ئەڤرۆ
ل ئێكشەمبیا بۆری د دەمێ ئەنجامدانا یاریا دووماهیا كۆپا كوردستانێ یا تەپا پێی د ناڤبەرا یانەیێن دهۆك و پێشمەرگەیا هەولێر روودانێن نە پێشبینیكری دناڤبەرا جەماوەرێن هەردو یانەیان پەیدابوو و ئالۆزی ژ پەلۆكێن یاریگەها فرانسۆ حەریری بەرە ب ئەردێ یاریگەهێ چوو، ئەو ب سەركەفتنا پێشمەرگە ب دووماهی هات لێ توندوتیژی زێدەتر لێهات، كی بەرپرس بوو؟ بۆچی روودا؟ رۆهنكرنێن ئێكەتیا تەپا پێی و یانەیا دهۆكێ چنە؟
ل دەستپێكێ ئازاد محەمەد ئەندامێ ئێكەتیا تەپا پێی یا كوردستانێ بۆ رۆژناما ئەڤرۆ گۆت: بەری دەستپێكرنا یاریێ هەموو پلان ئاسایی بوون و رێكخستنەكا باش دهاتە كرن، لێ ئەوا دناڤ پەلۆكێن یاریگەهێ دا پەیدابوویی جهێ سەرنجراكێشێ بوو ژبەركو ب سەدەهان مەتران ژێك دووربوون و هێزێن ئێمناهیێ ژی نێزك بوون، ب هیچ رەنگەكی ئەو روودان ناهێتە قەبوولكرن و دێ لژنە و دووڤچوونا تەسەل هەبیت هەر كەسەكێ توندوتیژی كربیت و بوویە ئەگەرێ روودانێ دێ گەهیتە سزایێ خوە، پشتی هەموو بەلگە دهێنە كومكرن ل دووڤ یاسایێ دێ سەرەدەریێ دگەل كەین، ناهێلین سیمایێ وەرزشا كوردستانێ ل نافخۆ و دەرڤەیێ هەرێمێ كرێت بكەت.
ژلایێ خوەڤە سەرۆكێ یانەیا دهۆك جەلال عەبدوللا د كۆنگرەیەكێ رۆژنامەڤانی دا گۆت: ئەو روودانا ل یاریگەهێ هاتیە دیتن زوور پێ نەخۆش بووینە و داخوازا دانانا لژنەكێ دكەین جهێن بلند دكەین دووڤچوونێ بكەن، ژبەركو هندەك پۆلیسێن دناڤ یاریگەهێ دا ب دروستی كارێ خوە ئەنجام نەدابوو و مە گەلەك بەلگە هەنە توندوتیژی دژی جەماوەرێ مە هاتیە ئەنجامدان، سەرباری مە جەماوەرێ خوە ئاگەهداركربوو كو بشێوەكێ شارستانی پشتەڤانیێ بكەن، لێ مخابن جەماوەرێ مە تووشی ئێشانەكا نەخۆش بوو ژلایێ هێزێن ئێمناهیێ، لەوما مە بڕیاردا چالاكیێن خوە ب راوەستینن هەتا لژنەك پێكبهێت و دەرنجام دیاربن.
سەرۆكێ یانەیا دهۆك دیاركر بڕیارە ئەڤرۆ هەموو یانەیێن پارێزگەهێ دگەل رێڤەبەرێ وەرزش و نوونەراتیا لژنا ئۆلمپی كۆمبوونێ بكەن پێخەمەت چەند بابەتێن هەستیار ژ وانا ئەو نەحەقیا ل پارێزگەهێ و یانەیێن وێ دهێنە كرن بۆ نموونە بتنێ ئێك كەس نوونەرێ پارێزگەهێ یە د ئێكەتیا تەپا پێی دا د بەرانبەر دا سێ ژ هەر پارێزگەهەكێ دگەل دانە.
یانەیا دهۆك چالاكیێن خوە راوەستاندن و ئێكەتیا تەپا پێی دێ دووڤچوونێ كەت
نيشاندان