ئەڤرۆ

ئەڤرۆ، پەیامنێران:

بڕیارە ئەڤرۆ 20/3/2023 ل سەرانسەری پارێزگەها دهۆكێ‌ كەرنەڤالێن جودا یێن هەلكرنا ئاگرێ‌ نەورۆزێ‌ و ئاهەنگێن جەماوەری بهێنە ئەنجامدان و هەژمارەكا زۆر یا گەشتیاران ژی قەستا پارێزگەها دهۆكێ‌ بكەن.
د. عەلی تەتەر، پارێزگارێ دهۆكێ دوهی سەرپەرشتیا كۆمبوونەكا تایبەت ل دۆر بەرهەڤیێن جەژنا نەوروزێ و سەرسالا كوردی كر و دكۆمبوونێ دا دوپاتی ل سەر پاراستنا سەر و مال و گیانێ وەلاتیان و مەراسیمێن هەلكرنا ئاگری ل سنوورێ هەموو دەڤەرداری و ناوچەداریێن سەر ب پارێزگەها دهۆكێ ڤە و پاراستنا ژینگەهێ و پاقژراگرتنا وێ‌ كر.
پارێزگارێ دهۆكێ د كۆنگرەكێ رۆژنامەڤانی دا هەموو جەماوەر و هێز و لایەنێن سیاسی داخوازكرنە مەراسیمێن هەلكرنا ئاگرێ نەورۆزێ‌ و داخواز ژ وەلاتیێن نەهێنە مەراسیمان ژی كر نەورۆزێن جاران بگێڕن و ئاگری ل سەر بانێن مالێن خوە ب رێیێن شارستانی هەل بكەن.
د. عەلی تەتەر، پارێزگارێ دهۆكێ د وی كۆنگرێ‌ رۆژنامەڤانی دا گۆت: «هەر كەسێ‌ تەقێ‌ بكەت دێ‌ تووشی پێرابوونێن یاسایی بیت و دێ‌ دووڤچوونەكا تۆند ل سەر ڤێ‌ چەندێ‌ هێتە كرن، هیڤی ژ هەموو خەلكێ‌ دهۆكێ‌ دكەم ڤێ‌ چەندێ‌ دووبارە نەكەن، ل سالا بۆری ژی چەند كەسەك ژ بەر تەقەكرنێ‌ هاتبوونە دەستەسەركرن».
ژ لایەكێ‌ دیڤە رێڤەبەریا گشتی یا رەوشەنبیری و هونەی و سەرۆكاتیا باژێرڤانیا دهوكێ ب پشتەڤانیا د. عەلی تەتەر، پارێزگارێ دهۆكێ دێ، ئەڤرۆ ریورەسمێن هەلكرنا ئاگرێ نەوروزێ ب ئاهەنگەكا ستران گۆتنێ و روپیڤانا جەماوری ل دەمژمێر 5ی ئێڤاری ل پاركا نەورۆز سازكەن.
دیسا پەیڤدارێ‌ رێڤەبەریا هاتنوچوونا پارێزگەها دهۆكێ‌ ژی راگەهاند، ل سپێدەهیا رۆژێن نەورۆزێ رێرەوێ‌ هاتنوچوونێ‌ دێ‌هێتە گوهۆڕین، بۆ نموونە: ل سپێدێ‌ دێ‌ جادەیێن سەرەكی ژ بێسرێ‌ هەتا زاویتە ب تنێ‌ چوون بیت و بەروڤاژی ل ئێڤاری دێ‌ ب تنێ‌ هاتن بیت.
هەروەسا ل گەلیێ‌ ركاڤا بۆ گەلیێ‌ كورتكێ‌ دێ‌ ب تنێ‌ چوون بیت و جادا گەلی دێ‌ ب تنێ‌ چوون بیت.
دیسا ل ئامێدیێ‌ ژی كەرنەڤالێ هەلكرن و ئاهەنگا نەورۆزا ئەڤ سالە دێ ب شێوازەكێ جودا ژ سالێن چوویی هێتە ئەنجامدان و جهێ هەلكرنا ئاگرێ نەورۆزێ ژی هاتیە گوهارتن و ئاگر ل بەرامبەری باژێری دێ‌ هێتە هەلكرن.
ل ئیدارەیا سەربخوە یا زاخۆ ژی بەرهەڤی بۆ نەورۆز و ڕەمەزانێ دهێنە كرن و دوهی ب سەرپەرشتیا گۆهدار شێخۆ، سەرپەرشتێ ئیدارەیا سەربخوە یا زاخۆ، كۆمبوونا لیژنا ئەمنی ل گەل لایەنێن پەیوەندیدار هاتە ئەنجامدان و بابەتێ بەرهەڤیێن نەورۆزێ و چاوانیا ڕێكخستنا ڕێورەسمێن وێ و پێشوازیكرنا مێهڤانان هاتە گەنگەشەكرن.
دیسا ل ئاكرێ‌ ژی هەموو بەرهەڤی هاتینە كرن و نەورۆزەكا جودا ژ سالێن بۆری دێ هێتە كرن، بۆ ڤێ مەرەمێ ژی چەندین لیژنە هاتینە پێكئینان بۆ وێ چەندێ ب باشترین شێوە خزمەتا مێهڤان و گەشتیاران بهێتە كرن و شەعبان خەلیل بەرواری، دەڤەردارێ ئاكرێ ب وەكالەت بۆ ئەڤرۆ گۆت: «بۆ نەورۆزا ئەڤ سالە ئەم پێشبینیا هاتنا 100 هزار گەشتیاران دكەین، بهێنە ئاكرێ بۆ دیتنا كەرنەڤالا نەورۆزا ئاكرێ».
دیسا ب هەلكەفتا هاتنا نەورۆزێ‌ سەرۆكاتیا باژێرڤانیا دهۆكێ‌ دەست ب هەوەكا بەرفرەه یا پاقژیێ‌ و راكرنا تایرێن ترۆمبێلان كریە.
ژ لایەكێ‌ دیڤە رێوار محەمەد رەشید، پەێڤدارێ‌ رێڤەبەریا گشتی یا گەشتوگوزارێ‌ ل پارێزگەها دهۆكێ‌ گۆت: «ئەڤ سالە رێڤەبەریا مە بەرهەڤیێن باش بۆ پێشوازیا گەشتیاران كرینە و هژمارەكا تیمان بۆ پێشوازی و خزمەتكرنا گەشتیاران یێن هاتینە پێكئێنان، ئەم پێشبینی دكەین پتر ژ 15 هزار گەشتیاران قەستا پارێزگەها دهۆكێ‌ بكەن».

