د. عەلی تەتەر، پارێزگارێ دهۆكێ دوهی 5/3/2023 سەرا تیمێن هەوا پاقژكرنا رووبارێ دهۆكێ دا و ژ نێزیك سەحكرە كارێن پاقژكرنێ و چەندین شیرەت و راسپاردە ئاراستەی بەرپرسێن سەرۆكاتیا باژێرڤانیا دهۆكێ كرن، كو رووبارێ دهۆكێ جوانتر ب خەلمینن و رێكبێخن.
پارێزگارێ دهۆكێ د كۆنگرەكێ رۆژنامەڤانی دا گۆت: «جهێ مخابنیێ یە، كو هندەك كەسان جوانیا رووباری كرێتكریە و تێكدایە، هەروەسا گازندە ژ لایەنێن پەیوەندیدار ژی كر، كو وەكو پێدڤی نەشیاینە جوانیا رووباری ب پارێزن و رێكبێخن».
پارێزگارێ دهۆكێ گۆتژی: «ئەوێن گرێبەست ل سەر رووبارێ دهۆكێ هەی و ب ئەركێ خوە رانەبن دێ گرێبەستێن وان هێنە هەلوەشاندن».
هەوا پاقژكرنا رووبارێ دهۆكێ بۆ دەمێ‌ سێ‌ رۆژان یا بەردەوام بوو، تێدا 100 تەنێن گلێشی هاتینە راكرن.

ئاكرێ‌، رەمەزان زەكەریا:

سالانە رۆژا 20ێ ئادارێ ل دەڤەرداریا ئاكرێ كەرنەڤالا هەلكرنا ئاگرێ نەورۆزێ ب رەنگەكێ تایبەت دهێتە كرن و مێهڤان ل سەر ئاستێ كوردستانێ و دەڤەرێ قەستا ئاكرێ دكەن بۆ دیتنا خەتیرێن ئاگرێ نەورۆزا ئاكرێ.
شەعبان خەلیل بەرواری، دەڤەردارێ ئاكرێ ب وەكالەت بۆ ئەڤرۆ گۆت: «سالانە 20ێ ئادارێ چاڤێ هەموویان ل سەر كەرنەڤالا نەورۆزا ئاكرێ یە، بۆ ڤێ مەبەستێ مە دڤێت باشترین نەورۆز ل رۆژا هەلكرنا ئاگرێ نەورۆزێ‌ ل ئاكرێ بكەین».
گۆتژی: «نەورۆزا ئاكرێ تایبەتمەندیا خوە هەیە، لەورا ل هەموو كوردستانێ و ئیراقێ و چەندین وەلاتێن ئەورۆپی مێهڤان قەستا ئاكرێ دكەن، ل رۆژا 20ێ ئادارێ میدیا ناڤخوە و جیهانی ژی گرنگیێ ب كەرنەڤالا نەورۆزا ئاكرێ ددەن».
ناڤهاتی خویا ژی كر، بۆ ئەڤ سالە هندەك گوهۆڕین د كەرنەڤالا نەرۆزا ئاكرێ دا دێ هێنە ئەنجامدان، مەبەست ژی جوانتركرنا كەرنەڤالێ یە.
گروپێن خوەبەخش ل ئاكرێ دەست ب بەرهەڤیان كریە و هەر ژ نوكە دەست ب دروستكرنا خەتیران كریە بۆ وێ چەندێ ل رۆژا 20ێ ئادارێ ببەنە سەر كەلا ئاكرێ.

هەولێر، قائید میرۆ:

پەرلەمانتارەكێ پارتی ل پەرلەمانێ ئیراقێ ئاشكرا كر، چەندین پێنگاڤ بۆ ئاساییكرن و ئاڤاكرنا دەڤەرا شنگالێ هاتینە هاڤێتن و دبێژیت: كار دهێتە كرن جارەكا دی شنگال بەر ب ئاڤاكرن و گەشەكرنێ بچیت، ژ وان ژی: پێنج هزار دەلیڤێن كاری بۆ خەلكێ شنگالێ دێ‌ هێنە دابینكرن.
مەحما خەلیل، پەرلەمانتارێ پارتی ل پەرلەمانێ ئیراقێ بۆ رۆژناما ئەڤرۆ دیار كر، وان بەردەوام كار بۆ ئاڤاكرنا رەوشا شنگالێ كریە و بەری چەند رۆژان ژی شاندەكێ ئیراقێ ب مەرەما بجهئینانا داخوازیێن خەلكێ شنگالێ سەرەدانا دەڤەرێ كریە و گۆت: «ئەم بەردەوام ل بەغدا كار دكەین، كو رەوشا شنگالێ زوو بهێتە ئاساییكرن و دوبارە شنگال بهێتە ئاڤاكرن و خەلك ڤەگەڕیتە سەر مال و حالێن خوە».
مەحما خەلیل گۆتژی: «بڕیارە پێداچوون د رەوشا شنگالێ دا بهێتە كرن و پێنج هزار دەلیڤێن كاری بۆ خەلكێ شنگالێ بهێنە دابینكرن و چار هزار كەس ژی دێ هێنە قەرەبووكرن، هەروەسا مافێ‌ شەهیدێن شنگالێ دێ هێتەدان ئەڤە ژی هەموو دێ بنە ئەگەرێ ڤەژاندنا شنگالێ ژ چەندین لایانڤە».

