ئه‌ڤرۆ،

بڕیاره‌ ل ئه‌ینیا بهێت هه‌ڤڕكیێن گه‌ڕا دویێ‌ ژ قۆناغا ئێكێ‌ یا خولا پلا نایابا ئیراقێ‌ یا ته‌پا پێی ب ئه‌نجامدانا پێنچ یاریان دیسان ل شه‌مبیا دووڤدا چار یاریان ل یاریگه‌هێن جودا ل سه‌ر ئاستێ‌ ئیراقێ‌ و كوردستانێ‌ بهێنه‌ ئه‌نجامدان.

ل ئه‌ینیا بهێت تیما یانا دهۆك دێ‌ ل ناڤه‌راستا ئیراقێ‌ بیته‌ مێڤانا یانا دیوانیه‌ و یانا زاخۆ ل یاریگه‌ها خوه‌ دێ‌ مێڤانداریا یانا سیناعه‌ ل ده‌مژمێر سێیێ‌ ئێڤاری كه‌ت، د یاریا ئێكێ‌ یا بوری دا دهۆكێ‌ دو خالێن گرنگ ل گه‌ل مێڤانا خوه‌  شورته‌ ژ ده‌ست دابوون سه‌رباری هه‌تا خوله‌كا 88ێ‌ دا یا پێشكه‌فتی بوو ب گۆله‌كێ‌ لێ‌ یاریزانێ‌ شورته‌ مه‌ناف یونس شیا گۆلا وه‌كهه‌ڤیێ‌ بۆ تیما خوه‌ بینت، ژلایێ‌ خوه‌ڤه‌ یانا زاخۆ ئه‌وا ل یاریگه‌ها ئه‌لساحر ل باژێرێ‌ به‌غدا نه‌شیایی ژ ئاسته‌نگا كه‌رخ ده‌رباز بیت ب گۆله‌كێ‌ تووشی خوساره‌تیێ‌ بوو ئه‌وا د خوله‌كا 78 دا هاتیه‌ تۆماركرن بۆ یاریا ئه‌ینیا بهێت دێ‌ پشتبه‌ستن ل سه‌ر جه‌ماوه‌رێ‌ خوه‌ كه‌ت بۆ سه‌ركه‌فتنا ئێكێ‌ ل سه‌ر سیناعه‌ و ده‌ستپێكه‌كا باش تۆماربكه‌ت، ژ یاریێن دی یێن رۆژا ئه‌ینی، نه‌فت – حدوود، ئه‌لقاسم – جه‌ویه‌، ته‌له‌به‌ – كاره‌با، نه‌فت ئه‌لوه‌سه‌ت – نه‌فت ئه‌لمیسان.

ل شه‌مبیا بهێت چار یاریێن مایی دێ‌ گه‌ڕا دویێ‌ ب دووماهی ئینن و بڤی ره‌نگی، یانا هه‌ولێر دێ‌ ل یاریگه‌ها خوه‌ شه‌هید فرانسۆ حه‌ریری ده‌مژمێر 7:30 شه‌ڤ مێڤانداریا كاره‌با یا به‌غدایی كه‌ت ئه‌وا داخوازكریه‌ بڕێیا مێڤانا خوه‌ كاره‌با تۆلێن یاریا ئێكێ‌ ڤه‌كه‌ت ده‌مێ‌ ل گه‌ل یانا كه‌ربه‌لا ب دو گۆلان به‌رامبه‌ر گۆله‌كێ‌ تووشی خوساره‌تیێ‌ بووین، د یاریه‌كا دی دا ئه‌ڤا ل هه‌مان یاریگه‌ها هه‌ولێرێ‌ هێته‌ كرن لێ‌ ده‌مژمێر سێ‌ ئێڤاری تیما یانا نه‌وروز ژ باژێرێ‌ سلێمانیێ‌ دێ‌ مێڤانداریا یانا كه‌رخ كه‌ت، تیما سلێمانیێ‌ د یاریا ئێكێ‌ دا ل گه‌ل نه‌فت ئه‌لبه‌سرا ب گۆله‌كێ‌ تووشی خووساره‌تیێ‌ بوو، ژ یاریێن دی یێن رۆژا شه‌مبیا بهێت نه‌جه‌ف – نه‌فت ئه‌لبه‌سرا، شورته‌ و زه‌ورا د گرنترین یاریێن ڤێ‌ گه‌ڕێ‌ دا كه‌ن.

