ئەڤرۆ
چاڤەڕێ دهێتە كرن ئەڤرۆ ل دەمژمێر 11 شەڤ دەست ب هەڤڕكیێن قۆناغا چارێك دووماهیا قارەمانیا یانەیێن ئۆرۆپا قارەمانێن خولا چامپیۆنز لیگ یا یاریێن ئێكێ و هاتنێ ب ئەنجامدانا دو دیدارێن ئاگرین و ب هێز ژبۆ دەربازبوونا نیڤا رێكێ بەر ب پێش دووماهییا قارەمانیێ.
مانچستەر ستی و بایرن میۆنخ
بڕیارە تیما یانەیا مانچستەر ستی یا ئنگلتەرایێ ل یاریگەها خوە ئستاد ئتیحاد مێڤانداریا هەڤڕكا خوە بایرن میۆنخ یا ئەلمانی د یاریەكا ئاگرین دا د ناڤبەرا دو زلهێزین ئۆرۆپا و بەربژارێن دەستڤە ئینانا ناسناڤێ چامپیۆنزێ بكەت، خودانێن ئەردی د خولا پرێمەرلیگ دا ئاست و ئەنجامێن باش نیشان ددەتە تایبەت یاریزانێن وێ ئیرلینگ هالاند گۆلكەرێ چامپیۆنز ب10 گۆلان و یێ ئنگلتەرایێ ب30 گۆل و رێزبەندیا وێ یا دویێ یە پشتی ئارسنال ب جوداهیا پێنچ خالان ئەڤ چەندە دێ بیتە ئەگەر راهێنەرێ وێ یی ئسپانی پیب گۆاردیۆلا ب هەمان مۆرال بەرانبەر مێڤانا خوە بیت، ژلایێ خوەڤە بایرن میۆنخ تیمەما ب سانەهی نابیت بەلكۆ ب ئارمانج و هیڤیێن مەزنن ئەوێند نوكە دا سەرێ لیستەیا خولا ئەلمانیا دهێت ب58خالان و بۆ ڤێ یاریێ ژی رازی نابیت ژبلی دەستڤە ئینانا خالێن یاریێ ژبۆ مسۆگەركرنا پلێتا دەربازبوونێ د یاریا دویێ دا، ئانكو ژلایێ چەستەیی و دەرۆنی هەردو تیم بەرهەڤن بۆ دیدارا ئاگرین یا ئەڤ شەڤە، مان ستی دێ بزاڤێ كەت مفایی ژ ئەرد و جەماوەرێ خوە وەربگریت بۆ سەركەفتنێ، بەرانبەر دا بایرن دێ شەڕی بۆ سەركەفتن یان وەكهەڤیێ كەت پێخەمەت د یاریا دویێ دا دناڤ جەماوەرێ خوە دا پلێتا دەربازبوونێ مسۆگەر بكەت ب سەركێشیا راهێنەرێ خوە یێ نوو تۆماس تۆخێل ئەوا ل جهێ راهێنەرێ بەرێ جۆلیان ناگێلزمانی، هەردو یانە 10 جاران بەرانبەری ئێك بووینە و ئەنجام دناڤبەرا خوە دا ب نیڤی بەلاڤكریە پێنچ سەركەفتن بۆ بایرنێ و پێنچ بۆ مان ستی بووینە، دادڤانێ یاریا ئەڤ شەڤە یێ ئسپانی خیسۆس خێل مانزانۆ.
پێكهاتیێ پێشبینیكری
ل دووڤ بووچوونێن شارەزایێن وەرزشی پێكهاتیێ پێشبینیكری یێن هەردو تیما بڤی رەنگی نە، یا بایرن میۆنخێ: گۆلپارێز یان سۆمێر، هێلا بەرەڤانیێ جواو كانسیلۆ، بنیامێن باڤارد، ماتیاس دی لێخت، ئالفۆنسۆ دیڤێز، هێلا ناڤین، جواو كیمیتچ، تۆماس مۆلەر، لیرۆی سانی، هێلا هێرشبرنێ، جەمال مۆسیلا، سێرجی جنابری و سادیۆ مانی، ژلایێ خوەڤە پێكهاتیێ مان ستی، گۆلپارێز ئیدرسۆن، هێلا بەرەڤانیێ مانویێل ئاكانجی، جۆن ووستۆنز، رۆبێن دیاز، ناسان ئیكی، هێلا ناڤین رۆدرێگۆ هێرناندێز، كێڤێن دی برۆیین، ئیلكایی گۆندۆگان، جاك كریتێچ، ریاز محرز، هێلا هێرشبەریێ هالاند.
بەنفیكا- ئەنتەر میلان
د یاریەكا دی یا ب هێز و هەڤڕكی دا و ب تاما تۆلڤەكرێ دا، یانەیا بەنفیكا یا پۆرتۆگالی دێ ل یاریگەها خوە مێڤانداریا یانەیا ئەنتەر میلان یا ئیتالی كەت، هەرچەندە هەردو یانە بتنێ جارەكێ بەرانبەر ئێك بووینە ژ چارچووڤێ چامپیۆنزێ ئەوژی ل سالا 1965 بوو د یاریا دووماهیێ دا ئەنتەر ب گۆلەكێ سەركەفتن تۆماركربوو، لێ سێ جارێن دی ژی بەرانبەر ئێك بووینە وەكهەڤیەك و دو سەركەفتن بۆ ئەنتەر بووینە، ئانكو یانەیا پۆرتۆگالی نەشیایە چو سەركەفتنا تۆماربكەت، بۆ یاریا ئەڤ شەڤە وەكو تۆلڤەكرن بەنفیكا دێ هەمی شیانێن خوە بۆ سەركەفتنا ئێكێ مەزێخیت و تۆلێن خوە ڤەكەت.
بیرەوەریێن بەنفیكا و ئەنتەر د چامپیۆنزێ دا
یانەیا بەنفیكا یا پۆرتۆگالی پێنج جاران دەربازبوویە یاریێن دووماهیا چامپیۆنزێ د سالێن شێستێ یێن چەرخێ بوری دا، دو جاران ناسناڤ دەستڤە ئیناینە و سێ جاران ژ دەست دایە، بەرانبەر دا یانەیا ئەنتەر چار جاران دەربازبوویە یاریا دووماهیێ د ماوەیێ 1964 هەتا 1972ێ، دو ناسناڤ دەستڤە ئیناینە دیسان دو ژ دەستداینە.
نيشاندان