ئەڤرۆ

بەرپرسێ رێكخراوا فەلەكناسێن كوردستانێ ئاشكرا كر، رۆژانە چەندین ئەرد هەژین ل هەرێما كوردستانێ تۆماركرن، بەلێ ئەرد هەژێن بچووكن و تنێ ژلایێ دەزگەهێ ئەرد هەژینێ تۆمار دكەت. هەروەسا دبێژیت: هەموو جیهان لسەر هێلا ئەرد هەژینێ یە و راست نینە دەمێ دبێژن هەرێما كوردستانێ ل سەر هێلا ئەرد هەژینێ نینە و هەموو دەڤەرێن جیهانێ بۆ ئەرد هەژینێ د پاراستی نینن، ئەگەر بهێت و نەكەڤنە سەر هێلا ئەرد هەژینێ.

ئەژی چەتو حەسەن، بەرپرسێ رێكخراوا فەلەكناسێن كوردستانێ بۆ رۆژناما ئەڤرۆ دیار كر” راگەهاندنا نافخۆ یا بیانی ژی ب شاشی پەیاما زانایێ هۆلەندی ل دۆر پەیدابوونا ئەرد هەژینێ گەهاندیە، چونكە وی رۆژا ئەرد هەژینێ دیارنەكربوو تنێ گۆتبو ل داهاتی دێ ئەرد هەژین ل دەڤەرێ پەیدابن، ئەو دەڤەرێن دكەڤنە سەر هێلا چالاك یا ئەرد هەژینێ هەموو دەمەكی مەترسی ل سەر هەیە بۆ چێبوونا ئەرد هەژینێ.
زێدەتر گۆت: ئەو دەڤەرێن كێشوەر دگەهنە ئێك دبێژنێ هێلان بەر ئێك كەفتنێ واتە دەڤەرێن ئەكتیف یێن ئەرد هەژینانە، هێلا ئەرد هەژینێ ل كەنداڤێ عەرەبی دەست پێدكەت هەتا دگەهیتە توركیا هەموو هێلا ئەرد هەژینێ یە، جهێ بەر ئێك كەفتنا دو پارچانە جەزیرا عەرەبی دگەل ئوراسیا، بەری ملیۆنان سالان دەرزەك پەیدابوویە و هەر وەكی خوە مایە.
فەلەكناسی ئاشكرا ژی كر، بسپۆر نابێژن ئەرد هەژین ل هەرێما كوردستانێ پەیدانابن، چو راستی بۆ ڤێ چەندێ نینە، ژبەركو دەڤەرەك ل سەر هێلا ئەرد هەژێ ژی نەبیت چێدبیت ئەرد هەژین تێدا پەیداببیت، پێدڤیە خەلك ڤێ راستیێ بزانن هەموو جهەك ل سەر دنیایێ یێ پاراستی نینە ل ئەرد هەژینێ، هەتا خەلك خوە بەرهەڤ بكەت بۆ مەترسیێن ئەرد هەژینێ، ئێكەم رێنمایی بۆ خۆ پاراستنێ ل ئەرد هەژینێ، دڤێت ددەمێ پەیدابوونا ئەرد هەژینێ ئێكەم تشت ئەڤە مرۆڤ خوە تێكنەدەت و كاریگەری ل سەر مرۆڤی نەبیت، ل دووڤ دا پێنگاڤ هەنە ئەگەر شیاندابیت ل ئاڤاهی دەركەڤیت و رێكێن سلامەت بكار بینیت.
ئەژی چەتو حەسەن ئاماژە كر “هندی ئەرد هەژێن هەتا نوكە چێبوی ئاڤاهی خراپ نەكرینە، ل جیهانێ چو تاوەر ب ئەگەرێ هێزا ئەرد هەژینێ نە هەرفتینە، ئەڤا ل توركیا چێبووی شوقە ب سەر خەلكی دا هەرفتی جودایە، چونكە دەمێ ئەرد هەژینێ 45 چركەبوون ئەڤە گەلەك زۆرە بۆ ئەرد هەژینێ، خالا دویێ كوالێتیا وان ئاڤاهیێن هاتینە چێكرن مەرجە خوە ل بەر ئەرد هەژینێ بگرن، هندەك ژ وان شوقەیان دكەڤن بوونە و كاریگەری هەبوویە، ڤان سالێن دوماهیێ روودانێن سرۆشتی زێدەبووینە و ئێك ژ وان روودانێن سرۆشتی زێدەبوونا ئەرد هەژینایە، بەردەوام ئەرد هەژین دهێنە تۆماركرن، بەری نوكە ئەز ب خوە ل رێڤەبەرایەتیا ئەرد هەژین و سەقاناسیێ بووم هەیڤێ 300 هەتا 400 ئەرد هەژینا ل هەرێما كوردستانێ دهاتنە تۆماركرن، بەلێ هەموو ئەرد هەژێن بچووكن و مرۆڤ هەست پێناكەت تنێ ل وێستگەهێن تۆماركرنا ئەرد هەژینێ دهێنە تۆماركرن.