ئه‌ڤرۆ،

فۆتۆ: ئازاد زووم

بڕیاره‌ ل ئه‌ینیا بهێت تیما باسكێت بۆلا یانا زاخۆ نوونه‌را ئیدارا سه‌ربه‌خوه‌یا زاخۆ یاریا خوه‌ یا ئێكێ‌ ژ چارچووڤێ‌ وه‌رزێ‌ نوو یا خولا پلا نایابا كوردستانێ‌ ده‌مێ‌ ل هۆلا گرتیا بنگه‌هێ‌ وه‌رزشی ل باژێرێ‌ زاخۆ ده‌مژمێر پێنجێ‌ ئێڤاری مێڤانداریا یانا ئاسۆ یا هه‌ولێری بكه‌ت.

ل سه‌ر دووماهی به‌رهه‌ڤیێن باسكێتا زاخۆ بۆ خولا كوردستانێ‌ جوتیار عه‌لی راهێنه‌رێ‌ تیمێ‌ بۆ رۆژناما ئه‌ڤرۆ گۆت: وه‌كو هه‌ر تیمه‌كا پشكدار د خولێ‌ دا مه‌ به‌رهه‌ڤیێن خوه‌ كرینه‌، هه‌بوونا خولا ئیراقێ‌ ده‌لیڤه‌ بوو یاریزانێن مه‌ یێن كورد په‌یداكریه‌ كو ل گه‌ل تیمێ‌ به‌رهه‌ڤیان بكه‌ن به‌ری خولا كوردستانێ‌ ده‌ستپێ بكه‌ت سه‌رباری مه‌ هنده‌ك یاریزان یێن هه‌ین دێ‌ ل هه‌ردو خولا پێدڤی بین، لێ‌ ب گشتی تیما مه‌ یا به‌رهه‌ڤه‌ و یاریا ئێكێ‌ دێ‌ تاقیكرنا دروست بیت بۆ یاریزانێن مه‌ یێن گه‌نج، ئه‌م نه‌ بتنێ‌ بۆ پشكداریێ‌ هاتینه‌ د خولێ‌ دا به‌لكو بۆ هه‌ڤڕكیێ‌ ل سه‌ر ناسناڤی بكه‌ین و یا گرنگ یاریزانێن مه‌ مفایی ژێ‌ وه‌ربگرن ژبه‌ركو پێكهاتیێ‌ تیمێ‌ هه‌موو گه‌نجێن زاخۆ نه‌.

بۆ زانین حه‌فت یانه‌ پشكدارن ئه‌وژی زاخۆ، هێرش، قه‌لا، ئه‌كه‌د، ده‌ربه‌ندیخان و سۆلاڤ، یاریێن وان ب شێوه‌یێ‌ خول دو قۆناغ ب سه‌رپه‌رشتیات ئێكه‌تیا باسكێت بۆلا كوردستانێ‌ دهێته‌ رێڤه‌برن.

ئه‌ڤرۆ،

ل حه‌فتیا بوری كارگێریا یانا سێمێل یا وه‌رزشی كۆنگره‌یه‌كێ‌ رۆژنامه‌ڤانی سازكری ژبۆ دیاركرنا كاودانێن خوه‌ یێن دارایی یێن خراب و بڕیارا هه‌لاویستنا هه‌موو چالاكیێن خوه‌ دایه‌ و داخوازا پشته‌ڤانیێ‌ كرینه‌ و هه‌تا نوكه‌ چاڤه‌ڕێ‌ نه‌ لایه‌نه‌ك بهێته‌ سه‌ر هێل بۆ چاره‌كرنا ئاریشه‌یان.

