دهێتە چاڤەڕێ‌ كرن ئەڤرۆ شەش یاریێن مایی ژ هەڤڕكیێن گەڕا 32ێ‌ یا خولا پلا نایابا ئیراقێ‌ یا تەپا پێی ل دەڤەرێن جودا یێن كوردستانێ‌ و ئیراقێ‌ بهێنە ئەنجامدان، یانەیا زاخۆ ل یاریگەها خوە دێ‌ شەڕێ‌ سێ‌ خالان بەرانبەر دیوانیە كەت و هەردو یانەیێن هەولێر و نەورۆز ژ دەرڤەیی یاریگەهێن خوە دێ‌ بزاڤێن ئەنجامەكێ‌ باش كەن.
زاخۆ د قۆناغەكا هەستیار دا یە
بڕیارە ئەڤرۆ ل دەمژمێر حەفتی شەڤ تیما تەپا پێی یا یانەیا زاخۆ د ناڤ ئەرد و جەماوەرێ‌ خوە دا مێڤانداریا یانەیا دیوانیە بكەت كو دهێتە هژمارتن یاریەكا گرنگ و دەلیڤەیەك بۆ ئاشتكرنا جەماوەرێ‌ خوە پشتی د یاریا بۆری دا نەشیایی دلێ‌ جەماوەرێ‌ خوە خوەشبكەت و دگەل شورتە ب گۆلەكێ‌ خوسارەت بووی، كوڕێن خابۆری ب 33 خالان ژ حەفت سەركەفتن، 12 وەكهەڤی و12 خوسارەتی ل رێزا 16ێ‌ دهێت، بەرانبەر دا مێڤانا وێ‌ دیوانیە ئەوا پاشڤەچوونا خوە بۆ پلا ئێك ئێكلاكری ب 12 خالان رێزا 20ێ‌ و دووماهیێ‌ دهێت و دەلیڤەیا مانا خوە د نایاب دا نەمایە، بۆ تیما زاخۆ ئەڤ یاریە گەلەك یا گرنگە و پێشبینیێن سەركەفتنا وێ‌ دهێنە كرن و دەلیڤەیا ریچزبەندیا خوە باشتر لێ‌ بكەت لێ‌ تیما دیوانیە چو گڤاشتن ل سەر نینن و دبیت یاریەكا گرتی ژی بكەت نەهێلیت چ گۆل ل سەربن.
نزار مەحرۆس: هەمی تیم ب هێزن و ئەم پێدڤی ب سەركەفتنێ‌ نە
راهێنەرێ‌ تیما زاخۆ یێ‌ سوری نزار مەحرۆس گۆت: ب هیچ رەنگەكی ئەم سڤكاتیێ‌ ب ڤێ‌ یاریێ‌ ناكەین و هەمی تیمێن د خولێ‌ د ب هێزن، ئەو یاریێن دناڤ ئەرد و جەماوەرێ‌ مە دا دڤێت سەركەفتنێ‌ بینن ژبەركو ئەم گەلەك پێدڤی نە پێخەمەت باشكرنا هەلوەستێ‌ خوە د خولێ‌ دا، راستە تیما دیوانیە ل دووماهیا رێزێ‌ یە لێ‌ ئەڤە تەپا پێی یە و دوور نینە یاریەكا ب هێز بكەت، لەوما مە هۆشداری دایە هەمی یاریزانێن خوە و دڤێت گڤاشتنێ‌ بكەن و ئارمانجا سەركەفتنێ‌ بینت و دەستان ژ گڤاشتنێ‌ بەر نەدەن هەتا دووماهی فیركا دادڤانی، جەماوەرێ‌ مە خالا هێزێ‌ و سەركەفتنێ‌ یە.
هەولێر و نەورۆز ژ دەرڤەیی یاریگەهێن خوە دێ‌ یاریێ‌ كەن
هەر ئەڤرۆ ل دەمژمێر حەفت شەڤ تیما یانەیا هەولێر دێ‌ بیتە مێڤانا یانەیا نەفت ئەلبەسرا د یاریەكا بهێز و هەڤڕكی دا، هەولێر ب42 خالان رێزا 12ێ‌ دهێت، خودانێن ئەردی ب37 خالان رێزا 14ێ‌ یە، ژلایێ‌ خوەڤە یانەیا نەورۆز ل یاریگەها شەعب دێ‌ بیتە مێڤانا یانەیا شورتە ل دەمژمێر پێنجێ‌ ئێڤاری، نەورۆز ب41 خالان رێزا 13ێ‌ دهێت و شورتە ب64 خالان سەرێ‌ لیستا رێزبەندیێ‌ دهێت.
ژ یاریێن دی یێن ئەڤرۆ
تیما یانەیا تەلەبە بەرانبەر جەویە، كەرخ- نەفت ئەلوەسەت، سیناعە- نەفت، بۆ زانین شورتە رێزا ئێكێ‌ دهێت، جەویە ب62 خالان و تەلەبە ب53 خالان رێزێن دویێ‌ و چارێ‌ دهێن.

