ئه‌ڤرۆ،

دهێته‌ چاڤه‌ڕێ‌ كرن ئه‌ڤرۆ نوونه‌رێن هه‌رێما كوردستانێ‌ دێ‌ پێنگاڤاخوه‌ یا ئێكێ‌ د وه‌رزێ‌ نوو یێ‌ خولا پلا نایابا ئیراقێ‌ یا ته‌پا پێی دا هاڤێژن پشتی دوهی چار یاری د ڤه‌كرنا خولێ‌ دا هاتینه‌ ئه‌نجامدان.

تیما یانا دهۆك ل یاریگه‌ه و دناڤ جه‌ماوه‌رێ‌ خوه‌ دا دێ‌ مێڤانداریا یانا شورته‌ یا به‌غدایی قاره‌مانا وه‌رزێ‌ بوری كه‌ت ئه‌وا دێ‌ ل ده‌مژمێر 7:30 ب شه‌ڤ هێته‌ كرن، ژلایێ‌ خوه‌ڤه‌ ل ده‌مژمێر سێ‌ پشتی نیڤرۆ یانا زاخۆ ل باژێرێ‌ به‌غدا دێ‌ بیته‌ مێڤانا یانا كه‌رخ، ل ناڤه‌راستا ئیراقێ‌ یانا هه‌ولێر دێ‌ بیته‌ مێڤانا یانا كه‌ربه‌لا، یانا نه‌وروز ل باشۆرێ‌ ئیراقێ‌ دێ‌ بیته‌ مێڤانا یانا نه‌فت ئه‌لبه‌سرا.

ل دۆر دووماهی به‌رهه‌ڤیێن دهۆكێ‌ سلێمان ره‌مه‌زان راهێنه‌رێ‌ تیمێ‌ بۆ رۆژناما ئه‌ڤرۆ گۆت: پشتی ده‌ربازبوونا تیما مه‌ بۆ خولا پلا نایاب به‌رهه‌ڤیێن مه‌ به‌رده‌وام بووینه‌ و نه‌ راوه‌ستیاینه‌، یاریا ئێكێ‌ تاقیكرنه‌كا ب زه‌حمه‌ته‌ و بهێزه‌ هه‌مبه‌ری قاره‌مانا وه‌رزێ‌ بوری یانا شورته‌، هه‌رچه‌نده‌ مه‌ دو ئاریشه‌ هه‌نه‌ كو  دبیت بنه‌ ئاسته‌نگ بۆ پێشكێشكرنا ئاستی ئه‌و ژی ژلایێ‌ چه‌سته‌یی پرانیا یاریزانێن مه‌ د به‌رهه‌ڤ نینن دیسان نه‌ گه‌هشتنا یاریزانه‌كێ‌ پیشه‌كار ژی دێ‌ كارتیكرنا خوه‌ هه‌بیت، هه‌روه‌سان ئاریشا دویێ‌ ئه‌و خشته‌یێ‌ هاتیه‌ دانان كو هه‌شت یاریێن مه‌ ل دووڤ ئێك ل گه‌ل تیمێن بهێزن ئه‌ڤچه‌نده‌ ژی دێ‌ بیته‌ بارگرانیه‌ك ل سه‌ر چه‌سته‌یێ‌ یاریزانان و ترسا هنگاڤتنان لێ‌ هه‌رچه‌وابیت ئه‌م رژدین بۆ یاریا ئه‌ڤرۆ و هه‌ر یاریه‌كا دی بتنێ‌ بۆ سێ‌ خالێن یاریێ‌ بكه‌ین و پشتبه‌ستنا مه‌ یا ئه‌ڤرۆ دێ‌ پشته‌ڤانیا جه‌ماوه‌ری بیت ئه‌وێ‌ هه‌رده‌م بووینه‌ خالان سه‌ركه‌فتنا تیمێ‌.

ژلایێ‌ خوه‌ڤه‌ حه‌مزه‌ هادی راهێنه‌رێ‌ تیما زاخۆ گه‌شبینیا خوه‌ دیاركر ب ئه‌نجامه‌كێ‌ دلخوه‌شكه‌ر ژ به‌غدا ڤه‌گه‌ڕێن و گۆت: بۆ هه‌موو یانه‌كا پشكدار یاریا ئێكێ‌ یا ب زه‌حمه‌ته‌ و تاقیكرنه‌كا بهێزه‌ بۆ یاریزان و راهێنه‌ران، لێ‌ تیما زاخۆ ب هه‌موو لایه‌ناڤه‌ یا به‌رهه‌ڤه‌ بۆ یاریا ئه‌ڤرۆ، ئه‌م یێن هاتینه‌ سێ‌ خالێن یاریێ‌ سه‌رباری دبیت دو یاریزانێن مه‌ ژبه‌ر هنگاڤتنێ‌ پشكدار نه‌بن لێ‌ مه‌ پێگوهۆڕێ‌ باش هه‌یه‌ جهێ‌ وان بگریت.