ل دۆر ڤێ‌ یه‌كێ‌ هاریۆان عابد سه‌رۆكێ‌ یانا سێمێل یا وه‌رزشی بۆ رۆژناما ئه‌ڤرۆ دیاركر ژبه‌ر نه‌بوونا پشته‌ڤانیێ‌ و نه‌ به‌رسڤدانا داخوازیێن وان ل حه‌فتیا بوری بڕیاردا بوو هه‌موو چالاكیێن خوه‌ یێن وه‌رزشی د خولێن ئیراقێ‌ و كوردستانێ‌ دا ب نه‌ چاری هه‌لاویستن هه‌تا حوكمه‌ت بهێته‌ سه‌ر هێل سه‌رباری ڤێ‌ چه‌ندێ‌ هه‌تا نوكه‌ ژی چو لایه‌نا به‌رهه‌ڤیا خوه‌ دیارنه‌كریه‌ بۆ پشته‌ڤانیێ‌ له‌وما ئه‌م نه‌چارین هه‌لاویستنا چالاكیێن مه‌ به‌رده‌وامبن كو ب مخابنی ڤه‌ ئه‌ڤچه‌نده‌ دێ‌ لاو و گه‌نجێن سێمێلێ‌ زه‌ره‌مه‌ندبن، ژبه‌ركو وه‌رزێ‌ چالاكیان ده‌ستپێكریه‌ تایبه‌ت یاریا ته‌پا پێی و هه‌یڤانه‌ مه‌ پێدڤی ب نێزیكی 15ملیۆن دینارانه‌ژبۆ بڕێڤه‌برنا چالاكیێن خوه‌ و د شیان دانینه‌ ل سه‌ر مینحا هه‌یڤانه‌ بوو مه‌ دهێت ژلایێ‌ پارێزگه‌ها دهۆكێ‌ پشكداربن كو دكه‌هیته‌ حه‌فت ملیۆن و 500 هزار دیناران و یا پێدڤی دڤێت بوو به‌رهه‌ڤیێن تیمێ‌ و مووچه‌یی هه‌یڤانه‌ یێ‌ یاریزان و راهێنه‌ران بهێته‌ دابینكرن و كۆژمێ‌ نوكه‌ تێرا چو ناكه‌ت.

ناڤهاتی ئه‌وچه‌نده‌ ژی دیار كر ژبلی پێدڤیا دارایی بۆ چالاكیێن وه‌رزشی د وه‌رزێ‌ نوو دا یانا سێمێل ب خوه‌ ژی هه‌تا نوكه‌ قه‌رداره‌ ل وه‌رزێ‌ بوری پێنچ مووچه‌ و قه‌رێن كرینا چلۆبه‌رگێن وه‌رزشی بۆ تیمێن مه‌ یێن پێشكه‌فتی، لاوان و تازه‌پێگه‌هشتیان ل سه‌ر یانێ‌ ماینه‌ ئه‌ڤه‌ ژی ئاریشه‌ك و گۆت: هه‌رچه‌نده‌ و سۆپاسی ڤه‌ پارێزگارێ‌ دهۆكێ‌ چێكرنا فریزه‌یێ‌ یاریگه‌هێ‌ ئێخستبوو لایێ‌ خوه‌ڤه‌ داخوازێ‌ ژ به‌رێز د. عه‌لی ته‌ته‌ر دكه‌ین پشته‌ڤانیا مه‌ بكه‌ت پێخه‌مه‌ت گه‌نج و لاوێن سێمێلێ‌ بێ‌ به‌هر نه‌بن ژ وه‌رزشێ‌.

ئه‌ڤرۆ، قه‌یس وه‌یس

چاڤه‌رێ‌ دهێته‌ كرن سوبه‌هی و ئه‌ینیا بهێت ده‌ست ب وه‌رزێ‌ نوو یێ‌ 2022-2023 یا خولا كوردستانێ‌ بۆ یانه‌یێن پلا نایاب ب پشكداریا 15 یانا بهێنه‌ ئه‌نجامدان پشتی خوه‌ڤه‌كێشانا یانا نه‌وروز و یاریێن وان دێ‌ ب شێوه‌یێ‌ خول دو قۆناغ ب سه‌رپه‌رشتیا ئێكه‌تیا ته‌پا پێی یا كوردستانێ‌ حه‌فتیانه‌ ئێك گه‌ڕ هێته‌ كرن، سێ‌ یانه‌یێن پارێزگه‌ها دهۆكێ‌ و ئیدارا سه‌ربه‌خوه‌یا زاخۆ ل گه‌ل دا پشكدارن ئه‌وژی دهۆك، زاخۆ و ئاكرێ‌.

