ئەڤرۆ
سەباح زوهێر:
پارێزەرەكێ بو رۆژناما ئەڤرۆ دیار كر كو هەر كەسێ چەكی هەلگریت و مولەت نەبیت، قانوونێ سزایەكێ توند بۆ دانایە هەتا هەكە چ تاوان ژی ئەنجام نەدابن و گۆت: ل گورەی قانوونێ و لدووڤ ماددێ 15ێ سزایێ وی كەسی زیندان كرنە كو ژ سالەكێ كێمتر نینە و ژ سێ سالا پتر نینە و سزایێ دارایی ژ 2 ملیون دینارا كێمتر نینە و ژ 5 ملیونا زێدەتر نینە.
پارێزەر عەبدلناسر حەسەن زێباری بۆ روژناما ئەڤرۆ دیار كر كو رێكخستنا چەكی د هەر جڤاكەكی دا پێدڤی ب قانوونەكێ یە، ل هەرێما كوردستانێ ژی یاسا هاتە دانان ل سالا 1993 بەلێ كێماسی كەفتینە د ڤێ قانوونێ دا و گوهۆڕین چێبوون و تەكنولوجیا پێشكەفت و چەك زورتر لێهات و گۆت: (پێدڤیە سزا بهێنە توند كرن ژبەر هندێ قانوونا چەكی یا ژمارە (8) یا سالا 2022 ێ و قانوونا سالا 1993 ێ هاتە هەلوەشاندن).
پارێزەری گۆتژی: (مەبەستا سەرەكی یا قانوونێ ژ قەدەغەكرنا هەلگرتنا چەكی بۆ هندێ یە ئەو ئاریشێن دناڤ جڤاكی دا هەی مەزنتر لێ نەهێن و نەگەهتە رادێ هەلگرتنا چەكی، چونكی هەموو دەما مروڤ دبینیت چەك وەك پشتەڤانەكێ یە ل گەل مروڤی و زێدەتر مروڤی پالدەت بۆ ئاریشا).
زێباری د بەردەوامیا ئاخفتنێن خوەدا دیار كر كو ژبەر هندێ قانوونێ یا رێكخستی ئەو كەسێن كڕین و فروتنا چەكی دكەن پێدڤیە دەستوری هەبیت ژلایێ حوكمەتا هەرێما كوردستانێ ڤە وەكو قانوونێ دیار كری و ئەو كەسێ چەكی بكاردئینیت و هەلدگریت پێدڤیە ژیێ وی ژ 21 سالیێ كێمتر نەبیت و ئەوان ژی مولەت هەبیت و چ نەخوشیێن دەروونی و عەقلی نەبن و گۆت: (پێدڤیە ئەڤە ژی بهێتە سەلماندن ب راپورتا نوشداری و چ رابردویێن تاوانی نەبن، ئانكو هەلگرتنا چەكی ل دەف وی كەسی یا بەرئاقل بیت كا ژبەر چ ئەڤ كەسە دێ چەكی هەلگریت هەكە ئەڤ مەرجە نەبن یا خەلەتە ئەڤ كەسە چەكی هەلگریت).
پارێزەر عەبدلناسر زێباری گۆتژی: (قانوونێ ئەو ژی رێكخستیە كو ئەو كەسێن بازرگانیێ ب چەكی دكەن ب رەنگەكێ قاچاغ دێ هێنە سزادان بۆ ماوێ 10 سالا كێمتر نەبیت ئەڤ رێكخستنە هەموو هاتیە كرن ل دووڤ قانوونا چەكی یا ژمارە 8 یا سالا 2022 ێ .
نيشاندان