ئه‌ڤرۆ،

دادڤانێ‌ نێڤده‌وله‌تی خودانێ‌ شارا ماسته‌رێ‌ شڤان له‌زگین كوڕێ‌ باژێرێ‌ سێمێلێ‌ وه‌كو ئێكانه‌ كورد دێ‌ پشكداریێ‌ د سێ‌ قاره‌مانیێن نێڤده‌وله‌تی بۆ یاریا تایكۆاندویێ‌ دا كه‌ت.

ل دۆر به‌رنامێ‌ وی یێ‌ پشكداریان ناڤهاتی تایبه‌ت بۆ رۆژناما ئه‌ڤرۆ گۆت: ب شانازی ڤه‌ وه‌كو دادڤانێ‌ ئێكانه‌ كورد پشكداری سێ‌ قاره‌مانیێن نێڤده‌وله‌تی و ئێكا عه‌ره‌بی بكه‌م ئه‌ڤه‌ ژی ژبه‌ر ئاست و رژدی و شیانێن من بووینه‌، قاره‌مانیا ئێكێ‌ ب ناڤێ‌ قاره‌مانیا به‌یرۆت یا نێڤده‌وله‌تی یا ڤه‌كری بۆ ئاستێ‌ G2 ل سه‌ر هه‌موو ژیێن جودا كو ئه‌ڤرۆ ب دووماهی هاتبوون تێدا یاریزانێن سه‌ر ئاستێ‌ كێشوه‌رێن ئاسیا، ئه‌فریقیا و ئۆرۆپا و ئه‌مریكا باشۆر پشكداربوون، دیسان ل هه‌مان وه‌لات دێ‌ پشكداری قاره‌مانیا یانه‌یێن عه‌ره‌بی بۆ ئاستێ‌ كوڕان و كچان كه‌م ئه‌وا دێ‌ هه‌تا 13ێ‌ ڤێ‌ هه‌یڤێ‌ بۆ یانێن عه‌ره‌بی یا به‌رده‌وامبیت، قاره‌مانیا دویێ‌ یا نێڤده‌وله‌تی پشكداربم ل 27ێ‌ ڤێ‌ هه‌یڤێ‌ وه‌لاتێ‌ فله‌ستین مێڤانداریا وێ‌ كه‌ت ئه‌و ژی ل سه‌ر ئاستێ‌ چی دو یا باوه‌رپێكریه‌، قاره‌مانیا سێیێ‌ دێ‌ ل ده‌ستپێكا چڕیا دویێ‌ یا بهێت باژێرێ‌ ئیسلام ئاباد پایته‌ختێ‌ پاكستانێ‌ بیت كو باشترین هه‌لبژارتیێن جیهانێ‌ دێ‌ پشكداریێ‌ كه‌ن.

هه‌روه‌سا شڤان له‌زگین گۆت: گه‌هشتنا من بۆ ڤی ئاستی ب سانه‌هی نه‌بوویه‌ به‌لكو زه‌حمه‌ته‌كا درێژ و نه‌بوونا پشته‌ڤانیێ‌ لێ‌ من ده‌ست ژ حه‌ز و كارێ‌ خوه‌ به‌ر نه‌دا و به‌رده‌وام ب پشكداریا خولان و قاره‌مانیا ئاستێ‌ خوه‌ بلند كر و چوویمه‌ گه‌له‌ك قاره‌مانیێن نێڤده‌وله‌تی و تایبه‌ت كوریا و ئیرانێ‌ و رژدم به‌رده‌وامبم هه‌تا بگه‌همه‌ قاره‌مانیێن ئۆلمپیادا و هه‌كه‌ پشته‌ڤانی هه‌بیت چوونا من ژی نێزك دكه‌ت.

ئه‌ڤرۆ، هه‌ولێر، سولین سلێمان.

د دیداره‌كێ‌ دا یاریزانا تیما باسكێت بۆلا یانا ده‌ربه‌ندیخان دیاركر ده‌ڤه‌را گه‌رمیان سالانه‌ كۆمه‌كا باش یا یاریزانێن كچ بۆ قاره‌مانیێن كوردستانێ‌ و ئیراقێ‌ به‌رهه‌ڤ دكه‌ت و هیڤیێن مه‌ ئه‌و بگه‌هینه‌ ئاستێن بلند.