سوبه‌هی سێ‌ یاری ژ گه‌ڕا ئێكێ‌ دێ‌ هێنه‌ كرن ئه‌و ژی، دهۆك ل یاریگه‌ها خوه‌ یا سێیێ‌ مێڤانداریا یانا شێروانه‌ كه‌ت، یانا ئاكرێ‌ ل باژێرێ‌ پیرمام دێ‌ بیته‌ مێڤانا پێشمه‌رگه‌یا هه‌ولێرێ‌، دیسان چه‌مچه‌مال و شه‌قلاوه‌ هه‌مبه‌ری ئێك بن.

ل رۆژا ئه‌ینی دێ‌ چار یاریێن دی هێنه‌ كرن بڤی ره‌نگی، زاخۆ ل باشۆرێ‌ باژێرێ‌ سلێمانیێ‌ دێ‌ بیته‌ مێڤانا یانا سه‌ید سادق، هه‌روه‌سان ئارارات -چوارقۆرنه‌، هندرین – سۆران، ده‌ربه‌ندیخان –  برایه‌تی، سیروانی نوو دێ‌ یا چاڤه‌ڕێ‌ بیت، بۆ زانین هه‌موو یاری ل ده‌مژمێر 2:30 نیڤرۆ هێنه‌ كرن.

ل دۆر ده‌ستپێكرنا خولا كوردستانێ‌ ئازاد محه‌مه‌د ئه‌ندامێ‌ ئێكه‌تیا ته‌پا پێی یا كوردستانێ‌ بۆ رۆژناما ئه‌ڤرۆ گۆت: بۆ وه‌رزێ‌ نوو هه‌موو به‌رهه‌ڤیێن ب دووماهی هاتینه‌ تایبه‌ت ب دانانا لژنه‌یێن دادڤانان، سه‌رپه‌رشتیارێن یاریان، راگه‌هاندنێ‌ و ئه‌منی و دیسان هه‌ر تشته‌كێ‌ پێدڤی بۆ سه‌ركه‌فتنا خولێ‌ هاتینه‌ دابینكرن، ژلایه‌كێ‌ دووڤه‌ رێژه‌یا دادڤانان و سه‌رپه‌رشتیان ل پارێزگه‌هێ‌ گه‌له‌ك باشبوویه‌ پێنچ یێن نیڤا یاریگه‌هێ‌، حه‌فت هاریكارێن دادڤانی و شه‌ش دادڤانێن چارێ‌، هه‌روه‌سان رێژا سه‌رپه‌رشتیارن ل دووڤ ژیێ هاتیه‌ ده‌ستنیشانكرن كو ژ 55 سالی زێده‌تر نه‌بیت، گه‌شبینن دێ‌ خوله‌كا سه‌ركه‌فتی بیت ب پشته‌ڤانیا حوكمه‌تا هه‌رێما كوردستانێ‌.

ئه‌ڤرۆ

برٍیاره‌ ئه‌ڤرۆ ژی هه‌شت یاریێن هه‌ر چار كۆمێن مایی ژ قۆناغا چارێ‌ و هاتنێ‌ یا قاره‌مانیا یانه‌یێن ئۆرۆپا قاره‌مانێن خولا بهێنه‌ ئه‌نجامدان و ئه‌نته‌ر و به‌رشه‌لۆنا د كۆمپیتا ڤێ‌ گه‌ڕێ‌ دا هه‌مبه‌ری ئێك بن و یاریێن ئه‌ڤ شه‌ڤه‌ دبنه‌ یێن ڤه‌بڕ بۆ هنده‌ك یانه‌یان.

