌ڤکاریا لەشکرێ سووریێ دکەت، دیسان وه‌سا دهێته‌ دیتن کو به‌شار ئه‌سەد ل سه‌ر مه‌رجێن خوه‌ یێن بۆ ده‌سپێکرنا په‌یوه‌ندیێن دو قۆلی ل گەل تورکیا رژده‌.
ل گۆر باوەریا چاڤدێرێن سیاسی بەری نها ژی چەندین جاران بەشار ئەسەدی ب رێیا رۆسیا ب رەنگەکێ ئاشکرا داخواز ژ تورکیا کریە هەموو هێزێن خوە ژ ئاخا سووریێ ڤەکێشیت، نها ژی شامێ دڤێت ب پشتەڤانیا رۆسیا د پێنگاڤا ئێکێ دا ئدلبێ ژ دەستێ گرۆپێن چەکدار دەرخینیت، هەکە لەشکرێ سووریێ بشێن ئدلبێ ژ دەستێ گرۆپێن سەر ب تورکیا دەرخینن وی دەمی دێ رەوشەکا نوو هێتە پێش، چونکی نها رۆسیا و رژێما بەشاری دخوازن پێگەهێ تورکیا ل سووریێ لاواز بکەن دا ئەنقەرە یا نەچار بیت هەموو داخوازیێن شامێ قەبوول بکەت، ژ بەر هندێ ژی ئازادکرنا ئدلبێ گرنگیەکا خوە یا مەزن هەیە.
ئەو یەک د دەمەکێ دایە کو بەری چەند رۆژان بەرپرسەکێ وەزارەتا دەرڤە یا سووریێ ژی راگەهاند، هەتا نها هەلوەستێ وان ل دۆر دەستپێکرنا قۆناغەکا نوو ل گەل تورکیا نەهاتیە گوهۆرین، چونکی تورکیا پشکەک ژ ئاخا سووریێ داگیر کریە و هەتا هێزێن تورکیا ل سووریێ بن و تورکیا پشتەڤانیێ ل گرۆپێن چەکدار بکەت ئەو وەکو سووریێ ب چو رەنگەکێ ل گەل تورکیا دەست ب قۆناغەکا نوو ناکەن.

بەری دو رۆژان ناسر کەنعانی پەیڤدارێ وەزارەتا دەرڤە یا ئیرانێ راگەهاند، ئەو ب رێیا وەلاتێ عومانێ ل گەل ئەمریکا دانوستاندنان دکەن و وان دڤێت د پێنگاڤا ئێکێ دا گرتیێن ئەمریکا یێن ل زیندانێن ئیرانێ ئازاد بکەن و ل هەمبەر دا ئەمریکا ژی دڤێت هندەک سزایێن ل سەر ئیرانێ راکەت و پێگیریێ ب وێ رێککەفتنا ئەتۆمی بکەت یا بەری چەندین سالان د ناڤبەرا ئیرانێ و ئەمریکا دا هاتبوو ئیمزا کرن.
ل هەمبەر داخۆیانیا پەیڤدارێ وەزارەتا دەرڤە یا ئیرانێ، دوهی بەرپرسەکێ وەزارەتا دەرڤە یا ئەمریکا ژی راگەهاند چو راستی بۆ وی بابەتی نینن و ئەو وەکو ئەمریکا چو رێککەفتنان ل گەل ئیرانێ ناکەن، تنێ وان هۆشداری داینە ئیرانێ دا ئالۆزیان ل دەڤەرێ دروست نەکەت، دڤێت ئیران نەبیتە مەترسی ل سەر ئارامیا رۆژهەلاتا ناڤین و هەکە ئیرانێ بڤێت ئالۆزیان دروست بکەت، ئەمریکا دێ سزایێن گەلەک دژوار ل سەر وی وەلاتی سەپینیت و ب رێیا عومانێ وان هۆشداری داینە ئیرانێ.

وەزارەتا دەرڤە یا کەنەدا راگەهاند، ل هەمبەر دەستێوەردانێن چینێ و مەترسیێن کو چین بۆ بەرژەوەندیێن وان دروست دکەت، وان بریار داینە دبلۆماتکارەکێ چینێ ژ وەلاتێ خوە دەرخینن و دڤێت وەلاتێ چینێ پێگیریێ ب قانوونێن نێڤدەولەتی بکەت و هەتا چین دەست ژ هەلوەستێ خوە یێ خراب بەرنەدەت ئەو وەکو کەنەدا ب چو رەنگەکێ بەرهەڤ نینن پەیوەندیێن خوە ل گەل وی وەلاتی ئاسایی بکەن.
ل ئالیێ دی وەزارەتا دەرڤە یا چینێ ژی راگەهاند، کەنەدا ل ژێر کاریگەریا ئەمریکا دڤێت ئالۆزیان بۆ بەرژەوەندیێن چینێ دروست بکەت، هەر پێنگاڤەکا کەنەدا ل دژی وەلاتێ وان بێی بەرسڤ نامینیت و چین ژ بۆ پاراستنا بەرژەوەندیێن خوە دێ یا پێدڤی کەت.