ئەڤرۆ
د داخویانیەكێ‌ دا سەرۆكێ‌ یانەیا تەناهی دیار كر دەربازبوونا تیما وان یا تەپا پێی بۆ قۆناغا دویێ‌ ژ چارچووڤێ‌ كۆما پارێزگەهێ‌ یا خولا پلا دو یا كوردستانێ‌ ب كارەكێ‌ كۆم هاتیە سەرباری ئاستەنگان و دێ‌ رژدبن بۆ قۆناغا دویێ‌ یا دەربازبوونێ‌ بەر ب پلا ئێك كو باشتر خوە بەرهەڤ بكەین هەتا بگەهنە ئارمانجا خوە.
زێدەتر جاسم شەعبان بۆ رۆژناما ئەڤرۆ گۆت: هەرچەندە كۆمەكا ئاستەنگان كەفتە رێكا مە دا ژوانا نەبوونا یاریزانێن گەلەك باش و گڤاشتنێن دارایی لێ‌ وەكو كارگێریا یانێ‌ مە ب هەردو ملان و ب سۆز و رژدی پلان و بەرنامە دانا پێخەمەت بۆ وەرزێ‌ ئەڤ سالە یانەیا تەناهی ببیتە ئێك ژ هەڤڕكان بۆ پلێتا دەربازبوونێ‌، پێنەڤێت ئارمانجا مە ژی ئێك بوو ئەوژی بزاڤێ‌ بكەین ڤەگەڕێنە پلا ئێكا كوردستانێ‌، د ماوێ‌ قۆناغا ئێكێ‌ یا كۆما پارێزگەها دهۆكێ‌ مە چار یاری ئەنجامدان حەفت خال ب دو سەركەفتن و وەكهەڤیەك كومكرن و رێزا دویێ‌ ب دەستخوەڤە ئینا و شیان پێنگاڤا ئێكێ‌ ب سەركەفتیانە پاڤێژین و دەربازبنە قۆناغا دویێ‌ بۆ هەڤڕكیا پلێتا دەربازبوونێ‌.
هەروەسان ناڤهاتی گۆت: پێنەڤێت ئەڤ دەربازبوونە ب سانەهی نەهاتیە بەلكۆ ب كارەكێ‌ كۆم ژ كارگێری، كادرێ‌ راهێنانێ‌ و یاریزان لێ‌ بۆ قۆناغا دویێ‌ ژی دێ‌ هەمان ئاستەنگ هەبن و دبیت گڤاشتن زێدەتر هەبن، لەوما هەرزوو مە هزر د چاوانیا دانانا پلانێن باشتر بۆ قۆناغا دویێ‌ ئەوا دبیت پشتی جەژنێ‌ ژڤانێ‌ وێ‌ بهێتە دیاركرن، هیڤییا مە ئەوە لایەنێن پەیوەندیدار پشتەڤانێن گەنجێن تەناهی بن ژبەركو ئەوان ژی حەز و ڤیانێن مەزن هەنە بۆ وەرزشی و گەشبینن دێ‌ پێنگاڤێن باشتر هاڤێژین

ئەڤرۆد دیدارەكێ‌ دا یاریزانێ‌ گەنج یێ‌ تیما تەپا پێی یا یانەیا دهۆك ئیڤان سلێمان دیار كر پشتی بۆرینا پێنچ هەیڤان ژ هنگاڤتنێ‌ د نوكە دا د قۆناغا خوە بەرهەڤكرنێ‌ دایە و رژدە باشترین شێوە بهێتە د ناڤ خولا پلا نایابا ئیراقێ‌ دا.
زێدەتر ناڤهاتی بۆ رۆژناما ئەڤرۆ گۆت: وەكو هەر یاریزانەكێ‌ گەنج یێ‌ پارێزگەهێ‌ ب گەرمی و ب هەمی شیانێن خوە من بەرهەڤی دگەل تیما یانەیا دهۆكێ‌ دكرن بۆ وەرزێ‌ نوكە یێ‌ خولا پلا نایابا ئیراقێ‌ و هەردیسان ژی دگەل تیما خولا كوردستانێ‌ و گەشبین بووم باشترین شێوە و جوانترین ئاست دگەل یانەیا خوە نیشان بدەم، لێ‌ ژ نشكەكێ‌ و مخابنی ڤە پشتی ئەنجامدانا حەفت یاریێن دەستپێكا خولێ‌ د هەڤڕكیێن پلا نایاب دا و یاریا هەشتێ‌ دگەل نەفت ئەلبەسرا ئەوا ل باژێرێ‌ بەسرا دەستپێكا كانوونا ئێكێ‌ یا سالا بۆری هاتیە كرن تووشی هنگاڤتنەكا نە چاڤەڕێ‌ كری بووم د پێ‌ خوە دا بوو ئەگەر هەموو هیڤی و ئارمانجێن من پاشئێخستن و ئەز دووركریمە، لێ‌ پشتی نەشتەرگەری من كری هەمی بزاڤێن من ئەوبوون ل دووڤ شیرەتێن نۆژداری زووترین دەم ڤەگەڕێمە د ناڤ یاریان دا و چەندین قۆناغێن چارەسەریێ‌ من دەربازكرن، د نوكە دا سۆپاسیا خودایێ‌ مەزن دكەم كو تەندرۆستیا من یا باشە و هنگافتن بەر ب دووماهیێ‌ چوویە.
هەروەسان یاریزانێ‌ ناڤهاتی دیاركر د نوكە دا ئەو یێ‌ د قۆناغا راهێنانێن چەستەیی و هێزێ‌ دا ژبۆ ڤەگەراندنا ئاست و شیانێن خوە و گەشبینە د ماوەكێ‌ نێزیك ڤەگەڕێتە دناڤ یاریگەهێ‌ دا و دووبارە بشێت خزمەتا یانەیا خوە بكەت وەكو ئێك ژ یاریزانێن باژێرێ‌ خوە تیما دهۆكێ‌ بەر ب سەركەفتنا ببەن.