د كۆما ئێكێ‌ دا

تیما یانا ناپۆلی یا ئیتالی ل یاریگه‌ها خوه‌ دێ‌ مێڤانداریا یانا ئه‌یاكس ئه‌مستردام یا هوله‌ندی كه‌ت ب هیڤیێن دووباره‌ سه‌ركه‌فتنا مه‌زن یا حه‌فتیا بوری ده‌مێ‌ ل یاریگه‌ها وێ‌ ب شه‌ش گۆلان به‌رامبه‌ر گۆله‌كێ‌ سه‌ركه‌فتنێ‌ ئینایی، یانا ئیتالی ئه‌وا نوكه‌ سه‌رێ‌ لیستێ‌ دهێت ب نه‌ه خالان شیایه‌ ببیته‌ ئێك ژ تیمێن سرنجراكێش و باشترین ئاست ل یاریێن بوری نیشان بده‌ت، د سێ‌ یاریان دا یاریزانێن وان شیاینه‌ 11 گۆلان تۆماربكه‌ت، ئه‌ڤ یاریه‌ ده‌مژمێر 7:45 شه‌ڤ هێته‌ كرن، هه‌مبه‌ری وێ‌ تیما ئه‌یاكس دێ‌ هه‌موو چه‌كێ‌ خوه‌ ب كارئینت هه‌مبه‌ری هێزا ئیتالی پێخه‌مه‌ت پاراستنا جهێ‌ خوه‌ ئه‌وا نوكه‌ سێ‌ خال هه‌ین و رێزا سێیێ‌ دهێت به‌لكۆ بۆ پاشتگۆیێ‌ ئۆرۆپا بهێته‌ وه‌رگرتن، ژلایه‌كێ‌ دووڤه‌ یانا لیڤه‌رپۆل یا ئنگلترایێ‌ د ره‌وشه‌كا باش دانینه‌ ل خولا پرێمه‌رلیگ ئه‌وا ل رێزا ده‌هێ‌ دهێت ب ده‌ه خالان دێ‌ بیته‌ مێڤانا گلاسكۆ رێنجێرز یا ئۆسكۆتله‌ندی، لیڤه‌رپۆل ب شه‌ش خالان رێزا دویێ‌ دهێت و گلاسكۆ بێ‌ خال رێزا چارێ‌ دهێت، سه‌رباری د یاریا بوری یا چوونێ‌ دا لیڤه‌رپۆل ب دو گۆلان سه‌ركه‌فتن تۆماركربوو، لێ‌ دوور نینه‌ دڤێ‌ یاریێ‌ دا ئه‌و ئه‌نجامێ‌ باش نه‌ئینت ژبه‌ركو خودانێن ئه‌ردی دێ‌ ب هه‌موو هێزا خوه‌ یاریێ‌ كه‌ن، بۆ زانین یاری ده‌مژمێر ده‌ه شه‌ڤ هێته‌ ئه‌نجامدان.

د كۆما دویێ‌ دا.