ئەڤرۆ

ئامێديێ، مەحمود نهێلى:

كۆنفرانسەك ل دۆر ئاریشەیێن گەنجان ل دەڤەرێ‌ و چاوانیا چارەسكرنا وان و نەهێلانا ئاستەنگان ل هەمبەر شیانێن وان، ژ لایێ‌ رێكخراوا گەنجێن بەرهەمدار تایێ‌ شێلادزێ‌ هاتە ئەنجام دان.
عەمار نزار، بەرپرسێ‌ رێكخراوا گەنجێن بەرهەمدار بۆ رۆژناما ئەڤرۆ دیار كر، ئەڤە ئێكەم كۆنفرانسێ‌ ب ڤی رەنگی یە ل دەڤەرا وان دهێتە ئەنجام دان و گۆت: «د دو پەنەلێن كۆنفرانسی دا بابەتێن جودا ل گەل پشكداران هاتنە گوتوبێژكرن و باس ل چەندین تەوەران هاتە كرن و ئەگەر و ئاستەنگێن دبنە رێگر ل هەبەر پێكشەفتنا گەنجی هاتنە گەنگەشە كرن».
ناڤهاتی خویا ژی د كۆنفرانسی دا ئاماژە ب چاوانیا ئاڤاكرنا مللەتان ل سەر دەستێ‌ گەنجان هاتە كرن و گۆت: «ئەم دێ‌ بەردەوام بین ل سەر كارێن ڤی رەنگی ژ پێخەكەت پێشڤەبرنا شیانێن گەنجان و نەهێلانا ئاستەنگ و ئەگەرێن دبنە رێگر بۆ پێشكەفتنا وان».

هەولێر، قائید میرۆ:

