ئه‌ڤرۆ:

رێكخستنا لێبۆرینا نێڤده‌وله‌تی راگه‌هاند كو چه‌ند رۆژن هێزێن ئێمناهیێ یێن ئیرانێ ل باژێرێ سنه‌ یێ رۆژهه‌لاتێ كوردستانێ ده‌ست ب كوشتنا وه‌لاتیێن سڤیل كرینه‌ و هه‌تا نها گه‌له‌ك كه‌س هاتینه‌ كوشتن، سنه‌ ب ته‌مامی ژ ئالیێ هێزێن سه‌ربازی ڤه‌ هاتیه‌ دۆرپێچ كرن و دڤێت وه‌لاتێن جیهانێ ل هه‌مبه‌ر ره‌وشا نها بێده‌نگ نه‌مینن.

رێكخستنا لێبۆرینا نێڤده‌وله‌تی دوهی راگه‌هاند كو چه‌ند رۆژن هێزێن ئێمناهیێ باژێرێ سنه‌ ب ته‌مامی دۆرپێچ كرینه‌ و ب ره‌نگه‌كێ راسته‌وخوه‌ ته‌قه‌ ل وه‌لاتیێن سڤیل و خوه‌نیشاده‌ران دكه‌ن، هه‌تا نها گه‌له‌ك كه‌س هاتینه‌ كوشتن و ب شه‌ڤان ژی هێزێن ئێمناهیێ ئێرشی مالێن وه‌لاتیان دكه‌ن و خه‌لكی ده‌سته‌سه‌ر دكه‌ن، هه‌تا نها گه‌له‌ك كه‌س بریندار بووینه‌ و نها ره‌وشا باژێرێ سنه‌ گه‌له‌ك خرابه‌ و دڤێت وه‌لاتێن جیهانێ ل هه‌مبه‌ر كوشتنا كوردان ل باژێرێ سنه‌ بێده‌نگ نه‌مینن و نه‌رازیبوونا خوه‌ ل هه‌مبه‌ر ده‌وله‌تا ئیرانێ دیار بكه‌ن.

هه‌مان رێكخستنێ ئه‌و یه‌ك ژی دیار كریه‌ كو گه‌له‌ك ڤیدیۆ و دیمه‌ن ل به‌ر ده‌ستێ وان هه‌نه‌ كو نیشا دده‌ن هێزێن ئیمناهیێ به‌رده‌وام ته‌قه‌ ل خوه‌نیشاده‌ران و وه‌لاتیێن سڤیل دكه‌ن و مخابن ژ به‌ر كو نها هێلا ئینتێرنێتێ ژی هاتیه‌ بڕین هژمارا دروست یا كوشتی و برینداران ل به‌ر ده‌ست نینه‌، لێ نها ره‌وشا وی باژێری و گه‌له‌ك باژێرێن دی یێن ئیرانێ خرابه‌ و دڤێت وه‌لاتێن جیهانێ ب رێیا بالیۆزخانێن ئیرانێ نه‌رازیبوونا خوه‌ دیار بكه‌ن، چونكی بێده‌نگیا وه‌لاتێ جیهانێ دێ بیته‌ ئه‌گه‌ر كو گه‌له‌ك كه‌س دی ژی ببنه‌ قوربانی.

ل ئالیێ دی رێكخستنا مافێن مرۆڤی یا رۆژهه‌لاتێ كوردستانێ ژی راگه‌هاند كو ب هزاران چه‌كدار و هێزێن ئێمناهیێ ل ده‌ڤه‌رێن دی یێن ئیرانێ هاتینه‌ و ل باژێرێ سنه‌ بجه بووینه‌، به‌رده‌وام هێزێن ئێمناهیێ ته‌قه‌ ل خوه‌نیشاده‌ران و خه‌لكێ سڤیل دكه‌ن، ژ به‌ر كو هێلێن ئینتێرنێتێ هاتینه‌ بڕین و خه‌لك نه‌شێن ته‌له‌فۆنان ژی بكه‌ن هه‌تا نها هژمارا دروست یا كوشتی و برینداران ل به‌ر ده‌ست نینه‌ لێ یا نها ل سنه‌ روو دده‌ت كاره‌ساته‌ك گه‌له‌ك مه‌زنه‌ و دڤێت كورد ل هه‌موو جیهانێ ل هه‌مبه‌ر ره‌وشا نها یا ل باژێرێ سنه‌ و باژێرێن دی یێن رۆژهه‌لاتێ كوردستانێ بێده‌نگ نه‌مینن.