بەزۆكا كینی و یاریزانا یاریێن گۆرەپانێ‌ فایس كیبیگۆن ریكۆردا جیهانی یا بەریكانا 1500م شكاند، د چارچووڤێ‌ خولا نێڤدەولەتی ئەلماس ئەوا ل فلۆرنسا یا ئیتالیا دهێتە كرن.
كیبیگۆن شیا بۆ ماوێ‌ سێ‌ خولەك و 49 جركە و 11 پشك ژ چركا رێزا ئێكێ‌ بهێت و پێشكەڤیت ل سەر بەزۆكا ئەسیۆبی گێنزیبی دیبابا ئەوا نمرا پیڤایی هەر ژ سالا 2015ێ‌ ل سەر ناڤێ‌ وێ‌ هاتیە تۆماركرن و شیا ب جوداهیا هەشت چركا ئەڤێ‌ نمرا بۆ ماوەیێ‌ حەفت سالە شكاند و ل سەر ناڤێ‌ خوە تۆماربكەت و میدالیا زێری ب دەستخوەڤە بینت كو دهێتە هژمارتن میدالیا پێنجێ‌ یا جیهانی پشتی ناسناڤێن قارەمانیا لوندن 2017، یۆچین 2022 و ئۆلمپیادا ریۆ جانیرۆ 2016 و ئۆلمپیا تۆكیۆ 2020ێ‌.

قەیس وەیس:

لژنەیا بەریكانەیان ل ئێكەتیا تەپا پێی یا ئیراقێ‌ بڕیاردا پشتی ب دووماهی هاتنا هەڤڕكیێن گەڕا 32ێ‌ دێ‌ خولا پلا نایاب بۆ ماوەیەكێ‌ دەستنیشانكری هێتە راوەستاندن پێخەمەت دەلیڤەكا بۆ ئەوان یاریزانێن یانەیێن خولێ‌ دا ژ بۆ پشكداریێ‌ دگەل هەلبژارتیێ‌ ئۆلۆمپیێ‌ ئیراقێ‌ خوە بەرهەڤكرن بۆ یاریێن هەڤالینی و قارەمانیێن داهاتی دا.
لژنەیا بەریكانەیان دیار كر ئەڤ راوەستیانە ل دووڤ كەرنەڤالێ‌ سالانە یێ‌ ئێكەتیا تەپا پیێ یا جیهانی یە هەر ژ 12ێ‌ هەتا 20 ڤێ‌ هەیڤێ‌ بۆ هەلبژارتیێن جیهانێ‌ هاتینە دانان ژبۆ ئەنجامدانا یاریێن هەڤالینی، لەوما بۆ مفا وەرگرتن ژ حەفتییا فیفا هەردو هەلبژارتیێن مە یا ئۆلمپی و یا نشتیمانی ب سەركێشیا راهێنەرێ‌ ئسپانی خیسۆس كاساس هەموو یاریزانێن داخوازكری كۆمبكەت و یاریەكا هەڤالینی د حەفتییا فیفایێ‌ دا بەرانبەر هەلبژارتیێ‌ كۆلۆمپیا بكەن ئەوا دێ‌ ل 16ێ‌ ڤێ‌ هەیڤێ‌ ل باژێرێ‌ ڤالێنسا یا وەلاتێ‌ ئسپانیا هێتە ئەنجامدان.
دیسان دیار كر هەلبژارتیێ‌ ئۆلمپی دێ‌ مفایی ژ راوەستانا خولێ‌ بینت ژبەر كو راهێنەر رازی شنێشل دێ‌ كەمپەكێ‌ راهێنانێ‌ دانیت بەری بكەڤنە د هەڤڕكیێن قارەمانیا رۆژئاڤا ئاسیا بۆ ژیێن ل بن23ێ‌ سالی دا ئەوا دێ‌ بۆ ماوێ‌ هەشت رۆژان هەر ژ 12 هەتا 20ێ‌ ڤێ‌ مەهێ‌ ل باژێرێن بەغدا و كەربەلا مێڤانداریا وێ‌ كەن.