بەرپرسەكا وەزارەتا شەهیدان دبێژیت: لژنەیەكا دی یا چاكسازیێ ل وەزارەتا شەهیدان هاتیە پێكئینان و پرۆسا چاكسازیێ دێ بەردەوامی هەبیت بۆ زێدەتر ئەنجامدانا چاكسازیێ.
شیرین ئیبراهیم، شیرەتكارا وەزارەتا شەهید و ئەنفالكریان بۆ رۆژناما ئەڤرۆ دیار كر، چار لژنەیێن لاوەكی ژ بۆی چاكسازیێ د ناڤا وەزارەتا شەهیدان دا هاتینە پێكئینان و پێنگاڤێن باش هاتینە هاڤێتن ژ بۆی ئەنجامدانا چاكسازیێ و گۆت: «هەژمارەكا زۆر یا ناڤێن نەقانوونی هاتینە لادان، پرۆسە دێ بەردەوام بیت و هەر كەسەكێ گورەی قانوونێ نەهاتبیتە تۆماركرن دێ هێتە لادان، ئانكو لیستا شەهید و ئەنفالكریان دێ هێتە پاقژكرن و هەر كەسەكێ قانوون ڤەنەگریت دێ ناڤێ وی هێتە لادان».
شیرین ئیبراهیم گۆتژی: «لژنەیەكا دی ژی هاتیە پێكئینان بۆ ئەو كەسێن پێشمەرگە بووینە و ژ قانوونا وەزارەتا شەهیدان مفادار نابن، لەوڕا ژی دێ بادەكێن وانا هێنە ڤەگەڕاندن بۆ وەزارەتا پێشمەرگەی و ل گورەی قانوونا وەزارەتا پێشمەرگەی دێ‌ هێنە خانەنشینكرن یان ژی ب شەهید دێ‌ هێنە تۆماركرن و د دووڤ دا بۆ سەر وەزارەتا شەهید و ئەنفالكریان دێ‌ هێنە ڤەگەڕاندن».

ئەڤرۆ

رەمەزان زەكەریا

سالانە ل دەمێ وەرزێ بۆهارێ گەشتیار ب رەنگەكێ بەرفرەهـ قەستا ناڤ سروشتێ كوردستانێ دكەن ب مەبەستا ئەنجامدانا گەشت و سەیرانان، بەلێ ژینگەهێ ناپارێزن و پیس دكەن و ب ڤێ چەندێ ژی رێكخراوێن ژینگەهـ پارێز گازندا دكەن ژ پیسكرنا ژینگەهێ و پێگیر نەبوونا گەشتیارا ب رێنمایێن جهێن شولەژی بۆ راكرنا بەرمایكا.

تاهر ئالكەیی، سەرۆكێ رێكخراوا گول و سروشت بۆ ئەڤرۆ گۆت: سالانە ئەو زیانێن ل وەرزێ بۆهارێ و گەشت و سەیرانا دگەهنە ژینگەهێ ب درێژاهیا وەرزێن دی ناگەهیت ژینگەهێ، ژبەركو رێژا گەشتیارا زێدە دبیت و گەشتیار ژبلی فرەدانا مادێن پلاستیكی و لایلونی و شكاندنا قەدێن دارا بەرمایكێن خۆ ژی دهێلنە ناڤ سروشتی دا ئەڤە ژی بۆ مەترسیەكا مەزن ل سەر ژینگەهێ و بەردەوام دناڤ قوتابخانا دا مە ئاگەهداری بەلاڤكرینە بۆ وێ چەندێ دەمێ گەشت و سەیرانا ژینگەهێ پیس نەكەن و بپارێزن، بەلێ وەلاتی پێگیر نینە ئەڤ چەندە ژی بوویە مەترسیەكا مەزن ل سەر ژینگەهێ.
شەوان یوسف ، سەرۆكێ رێكخراوا هەناسە پلاس یا نێڤدەولەتی بۆ ژینگەهێ بۆ ئەڤرۆ گۆت: ئێك ژ وان مەترسێن بەردەوام ل سەر ژینگەهێ دروست دبیت وەرزێ بۆهارێیە كو گەشتیار چ دلۆڤانیێ ب ژینگەهێ نابەن و هەر چی مادەیەكێ خرابە بۆ ژینگەهێ گەشتیار دهێلنە دناڤ سروشتی دا، ئەڤ سروشتە رۆژ بۆ رۆژێ یێ پیس دبیت، دخوازین دەمێ خێزان ب مەرەما گەشت و سەیرانا ل مال دەردكەڤن هزر بكەن ئەو ژینگەهـ مالا وان یا دوێیە و كیسكێن مەزن دگەل خۆ ببەن، ئەگەر نەزڤرینن مال ژی، بەلێ كۆم بكەن و ل نێزیك جادەیا گشتی دانن، بۆ وێ چەندێ ترۆمبێلێن ژینگە پارێز بشێن ب ساناهی كۆم بكەن، ئەوا بەرامبەر ژینگەهێ دهێتە كرن بۆ نوكە و پاشەرۆژێ مەترسیەكا مەزنە هیڤی خوازین سزا و پاداشت بهێنە دانان بۆ پارێزەرێن ژینگەهێ و ئەوێن ژینگەهێ پیس دكەن.