ل یاریگه‌ها خوه‌ سیڤیتاس مێترۆ بۆلیتانۆ یانه‌یا ئه‌تله‌تیكۆ مه‌درید یا ئسپانی دێ‌ مێڤانداریا كلۆپ برۆچ یا به‌لچیكی كه‌ت ئێك ژ تیمێن دهێنه‌ هژمارتن هه‌سپێ‌ ره‌ش یێ‌ قاره‌مانیێ‌، یانا ئسپانی سێ‌ خال كۆمكرینه‌ ل رێزا چارێ‌ و دووماهیێ‌ دهێت د ره‌وشه‌كا خراب دانه‌ سه‌رباری هیڤیێن ده‌بازبوونێ‌ ژ ده‌ست نه‌داینه‌ لێ‌ یاریا ئه‌ڤ شه‌ڤه‌ دێ‌ بیته‌ ئاسته‌نگ هه‌مبه‌ری ئه‌ڤان هیڤییان هه‌كه‌ هاتوو نه‌شیا سه‌ركه‌فتنێ‌ ل سه‌ر خودانا سه‌رێ‌ لیستێ‌ كلۆپ برۆچ بینت ئه‌وا نه‌ه خال كۆمكرین و ئارمانجا وێ‌ سه‌ركه‌فتنه‌ بۆ مسۆگه‌ركرنا ده‌ربازبوونێ‌، دیاریا بوری دا ئه‌تله‌تیكۆ نه‌شیابوو سه‌ركه‌فتنێ‌ بینت ده‌مێ‌ ب دو گۆلان تووشی خوساره‌تیێ‌ بوویی له‌وما دێ‌ هزر ل تۆلڤه‌كرنێ‌ ژی كه‌ت ئه‌وا دێ‌ ل ده‌مژمێر 7:45 شه‌ڤ هێته‌ كرن، ژلایه‌كێ‌ دووڤه‌ ل ده‌مژمێر ده‌هێ‌ شه‌ڤ یانا بایرن لیڤه‌ركۆزن یا ئه‌لمانی ب ژڤانه‌ دناڤ یاریگه‌ها خوه‌ دا هه‌مبه‌ری پۆرتۆ یا پۆرتۆگالی بیت ئێك ژ یاریێن بهێز بۆ هه‌ردو یانه‌یان ژبه‌ركو هه‌ردو ب سێ‌ خالان رێزێن دویێ‌ و سێیێ‌ دهێن، بزاڤێن وان دێ‌ بۆ سێ‌ خالان بن پێخه‌مه‌ت رێزا دویێ‌، یاریا حه‌فتیا بوری یانا پۆرتۆگالی ب دو گۆلان سه‌ركه‌فت بوو.

د كۆما سێیێ‌ دا.

د ڤێ‌ كۆمێ‌ دا ئه‌وا هاتیه‌ هژمارتن یا ئاگرین یانه‌یا به‌رشه‌لۆنا كه‌فتیه‌ لبن گه‌ڤێن دووركه‌فتنێ‌ ژ قۆناغا 16ێ‌ یا چامپیۆنزێ‌ ژبه‌ركو بتنێ‌ سێ‌ خال ژ سێ‌ یاریان ده‌ستڤه‌ ئیناینه‌ و رێزا سێیێ‌ دهێت ئه‌ڤ گه‌فه‌ د یاریا ئه‌ڤ شه‌ڤه‌ دا دێ‌ مه‌ترسیدارتربیت ده‌مێ‌ ل یاریگه‌ها خوه‌ كامپ نوو مێڤانداریا ئه‌نته‌رمیلان یا ئیتالی دگه‌ت ئه‌وا شه‌ش خال هه‌ین و رێزا دویێ‌ دهێت، هژماره‌كا به‌رچاڤ یا یاریزانێن یانا كاته‌لۆنی ژبه‌ر هنگاڤتنێ‌ پشكدار نابن ژوانا ئه‌ندریاس كریستنسن، رۆنالد ئاراخۆ، فرینكی دی یۆنگ، جۆل كۆندی، هیكتۆر بیلیرین و ممفس دیبایی، لێ‌ یانا ئه‌نته‌ر بێ‌ به‌هرنابیت ژ هنگاڤتنا ئه‌و ژی رۆمێلۆ لۆكاكۆ، برۆزۆڤێتچ، گۆلپارێز ئه‌لێكس كۆرداز، خۆاكین كۆریا، یاریا ئه‌ڤ شه‌ڤه‌ ده‌لیڤه‌یا دووماهیێ‌ یه‌ بۆ چاڤی هێرناندێز وله‌شكه‌رێ‌ بارسا ئه‌وێن چو رێ نینن ژبلی سه‌ركه‌فتنێ‌ لێ‌ یانا ئتیالی ژی دزانین ژ ده‌ستدانا هه‌ر خاله‌كێ‌ ئانكۆ لاوازبوونا هیڤیێن ده‌ربازبوونێ‌ یه‌ و سه‌ركه‌فتن دێ‌ هیڤیان مسۆگه‌ر كه‌ت، ژلایه‌كێ‌ دووڤه‌ یانا بایرن میۆنخ یا ئه‌لمانی دێ‌ ب گه‌شته‌كا بێ‌ ئاسته‌نگ به‌ر ب وه‌لاتێ‌ چیكێ‌ چیت و بیته‌ مێڤانا فیكتۆریا بلزن ئه‌وا بێ‌ خال رێزا دووماهیێ‌ دهێت، یانا باڤاریا خودانا خوه‌ سه‌رێ‌ لیستێ‌ ب نه‌ه خالان دێ‌ بزاڤێ‌ كه‌ت ئه‌ڤرۆ چوونا خوه‌ ب فه‌رمی كه‌ت بۆ قۆناغا 16ێ‌، بۆ زانین هه‌ردو یاری ل ده‌مژمێر 10ی شه‌ڤ هێنه‌ ئه‌نجامدان.