راهێنەرێ‌ هەلبژارتیێ‌ ئیراقێ‌ یێ‌ ئسپانی خیسۆس كاساس 27 یاریزان بۆ ناڤ پێكهاتیێ‌ تیما خوە یێ‌ تەپا پێی داخوازكرینە كەمپێ‌ راهێنانێ‌ ئەوا دێ‌ ل 12 هەتا 20ێ‌ ڤێ‌ مەهێ‌ ل باژێرێ‌ خیریز ل وەلاتێ‌ ئسپانیا و یاریەكا هەڤالینی ل هەمان وەلاتی ل 16 ڤێ‌ مەهێ‌ ل یاریگەها ئەلماستایا یا ڤالێنسا كەت، بتنێ‌ شەش یاریزانێن كوردن د ناڤ دانەژوانا پێنچ ڕەڤەندا كوردە ل ئۆرۆپا، ئەوژی مێرخاس دۆسكی، پێشەنگ عەبدوللا، ئالان محیەددین، ئالایی فازل و ئۆسامە رەشید و شێركۆ كەریم ژ یانەیا هەولێر.
پێكهاتیێ‌ ئیراقێ‌ بوویە جهێ‌ نەرازیبوونا جادەیا وەرزشی و جەماوەرێ‌ چەندین یانەیێن كوردستانێ‌ و ئیراقێ‌ و كارڤەدان ل تۆرێن چڤاكی پەیدا كریە، كۆمەكا شرۆڤەكار و وەرزشڤانێن دەڤەرێ‌ ژێگكرتنا پرانیا یاریزانێن هاتینە داخوازكرن ل دووڤ حەزا چەند كەسێن نێزیكی ئێكەتیا تەپا پێی یە و بەرانبەر دا چەند یاریزانێن گەنج و خودان شان هەنە داخواز نەكرینە تایبەت یانەیێن كوردستانی نموونە رێوان ئەمین، سیابەند عەگید و محەمەد سەعید ژ یانەیا دهۆك، دیسان ئەحمەد سەبری، سیپان سەدیق ژ یانەیا زاخۆ، هەروەسان هەلۆ فائیق.

ئەڤرۆ

پشتی چوونا هەردو یاریزانان یێ‌ ئەرجەنتینی لینۆێل مێسی و یێ‌ ئسپانی سێرجیۆ رامۆس ژ یانەیا پارێس سانجێرمانا فرەنسی هاتیە دۆپات كرن، دەزگەهێن راگەهاندنێ‌ ل ئۆرۆپا و سعۆدیێ‌ ئاماژە ب بزاڤێن مەزن یێن یانەیێن سعۆدیێ‌ بۆ ئیمزاكرنا گرێبەستێن وان دكەن.
رۆژناما سپۆرت یا ئسپانی دیار كر یانەیا هیلال یا سعۆدیێ‌ هەمی بەرهەڤی كرینە بۆ پێشوازیا ستێرێ‌ ئەرجەنتینی لیۆنێل مێسی بتنێ‌ چاڤەڕێ‌ رازیبوون ل سەر ئیمزاكرنا گرێبەستا وان مایە، یانەیا هیلال 400 ملیۆن یۆرۆ دگەل مووچەكێ‌ د ماوێ‌ سالەكێ‌ دا دناڤبەرا 500بۆ 600 ملیۆن یۆرۆیانە.
ژلایەكێ‌ دووڤە یانەیێن نەسر و ئیتحاد ل سەر هێلن بۆ رازیكرنا یاریزانێ‌ ئسپانی سێرجیۆ رامۆس، دووماهی پێنگاڤ دوهی یانەیا نەسر ب رێكا ستێرێ‌ خوە كریستیانۆ رۆنالدۆیی هاڤێتیە، لێ‌ رامۆسی پاشەرۆژا خوە ب رازیبوونا خێزانا خوە دانایە و دوور نینە هەتا حەفتیا بهێت بڕیارا خوە رابگەهینت.