هەولێر، قائید میرۆ:

پەیڤدارێ وەزارەتا شەهید و ئەنفالكریان ئاشكرا كر، پشتی بڕیارا حوكمەتا هەرێما كوردستانێ بۆ دانا یەكەیێن ئاكنجیبوونێ بۆ كەسوكارێن شەهید و ئەنفالكریان، بڕیارە ناڤێن كەسوكارێن شەهید و ئەنفالكریان بۆ سەرۆكایەتیا جڤاتا وەزیران بهێنە بلندكرن و ژ وەرگرتنا یەكەیەكا ئاكنجیبوونێ مفادار بن.
عادل حەمە سالح، پەیڤدارێ وەزارەتا شەهید و ئەنفالكریان بۆ رۆژناما ئەڤرۆ دیار كر، كەسوكارێن شەهید و ئەنفالكریان و زیندانیێن سیاسی یێن هەتا نوكە پارچێن ئەردی و یەكەیێن ئاكنجیبوونێ وەرنەگرتین، ناڤێن وان بۆ سەرۆكایەتیا جڤاتا وەزیران دێ هێنە بلندكرن و گۆت: «ل سەرۆكایەتیا جڤاتا وەزیران فەرمان دێ بۆ هێتە دەركرن و ناڤێن وان بۆ وەزارەتێن پەیوەندیدار دێ‌ هێنە هنارتن، داكو یەكەیێن ئاكنجیبوونێ بۆ بهێنە ئاڤاكرن و ژ بڕیارا حوكمەتێ مفادار بن، بەلێ ئەڤێن بەری نوكە مفاداربووین، جارەكادی مفادار نابن و بڕیار ب تنێ بۆ وانایە یێن هەتا نوكە مفادار نەبووین».
عادل حەمە سالح گۆتژی: «ئێك ژ خالێن كارناما حوكمەتا هەرێما كوردستانێ خزمەتكرنا كەسوكار و مالباتێن سەربلندێن شەهید و ئەنفالكریانە، بەری نوكە ل سەر پێشنیارا وەزیرێ شەهیدان بڕیار هاتبوو دان، ئەو خێزانێن مفادار نەبووین، ل شوونا پارچێن ئەردی یەكەیێن ئاكنجیبوونێ بۆ بهێنە ئاڤاكرن، بەردەوام ژی كار بۆ ڤێ چەندێ دێ هێتە كرن، هەتا هەموو خێزانێن شەهید و ئەنفالكریان ژ بڕیارا حوكمەتێ مفادارببن».

هەولێر، قائید میرۆ:

بڕیاردەرا لیژنا ساخلەمیێ‌ ل پەرلەمانێ كوردستانێ خویا كر، پشتی وان دووڤچوون بۆ ئاریشەیا كارمەندێن ساخلەمیێ‌ ل پارێزگەها دهۆكێ و ئیدارەیا سەربخوە یا زاخۆ ل گەل وەزارەتا دارایی و ساخلەمیێ‌ كری، ئاریشەیا مەزاختنا مووچێ كارمەندێن ساخلەمیێ‌ ل پارێزگەها دهۆكێ و ئیدارەیا سەربخوە یا زاخۆ هاتە چارەسەركرن و مووچێ شەش مەهان دێ بۆ هێتە مەزاختن.
رۆژان سلێڤانەیی، بڕیاردەرا لیژنا ساخلەمیێ‌ ل پەرلەمانێ كوردستانێ بۆ رۆژناما ئەڤرۆ دیار كر، هەژمارەكا كارمەندێن ساخلەمیێ ل پارێزگەها دهۆكێ و ئیدارەیا سەربخوە یا زاخۆ بشێوەیێ گرێبەست هاتبوونە دامەزراندن و مووچێ وان ل سەر بودجەیا گەشەپێدانێ‌ بوو، بەلێ دیارە ئاریشە بۆ مەزاختنا مووچەیێ وان هاتیە چێكرن و چەندین مەهە مووچەیێ وان نەهاتیە مەزاختن و گۆت: «مە دووڤچوون بۆ ئاریشەیا وان كریە و دێ‌ هێتە چارەسەركرن، مە بەری نوكە سەرەدانا وەزارەتا دارایی كر و حەفتیا بۆری ژی مە سەرەدانا وەزیرێ ساخلەمیێ كر».
رۆژان سلێڤانەیی گۆتژی: «ئەم ل گەل وەزیرێ ساخلەمیێ گەهشتینە ئەڤی ئەنجامی، مووچەیێ شەش مەهان یێن 327 كارمەندێن ساخلەمیێ بهێتە مەزاختن، بڕیارە د دەمەكێ‌ نێزیك دا و ل گورەی شێوازەكێ دیاری كری مووچەیێ شەش مەهان بۆ بهێتە مەزاختن و ئیدی هەیڤانە ژی مووچەیێ وان كارمەندان بهێتە مەزاختن و ئاستەنگێن بەرێ نەمینن بۆ دانا مووچەیێ وان كارمەندان».