قەیس وەیس:

ل دووڤ دەنگۆباسێن هاتینە بەلاڤكرن ئێكەتیا تەپا پێی یا ئیراقێ‌ ل سەر بڕیارا خوە یا دەستپێكا وەرزێ‌ ئەڤ سالە لێڤەبوویە یێ‌ سیستەمێ‌ داكەفتنا چار یانەیێن دووماهیێ‌ ژ پلا نایاب بۆ پلا ئێك و سەرئێخستنا دو یانەیێن پلا ئێك بۆ نایاب، ئەڤ بڕیارە ناكۆكی دناڤ چەند لایەنان پەیداكربە.
د داخویانیەكێ‌ دا عەلی عبێسی جێگرێ‌ سەرۆك لژنەیا بەریكانەیان گۆت: بڕیارا داكەفتنا دو یانەیان بۆ پلا ئێك بەرۆڤاژی رێكەفتن و پلانێن مە بووینە كو چار یانە داكەڤنە پالا ئێك و دو یێن پلا ئێك سەركەڤنە نایاب و ئەڤ بڕیارە دێ‌ كارتیكرنێ‌ ل سەر پاشەرۆژا نێزیك یا خولا ئیراقێ‌ كەت تایبەت پرۆژەیێ‌ خولا پیشەكاران ئەوا ل سالا بۆری هاتیە پەسەندكرن.
ژلایێ‌ خوەڤە گۆڤەند عەبدولخالق ئەندامێ‌ ئێكەتیا تەپا پێی یا ئیراقێ‌ بۆ دەزگەهەكێ‌ راگەهاندنا ئیراقێ‌ گۆت: ئەم ل دووڤ پەیرەوێ‌ نافخۆ یێ‌ دەستەكا گشتی پێگیرین كو دەستەكا گشتی 20 ئەندامن ژ 20 یانەیان ئەو ژی یێن پلا نایابن و دانانا خولا پیشەكاران چ پەیوەندی ب پلا نایاب ڤە نینە، لەوما سیستەمێ‌ سەرەكی یێ‌ دەستەكا گشتی و ئێكەتیا تەپا پێی دشیان دانینە هژمارا وان ب گوهۆڕیت.

ئەڤرۆ

زاخۆ، عەلی حاجی:

د داخویانیەكێ‌ دا راهێنەرێ‌ تیما تەپا پێی یا باتیفا ئەوا پشكدار د ڤاڤارتنێن خولا پلە دو یا كوردستانێ‌ دا بۆ رۆژناما ئەڤرۆ دیار كر وان هەمی كێماسیێن دناڤ تیمێ‌ دا چارەسەر كرینە ژبلی دەربازبوونێ‌ بۆ خولا پلە ئێكا كوردستانێ‌ ئەو ب چ تشتەكێ‌ دیتر رازی نابن .
زێدەتر نەوزاد عەلی گۆت : پشتی من ئەركێ‌ راهێنەراتیا تیما باتیفا وەرگرتی دگەل كارگێریا یانێ‌ مە پلانەك دارێشت كو د چەند قوناغەكان دەربازبوو ژ بۆ دروستكرنا تیمەكا رێك و پێك بۆ وەرزێ‌ ئەڤ سالە یێ‌ ڤاڤارتنێن خولا پلە دو، پێنگاڤا ئێكێ‌ تاقیكرن بۆ یاریزانان دەستپێكر و شییاین سێ‌ یاریزانان د وێ‌ تاقیكرنێ‌ دا هەلبژێرین، پێنگاڤا دویێ‌ دا جارەكا دی ئەو یاریزانێن خەلكێ‌ باتیفا ڤەگەراندن دناڤ تیمێ‌ دا ئەوێن د وەرزێ‌ بوری دگەل تیمێ‌ دا و زێدەباری هندێ‌ ژی مە هەڤبەستا چەند یاریزانەكێن باژێرێ‌ زاخۆ گرێدا و دەست ب یاریێن هەڤالینی كرن پێخەمەت كێماسیێن خوە بزانین.
ناڤهاتی ئەو چەندە ژی گۆت: بۆ قوناغا سێیێ‌ هەڤبەستا سێ‌ هەتا چار یاریزانێن دیتر گرێدا كو یاریزانەك خەلكێ‌ بەغدایە و ئێكێ‌ دیتر ژی یێ‌ مووسلە، ب گرێدانا وان هەڤبەستا د نوكە دا تیما مە یا بێ‌ كێماسی یە و بەرهەڤە بۆ ئەنجامدانا یاریێن خولێ‌.
ل دووماهیێ‌ نەوزادی گۆت: تیما مە رەوشەكا باش دەرباز دكەت و بهێزترە ژ وەرزێ‌ بوری و چاڤەرێنە یاریێن وەرزێ‌ نوو دەست پێبكەن و ئارمانجا مە یا سەرەكی ژی دەرباز بوونە بۆ پلە ئێكا كوردستانێ‌ و مە باوەرییەكا مەزن ژی ب تیما خوە هەیە .