زێده‌تر راژان ئه‌نوه‌ر بۆ رۆژناما ئه‌ڤرۆ گۆت: وه‌كو یاریزانه‌كا حه‌ز و ڤیان بۆ یاریا باسكێت بۆلێ‌ هه‌ر ژ سالا 2010 ل گه‌ل یانا ده‌ربه‌ندیخان به‌رده‌وام بوویمه‌ كو ئه‌ڤ یانه‌ بوویه‌ ئه‌گه‌ر یاریا باسكێت بۆلێ‌ به‌ر ب پێشڤه‌ بچیت و شیایمه‌ ئاستێ‌ خوه‌ ب گه‌هینه‌ پلێن باش و به‌رده‌وامم هه‌تا ب گه‌همه‌ هیڤی و ئۆمێد خوه‌، له‌وما دخوازین جهێن په‌یوه‌ندیدار خولێن بهێزكرن و پیشخستنا ئاستێ‌ راهێنه‌راتیا ڤێ‌ یاریێ‌ ل سه‌ر ئاستێ‌ كچان ل كوردستانێ‌ و ئیراقێ‌ بهێنه‌ ڤه‌كرن، ژبه‌ركو نه‌بوونا قاره‌مانیا و راهێنه‌رێن شاره‌زا دێ‌ كارتیكرنا نه‌رێنی ل سه‌ر ئاستێ‌ مه‌ كه‌ت و دڤێت ئه‌م به‌رده‌وامبین ل سه‌ر راهێنانێن.

ل دووماهیێ‌ ناڤهاتی هیڤی خواست هاریكاریا مادی بۆ یانا ده‌ربه‌ندیخان بهێته‌ كرن سه‌رباری ئه‌ڤ ئاریشه‌ یا هه‌موو یانێن كوردستانێ‌ یه‌ و دخوازن چاره‌بیت لێ‌ وه‌كو یانا ده‌ربه‌ندیخان و ژبه‌ر رۆلێ‌ وێ‌ بۆ پێشكه‌فتنا یاریا باسكێت بۆلا كچان دڤێت پشته‌ڤانی بوو هه‌بیت.

ئه‌ڤرۆـ

ستێرێ‌ ئنگلته‌رایێ‌ و یانه‌یا بۆرۆسیا دۆرتمۆند یا ئه‌لمانی جۆد بیلینگهام گرێبه‌ستا گران بوها یا ریال مه‌درید یا ئسپانی ڕه‌دكر و ڤه‌گه‌ڕیانا خوه‌ بۆ یانا لیڤه‌رپۆل دا دۆپاتكر.

ل دووڤ راپۆرتا ده‌زگه‌هێ‌ كادینا سیر یا ئسپانی كو بیلینگهام یانا ریال مه‌درید بێ‌ ئۆمێد كر ل سه‌ر رازیبوونا وی ب ئیمزاكرنا گرێبه‌ستێ‌ سه‌رباری كۆژمێ‌ مه‌زن بوو هاتیه‌ ته‌رخانكرن كو زێده‌تری شێست ملیۆن یۆرۆیان ل گه‌ل پاداشتێن خولێ‌ و چامپیۆنزێ‌  به‌روڤاژی رێكا خوه‌ گوهۆڕت و دێ‌ ل وه‌رزێ‌ بهێت به‌ر ب یانا لیڤه‌رپۆل چیت سه‌رباری گرێبه‌ستا وی هه‌تا 2024ێ‌ لێ‌ د به‌نده‌كێ‌ یاسایی د به‌رژوه‌ندیا وی دایه‌.

هه‌مان ده‌زگه‌هی دیاركر كو ئه‌گه‌رێ‌ ڕه‌دكرنا یاریزانێ‌ بۆرۆسیا دۆرتمۆند ل سه‌ر گرێبه‌ستا ریالێ‌ ژبه‌ركو وی دڤێت هه‌لبژارتیێ‌ ئنگلته‌رایێ‌ ژ ده‌ست نه‌ده‌ت كو ئێك ژ مه‌رجێن دهێنه‌ چێگیركرن ل سه‌ر یاریزان دڤێت ل خولا ئنگلته‌رایێ‌ بن ئه‌ڤچه‌نده‌ نه‌چاركر ئه‌و گرێبه‌ستا یانا ئسپانی ڕه‌دبكه‌ت.