هەولێر، قائید میرۆ

بسپۆرەكێ كەرتێ چاندنێ راگەهاند، ل هەرێما كوردستانێ حەفت پڕۆژێن ستراتیژی یێن شیری هاتینە ڤەكرن و بڕیارە ل سەر راسپاردا سەرۆكێ حوكمەتا هەرێما كوردستانێ كەرتێ چاندنێ و ئاژەلداریێ بهێتە پیشەسازی كرن و كارگەهێن نافخۆ بۆ بازاڕێ بەرهەمێ نافخۆ بهێنە ڤەكرن.

نەوزاد محەمەد عەزیز، بسپۆرێ كەرتێ چاندنێ بۆ رۆژناما ئەڤرۆ دیار كر «ل هەرێما كوردستانێ حەفت پڕۆژێن ستراتیژی یێن ئاژەلی و شیری هەنە و ڤەكرنا وان جورە پڕۆژەیان كاریگەری ل سەر ئابورا هەرێما كوردستانێ و كەرتێ چاندنێ و ئاژەلداریێ هەیە، چونكە دەلیڤا كاری بۆ چەندین كەسان دهێتە دابینكرن و بەرهەمێ شیرێ نافخۆژی ل نەبوونا بازاڕی دێ رزگاربیت».
زێدەتر گۆت: ئێك ژ ئاستەنگێن هەمبەر كەرتێ چاندنێ و بەرهەمێ ناڤخۆ ب گشتی نەبوونا بازاڕیە بۆ بەرهەمێ جووتیاران، بەلێ دەمێ كارگەهەك دهێتە ڤەكرن كاریگەری ل سەر ڤەژاندنا ڤی كەرتی هەیە، بۆ نموونە ئەو كارگەها ل دەڤەرا بارزانی هاتیە ڤەكرن رۆژانە دێ 20 تەنێن شیری ل جووتیارێن دەڤەرێ كڕیت و كەتە بەرهەمێ نافخۆ هەتا كۆم كرنا شیری و ڤەگوهاستن بۆ كارگەهێ ژی ل سەر ئەركێ كارگەهێ یە، ئەڤە پالدەرەكێ باشە بۆ ڤێ چەندێ خەلكێ گوندان زێدەتر تەرش و تەوالی خودان بكەن و هەتا ل داهاتی دێ كاریگەری لسەر ئاڤاكرنا گوندانژی هەبیت.
خویاژی كر، چۆلكرنا گوندان ژلایێ گوندنیان زێدەتر بۆ نەبوونا خزمەت گوزاریان و دەلیڤێن كاری ڤەدگەڕیت دەمێ كار ل گوندان نەمای گوندی نەچاربوون قەستا باژێڕی بكەن و ببنە فەرمانبەر، بەلێ دەمێ دەلیڤا كاری هەبیت ل گوندان ئەڤە بێگومان دێ خەلك زێدەتر بەرێ خوە ددەت گوندان، ژلایەكێ دیڤە دێ وەلاتیێن هەرێما كوردستانێ قورتالبن ل بەرهەمێ بیانی یێن چەندین مادە دگەل دهێنە تێكەلكرن و دهێنە ناڤا هەرێما كوردستانێ، بەرهەمێ بیانی چو جارا نەشێت هەڤڕكیا بەرهەمێ نافخۆ بكەت، چونكە بەرهەمێ جووتیارێن مە بەرهەمەكێ سەدێ سەد سرۆشتیە و بێی بكار ئینانا چو مادێن زیانبەخش دهێنە چێكرن و بەرهەمیچ بیانی كاریگەریێن خراپ لسەر ساخلەمیا مرۆڤی هەنە.
دكتۆر نەوزاد محەمەد عەزیز گۆت ژی «سیاسەتا مەسروور بارزانی سەرۆكێ حوكمەتا هەرێما كوردستانێ ئەڤە كەرتێ چاندنێ و ئاژەلداریێ بهێتە پیشەسازی كرن و پڕۆژێن ستراتیژی بهێنە دامەزراندن و ڤەكرن، چونكە ڤەكرنا وان پڕۆژان دێ كارتێكرن لسەر ئاسایشا خوارنێ هەبیت، هەموو وەلاتێن جیهانێ ژی گرنگیەكا تایبەت ددەن ئاسایشا خوارنێ، چونكە ئاسایشا خوارنێ چەندین لایەنانڤە گرێدایە و هەر وەلاتێ ئاسایشا خوە یا خورانێ دابین نەكەت ئەڤە مەترسی لسەر ئەڤی وەلاتی هەنە، ب پیشەسازی كرنا هەر كەرتەكی دێ بیتە ئەگەر بۆ بەرەف پێشبرنا ئاسایشا خوارنێ ل هەرێما كوردستانێ بدیتنامن ڤەكرنا پڕۆژێن ستراتیژی دڤێت ل دەستپێكا كارێن حوكمەتێ بیت، چونكە بێی هەبوونا پڕۆژێن ستراتیژی د بیاڤێن چاندنێ وئاژەلداری ئەم نەشێین بێژین ئاسایشا خوارنێ یا زامنە، بەری نوكە ژی چەندین جاران سەرۆكێ حوكمەتا هەرێما كوردستانێ هەلویستێ خوە دیاركریە لسەر سیاسەتا حوكمەتێ بۆ بەرەڤ پێشڤەبرنا كەرتێ چاندنێ و ئاژەلداریێ».