د كۆما چارێ‌ دا.

رێزبه‌ندیا ڤێ‌ كۆمێ‌ ده‌لیڤه‌ بۆ هه‌ر چار یانێن پشكدار به‌رده‌ست كریه‌ هه‌تا یاریا ئه‌ڤ شه‌ڤه‌ و دبیت گوهۆڕین د رێزبه‌ندیێ‌ دا ژی په‌یدابكه‌ت، یانه‌یا سپۆرتینگ له‌شبۆنه‌ یا پۆرتۆگالی ئخودانا شه‌ش خالا ل رێزا ئێكێ‌ دهێت دێ‌ مێڤانداریا مارسێلیا یا فره‌نسی كه‌ت ئه‌وا ب سێ‌ خالان رێزا دووماهیێ‌ دهێت، د گه‌ڕا بوری دا یانه‌یا فره‌نسی ب چار گۆلان به‌رامبه‌ر گۆله‌كێ‌ سه‌ركه‌فتن ل سه‌ر یا پۆرتۆگالی ئینابوو ئانكو تیما دووماهیێ‌ سه‌ركه‌فتنه‌كا مه‌زن ل سه‌ر خودانا سه‌رێ‌ لیستێ‌ ئینابوو، لێ‌ یاریا ئه‌ڤ شه‌ڤه‌ پێنه‌ڤێت دێ‌ بیته‌ یا تۆلڤه‌كرنێ‌ و پاراستنا سه‌رێ‌ لیستێ‌ بیت به‌ری بكه‌ڤیته‌ د ئاسته‌نگێن ده‌ربازبوونێ‌ دا، دیسان هیڤیێن یانا فره‌نسی ژی گه‌ش بووینه‌ و خوه‌ ب سانه‌هی تووشی خوساره‌تیێ‌ ناكه‌ت، ژلایه‌كێ‌ دووڤه‌ یاریا دناڤبه‌را تۆتنهام یا نگلترایێ‌ و ئانتراخت فرانكفۆرت یا ئه‌لمانیا دێ‌ شه‌ڕه‌كێ‌ دبیت بۆ ده‌ستڤه‌ ئینانا خالێن یاریێ‌ و چاڤه‌ك بۆ سه‌ركه‌فتنێ‌ و چاڤێ‌ دی ل یاریا هه‌ڤڕكێن كۆما خوه‌بن پێخه‌مه‌ت وه‌رگرتنا سه‌رێ‌ لیستێ‌، تۆتنهام و ئانتراخت ب چار خالان رێزێن دویێ‌ و سێیێ‌ دهێن لێ‌ یانا ئنگلترایێ‌ ئه‌وا دێ‌ ئه‌ڤ شه‌ڤه‌ ل یاریگه‌ها خوه‌ مێڤانداریا یانا ئه‌لمانی كه‌ت هیڤیێن خوه‌ بۆ سێ‌ خالان گه‌شتر لێكرینه‌ سه‌رباری یانا ئه‌لمانی ئه‌و تیما ب سانه‌هی نابیت بۆ ژ ده‌ستدانێ‌ سه‌رباری د یاریا بوری دا هه‌ردو یانه‌ بێ‌ گۆل وه‌كهه‌ڤبوون، بۆ زانین هه‌ردو یاریێن ڤێ‌ كۆمێ‌ ل ده‌مژمێر ده‌هی شه‌ڤ هێنه‌كرن.