ئه‌ڤرۆ،

دوهی ل باژێرێ‌ فرانكفۆرت ل ئه‌لمانیا پشككێشانا ڤاڤارتنێن ده‌ربازبوونێ‌ بۆ یۆرۆیا 2024ێ‌ هاته‌ ئه‌نجامدان ئه‌وا بڕیاره‌ هه‌ڤڕكیێن وێ‌ ل 14 خزیرانا 2024ێ‌ وه‌لاتێ‌ ئه‌لمانیا مێڤانداریا وێ‌ بكه‌ت، 50 هه‌لبژارتی دێ‌ هه‌ڤڕكیێ‌ بۆ 20 پلێتان كه‌ن و هه‌ر ده‌ه كۆم بڤی ره‌نگی بوون.

كۆما ئێكێ‌: ئسپانیا، ئسكۆتله‌ندا، نه‌وریج، جورجیا، قوبرس.

كۆما دویێ‌: هۆله‌ندا، فره‌نسا، ئیرله‌ندا، یونانستان، گه‌بلتارق

كۆما سێیێ‌: ئیتالیا، ئنگلترا، ئۆكراین، مه‌قدونیا باكۆر، مالتا.

كۆما چارێ‌: كرواتیا، وێلز، ئه‌رمینیا، توركیا، لاتیڤیا.

كۆما پێنجێ‌: بۆله‌ندا، چێك، ئه‌لبانیا، گزیرتێن فارۆ، ئه‌ستۆنیا.

كۆما شه‌شێ‌: به‌لجیكا، نه‌مسا، سوید، ئازاربێجان، ئستۆنیا.

كۆما حه‌فت: هنگاریا، سربیا، مۆنتێنێگرۆ، بلگاریا، لیتوانیا.

كۆما هه‌شت: دانیمارك، فینله‌ندا، سلۆڤینیا، كازاخستان، ئیرله‌ندا، سان مارینۆ.

كۆما نه‌هێ‌: سویسرا، ئسرائیل، رۆمانیا، كۆسۆفۆ، بیلارۆسیا، ئاندۆرا.

كۆما ده‌هێ‌: پۆرتۆگال، بۆسنا، ئایسله‌ندا، لۆكسمبۆرگ، سلۆڤینیا، لیختنشتاین.

بۆ زانین سێ‌ پلێتێن دێ‌ بڕێیا قاره‌مانیا خولا نه‌ته‌وه‌یێن ئۆرۆپا هێنه‌ دیاركرن ل گه‌ل ئه‌لمانیا هژمارا وان بنه‌24 هه‌لبژارتی، هه‌ڤڕكیێن ڤاڤارتنان ل 23ێ‌ ئادارا سالا 2023ێ‌ هێته‌ ئه‌نجامدان.

ئه‌ڤرۆ،

ئێكه‌تیا ته‌پا پێی یا فیفا د قۆناغا ڤه‌گۆلینێ‌ دا یه‌ ژبۆ دیاركرنا ئه‌وان گۆتگۆتێن هاتینه‌ به‌لاڤكرن كو یاریزانێن هه‌لبژارتیێ‌ كامیرۆن ب كارێ‌ سێربازبێ‌ كرینه‌ به‌ری پشكداریێ‌ د مۆندیالا قه‌ته‌ر 2022ێ‌ دا بكه‌ن ئه‌وا دێ‌ ل 20ێ‌ چڕیا دویێ‌ یا بهێت ده‌ستپێكه‌ت.

ژلایێ‌ خوه‌ڤه‌ ئێكه‌تیا ته‌پا پێی یا كامیرۆنی ئه‌و گۆتگۆتێن دژی یاریزانێن وان ب نه‌وه‌یی ده‌رئێخستن و گۆت: ل وه‌لاتێ‌ مه‌ ئازادیا په‌رستكرنێ‌ و رووحی یا هه‌یی ل دووڤ سیسته‌مێ‌ علمانیه‌تێ‌ كو ئه‌ڤچه‌نده‌ نا بیته‌ ڕێگر و نه‌ دژی یاسایا نێڤده‌وله‌تی یه‌، له‌وما ئه‌م ڕه‌دكه‌ین ئه‌وا هاتیه‌ به‌لاڤكرن دژی یاریزانێن مه‌ و دێ‌ چاڤه‌ڕێ‌ ئه‌نجامێن ڤه‌كۆلینا فیفایێ‌ بین، هنده‌ك لایه‌ن دژاتیێ‌ په‌یدادكه‌ن و ئه‌ڤه‌ نه‌ بتنێ‌ دروست نینه‌ به‌لكۆ بێ‌ رێزیه‌ ل سه‌روه‌ریا كامیرۆنێ‌ و پشتی ده‌رئه‌نجام ده‌ركه‌ڤن دێ‌ مه‌ هه‌لویست هه‌مبه‌ر ئه‌وان تێكده‌ران هه‌بیت.