دهۆك، لەزگین جوقی

سەرۆكێ‌ لیژنا كۆچ و كۆچبەران ل پەرلەمانێ‌ عیراقێ‌ دیار كر:» پێشنیاز هاتیە كرن ب شێوەیەكێ‌ دادپەروەرانە بۆ هەموو ئاوارێن زڤرینا سەر جهێن خۆ پێنچ ملیۆن دیناران وەربگریت، ژ بەر كو خەلكێ‌ شنگال مالێن وان یێن هاتینە خرابكرن دەمێ‌ ڤەگەرن گەلەك خێزانان چو جهێن ئاكنجیبوونێ‌ نینن».

شەریف سلێمان، سەرۆكێ‌ لیژنا كۆچ و كۆچبەران ل پەرلەمانێ‌ عیراقێ‌ راگەهاند:» ئەلمانیا و ئەمریكا و ئێكەتیا ئوروپی و حوكمەتا هەرێما كوردستانێ‌ پشتەڤانیا خۆ بۆ ئاڤادانیا شنگال دیاركرینە، لێ‌ ئاریشا شنگال نەبوونا تەناهیی و باوەری یە، لەورا ژی ئاوارە ماینە هەتا نوكە 90% ئاوارێن ل دهۆكێ‌ ئاكنجیی خەلكێ‌ شنگالێ‌ نە و هێشتا نەشیاینە ڤەگەرن، پێدڤیە حوكمەتا عیراقێ‌ باوەری بۆ خەلكێ‌ چێكەت و رەوشا شنگال ئارام بكەت».
گۆت ژی:» ب فەرمی مە داخواز ژ محەمەد شیاع سوودانی كریە ل سەر زڤرینا ئاواران بۆ شنگال كار بكەت و سوزدایە ڤێ‌ بابەتی ب رژدی وەربگریت و رێكەفتنا شنگال ژی بكەڤتە واری بجه ئێنانێدا، ژ بەر كو ئەڤە بوونە نەهـ سال خەلكێ‌ ئاوارە پێدڤیە ئاوارە ژ ڤێ‌ رەوشێ‌ قورتال بن».
پیر دەیان جەعفەر رێڤەبەرێ‌ كۆچ و كۆچبەران وبەرسڤدانا قەیرانا ل پارێزگەها دهۆكێ‌ راگەهاند:» 700 خیزانێن ئاوارە ناڤێن خۆ بۆ زڤرینا شنگال تۆماركرینە و پتر ژ 150 سەرۆك خێزان زڤرینە شنگال و29 سەرۆك خێزانا ژی زڤرینا خۆ بۆ شنگال هەلوەشاندن و لێڤەبوون و ناچنە شنگال، هەتا نوكە نێزیكێ‌ 330 هزار كەسێن ئاوارە دناڤ كەمپان ژ دەرڤە كەمپان ل سنۆرێ‌ پارێزگەها دهۆكێ‌ ماینە ژ ئەنجامێ‌ هێرشا تیرۆرستێن داعش سالە 2014ێ‌ خەلكێ‌ ژ شنگال ئاوارەبوون هەتا نوكە ژی خەلكێ‌ شنگال ماینە نەشیاینە ڤەگەرن».
عیماد، ئاوارەكێ‌ شنگالێ‌ یە ل كۆمەلگەها شاریا دژیت دیاركر: «ل سالا 2014ێ‌ ئەم ژ شنگال ئاوارەبووین، ژبەر هیرشا تیرۆرستێن داعش و ئەڤە بوونە نەه سال ئەم دبن خیڤەتان دا، هەتا نوكە ژی حوكمەتا عیراقێ‌ كارەكێ‌ وەسا باش نەكریە رەوشا شنگال خۆش كەت و هێشتا خەلكێ‌ زەرەرمەند نەهاتیە قەرەبووكرن و كچ و ژن و زارۆكێن ئێزدی د دەستێ‌ تیرۆرستێن داعش دا ماینە و چارەنڤیسێ‌ گەلەك كەسان دیارنینە «.
گۆت ژی:» ئەم سوپاسیا حوكمەتا هەرێما كوردستانێ‌ و خەلكێ‌ كوردستانێ‌ دكەین ئەڤە نەه سالن مە ب خۆدان دكەن و پشتەڤانیێ‌ و هەڤكاریا مە دكەن، نوكە ژی مە ناڤێ‌ خۆ بۆ زڤرینا شنگال تۆماركریە و ئەم چاڤەرێ‌ وەرگرتنا رازیبوونێ‌ دكەین و دێ‌ زڤرینە شنگال و دەست ب ژیانەكا نوو كەین».