ئه‌و یه‌ك د ده‌مه‌كێ دایه‌ كو چار حه‌فتینه‌ خوه‌نیشادان ل ئیرانێ و رۆژهه‌لاتێ كوردستانێ به‌رده‌وام دكه‌ن و نها خوه‌نیشادان ل گه‌له‌ك ده‌ڤه‌رێن دی یێن ئیرانێ ژی به‌لاڤ بووینه‌، به‌رپرسێن ئیرانێ دبێژن هه‌تا نها دوسه‌د كه‌س هاتینه‌ كوشتن لێ رێكخستنێن مافێن مرۆڤی ئاماژه‌ ب هندێ دكه‌ن كو هژمارا كوشتیان گه‌له‌ك زێده‌یه‌ و پتر ژ ٥ هزار كه‌س ژی بریندار بووینه‌ و ب تایبه‌تێ ل باژێرێن كوردی هێزێن ئێمناهیێ ب هه‌موو شیانێن خوه‌ بزاڤا هندێ دكه‌ن دا خوه‌نیشاده‌ران سه‌ركوت بكه‌ن.

ب، سه‌رجان مه‌حمود:

میخائیل بۆگدانۆڤ جێگرێ وه‌زیرێ ده‌رڤه‌ یێ رۆسیا د داخۆیانیه‌كێ دا راگه‌هاند كو ئه‌و دخوازن هه‌موو پرسێن د ناڤبه‌را توركیا و سووریێ دا ب دیالۆگێ چاره‌سه‌ر‌ بكه‌ن و گۆت: (نها په‌یوه‌ندیێن د ناڤبه‌را توركیا و سووریێ دا د ئاستێ هه‌ری خراب دانه‌ و ل سه‌ر داخوازا توركیا ئه‌م هه‌ول دده‌ین به‌رپرسێن توركیا و سووریێ ده‌ست ب دانوستاندنان بكه‌ن و ب رێیا دیالۆگێ پرسێن هه‌ی چاره‌سه‌ر‌ بكه‌ن و هه‌كه‌ هه‌ر دو ئالی ده‌ست ب دانوستاندنان بكه‌ن دێ د ده‌مه‌كێ نێزیك دا په‌یوه‌ندیێن وان گه‌هیته‌ ئاسته‌كێ بلند و ئه‌و یه‌ك دێ خزمه‌تا چاره‌سه‌ركرنا پرسێن دی یێن سووریێ كه‌ت).

د ڤێ مژارێ دا ره‌جه‌ب ته‌یب ئه‌ردۆغانێ سه‌رۆك كۆمارێ توركیا ژی راگه‌هاند كو وان د ئاستێ شیره‌تكاران دا ل گه‌ل حوكمه‌تا سووریێ ده‌ست ب هه‌ڤدیتنان كرینه‌ و هه‌ر ده‌مێ پێدڤی بیت ئه‌و به‌رهه‌ڤه‌ ل گه‌ل به‌شار ئه‌سه‌د ژی كۆمبیت.

ل هه‌مبه‌ر ئاخڤتنا سه‌رۆك كۆمارێ توركیا، به‌شار ئه‌سه‌د ژی راگه‌هاند دڤێت توركیا هێزێن خوه‌ ژ ئاخا سووریێ ڤه‌كێشیت و ده‌ست ژ پشته‌ڤانیكرنا گرۆپێن تیرۆرست ژی به‌رده‌ت، هه‌كه‌ توركیا ئه‌و یه‌ك بجهئینا وی ده‌می ئه‌و دشێن ل گه‌ل وی وه‌لاتی ده‌ست ب دانوستاندنان بكه‌ن.

ئه‌ڤرۆ:

وه‌زاره‌تا ده‌رڤه‌ یا فره‌نسا دوهی راگه‌هاند كو هه‌تا نها ئیرانێ پێنج وه‌لاتیێن وان ب به‌هانا پشته‌ڤانیكرن ل خوه‌نیشادانێن ل ته‌هرانێ ده‌سته‌سه‌ر كرینه‌ و مه‌ترسی ل سه‌ر ژیانا وه‌لاتیێن دی یێن فره‌نسی ژی ل ئیرانێ یا هه‌ی، ژ به‌ر هندێ ژی دڤێت وه‌لاتیێن فره‌نسا یێن كو نها ل ئیرانێ نه‌ د زووترین ده‌م دا ل ئیرانێ ده‌ركه‌ڤن.

وه‌زاره‌تا ده‌رڤه‌ یا فره‌نسا ئه‌و یه‌ك ژی دیار كریه‌ كو ره‌وشا ناڤخوه‌یی یا ئیرانێ رۆژ ب رۆژێ خرابتر لێ دهێت و ئه‌و یه‌ك مه‌ترسیا خوه‌ بۆ وه‌لاتیێن فره‌نسا هه‌یه‌، ژ به‌ر هندێ ژی دڤێت وه‌لاتیێن فره‌نسا هه‌ر زوو ژ ئیرانێ ده‌ركه‌ڤن دا چو مه‌ترسی ل سه‌ر ژیانا وان دروست نه‌بیت.