ئهڤرۆ، نهوزاد هلۆری:
ب مهرهما خزمهتكرنا كهرتێ پهروهردێ و دابینكرنا پڕۆژهیێن خزمهتگوزاری، پارێزگارێ دهۆكێ ل گهل ههژمارهكا بهرپرسێن كارگێری، دوهی 15/1/2023 بهرێ بنیاتی بۆ ههژمارهكا پڕۆژهیان ل دهۆكێ دانا و جاددا 30م ژی ل گهڕهكا نزاركێ ڤهكر، گوژمێ پتری 14 ملیار و 820 ملیۆن دیناران بۆ هاتیه تهرخانكرن.
د. عهلی تهتهر، پارێزگارێ دهۆكێ ل دهمێ ڤهكرنا جاددا 30م ل نزاكێ بۆ دهزگههێن ڕاگههاندنێ گۆت: (ئهم وهكو پارێزگهها دهۆكێ ب ڕهنگهكێ یهكسانی پڕۆژهیێن خزمهتگوزاری دێ گههینینه ههموو دهڤهرداری و ناوچهداری و گوند و كۆمهلگههان، ل رۆژێن بهێن ژی بهرێ بنیاتی بۆ چهندین پڕۆژهیان ل دهۆكێ و دهڤهرداریێن دی دێ دانین و هندهك پڕۆژهیان ژی دێ ڤهكهین، د ئهڤ ساله ژی دا كومهكا پڕۆژهیان دێ هێنه راگههاندن و ههموو پڕۆژه ل دهمێ دهستنیشانكری و ب كوالیتیهكا باش و ل دووڤ پیڤهرێن ئهندازیاری دهێنه چێكرن).
پارێزگارێ دهۆكێ بهرێ بنیاتی بۆ پڕۆژهیێ ئاڤاكرنا قوتابخانهكا 18 رێزی ل تاخێ مالتا سهری ب گوژمێ ملیارهك و 451 ملیۆن دیناران دانا، بهرێ بنیاتی بۆ پڕۆژهیێ ڤهكرن و قێركرنا چهند جاده و كولانان ل جهێن جودا جودا ل سنوورێ باژێرڤانیێن رۆژههلات و رۆژئاڤا ل باژێرێ دهۆكێ ب گوژمێ 13 ملیار و 366 ملیۆن دیناران ب درێژاهیا پتری 55كم دانا.
دیسا ههر دوهی پارێزگارێ دهۆكێ پڕۆژێ قێركرنا جاددا 30م ل تاخێ نزاركا نوو ههتا دگههیته پهیمانگهها نولچ ڤهكر، پرۆژه ل گهل چێكرنا چهندین جاده و كولانا ل تاخێ نزاركێ و ئێتیتێ و جهێن دی پێك دهێت.
نيشاندان